อรรถกถาเล่มที่ ๓ ภาษาบาลีอักษรไทย
 วินย.อ. (สมนฺต.๓)

                    อุโปสถกฺขนฺธกวณฺณนา
                       --------
     {๑๓๒} อุโปสถกฺขนฺธเก อญฺญติตฺถิยาติ เอตฺถ ติตฺถํ วุจฺจติ ลทฺธิ
อญฺญํ ติตฺถํ อญฺญติตฺถํ อญฺญติตฺถํ เอเตสํ อตฺถีติ อญฺญ-
ติตฺถิยา ฯ อิโต อญฺญลทฺธิกาติ วุตฺตํ โหติ ฯ ธมฺมํ ภาสนฺตีติ
ยนฺเตสํ กตฺตพฺพากตฺตพฺพํ ตํ กเถนฺติ ฯ เต ลภนฺตีติ เต มนุสฺสา
ลภนฺติ ฯ มูคสูกราติ ถูลสรีรสูกรา ฯ
     {๑๓๕} อนชฺฌาปนฺโน วา โหติ อาปชฺชิตฺวา วา วุฏฺฐิโตติ เอตฺถ
ยํ อาปตฺตึ ภิกฺขุ อนชฺฌาปนฺโน วา โหติ อาปชฺชิตฺวา วา วุฏฺฐิโต ฯ
อยํ อสนฺตี นาม อาปตฺตีติ เอวมตฺโถ เวทิตพฺโพ ฯ สมฺปชาน-
มุสาวาโท กึ โหตีติ ยฺวายํ สมฺปชานมุสาวาโท อสฺส โหตีติ
วุตฺโต โส อาปตฺติโต กึ โหติ ฯ กตรา อาปตฺติ โหตีติ
อตฺโถ ฯ ทุกฺกฏํ โหตีติ ทุกฺกฏาปตฺติ โหติ ฯ สา จ โข น
มุสาวาทลกฺขเณน ภควโต ปน วจเนน วจีทฺวาเร อกิริยสมุฏฺฐานา
อาปตฺติ โหตีติ เวทิตพฺพา ฯ วกฺขติ หิ
                อนาลปนฺโต มนุเชน เกนจิ
                วาจาคิรํ โน จ ปเร ภเณยฺย
                อาปชฺเชยฺย วาจสิกํ น กายิกํ
                ปญฺหา เมสา กุสเลหิ จินฺติตาติ ฯ
     อนฺตรายิโกติ อนฺตรายกโร ฯ กิสฺส ผาสุ โหตีติ กิมตฺถาย
ผาสุ โหติ ฯ ปฐมสฺส ฌานสฺส อธิคมายาติ ปฐมสฺส ฌานสฺส
อธิคมตฺถาย ตสฺส ภิกฺขุโน ผาสุ โหติ สุขํ โหติ ฯ เอส นโย
สพฺพตฺถ ฯ อิติ ภควา อุทฺเทสโต จ นิทฺเทสโต จ ปฐมํ
ปาฏิโมกฺขุทฺเทสํ ทสฺเสสิ ฯ
     {๑๓๖} เทวสิกนฺติ ทิวเส ทิวเส ฯ จาตุทฺทเส วา ปณฺณรเส วาติ
เอกสฺส อุตุโน ตติเย จ สตฺตเม จ ปกฺเข ทฺวิกฺขตฺตุํ จาตุทฺทเส
อวเสเส ฉกฺขตฺตุํ ปณฺณรเส ฯ อยนฺตาว เอโก อตฺโถ ฯ อยมฺปน
ปกติจาริตฺตวเสน วุตฺโต ฯ สกึ ปกฺขสฺส จาตุทฺทเส วา ปณฺณรเส
วาติ วจนโต ปน ตถารูเป ปจฺจเย สติ ยสฺมึ ตสฺมึ จาตุทฺทเส
วา ปณฺณรเส วา อุทฺทิสิตุํ วฏฺฏติ ฯ อาวาสิกานํ ภิกฺขูนํ
จาตุทฺทโส โหติ อาคนฺตุกานํ ภิกฺขูนํ ปณฺณรโส ฯ สเจ อาวาสิกา
พหุตรา โหนฺติ อาคนฺตุเกหิ อาวาสิกานํ อนุวตฺติตพฺพนฺติ วจนโตปิ
เจตํ เวทิตพฺพํ ฯ

             อรรถกถาภาษาบาลีอักษรไทย เล่มที่ ๓ หน้า ๑๑๔-๑๑๕.
http://84000.org/tipitaka/atthapali/read_th.php?B=3&A=2360&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=2360&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=4&i=147
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=4&A=4053
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=4&A=4132
             The Pali Tipitaka in Roman Character :-
http://84000.org/tipitaka/read/roman_read.php?B=4&A=4132
             สารบัญพระไตรปิฎกเล่มที่ ๔
http://84000.org/tipitaka/read/?index_4