อรรถกถาเล่มที่ ๓ ภาษาบาลีอักษรไทย
 วินย.อ. (สมนฺต.๓)

                     อธิกรณเภทวณฺณนา
                       --------
     {๓๔๐} อธิกรณเภเท ฯ อิเม ทส อุกฺโกฏาติ อธิกรณานํ
อุกฺโกเฏตฺวา ปุน อธิกรณอุกฺโกเฏน สมถานํ อุกฺโกฏํ ทสฺเสตุํ
วิวาทาธิกรณํ อุกฺโกเฏนฺโต กติ สมเถ อุกฺโกเฏตีติอาทิมาห ฯ ตตฺถ
วิวาทาธิกรณํ อุกฺโกเฏนฺโต เทฺว สมเถ อุกฺโกเฏตีติ สมฺมุขาวินยํ
จ เยภุยฺยสิกญฺจ อิเม เทฺว อุกฺโกเฏติ ปฏิเสเธติ ปฏิกฺโกเสตีติ
อตฺโถ ฯ อนุวาทาธิกรณํ อุกฺโกเฏนฺโต จตฺตาโรติ สมฺมุขาวินยํ
สติวินยํ อมูฬฺหวินยํ ตสฺส ปาปิยสิกนฺติ อิเม จตฺตาโร สมเถ
อุกฺโกเฏติ ฯ อาปตฺตาธิกรณํ อุกฺโกเฏนฺโต ตโยติ สมฺมุขาวินยํ
ปฏิญฺญาตกรณํ ติณวตฺถารกนฺติ อิเม ตโย สมเถ อุกฺโกเฏติ ฯ
กิจฺจาธิกรณํ อุกฺโกเฏนฺโต เอกนฺติ สมฺมุขาวินยํ อิมํ เอกํ สมถํ
อุกฺโกเฏติ ฯ
     {๓๔๑} กติ อุกฺโกฏาติอาทิปุจฺฉานํ วิสฺสชฺชเน ฯ ทฺวาทสสุ อุกฺโกเฏสุ
อกตํ กมฺมนฺติอาทโย ตาว ตโย อุกฺโกฏา วิเสสโต ทุติเย
อนุวาทาธิกรเณ ลพฺภนฺติ ฯ อนีหตนฺติอาทโย ตโย ปฐเม
วิวาทาธิกรเณ ลพฺภนฺติ ฯ อวินิจฺฉิตนฺติอาทโย ตโย ตติเย
อาปตฺตาธิกรเณ ลพฺภนฺติ ฯ อวูปสนฺตนฺติอาทโย ตโย จตุตฺเถ
กิจฺจาธิกรเณ ลพฺภนฺติ ฯ อปิจ ทฺวาทสาปิ เอเกกสฺมึ อธิกรเณ
ลพฺภนฺติเยว ฯ ตตฺถชาตกํ อธิกรณํ อุกฺโกเฏตีติ ยสฺมึ วิหาเร มยฺหํ
อิมินา ปตฺโต คหิโต จีวรํ คหิตนฺติอาทินา นเยน ปตฺตจีวราทีนํ
อตฺถาย อธิกรณํ อุปฺปนฺนํ โหติ ตสฺมึเยว วิหาเร อาวาสิกา
สนฺนิปติตฺวา อลํ อาวุโสติ อตฺตปจฺจตฺถิเก สญฺญาเปตฺวา
ปาลิมุตฺตกวินิจฺฉเยเนว วูปสเมนฺติ ฯ อิทํ ตตฺถชาตกํ อธิกรณํ นาม ฯ
เยนาปิ วินิจฺฉเยเนว สมิตํ โสปิ เอโก สมโถเยว ฯ อิมํ
อุกฺโกเฏนฺตสฺสาปิ ปาจิตฺติยํ ฯ ตตฺถชาตกํ วูปสนฺตนฺติ สเจ ปน
ตํ อธิกรณํ เนวาสิกา วูปสเมตุํ น สกฺโกนฺติ ฯ อถญฺโญ
วินยธโร เถโร อาคนฺตฺวา กึ อาวุโส อิมสฺมึ วิหาเร อุโปสโถ
วา ปวารณา วา ฐิตาติ ปุจฺฉติ ฯ เตหิ จ ตสฺมึ อธิกรเณ
กถิเต ตํ อธิกรณํ ขนฺธกโต จ ปริวารโต จ สุตฺเตน วินิจฺฉินิตฺวา
