อรรถกถาเล่มที่ ๒ ภาษาบาลีอักษรไทย
 วินย.อ. (สมนฺต.๒)

     {๓๓๕} ตติยสิกฺขาปเท ฯ อปฺปกตญฺญุโนติ ยํ ภควตา ปกตํ ปญฺญตฺตํ
ตํ น ชานนฺตีติ อตฺโถ ฯ {๓๓๖} อุทเก หสฺสธมฺโมติ อุทกกีฬิกา
วุจฺจติ ฯ อุปริโคปฺผเกติ โคปฺผกานํ อุปริภาคปฺปมาเณ ฯ
หสฺสาธิปฺปาโยติ กีฬาธิปฺปาโย ฯ นิมุชฺชติ วาติ อาทีสุ นิมุชฺชนตฺถาย
โอโรหนฺตสฺส ปทวาเร ปทวาเร ทุกฺกฏํ ฯ นิมุชฺชนุมฺมุชฺชเนสุ
ปโยเค ปโยเค ปาจิตฺติยํ ฯ นิมุชฺชิตฺวา อนฺโตอุทเกเยว คจฺฉนฺตสฺส
หตฺถวารปทวาเรสุ สพฺพตฺถ ปาจิตฺติยํ ฯ ปลวตีติ ตรติ ฯ
หตฺเถหิ ตรนฺตสฺส หตฺถวาเร หตฺถวาเร ปาจิตฺติยํ ฯ ปาเทสุปิ
เอเสว นโย ฯ เยน เยน องฺเคน ตรติ ตสฺส ตสฺส ปโยเค
ปโยเค ปาจิตฺติยํ ฯ ตีรโต วา รุกฺขโต วา อุทเก ปตติ
ปาจิตฺติยเมว ฯ นาวาย กีฬตีติ ผิยาริตฺตาทีหิ นาวํ ปาเชนฺโต วา
ตีเร อุสฺสาเทนฺโต วา นาวาย กีฬติ ทุกฺกฏํ ฯ หตฺเถน วาติ
อาทีสุปิ ปโยเค ปโยเค ทุกฺกฏํ ฯ เกจิ หตฺเถน อุทเก ขิตฺตาย
กฐลาย ปตนุปฺปตนวาเรสุ ทุกฺกฏนฺติ วทนฺติ ตํ น คเหตพฺพํ ฯ
ตตฺถ หิ เอกปฺปโยคตฺตา เอกเมว ทุกฺกฏํ ฯ อปิจ อุปริโคปฺผเก
วุตฺตานิ อุมฺมุชฺชนาทีนิ ฐเปตฺวา อญฺเญน เยนเกนจิ อากาเรน
อุทกํ โอตริตฺวา วา อโนตริตฺวา วา ยตฺถ กตฺถจิ ฐิตํ อุทกํ
อนฺตมโส พินฺทุํ คเหตฺวา ขิปนกีฬายปิ กีฬนฺตสฺส ทุกฺกฏเมว ฯ
อตฺถโชตกํ ปน อกฺขรํ ลิขิตุํ วฏฺฏติ ฯ อยเมตฺถ วินิจฺฉโย ฯ
เสสเมตฺถ อุตฺตานเมว ฯ ปฐมปาราชิกสมุฏฺฐานํ กิริยา
สญฺญาวิโมกฺขํ สจิตฺตกํ โลกวชฺชํ กายกมฺมํ อกุสลจิตฺตํ ติเวทนนฺติ ฯ
                  หสฺสธมฺมสิกฺขาปทํ ตติยํ ฯ

             อรรถกถาภาษาบาลีอักษรไทย เล่มที่ ๒ หน้า ๔๕๒-๔๕๓.
http://84000.org/tipitaka/atthapali/read_th.php?B=2&A=9543&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=2&A=9543&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=2&i=586
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=2&A=12045
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=2&A=6976
             The Pali Tipitaka in Roman Character :-
http://84000.org/tipitaka/read/roman_read.php?B=2&A=6976
             สารบัญพระไตรปิฎกเล่มที่ ๑
http://84000.org/tipitaka/read/?index_2