ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๑ ภาษาบาลีอักษรไทย เปต.อ. (ปรมตฺถที.)

                    ๙๕. ๑๐. ขลฺลาฏิยเปติวตฺถุวณฺณนา
     กา นุ อนฺโตวิมานสฺมินฺติ อิทํ สตฺถริ สาวตฺถิยํ วิหรนฺเต อญฺญตรํ
ขลฺลาฏิยเปตึ อารพฺภ วุตฺตํ.
     อตีเต กิร พาราณสิยํ อญฺญตรา รูปูปชีวินี อิตฺถี อภิรูปา ทสฺสนียา
ปาสาทิกา ปรมาย วณฺณโปกฺขรตาย สมนฺนาคตา อติมโนหรเกสกลาปี อโหสิ.
ตสฺสา หิ เกสา นีลา ฑีฆา ตนู มุทู สินิทฺธา เวลฺลิตคฺคา ทฺวิหตฺถคยฺหา
วิสฏฺฐา ๑- ยาว เมขลา กลาปา โอลมฺพนฺติ, ตํ ตสฺสา เกสโสภํ ทิสฺวา ตรุณชโน
เยภุยฺเยน ตสฺสํ ๒- ปฏิพทฺธจิตฺโต อโหสิ. อถสฺสา ตํ เกสโสภํ อสหมานา อิสฺสาปกตา
กติปยา อิตฺถิโย มนฺเตตฺวา ๓- ตสฺสา เอว ปริจาริกทาสึ อามิเสน อุปลาเปตฺวา
ตาย ตสฺสา เกสูปปาตนํ เภสชฺชํ ๔- ทาเปสุํ. สา กิร ทาสี ตํ เภสชฺชํ
นฺหานิยจุณฺเณน สทฺธึ ปโยเชตฺวา คงฺคาย นทิยา นฺหานกาเล ตสฺสา อทาสิ. สา เตน
เกสมูเลสุ ๕- เตเมตฺวา อุทเก นิมุชฺชิ, นิมุชฺชนมตฺเตเยว เกสา สมูลา ปริปตึสุ,
สีสํ จสฺสา ติตฺตกลาพุสทิสํ อโหสิ. อถ สา สพฺพโส วิลูนเกสา ลุญฺจิตมตฺถกา
กโปตี วิย วิรูปา หุตฺวา ลชฺชาย อนฺโต นครํ ปวิสิตุํ อสกฺโกนฺตี วตฺเถน
สีสํ เวเฐตฺวา พหินคเร อญฺญตรสฺมึ ปเทเส วาสํ กปฺเปนฺตี กติปาหจฺจเยน
อปคตลชฺชา ตโต นิวตฺเตตฺวา ติลานิ ปีเฬตฺวา เตลวณิชฺชํ สุราวณิชฺชญฺจ กโรนฺตี
ชีวิตํ กปฺเปสิ. สา เอกทิวสํ ทฺวีสุ ตีสุ มนุสฺเสสุ สุรามตฺเตสุ  ๖- มหานิทฺทํ
โอกฺกมนฺเตสุ สิถิลภูตานิ เตสํ นิวตฺถวตฺถานิ อวหริ.
     อเถกทิวสํ สา เอกํ ขีณาสวตฺเถรํ ปิณฺฑาย จรนฺตํ ทิสฺวา ปสนฺนจิตฺตา
อตฺตโน ฆรํ เนตฺวา ปญฺญตฺเต อาสเน นิสีทาเปตฺวา เตลสํสฏฺฐํ โทณินิมฺมชฺชนึ
ปิญฺญากมทาสิ, โส ตสฺสา อนุกมฺปาย ตํ ปฏิคฺคเหตฺวา ปริภุญฺชิ. สา ปสนฺนมานสา
อุปริ ฉตฺตํ ธารยมานา อฏฺฐาสิ, โส จ เถโร ตสฺสา จิตฺตํ ปหํเสนฺโต
@เชิงอรรถ:  สี. วิสํสฏฺฐา         ม. ตตฺถ           สี.,อิ, สมฺมนฺเตตฺวา
@ ม. เกสพาธนเภสชฺชํ   สี. เกเส สมูเล     สี. สุรามทมตฺเตสุ
อนุโมทนํ กตฺวา ปกฺกามิ. สา จ อิตฺถี อนุโมทนกาเลเยว "มยฺหํ เกสา ทีฆา
ตนู สินิทฺธา มุทู เวลฺลิตคฺคา โหนฺตู"ติ ปตฺถนมกาสิ.
     สา อปเรน สมเยน กาลํ กตฺวา มิสฺสกกมฺมสฺส ผเลน ๑- สมุทฺทมชฺเฌ กนกวิมาเน
เอกิกา หุตฺวา นิพฺพตฺติ, ตสฺสา เกสา ปตฺถิตาการาเยว สมฺปชฺชึสุ, มนุสฺสานํ
สาฏกาวหรเณน ปน นคฺคา อโหสิ. สา ตสฺมึ กนกวิมาเน ปุนปฺปุนํ อุปฺปชฺชิตฺวา
เอกํ พุทฺธนฺตรํ นคฺคาว หุตฺวา วีตินาเมสิ.