วูปสเมติ ฯ อิทํ ตตฺถชาตกํ วูปสนฺตํ นาม อธิกรณํ เอตํ
อุกฺโกเฏนฺตสฺสาปิ ปาจิตฺติยเมว ฯ อนฺตรามคฺเคติ เต เจ
อตฺตปจฺจตฺถิกา น มยํ เอตสฺส วินิจฺฉเย ติฏฺฐาม นายํ วินเย
กุสโล อสุกสฺมึ นาม คาเม วินยธรา เถรา วสนฺติ ตตฺถ
คนฺตฺวา วินิจฺฉินิสฺสามาติ คจฺฉนฺตา อนฺตรามคฺเคเยว การณํ
สลฺลกฺเขตฺวา อญฺญมญฺญํ วา สญฺญาเปนฺติ อญฺเญ วา เต ภิกฺขู
นิชฺฌาเปนฺติ อิทํปิ วูปสนฺตเมว โหติ ฯ เอวํ วูปสนฺตํ อนฺตรามคฺเค
อธิกรณํ อุกฺโกเฏติ โย ตสฺสาปิ ปาจิตฺติยํ เอว ฯ อนฺตรามคฺเค
วูปสนฺตนฺติ นเหว โข ปน อญฺญมญฺญํ สญฺญตฺติยา วา
สภาคภิกฺขุนิชฺฌาปเนน วา วูปสนฺตํ โหติ ฯ อปิจ โข ปฏิปถํ อาคจฺฉนฺโต
เอโก วินยธโร ทิสฺวา กตฺถาวุโส คจฺฉถาติ ปุจฺฉิตฺวา อสุกนฺนาม
คามํ อิมินา นาม การเณนาติ วุตฺเต อลํ อาวุโส กึ ตตฺถ
คเตนาติ ตตฺเถว ธมฺเมน วินเยน ตํ อธิกรณํ วูปสเมติ อิทํ
อนฺตรามคฺเค วูปสนฺตํ นาม ฯ เอตํ อุกฺโกเฏนฺตสฺสาปิ ปาจิตฺติยเมว ฯ
     ตตฺถ คตนฺติ สเจ ปน อลํ อาวุโส กินฺตตฺถ คเตนาติ วุจฺจมานาปิ
มยํ ตตฺเถว คนฺตฺวา วินิจฺฉยํ ปาเปสฺสามาติ วินยธรสฺส วจนํ
อนาทิยิตฺวา คจฺฉนฺติเยว คนฺตฺวา สภาคภิกฺขูนํ เอตมตฺถํ
อาโรเจนฺติ ฯ สภาคภิกฺขู อลํ อาวุโส สงฺฆสนฺนิปาตํ นาม ครุกนฺติ
ตตฺเถว นิสีทาเปตฺวา วินิจฺฉินิตฺวา สญฺญาเปนฺติ ฯ อิทํปิ วูปสนฺตเมว
โหติ ฯ เอวํ วูปสนฺตํ ตตฺถ คตํ อธิกรณํ อุกฺโกเฏติ โย
ตสฺสาปิ ปาจิตฺติยเมว ฯ ตตฺถ คตํ วูปสนฺตนฺติ นเหว โข ปน
สภาคภิกฺขูนํ สญฺญตฺติยา วูปสนฺตํ โหติ ฯ อปิ จ โข สงฺฆํ
สนฺนิปาเตตฺวา อาโรจิตํ สงฺฆมชฺเฌ วินยธรา วูปสเมนฺติ ฯ อิทํ
ตตฺถ คตํ วูปสนฺตํ นาม ฯ เอตํ อุกฺโกเฏนฺตสฺสาปิ ปาจิตฺติยเมว ฯ
     สติวินยนฺติ ขีณาสวสฺส ทินฺนํ สติวินยํ อุกฺโกเฏติ ปาจิตฺติยเมว ฯ
อุมฺมตฺตกสฺส ทินฺเน อมูฬฺหวินเย ปาปุสฺสนฺนสฺส ทินฺนาย ตสฺส
ปาปิยสิกายปิ เอเสว นโย ฯ ติณวตฺถารกํ อุกฺโกเฏตีติ สงฺเฆน
ติณวตฺถารกสมเถน วูปสมิเต อธิกรเณ อาปตฺติ นาม เอกํ ภิกฺขุํ
อุปสงฺกมิตฺวา อุกฺกุฏิกํ นิสีทิตฺวา อญฺชลึ ปคฺคเหตฺวา เทสิยมานา
วุฏฺฐาติ ฯ ยํ ปเนตํ นิทฺทายนฺตสฺสาปิ อาปตฺติวุฏฺฐานํ นาม เอตํ
