อรรถกถาเล่มที่ ๓ ภาษาบาลีอักษรไทย
 วินย.อ. (สมนฺต.๓)

     {๑๑๒} มาตุฆาตกาทิวตฺถูสุ นิกฺขนฺตึ กเรยฺยนฺติ นิกฺขมนํ นิคฺคมนํ
อปวาหนํ กเรยฺยนฺติ อตฺโถ ฯ มาตุฆาตโก ภิกฺขเวติ เอตฺถ
เยน มนุสฺสิตฺถีภูตา ชนิกา มาตา สยมฺปิ มนุสฺสชาติเกเนว สตา
สญฺจิจฺจ ชีวิตา โวโรปิตา อยํ อานนฺตริเยน มาตุฆาตกกมฺเมน
มาตุฆาตโก ฯ เอตสฺส ปพฺพชฺชา จ อุปสมฺปทา จ ปฏิกฺขิตฺตา ฯ
เยน ปน มนุสฺสิตฺถีภูตาปิ อชนิกา โปสาวนิกามาตา วา
มหามาตา วา จูฬมาตา วา ชนิกาปิ วา นมนุสฺสิตฺถีภูตา มาตา
ฆาติตา ตสฺส ปพฺพชฺชา น วาริตา น จ อานนฺตริโย โหติ ฯ
เยน สยํ ติรจฺฉานภูเตน มนุสฺสิตฺถีภูตา มาตา ฆาติตา โสปิ
อานนฺตริโย น โหติ ฯ ติรจฺฉานคตตฺตา ปนสฺส ปพฺพชฺชา
ปฏิกฺขิตฺตา ฯ เสสํ อุตฺตานเมว ฯ ปิตุฆาตเกปิ เอเสว นโย ฯ
สเจปิ หิ เวสิยาปุตฺโต โหติ อยํ เม ปิตาติ น ชานาติ
ยสฺส สมฺภเวน นิพฺพตฺโต โส จ อเนน ฆาติโต ปิตุฆาตโก-
เตฺวว สงฺขํ คจฺฉติ อานนฺตริยญฺจ ผุสติ ฯ {๑๑๔} อรหนฺตฆาตโกปิ
มนุสฺสอรหนฺตวเสเนว เวทิตพฺโพ ฯ มนุสฺสชาติยํ หิ อนฺตมโส
อปพฺพชิตมฺปิ ขีณาสวํ ทารกํ วา ทาริกํ วา สญฺจิจฺจ ชีวิตา
โวโรเปนฺโต อรหนฺตฆาตโกว โหติ ฯ อานนฺตริยญฺจ ผุสติ
ปพฺพชฺชา จสฺส วาริตา ฯ อมนุสฺสชาติกมฺปน อรหนฺตํ มนุสฺสชาติยํ
วา อวเสสํ อริยปุคฺคลํ ฆาเตตฺวา อานนฺตริโย น โหติ
ปพฺพชฺชาปิสฺส น วาริตา ฯ กมฺมมฺปน พลวํ โหติ ฯ ติรจฺฉาโน
มนุสฺสอรหนฺตมฺปิ ฆาเตตฺวา อานนฺตริโย น โหติ ฯ กมฺมมฺปน
ภาริยนฺติ อยเมตฺถ วินิจฺฉโย ฯ เต วธาย โอนียนฺตีติ วธตฺถาย
โอนียนฺติ ฯ มาเรตุํ นียนฺตีติ อตฺโถ ฯ ยมฺปน ปาลิยํ สจา จ
มยนฺติ วุตฺตํ ตสฺส สเจ มยนฺติ อยเมวตฺโถ ฯ สเจติ หิ
วตฺตพฺเพ เอตฺถ สจา จ อิติ อยํ นิปาโต วุตฺโต ฯ สเจ จ
อิจฺเจว วา ปาโฐ ฯ ตตฺถ สเจติ สมฺภาวนตฺเถ นิปาโต ฯ
จ อิติ ปทปูรณมตฺเต ฯ สจชฺช มยนฺติปิ ปาโฐ ฯ ตสฺส สเจ

             อรรถกถาภาษาบาลีอักษรไทย เล่มที่ ๓ หน้า ๙๗-๙๘.
http://84000.org/tipitaka/atthapali/read_th.php?B=3&A=2022&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=2022&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=4&i=128
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=4&A=3551
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=4&A=3640
             The Pali Tipitaka in Roman Character :-
http://84000.org/tipitaka/read/roman_read.php?B=4&A=3640
             สารบัญพระไตรปิฎกเล่มที่ ๔
http://84000.org/tipitaka/read/?index_4