อรรถกถาเล่มที่ ๓๐ ภาษาบาลีอักษรไทย
 วิมาน.อ. (ปรมตฺถที.)

               อิติ ปรมตฺถทีปนิยา ขุทฺทกฏฺฐกถาย วิมานวตฺถุสฺมึ
                         จุทฺทสวตฺถุปฏิมณฺฑิตสฺส
                ปญฺจมสฺส มหารถวคฺคสฺส อตฺถวณฺณนา นิฏฺฐิตา.
                      ---------------------
                        ๖.  ปายาสิกวคฺค ๑-
                    ๖๕.  ๑. ปฐมอคาริยวิมานวณฺณนา
     ยถา วนํ จิตฺตลตํ ปภาสตีติ ปฐมอคาริยวิมานํ. ๒- ตสฺส กา อุปฺปตฺติ?
ภควา ราชคเห วิหรติ เวฬุวเน. เตน สมเยน ราชคเห เอกํ กุลํ อุภโตปสนฺนํ โหติ
สีลาจารสมฺปนฺนํ โอปานภูตํ ภิกฺขูนํ ภิกฺขุนีนํ. เต เทฺว ชยมฺปติกา ๓- รตนตฺตยํ
อุทฺทิสฺส ยาวชีวํ ปุญฺญานิ กตฺวา ตโต จุตา ตาวตึเสสุ นิพฺพตฺตึสุ, เตสํ ทฺวาทส-
โยชนิกํ ๔- กนกวิมานํ นิพฺพตฺติ. เต ตตฺถ ทิพฺพสมฺปตฺตึ อนุภวนฺติ. อถายสฺมา
มหาโมคฺคลฺลาโนติอาทิ เหฏฺฐา วุตฺตนเยเนว เวทิตพฺพํ.
     [๑๐๔๘]       "ยถา วนํ จิตฺตลตํ ปภาสติ
                   อุยฺยานเสฏฺฐํ ติทสานมุตฺตมํ
                   ตถูปมํ ตุยฺหมิทํ วิมานํ
                   โอภาสยํ ติฏฺฐติ อนฺตลิกฺเข.
     [๑๐๔๙]        เทวิทฺธิปตฺโตสิ มหานุภาโว
                   มนุสฺสภูโต กิมกาสิ ปุญฺญํ
                   เกนาสิ เอวญฺชลิตานุภาโว
                   วณฺโณ จ เต สพฺพทิสา ปภาสตี"ติ.
เถโร ปุจฺฉิ.
     [๑๐๕๐]  โส เทวปุตฺโต อตฺตมโน     โมคฺคลฺลาเนน ปุจฺฉิโต
             ปญฺหํ ปุฏฺโฐ วิยากาสิ       ยสฺส กมฺมสฺสิทํ ผลํ.
     [๑๐๕๑]       "อหญฺจ ภริยา จ มนุสฺสโลเก
                   โอปานภูตา ฆรมาวสิมฺห
@เชิงอรรถ: ๑ ฉ.ม. ปายาสิวคฺค  ๒ ฉ.ม. อคาริยวิมานํ
@๓ ม. ชายมฺปติกา  ๔ สี.,อิ. ทสโยชนิกํ
                   อนฺนญฺจ ปานญฺจ ปสนฺนจิตฺตา
                   สกฺกจฺจ ทานํ วิปุลํ อทมฺห.
     [๑๐๕๒]  เตน เม'ตาทิโส วณฺโณ     เตน เม อิธ มิชฺฌติ
             อุปฺปชฺชนฺติ จ เม โภคา     เย เกจิ มนโส ปิยา.
     [๑๐๕๓]        อกฺขามิ ตํ ภิกฺขุ มหานุภาว
                   มนุสฺสภูโต ยมกาสิ ปุญฺญํ
                   เตนมฺหิ เอวญฺชลิตานุภาโว
                   วณฺโณ จ เม สพฺพทิสา ปภาสตี"ติ
อตฺตโน สมฺปตฺตึ พฺยากาสิ. คาถาสุปิ อปุพฺพํ นตฺถิ.
                    ปฐมอคาริยวิมานวณฺณนา นิฏฺฐิตา.
                      --------------------

             อรรถกถาภาษาบาลีอักษรไทย เล่มที่ ๓๐ หน้า ๓๓๑-๓๓๓.
http://84000.org/tipitaka/atthapali/read_th.php?B=30&A=7001&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=30&A=7001&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=26&i=65
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=26&A=2339
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=26&A=2365
             The Pali Tipitaka in Roman Character :-
http://84000.org/tipitaka/read/roman_read.php?B=26&A=2365
             สารบัญพระไตรปิฎกเล่มที่ ๒๖
http://84000.org/tipitaka/read/?index_26