มยฺหํ น ขมตีติ เอวํ วทนฺโตปิ ติณวตฺถารกํ อุกฺโกเฏติ นาม ฯ
ตสฺสาปิ ปาจิตฺติยเมว ฯ ฉนฺทาคตึ ฯเปฯ คจฺฉนฺโต อธิกรณํ
อุกฺโกเฏตีติ วินยธโร หุตฺวา อตฺตโน อุปชฺฌายาทีนํ อตฺถาย
อธมฺมํ ธมฺโมติอาทีนิ ทีเปตฺวา ปุพฺเพ วินิจฺฉิตํ อธิกรณํ
ทฺวาทสสุ อุกฺโกเฏสุ เยนเกนจิ อุกฺโกเฏนฺโต ฉนฺทาคตึ คจฺฉนฺโต
อธิกรณํ อุกฺโกเฏติ นาม ฯ ทฺวีสุ ปน อตฺตปจฺจตฺถิเกสุ เอกสฺมึ
อนตฺถมฺเม อจรีติอาทินา นเยน สมุปฺปนฺนาฆาโต ตสฺส ปราชยํ
อาโรปนตฺถํ อธมฺมํ ธมฺโมติอาทีนิ ทีเปตฺวา ปุพฺเพ วินิจฺฉิตํ
อธิกรณํ ทฺวาทสสุ อุกฺโกเฏสุ เยนเกนจิ อุกฺโกเฏนฺโต โทสาคตึ
คจฺฉนฺโต อธิกรณํ อุกฺโกเฏติ นาม ฯ มนฺโท ปน โมมูโห
โมมูหตฺตาเอว อธมฺมํ ธมฺโมติอาทีนิ ทีเปตฺวา วุตฺตนเยเนว
อุกฺโกเฏนฺโต โมหาคตึ คจฺฉนฺโต อธิกรณํ อุกฺโกเฏติ นาม ฯ
สเจ ปน ทฺวีสุ อตฺตปจฺจตฺถิเกสุ เอโก วิสมานิ กายกมฺมาทีนิ
คหณมิจฺฉาทิฏฺฐึ พลวนฺเต จ ปกฺขนฺตริเย อภิญฺญาเต ภิกฺขู
นิสฺสิตตฺตา วิสมนิสฺสิโต คหณนิสฺสิโต พลวนิสฺสิโต จ โหติ ฯ
ตสฺส ภเยน อยมฺเม ชีวิตนฺตรายํ วา พฺรหฺมจริยนฺตรายํ วา
กเรยฺยาติ อธมฺมํ ธมฺโมติอาทีนิ ทีเปตฺวา วุตฺตนเยเนว อุกฺโกเฏนฺโต
ภยาคตึ คจฺฉนฺโต อธิกรณํ อุกฺโกเฏติ นาม ฯ ตทหุปสมฺปนฺโนติ
เอโก สามเณโร พฺยตฺโต โหติ พหุสฺสุโต โส วินิจฺฉเย ปราชยํ
ปตฺวา มงฺกุภูเต ภิกฺขู ทิสฺวา ปุจฺฉติ กสฺมา มงฺกุภูตตฺถาติ ฯ
เต ตสฺส ตํ การณํ อาโรเจนฺติ ฯ โส เต เอวํ วเทติ โหตุ
ภนฺเต มํ อุปสมฺปาเทถ อหนฺตํ อธิกรณํ วูปสเมสฺสามีติ ฯ เต
ตํ อุปสมฺปาเทนฺติ ฯ โส ทุติยทิวเส เภรึ ปหริตฺวา สงฺฆํ
สนฺนิปาเตติ ฯ ตโต ภิกฺขูหิ เกน สงฺโฆ สนฺนิปาติโตติ วุตฺโต
มยาติ วทติ ฯ กสฺมา สนฺนิปาติโตติ ฯ หิยฺโย อธิกรณํ
ทุพฺพินิจฺฉิตํ ตมหํ อชฺช วินิจฺฉินิสฺสามีติ ฯ ตฺวํ ปน หิยฺโย กุหึ
คโตติ ฯ อนุปสมฺปนฺโนสฺมิ ภนฺเต อชฺช ปน อุปสมฺปนฺโนมฺหีติ ฯ
โส วตฺตพฺโพ อิทํ อาวุโส ตุมฺหาทิสานํ ภควตา สิกฺขาปทํ
ปญฺญตฺตํ ตทหุปสมฺปนฺโน อุกฺโกเฏติ อุกฺโกฏนกํ ปาจิตฺติยนฺติ
คจฺฉ อาปตฺตึ เทเสหีติ ฯ อาคนฺตุเกปิ เอเสว นโย ฯ การโกติ
