อรรถกถาเล่มที่ ๑๕ ภาษาบาลีอักษรไทย
 องฺ.อ. (มโนรถ.๒)

                          ๒. ทุติยปณฺณาสก
                        ๖. ๑. ปุญฺญาภิสนฺทวคฺค
                     ๑. ปฐมปุญฺญาภิสนฺทสุตฺตวณฺณนา
     [๕๑] ทุติยสฺส ปฐเม  ปุญฺญาภิสนฺทาติ ปุญฺญสฺส อภิสนฺทา, ปุญฺโญปปตฺติโยติ ๑-
อตฺโถ. กุสลาภิสนฺทาติ ตสฺเสว เววจนํ. เต ปเนเต สุขํ อาหรนฺตีติ
สุขสฺสาหารา. สุฏฺฐุ อคฺคานํ รูปาทีนํ ทายกาติ โสวคฺคิกา. สุโข เนสํ วิปาโกติ
สุขวิปากา. สคฺเค อุปฺปตฺติ สคฺโค, สคฺคาย สํวตฺตนฺตีติ สคฺคสํวตฺตนิกา. จีวรํ
ปริภุญฺชมาโนติ จีวรตฺถาย วตฺถํ ลภิตฺวา สูจิสุตฺตาทีนํ อภาเวน ตํ นิกฺขิปนฺโตปิ
กโรนฺโตปิ การาเปนฺโตปิ ๒- ปารุปนฺโตปิ ชิณฺณกาเล ปจฺจตฺถรณํ กโรนฺโตปิ
ปจฺจตฺถริตุมฺปิ อสกฺกุเณยฺยํ ภุมฺมตฺถรณํ กโรนฺโตปิ  ภุมฺมตฺถรณสฺส  อนนุจฺฉวิกํ
ผาเลตฺวา ปาทปุญฺฉนํ กโรนฺโตปิ "ปริภุญฺชมาโน"เตฺวว วุจฺจติ. ยทา ปน
"ปาทปุญฺฉนมฺปิ กาตุํ ๓- น สกฺกา อิทนฺ"ติ สมฺมชฺชิตฺวา ฉฑฺฑิตํ โหติ, ตทา
ปริภุญฺชมาโน นาม น โหติ. อปฺปมาณํ เจโตสมาธินฺติ อรหตฺตผลสมาธึ. อปฺปมาโณ ตสฺส
ปุญฺญาภิสนฺโทติ อิมินา ทายกสฺส ปุญฺญเจตนาย อปฺปมาณตํ กเถติ. ตสฺส หิ
"ขีณาสโว เม จีวรํ ปริภุญฺชตี"ติ ปุนปฺปุนํ อนุสฺสรณวเสน ปวตฺตา ปุญฺญเจตนา
อปฺปมาณา โหติ. ตํ สนฺธาเยตํ วุตฺตํ. ปิณฺฑปาตาทีสุ ปน โย ปิณฺฑปาตํ
ปริภุญฺชิตฺวา สตฺตาหํปิ เตเนว ยาเปตฺวา ๔- อญฺญํ น ภุญฺชติ, โส สตฺตาหํปิ
ตํเยว ปิณฺฑปาตํ ปริภุญฺชมาโน นาม  โหติ. เอกสฺมึ ปน เสนาสเน
รตฺติฏฺฐานทิวาฏฺฐานาทีสุ จงฺกมนฺโตปิ นิสีทนฺโตปิ ๕- ยาว ตํ เสนาสนํ ปหาย
อญฺญํ น คณฺหาติ, ตาว ปริภุญฺชมาโน นาม โหติ. เอเกน ปน เภสชฺเชน
พฺยาธิมฺหิ วูปสนฺเต ยาว อญฺญํ เภสชฺชํ น ปริภุญฺชติ, ตาวเทว ปริภุญฺชมาโน
นาม โหติ.
@เชิงอรรถ: ๑ ฉ.ม. ปุญฺญปฺปวตฺติโยติ        ๒ ฉ.ม. อยํ ปาโฐ น ทิสฺสติ
@๓ ฉ.ม. อยํ ปาโฐ น ทิสฺสติ     ๔ ฉ.ม. ยาเปติ
@๕ ฉ.ม. อยํ ปาโฐ น ทิสฺสติ
     พหุเภรวนฺติ พหุเภรวารมฺมเณหิ สมนฺนาคตํ. รตนวรานนฺติ ๑- สตฺตนฺนํ
ปวรรตนานํ. อาลยนฺติ นิวาสฏฺฐานํ. ปุถู สวนฺตีติ พหุกา หุตฺวา สนฺทมานา.
เสสเมตฺถ อุตฺตานเมว.

             อรรถกถาภาษาบาลีอักษรไทย เล่มที่ ๑๕ หน้า ๓๔๘-๓๔๙.
http://84000.org/tipitaka/atthapali/read_th.php?B=15&A=8052&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=15&A=8052&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=21&i=51
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=21&A=1470
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=21&A=1473
             The Pali Tipitaka in Roman Character :-
http://84000.org/tipitaka/read/roman_read.php?B=21&A=1473
             สารบัญพระไตรปิฎกเล่มที่ ๒๐
http://84000.org/tipitaka/read/?index_21