อรรถกถาเล่มที่ ๓ ภาษาบาลีอักษรไทย
 วินย.อ. (สมนฺต.๓)

                    โจทนากณฺฑกวณฺณนา
                       ---------
     {๓๖๐-๓๖๑} อิทานิ เอวํ อุปฺปนฺนาย โจทนาย วินยธเรน กตฺตพฺพกิจฺจํ
ทสฺเสตุํ อนุวิชฺชเกนาติอาทิมารทฺธํ ฯ ตตฺถ ทิฏฺฐํ ทิฏฺเฐนาติ
คาถาย อยมตฺโถ ฯ เอเกเนโก มาตุคาเมน สทฺธึ เอกฏฺฐานโต
นิกฺขมนฺโต วา ปวิสนฺโต วา ทิฏฺโฐ ฯ โส ตํ ปาราชิเกน
โจเทติ อิตโร ตสฺส ทสฺสนํ อนุชานาติ ตํ ปน ทสฺสนํ
ปฏิจฺจ ปาราชิกํ น อุเปติ น ปฏิชานาติ ฯ เอวเมตฺถ ยนฺเตน
ทิฏฺฐํ ตนฺตสฺส ทิฏฺโฐ มยาติ อิมินา ทิฏฺฐวจเนน สเมติ ฯ
ยสฺมา ปน อิตโร ตํ ทสฺสนํ ปฏิจฺจ โทสํ น ปฏิชานาติ ตสฺมา
อสุทฺธปริสงฺกิโต โหติ อมูลกปริสงฺกิโตติ อตฺโถ ฯ ตสฺส ปุคฺคลสฺส
สุทฺโธ อหนฺติ ปฏิญฺญาย เตน สทฺธึ อุโปสโถ กาตพฺโพ ฯ
เสสคาถาทฺวเย เอเสว นโย ฯ เสสํ สพฺพตฺถ อุตฺตานเมวาติ ฯ
                อนุวิชฺชกกิจฺจ วณฺณนา นิฏฺฐิตา ฯ
     {๓๖๒-๓๖๓} โจทนาย โก อาทีติอาทิปุจฺฉานํ วิสฺสชฺชเน ฯ สจฺเจ จ
อกุปฺเป จาติ สจฺเจ จ ปติฏฺฐาตพฺพํ อกุปฺเป จ ฯ ยํ กตํ วา
น กตํ วา ตเทว วตฺตพฺพํ ฯ น จ โจทเก วา อนุวิชฺชเก วา
สงฺเฆ วา โกโป อุปฺปาเทตพฺโพ ฯ โอติณฺณาโนติณฺณํ ชานิตพฺพนฺติ
โอติณฺณญฺจ อโนติณฺณญฺจ วจนํ ชานิตพฺพํ ฯ ตตฺรายํ ชานนา วิธิ
เอตฺตกา โจทกสฺส ปุพฺพกถา เอตฺตกา ปจฺฉิมกถา เอตฺตกา
จุทิตกสฺส ปุพฺพกถา เอตฺตกา ปจฺฉิมกถาติ ชานิตพฺพา ฯ โจทกสฺส
ปมาณํ คณฺหิตพฺพํ จุทิตกสฺส ปมาณํ คณฺหิตพฺพํ อนุวิชฺชกสฺส
ปมาณํ คณฺหิตพฺพํ ฯ อนุวิชฺชโก อปฺปมตฺตกํปิ หาเปนฺโต อาวุโส
สมนฺนาหริตฺวา อุชุกํ กตฺวา อาหราติ วตฺตพฺโพ ฯ สงฺเฆน เอวํ
ปฏิปชฺชิตพฺพํ ฯ เยน ธมฺเมน เยน วินเยน เยน สตฺถุสาสเนน
ตํ อธิกรณํ วูปสมฺมตีติ เอตฺถ ธมฺโมติ ภูตวตฺถุ ฯ วินโยติ
โจทนา เจว สารณา จ ฯ สตฺถุสาสนนฺติ ญตฺติสมฺปทา เจว
อนุสาวนสมฺปทา จ ฯ เอเตน หิ ธมฺเมน จ วินเยน จ สตฺถุสาสเนน
จ อธิกรณํ วูปสมฺมติ ตสฺมา อนุวิชฺชเกน ภูเตน วตฺถุนา
โจเทตฺวา อาปตฺตึ สาเรตฺวา ญตฺติสมฺปทาย จ อนุสฺสาวนสมฺปทาย จ
ตํ อธิกรณํ วูปสเมตพฺพํ ฯ อนุวิชฺชเกน เอวํ ปฏิปชฺชิตพฺพํ ฯ
เสสเมตฺถ อุตฺตานเมว ฯ