เอวํ สงฺเฆน สทฺธึ อธิกรณํ วินิจฺฉินิตฺวา ปริเวณคตํ ปราชิตา
ภิกฺขู วทนฺติ กิสฺส ภนฺเต ตุมฺเหหิ เอวํ วินิจฺฉิตํ อธิกรณํ
นนุ เอวํ วินิจฺฉินิตพฺพนฺติ ฯ โส กสฺมา ปฐมํเยว เอวํ น
วเทถาติ ตํ อธิกรณํ อุกฺโกเฏติ ฯ โย เอวํ การโก อุกฺโกเฏติ
ตสฺสาปิ อุกฺโกฏนกํ ปาจิตฺติยํ ฯ ฉนฺททายโกติ เอโก
อธิกรณวินิจฺฉเย ฉนฺทํ ทตฺวา สภาเค ภิกฺขู ปราชยํ ปตฺวา อาคเต
มงฺกุภูเต ทิสฺวา เสฺวทานิ อหํ วินิจฺฉินิสฺสามีติ สงฺฆํ สนฺนิปาตาเปตฺวา
กสฺมา สนฺนิปาตาเปสีติ วุตฺโต หิยฺโย อธิกรณํ ทุพฺพินิจฺฉิตํ ตํ
อหํ อชฺช วินิจฺฉินิสฺสามีติ ฯ หิยฺโย ปน ตฺวํ กตฺถ คโตติ ฯ
ฉนฺทํ ทตฺวา นิสินฺโนมฺหีติ ฯ โส วตฺตพฺโพ อิทํ อาวุโส
ตุมฺหาทิสานํ ภควตา สิกฺขาปทํ ปญฺญตฺตํ ฉนฺททายโก อุกฺโกเฏติ
อุกฺโกฏนกํ ปาจิตฺติยนฺติ คจฺฉ อาปตฺตึ เทเสหีติ ฯ
     {๓๔๒} วิวาทาธิกรณํ กึนิทานนฺติอาทีสุ ฯ กินฺนิทานมสฺสาติ
กินฺนิทานํ ฯ โก สมุทโย อสฺสาติ กึสมุทยํ ฯ กา ชาติ อสฺสาติ
กึชาติกํ ฯ โก ปภโว โก สมฺภาโร กึ สมุฏฺฐานํ อสฺสาติ
กึสมุฏฺฐานํ ฯ สพฺพาเนตานิ การณเววจนานิเยว ฯ วิวาทนิทานนฺติ-
อาทีสุปิ ฯ อฏฺฐารสเภทกรวตฺถุสงฺขาโต วิวาโท นิทานเมตสฺสาติ
วิวาทนิทานํ ฯ วิวาทํ นิสฺสาย อุปฺปชฺชนกวิวาทวเสเนตํ วุตฺตํ ฯ
อนุวาโท นิทานํ อสฺสาติ อนุวาทนิทานํ ฯ อิทํปิ อนุวาทํ นิสฺสาย
อุปฺปชฺชนกอนุวาทวเสน วุตฺตํ ฯ อาปตฺติ นิทานํ อสฺสาติ
อาปตฺตินิทานํ ฯ อาปตฺตาธิกรณปจฺจยา จตสฺโส อาปตฺติโย อาปชฺชตีติ
เอวํ อาปตฺตึ นิสฺสาย อุปฺปชฺชนกอาปตฺติวเสเนตํ วุตฺตํ ฯ กิจฺจยํ
นิทานมสฺสาติ กิจฺจยนิทานํ ฯ จตุพฺพิธํ สงฺฆกมฺมํ การณมสฺสาติ
อตฺโถ ฯ อุกฺขิตฺตานุวตฺติกาย ภิกฺขุนิยา ยาวตติยํ สมนุภาสนาทีนํ
กิจฺจํ นิสฺสาย อุปฺปชฺชนกกิจฺจานํ วเสเนตํ วุตฺตํ ฯ อยํ จตุนฺนํปิ
อธิกรณานํ วิสฺสชฺชนปกฺเข เอกปทโยชนา ฯ เอเตนานุสาเรน
สพฺพปทานิ โยเชตพฺพานิ ฯ ทุติยปุจฺฉาย เหตุนิทานนฺติอาทิมฺหิ
วิสฺสชฺชเน นวนฺนํ กุสลากุสลาพฺยากตเหตูนํ วเสน เหตุนิทานาทิตา
เวทิตพฺพา ฯ ตติยปุจฺฉาย วิสฺสชฺชเน พฺยญฺชนมตฺตํ นานํ ฯ
