อรรถกถาเล่มที่ ๒ ภาษาบาลีอักษรไทย
 วินย.อ. (สมนฺต.๒)

     {๕๐๘} เตน สมเยนาติ จีวรปฏิคฺคหณสิกฺขาปทํ ฯ ตตฺถ
ปิณฺฑปาตปฏิกฺกนฺตาติ ปิณฺฑปาตโต ปฏิกฺกนฺตา ฯ เยน อนฺธวนํ
เตนูปสงฺกมีติ อปฺปญฺญตฺเต สิกฺขาปเท เยน อนฺธวนํ เตนูปสงฺกมิ ฯ
กตกมฺมาติ กตโจรกมฺมา ฯ สนฺธิจฺเฉทนาทีหิ กมฺเมหิ ปรภณฺฑํ
หริตฺวาติ วุตฺตํ โหติ ฯ โจรคามณิโกติ โจรเชฏฺฐโก ฯ โส กิร
ปุพฺเพ เถรึ ชานาติ ตสฺมา โจรานํ ปุรโต คจฺฉนฺโต ตํ ทิสฺวา
อิโต มา คจฺฉถ สพฺเพ อิโต เอถาติ เต คเหตฺวา อญฺเญน
มคฺเคน อคมาสิ ฯ สมาธิมฺหา วุฏฺฐหิตฺวาติ เถรี กิร
ปริจฺฉินฺนเวลายํเยว สมาธิมฺหา วุฏฺฐหิตฺวา ฯ โสปิ ตสฺมึเยว ขเณ
เอวํ อวจ ตสฺมา สา อสฺโสสิ ฯ ตํ สุตฺวา จ นตฺถิทานิ อญฺเญ
เอตฺถ สมโณ วา พฺราหฺมโณ วา อญฺญตฺร มยาติ ตํ มํสํ อคฺคเหสิ ฯ
เตน วุตฺตํ อถโข อุปฺปลวณฺณา ภิกฺขุนีติ อาทิ ฯ โอหียโกติ
อวหียโก อวเสโส วิหารวารํ ปตฺวา เอโกว วิหาเร ฐิโตติ
อตฺโถ ฯ สเจ เม ตฺวํ อนฺตรวาสกํ ทเทยฺยาสีติ กสฺมา อาห ฯ
สณฺหํ ฆนมฏฺฐํ อนฺตรวาสกํ ทิสฺวา โลเภน ฯ อปิจ อปฺปโก ตสฺส
อนฺตรวาสเก โลโภ เถริยา ปน สิขาปฺปตฺตา โกฏฺฐาสสมฺปตฺติ
เตนสฺสา สรีรปาริปูรึ ปสฺสิสฺสามีติ วิสมโลภํ อุปฺปาเทตฺวา เอวมาห ฯ
อนฺติมนฺติ ปญฺจนฺนํ จีวรานํ สพฺพปริยนฺตํ หุตฺวา อนฺติมํ ปจฺฉิมํ ฯ
อญฺญํ เลเสนาปิ วิกปฺเปตฺวา วา ปจฺจุทฺธริตฺวา วา ฐปิตํ จีวรํ นตฺถีติ
เอวํ ยถาอนุญฺญาตานํ ปญฺจนฺนํ จีวรานํ ธารณวเสเนว อาห
น โลเภน ฯ น หิ ขีณาสวานํ โลโภ อตฺถิ ฯ นิปฺปีฬิยมานาติ
อุปมํ ทสฺเสตฺวา คาฬฺหํ ปีฬิยมานา ฯ อนฺตรวาสกํ ทตฺวา อคมาสีติ
สงฺกจฺจิกํ นิวาเสตฺวา ยถา ตสฺส มโนรโถ น ปูรติ เอวํ
หตฺถตเลเยว ทสฺเสตฺวา อคมาสิ ฯ {๕๑๐} กสฺมา ปาริวฏฺฏกจีวรํ อปฏิคฺคณฺหนฺเต
อุชฺฌายึสุ ฯ สเจ เอตฺตโกปิ อมฺเหสุ อยฺยานํ วิสฺสาโส นตฺถิ กถํ
มยํ ยาเปสฺสามาติ วิหตฺถตาย สมภิตุนฺนตฺตา ฯ อนุชานามิ ภิกฺขเว
อิเมสํ ปญฺจนฺนนฺติ อิเมสํ ปญฺจนฺนํ สหธมฺมิกานํ สมสทฺธานํ สมสีลานํ
สมทิฏฺฐีนํ ปาริวฏฺฏกํ คเหตุํ อนุชานามีติ อตฺโถ ฯ {๕๑๒} ปโยเค
ทุกฺกฏนฺติ คหณตฺถาย หตฺถปฺปสารณาทีสุ ทุกฺกฏํ ฯ ปฏิลาเภนาติ
ปฏิคฺคหเณน ฯ ตตฺถ จ หตฺเถน วา หตฺเถ เทตุ ปาทมูเล
วา ฐเปตุ อุปริ วา ขิปตุ สเจ สาทิยติ คหิตเมว โหติ ฯ
สเจ ปน สิกฺขมานาสามเณรสามเณรีอุปาสกอุปาสิกาทีนํ หตฺเถ
