อรรถกถาเล่มที่ ๒ ภาษาบาลีอักษรไทย
 วินย.อ. (สมนฺต.๒)

     {๖๔๖-๖๔๙} เตน สมเยนาติ อจฺเจกจีวรสิกฺขาปทํ ฯ ตตฺถ ทสาหานาคตนฺติ
ทส อหานิ ทสาหํ ฯ เตน ทสาเหน อนาคตา ทสาหานาคตา ฯ
ทสาเหน อสมฺปตฺตาติ อตฺโถ ฯ ตํ ทสาหานาคตํ ฯ
อจฺจนฺตสํโยควเสน ภุมฺมตฺเถ อุปโยควจนํ ฯ เตเนวสฺส ปทภาชเน
ทสาหานาคตายาติ วุตฺตํ ฯ ปวารณายาติ อิทํ ปน ยา ทสาหานาคตาติ
วุตฺตา ตํ สรูปโต ทสฺเสตุํ อสมฺโมหตฺถํ อนุปฺปโยควจนํ ฯ
กตฺติกเตมาสิปุณฺณมนฺติ ปฐมกตฺติกเตมาสิปุณฺณมํ ฯ อิธาปิ
ปฐมปทสฺส อนุปฺปโยคตฺตา ปุริมนเยเนว ภุมฺมตฺเถ อุปโยควจนํ ฯ
อิทํ วุตฺตํ โหติ ยโต ปฏฺฐาย ปฐมมหาปวารณา ทสาหานาคตาติ
วุจฺจติ สเจปิ ตานิ ทิวสานิ อจฺจนฺตเมว ภิกฺขุโน อจฺเจกจีวรํ
อุปฺปชฺเชยฺย อจฺเจกํ อิทนฺติ ชานมาเนน ภิกฺขุนา สพฺพํปิ
ปฏิคฺคเหตพฺพนฺติ ฯ เตน ปวารณมาสสฺส ชุณฺหปกฺขปญฺจมิโต
ปฏฺฐาย อุปฺปนฺนสฺส จีวรสฺส นิธานกาโล ทสฺสิโต โหติ ฯ กามํ
เจส ทสาหปรมํ อติเรกจีวรํ ธาเรตพฺพนฺติ อิมินาว สิทฺโธ
อตฺถุปฺปตฺติวเสน ๑- อปุพฺพํ วิย อตฺถํ ทสฺเสตฺวา สิกฺขาปทํ ฐปิตํ ฯ
อจฺเจกจีวรนฺติ อจฺจายิกจีวรํ วุจฺจติ ฯ ตสฺส ปน อจฺจายิกภาวํ
@เชิงอรรถ: ๑. อิโต ปรํ ปน นิปาโต อิจฺฉิตพฺโพ ฯ
ทสฺเสตุํ เสนาย วา คนฺตุกาโม โหตีติ อาทิ วุตฺตํ ฯ ตตฺถ
สทฺธาติ อิมินา สทฺธามตฺตกเมว ทสฺสิตํ ฯ ปสาโทติ อิมินา
สุปฺปสนฺนา พลวสทฺธา ฯ เอตํ อจฺเจกจีวรํ นามาติ เอตฺถ
อิเมหิ การเณหิ ทาตุกาเมน ทูตํ วา เปเสตฺวา สยํ วา อาคนฺตฺวา
วสฺสาวาสิกํ ทสฺสามีติ เอวํ อาโรจิตจีวรํ อจฺเจกจีวรํ นาม
โหตีติ ฯ ฉฏฺฐิโต ปฏฺฐาย ปนุปฺปนฺนํ อนจฺเจกจีวรํปิ ปจฺจุทฺธริตฺวา
ฐปิตติจีวรํปิ เอตํ ปริหารํ ลภติเยว ฯ สญฺญาณํ กตฺวา
นิกฺขิปิตพฺพนฺติ กิญฺจิ นิมิตฺตํ กตฺวา ฐเปตพฺพํ ฯ กสฺมา เอตํ
วุตฺตํ ฯ ยทิ หิ  ตํ ปุเร ปวารณาย วิภชนฺติ เยน คหิตํ
เตน ฉินฺนวสฺเสน น ภวิตพฺพํ ฯ สเจ ปน ฉินฺนวสฺโส โหติ
จีวรํ สงฺฆิกเมว โหติ ฯ ตโต สลฺลกฺเขตฺวา สุขํ ทาตุํ ภวิสฺสตีติ ฯ
     {๖๕๐} อจฺเจกจีวเร อจฺเจกจีวรสญฺญีติ เอวมาทิ วิภชิตฺวา คหิตเมว สนฺธาย
วุตฺตํ ฯ สเจ ปน อวิภตฺตํ โหติ สงฺฆสฺส วา ภณฺฑาคาริกจีวรํ
สมยาติกฺกเมปิ อนาปตฺติ ฯ อิติ อติเรกจีวรสฺส ทสาหํ ปริหาโร ฯ
ติจีวรสฺส เอกทิวสมฺปิ ปริหาโร นตฺถิ ฯ อกตสฺส วสฺสิกสาฏิกจีวรสฺส
อนตฺถเต กฐิเน ปญฺจ มาสา วสฺเส อุกฺกฑฺฒิเต ฉมฺมาสา
อตฺถเต กฐิเน อปเร จตฺตาโร มาสา เหมนฺตสฺส ปจฺฉิเม
ทิวเส สติยา ปจฺจาสาย มูลจีวราธิฏฺฐานวเสน อปโรปิ เอโก
มาโสติ เอกาทสมาสา ปริหาโร ฯ อจฺเจกจีวรสฺส อนตฺถเต
กฐิเน เอกาทสทิวสาธิโก มาโส อตฺถเต กฐิเน เอกาทสทิวสาธิกา
ปญฺจมาสา ตโต ปรํ เอกทิวสมฺปิ ปริหาโร นตฺถีติ เวทิตพฺพํ ฯ
อนจฺเจกจีวเรติ อจฺเจกจีวรสทิเส อญฺญสฺมึ ฯ เสสเมตฺถ
อุตฺตานเมวาติ จ กฐินสมุฏฺฐานํ อกิริยา โนสญฺญาวิโมกฺขํ อจิตฺตกํ
ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ
                   อจฺเจกจีวรสิกฺขาปทํ ฯ

             อรรถกถาภาษาบาลีอักษรไทย เล่มที่ ๒ หน้า ๒๗๕-๒๗๗.
http://84000.org/tipitaka/atthapali/read_th.php?B=2&A=5787&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=2&A=5787&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=2&i=161
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=2&A=4159
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=2&A=2489
             The Pali Tipitaka in Roman Character :-
http://84000.org/tipitaka/read/roman_read.php?B=2&A=2489
             สารบัญพระไตรปิฎกเล่มที่ ๑
http://84000.org/tipitaka/read/?index_2