     {๓๖๔} อุโปสโถ กิมตฺถายาติอาทิปุจฺฉาวิสฺสชฺชนํปิ อุตฺตานเมวาติ ฯ
อวสานคาถาสุ เถเร จ ปริภาสตีติ อวมญฺญํ กโรนฺโต กึ อิเม
ชานนฺตีติ ปริภาสติ ฯ ขโต อุปหตินฺทฺริโยติ ตาย ฉนฺทาทิคามิตาย
เตน จ ปริภาสเนน อตฺตนา จ อตฺตโน ขตตฺตา ขโต สทฺธาทีนญฺจ
อินฺทฺริยานํ อุปหตตฺตา อุปหตินฺทฺริโย ฯ นิรยํ คจฺฉติ ทุมฺเมโธ
น จ สิกฺขาย คารโวติ โส ขโต อุปหตินฺทฺริโย ปญฺญาย อภาวโต
ทุมฺเมโธ ตีสุ สิกฺขาสุ อสิกฺขนโต น จ สิกฺขาย คารโว กายสฺส
เภทา นิรยํ อุปคจฺฉติ ฯ ตสฺมา น จามิสํปิ นิสฺสาย ฯเปฯ
ยถา ธมฺโม ตถา กเรติ ฯ ตสฺสตฺโถ ฯ น จ อามิสํ นิสฺสาย
กเร จุทิตกโจทเกสุ หิ อญฺญตเรน ทินฺนํ จีวราทิอามิสํ คณฺหนฺโต
อามิสํ นิสฺสาย กโรติ เอวํ น กเรยฺย ฯ น จ นิสฺสาย
ปุคฺคลนฺติ อยมฺเม อุปชฺฌาโย วา อาจริโย วาติอาทินา นเยน
ฉนฺทาทีหิ คจฺฉนฺโต ปุคฺคลํ นิสฺสาย กโรติ เอวํ น กเรยฺย ฯ
อถโข อุโภเปเต วิวชฺเชตฺวา ยถา ธมฺโม ฐิโต ตเถว กเรยฺยาติ ฯ
     อุปกณฺณกํ ชปฺเปตีติ เอวํ กเถหิ มา เอวํ กถยิตฺถาติ กณฺณมูเล
มนฺเตติ ฯ ชิมฺหํ เปกฺขตีติ โทสเมว คเวสติ ฯ วีติหรตีติ วินิจฺฉยํ
หาเปติ ฯ กุมฺมคฺคํ ปฏิเสวตีติ อาปตฺตึ ทีเปติ ฯ อกาเลน จ
โจเทตีติ อโนกาเส อนชฺฌิฏฺโฐ จ โจเทติ ฯ ปุพฺพาปรํ น ชานาตีติ
ปุริมกถํ จ ปจฺฉิมกถํ จ น ชานาติ ฯ อนุสนฺธิวจนกถํ น ชานาตีติ
กถานุสนฺธิวินิจฺฉยานุสนฺธิวเสน วจนํ น ชานาติ ฯ เสสํ สพฺพตฺถ
อุตฺตานเมวาติ ฯ
                โจทนากณฺฑกวณฺณนา นิฏฺฐิตา ฯ
                       --------

             อรรถกถาภาษาบาลีอักษรไทย เล่มที่ ๓ หน้า ๕๕๔-๕๕๖.
http://84000.org/tipitaka/atthapali/read_th.php?B=3&A=11264&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=11264&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=8&i=1077
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=8&A=9565
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=8&A=8017
             The Pali Tipitaka in Roman Character :-
http://84000.org/tipitaka/read/roman_read.php?B=8&A=8017
             สารบัญพระไตรปิฎกเล่มที่ ๔
http://84000.org/tipitaka/read/?index_8