เปสิตํ ปฏิคฺคณฺหาติ อนาปตฺติ ฯ ธมฺมกถํ กเถนฺตสฺส จตสฺโสปิ
ปริสา จีวรานิ จ นานาวิราควตฺถานิ จ อาเนตฺวา ปาทมูเล
ฐเปนฺติ อุปจาเร วา ฐตฺวา อุปจารํ วา มุญฺจิตฺวา ขิปนฺติ ฯ
ยํ ตตฺถ ภิกฺขุนีนํ สนฺตกํ ตํ อญฺญตฺร ปาริวฏฺฏกา คณฺหนฺตสฺส
อาปตฺติเยว ฯ อถ ปน รตฺติภาเค ขิตฺตานิ โหนฺติ อิทํ ภิกฺขุนิยา
อิทํ อญฺเญสํ สนฺตกนฺติ ญาตุํ น สกฺกา ปาริวฏฺฏกกิจฺจํ นตฺถีติ
มหาปจฺจริยํ จ กุรุนฺทิยํ จ วุตฺตํ ฯ ตํ อจิตฺตกภาเวน น สเมติ ฯ
สเจ ภิกฺขุนี วสฺสาวาสิกํ เทติ ปาริวฏฺฏกเมว กาตพฺพํ ฯ สเจ
ปน สงฺการกูฏาทีสุ ฐเปติ ปํสุกูลํ คณฺหิสฺสนฺตีติ ปํสุกูลํ
อธิฏฺฐหิตฺวา คเหตุํ วฏฺฏติ ฯ {๕๑๓} อญฺญาติกาย อญฺญาติกสญฺญีติ
ติกปาจิตฺติยํ ฯ เอกโต อุปสมฺปนฺนายาติ ภิกฺขุนีนํ สนฺติเก
อุปสมฺปนฺนาย หตฺถโต คณฺหนฺตสฺส ทุกฺกฏํ ฯ ภิกฺขูนํ สนฺติเก
อุปสมฺปนฺนาย ปน ปาจิตฺติยเมว ฯ {๕๑๔} ปริตฺเตน วา วิปุลนฺติ
อปฺปคฺเฆน จีวเรน วา อุปาหนตฺถวิกปตฺตตฺถวิกอํสพนฺธกกาย-
พนฺธนาทินา วา มหคฺฆํ สเจปิ ติจีวรํ ปฏิคฺคณฺหาติ อนาปตฺติ ฯ
มหาปจฺจริยํ ปน อนฺตมโส หรีตกีขณฺเฑนาปีติ วุตฺตํ ฯ วิปุเลน
วา ปริตฺตนฺติ อิทํ วุตฺตวิปลฺลาเสน เวทิตพฺพํ ฯ อญฺญํ
ปริกฺขารนฺติ ปตฺตตฺถวิกาทึ ยงฺกิญฺจิ ฯ วิกปฺปนูปคปจฺฉิมจีวรปฺปมาณํ
ปน ปริสฺสาวนํปิ น วฏฺฏติ ฯ ยํ เนว อธิฏฺฐานูปคํ
น วิกปฺปนูปคํ ตํ สพฺพํ วฏฺฏติ ฯ สเจปิ มญฺจปฺปมาณา
ภิสิจฺฉวิ โหติ วฏฺฏติเยว ฯ โก ปน วาโท ปตฺตตฺถวิกาทีสุ ฯ
เสสํ อุตฺตานตฺถเมว ฯ
     สมุฏฺฐานาทีสุ อิทํ ฉสฺสมุฏฺฐานํ กิริยากิริยํ
โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ
ติเวทนนฺติ ฯ
             จีวรปฏิคฺคหณสิกฺขาปทวณฺณนา นิฏฺฐิตา ฯ

             อรรถกถาภาษาบาลีอักษรไทย เล่มที่ ๒ หน้า ๑๙๐-๑๙๓.
http://84000.org/tipitaka/atthapali/read_th.php?B=2&A=3991&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=2&A=3991&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=2&i=46
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=2&A=752
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=2&A=489
             The Pali Tipitaka in Roman Character :-
http://84000.org/tipitaka/read/roman_read.php?B=2&A=489
             สารบัญพระไตรปิฎกเล่มที่ ๑
http://84000.org/tipitaka/read/?index_2