     อถ อมฺหากํ ภควติ โลเก อุปฺปชฺชิตฺวา ปวตฺติตวรธมฺมจกฺเก อนุปุพฺเพน
สาวตฺถิยํ วิหรนฺเต สาวตฺถิวาสิโน สตฺตสตา  ๒- วาณิชา สุวณฺณภูมึ อุทฺทิสฺส นาวาย
มหาสมุทฺทํ โอตรึสุ. เตหิ อารุฬฺหา นาวา วิสมวาตเวคุกฺขิตฺตา  ๓- อิโต จิโต จ
ปริพฺภมนฺตี ตํ ปเทสํ อคมาสิ. อถ สา วิมานเปตี สห วิมาเนน เตสํ อตฺตานํ
ทสฺเสสิ. ตํ ทิสฺวา เชฏฺฐวาณิโช ปุจฺฉนฺโต:-
         [๕๘] "กา นุ อนฺโตวิมานสฺมึ       ติฏฺฐนฺตี นูปนิกฺขมิ
              อุปนิกฺขมสฺสุ ภทฺเท  ๔-      ปสฺสาม ตํ พหิฏฺฐิตนฺ"ติ  ๕-
คาถมาห.
     ตตฺถ กา นุ อนฺโตวิมานสฺมึ ติฏฺฐนฺตีติ วิมานสฺส อนฺโต อพฺภนฺตเร ติฏฺฐนฺตี
กา นุ ตฺวํ, กึ มนุสฺสิตฺถี, อุทาหุ อมนุสฺสิตฺถีติ ปุจฺฉติ. นูปนิกฺขมีติ
วิมานโต น นิกฺขมิ. อุปนิกฺขมสฺสุ ภทฺเท, ปสฺสาม ตํ พหิฏฺฐิตนฺติ ภทฺเท ตํ มยํ
พหิ ฐิตํ ปสฺสาม ทฏฺฐุกามมฺหา, ตสฺมา วิมานโต นิกฺขมสฺสุ. "อุปนิกฺขมสฺสุ
ภทฺทนฺเต"ติ วา ปาโฐ, ภทฺทํ เต อตฺถูติ อตฺโถ.
     อถสฺส สา อตฺตโน พหิ นิกฺขมิตุํ อสกฺกุเณยฺยตํ ปกาเสนฺตี:-
@เชิงอรรถ:  สี. ปุญฺญาปุญฺญกมฺมานํ นิสฺสนฺเทน   สี.,อิ. สตมตฺตา   ม. วาตเวเคน ขิตฺตา
@ สี. ภทฺเท ตฺวํ                สี.,อิ. มหิทฺธิกนฺติ. เอวมุปริปิ
         [๕๙] "อฏฺฏียามิ หรายามิ      นคฺคา นิกฺขมิตุํ พหิ
              เกเสหมฺหิ ปฏิจฺฉนฺนา     ปุญฺญํ เม อปฺปกํ กตนฺ"ติ
คาถมาห.
     ตตฺถ อฏฺฏียามีติ นคฺคา หุตฺวา พหิ นิกฺขมิตุํ อฏฺฏิกา ทุกฺขิตา อมฺหิ.
หรายามีติ ลชฺชามิ. เกเสหมฺหิ ปฏิจฺฉนฺนาติ เกเสหิ อมฺหิ อหํ ปฏิจฺฉาทิตา
ปารุตสรีรา. ปุญฺญํ เม อปฺปกํ กตนฺติ อปฺปกํ ปริตฺตํ มยา กุสลกมฺมํ กตํ,
ปิญฺญากทานมตฺตนฺติ อธิปฺปาโย.
     อถสฺสา วาณิโช อตฺตโน อุตฺตริสาฏกํ ทาตุกาโม:-
         [๖๐] "หนฺทุตฺตรียํ ททามิ เต    อิทํ ทุสฺสํ นิวาสย
              อิทํ ทุสฺสํ นิวาเสตฺวา     เอหิ นิกฺขม โสภเน
              อุปนิกฺขมสฺสุ ภทฺเท       ปสฺสาม ตํ พหิฏฺฐิตนฺ"ติ
คาถมาห.
     ตตฺถ หนฺทาติ คณฺห. อุตฺตรียนฺติ อุปสํพฺยานํ ๑-, อุตฺตริสาฏกนฺติ อตฺโถ.
ททามิ เตติ ตุยฺหํ ททามิ. อิทํ ทุสฺสํ นิวาสยาติ อิทํ มม อุตฺตริสาฏกํ ตฺวํ
นิวาเสหิ. โสภเนติ สุนฺทรรูเป.