เหตุเยว หิ เอตฺถ ปจฺจโยติ วุตฺโต ฯ
     {๓๔๓} มูลปุจฺฉาย วิสฺสชฺชเน ฯ ทฺวาทส มูลานีติ โกธอุปนาห-
ยุคฬกาทีนิ ฉ วิวาทมูลานิ โลภโทสโมหา ตโย อโลภาโทสาโมหา
ตโยติ อิมานิ อชฺฌตฺตสนฺตานปฺปวตฺตานิ ทฺวาทส มูลานิ ฯ จุทฺทส
มูลานีติ ตาเนว ทฺวาทส กายวาจาหิ สทฺธึ จุทฺทส โหนฺติ ฯ
ฉ มูลานีติ กายาทีนิ ฉ สมุฏฺฐานปุจฺฉาย วิสฺสชฺชเน อฏฺฐารส
เภทกรวตฺถูนิ สมุฏฺฐานานิ ฯ ตญฺหิ เอเตสุ อฏฺฐารสสุ เภทกรวตฺถูสุ
สมุฏฺฐาติ เอเตหิ วา การณภูเตหิ สมุฏฺฐาติ เตนสฺเสตานิ
สมุฏฺฐานานีติ วุจฺจนฺติ ฯ เอส นโย สพฺพตฺถ ฯ
     {๓๔๔} วิวาทาธิกรณํ อาปตฺตีติอาทิเภเท เอเกน อธิกรเณน
กิจฺจาธิกรเณนาติ อิทํ อธิกรเณสุ เยน อธิกรเณน สมฺมนฺติ
ตํ ทสฺเสตุํ วุตฺตํ ฯ น ปเนตานิ เอกํสโต กิจฺจาธิกรเณเนว
สมฺมนฺติ ฯ น หิ ปุคฺคลสฺส สนฺติเก เทเสนฺตสฺส กิจฺจาธิกรณนฺนาม
อตฺถิ ฯ น กตเมน สมเถนาติ สาวเสสาปตฺติ วิย น สมฺมติ ฯ
น หิ สกฺกา สา เทเสตุํ น ตโต ปฏฺฐาย สุทฺธนฺเต ปติฏฺฐาตุํ ฯ
     {๓๔๘} วิวาทาธิกรณํ โหติ อนุวาทาธิกรณนฺติอาทินโย อุตฺตาโนเยว ฯ
     {๓๔๙} ตโต ปรํ ยตฺถ สติวินโยติอาทิกา สมฺมุขาวินยํ อมุญฺจิตฺวา
ฉยมกปุจฺฉา วุตฺตา ตาสํ วิสฺสชฺชเนเนว อตฺโถ ปกาสิโต ฯ
     {๓๕๑} สํสฏฺฐาทิปุจฺฉานํ วิสฺสชฺชเน ฯ สํสฏฺฐาติ สติวินย-
กมฺมวาจาขณสฺมึเยว ทฺวินฺนํปิ สมถานํ สิทฺธตฺตา สมฺมุขาวินโยติ วา
สติวินโยติ วา อิเม ธมฺมา สํสฏฺฐา โน วิสํสฏฺฐา ฯ ยสฺมา ปน
กทลิกฺขนฺเธ ปตฺตวทฺธนํ วิย น สกฺกา เตสํ วินิพฺภุชิตฺวา นานากรณํ
ทสฺเสตุํ ฯ เตน วุตฺตํ น จ ลพฺภา อิเมสํ ธมฺมานํ วินิพฺภุชิตฺวา
วินิพฺภุชิตฺวา นานากรณํ ปญฺญาเปตุนฺติ ฯ เอส นโย สพฺพตฺถ ฯ
     {๓๕๒} กึนิทาโนติ ปุจฺฉานํ วิสฺสชฺชเน ฯ นิทานํ นิทานมสฺสาติ
นิทานนิทาโน ฯ ตตฺถ สงฺฆสมฺมุขตา ธมฺมสมฺมุขตา วินยสมฺมุขตา
ปุคฺคลสมฺมุขตาติ อิทํ สมฺมุขาวินยสฺส นิทานํ ฯ สติเวปุลฺลปฺปตฺโต
ขีณาสโว ลทฺธูปวาโท สติวินยสฺส นิทานํ อุมฺมตฺตโก ภิกฺขุ
อมูฬฺหวินยสฺส นิทานํ โย จ เทเสติ ยสฺส จ เทเสติ อุภินฺนํ
สมฺมุขีภาโว ปฏิญฺญาตกรณสฺส นิทานํ ภณฺฑนชาตานํ อธิกรณํ
วูปสเมตุํ อสกฺกุเณยฺยตา เยภุยฺยสิกาย นิทานํ ปาปุสฺสนฺโน ปุคฺคโล
ตสฺส ปาปิยสิกาย นิทานํ ภณฺฑนชาตานํ พหุอสฺสามณกอชฺฌาจาโร
ติณวตฺถารกสฺส นิทานํ ฯ เหตุปจฺจยวารา วุตฺตนยา เอว ฯ
     {๓๕๓} มูลปุจฺฉาย วิสฺสชฺชนํ อุตฺตานเมว ฯ สมุฏฺฐานปุจฺฉาย กิญฺจาปิ
สตฺตนฺนํ สมถานํ กตเม ฉตฺตึส สมุฏฺฐานาติ วุตฺตํ สมฺมุขาวินยสฺส
ปน กมฺมสงฺคหาภาเวน สมุฏฺฐานาภาวโต ฉนฺนํเยว สมถานํ
ฉ สมุฏฺฐานานิ วิภตฺตานิ ฯ ตตฺถ กมฺมสฺส กิริยาติ ญตฺติ
เวทิตพฺพา ฯ กรณนฺติ ตสฺสาเยว ญตฺติยา ฐเปตพฺพกาเล ฐปนํ ฯ
อุปคมนนฺติ สยํ อุปคมนํ อตฺตนาเยว ตสฺส กมฺมสฺส กรณนฺติ
อตฺโถ ฯ อชฺฌุปคมนนฺติ อชฺเฌสนุปคมนํ อญฺญํ สทฺธิวิหาริกาทิกํ
อิมํ กมฺมํ กโรหีติ อชฺเฌสนนฺติ อตฺโถ ฯ อธิวาสนาติ วุจฺจติ
เม เอตํ กโรตุ สงฺโฆติ เอวํ อธิวาสนา ฉนฺททานนฺติ อตฺโถ ฯ
อปฺปฏิกฺโกสนาติ น เม ตํ ขมติ มา เอวํ กโรถาติ อปฺปฏิเสธนา ฯ
อิติ ฉนฺนํ ฉกฺกานํ วเสน ฉตฺตึส สมุฏฺฐานา เวทิตพฺพา ฯ
     {๓๕๔} นานตฺถปุจฺฉาวิสฺสชฺชนํ อุตฺตานเมว ฯ
     อธิกรณปุจฺฉาวิสฺสชฺชเน ฯ อยํ วิวาโท โน อธิกรณนฺติ
อยํ มาตาปุตฺตาทีนํ วิวาโท วิรุทฺธวาทตฺตา วิวาโท นาม โหติ ฯ
สมเถหิ ปน อธิกรณียตายาภาวโต อธิกรณํ น โหติ ฯ อนุวาทาทีสุปิ
เอเสว นโย ฯ เสสํ สพฺพตฺถ อุตฺตานเมว ฯ
                 อธิกรณเภทวณฺณนา นิฏฺฐิตา ฯ
                     ------------

             อรรถกถาภาษาบาลีอักษรไทย เล่มที่ ๓ หน้า ๕๔๒-๕๕๐.
http://84000.org/tipitaka/atthapali/read_th.php?B=3&A=11034&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=11034&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=8&i=1046
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=8&A=9021
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=8&A=7546
             The Pali Tipitaka in Roman Character :-
http://84000.org/tipitaka/read/roman_read.php?B=8&A=7546
             สารบัญพระไตรปิฎกเล่มที่ ๔
http://84000.org/tipitaka/read/?index_8