     เอวญฺจ ปน วตฺวา อตฺตโน อุตฺตริสาฏกํ ตสฺสา อุปเนสิ, สา ตถา  ๒-
ทิยฺยมานสฺส อตฺตโน อนุปกปฺปนียตญฺจ, ตถา  ๓- ทิยฺยมานํ อุปกปฺปติ, ตญฺจ
ทสฺเสนฺตี:-
         [๖๑] "หตฺเถน หตฺเถ เต ทินฺนํ   น มยฺหํ อุปกปฺปติ
              เอเสตฺถุปาสโก สทฺโธ     สมฺมาสมฺพุทฺธสาวโก.
@เชิงอรรถ:  สี.,อิ. อุปริวสนํ อุปริหารํ   ม. ตสฺส   ฉ.ม. ยถา
         [๖๒] เอตํ อจฺฉาทยิตฺวาน      มม ทกฺขิณมาทิส
              ตถาหํ สุขิตา เหสฺสํ      สพฺพกามสมิทฺธินี"ติ
คาถาทฺวยมาห.
     ตตฺถ หตฺเถน หตฺเถ เต ทินฺนํ, น มยฺหํ อุปกปฺปตีติ มาริส ตว หตฺเถน
มม หตฺเถ ตยา ทินฺนํ, น มยฺหํ อุปกปฺปติ น วินิยุชฺชติ, อุปโภคโยคฺคํ น
โหตีติ  ๑- อตฺโถ. เอเสตฺถุปาสโก สทฺโธติ เอโส รตนตฺตยํ อุทฺทิสฺส สรณคมเนน
อุปาสโก กมฺมผลสทฺธาย จ สมนฺนาคตตฺตา สทฺโธ เอตฺถ เอตสฺมึ ชนสมูเห อตฺถิ.
เอตํ อจฺฉาทยิตฺวาน, มม ทกฺขิณมาทิสาติ เอตํ อุปาสกํ มม ทิยฺยมานํ สาฏกํ  ๒-
ปริทหาเปตฺวา ตํ ทกฺขิณํ มยฺหํ อาทิส ปตฺติทานํ เทหิ. ตถาหํ สุขิตา เหสฺสนฺติ
ตถา กเต อหํ สุขิตา ทิพฺพวตฺถนิวตฺถา สุขปฺปตฺตา ภวิสฺสามีติ.
     ตํ สุตฺวา วาณิชา ตํ อุปาสกํ นฺหาเปตฺวา วิลิมฺเปตฺวา วตฺถยุเคน อจฺฉาเทสุํ.
ตมตฺถํ ปกาเสนฺตา สงฺคีติการา:-
         [๖๓] "ตญฺจ เต นฺหาปยิตฺวาน    วิลิมฺเปตฺวาน วาณิชา
              วตฺเถหจฺฉาทยิตฺวาน       ตสฺสา ทกฺขิณมาทิสุํ.
         [๖๔] สมนนฺตรานุทฺทิฏฺเฐ        วิปาโก อุทปชฺชถ
              โภชนจฺฉาทนปานียํ        ทกฺขิณาย อิทํ ผลํ.
         [๖๕] ตโต สุทฺธา สุจิวสนา      กาสิกุตฺตมธารินี
              หสนฺตี วิมานา นิกฺขมิ      ทกฺขิณาย อิทํ ผลนฺ"ติ
ติสฺโส คาถาโย อโวจุํ.
    #[๖๓] ตตฺถ ตนฺติ ตํ อุปาสกํ. จสทฺโท นิปาตมตฺตํ. เตติ เต วาณิชาติ
โยชนา. วิลิมฺเปตฺวานาติ อุตฺตเมน คนฺเธน วิลิมฺเปตฺวา. วตฺเถหจฺฉาทยิตฺวานาติ
@เชิงอรรถ:  สี.,อิ. น อรหตีติ       สี. ทิยฺยมาเนน สาฏเกน
วณฺณคนฺธรสสมฺปนฺนํ สพฺยญฺชนํ โภชนํ โภเชตฺวา นิวาสนํ อุตฺตรียนฺติ ทฺวีหิ
วตฺเถหิ อจฺฉาเทสุํ, เทฺว วตฺถานิ อทํสูติ อตฺโถ. ตสฺสา ทกฺขิณมาทิสุนฺติ ตสฺสา
เปติยา ตํ ทกฺขิณํ อาทิสึสุ.
    #[๖๔] สมนนฺตรานุทฺทิฏฺเฐติ อนูติ นิปาตมตฺตํ, ตสฺสา ทกฺขิณาย
อุทฺทิฏฺฐสมนนฺตรเมว. วิปาโก อุทปชฺชถาติ ตสฺสา เปติยา วิปาโก ทกฺขิณาย
ผลํ  ๑- อุปฺปชฺชิ. กีทิโสติ เปตี อาห โภชนจฺฉาทนปานียนฺติ, นานปฺปการํ
ทิพฺพโภชนสทิสํ โภชนญฺจ นานาวิราควณฺณสมุชฺชลํ ทิพฺพวตฺถสทิสํ วตฺถญฺจ อเนกวิธํ
ปานกญฺจ ทกฺขิณาย อิทํ อีทิสํ ผลํ อุทปชฺชถาติ โยชนา.
    #[๖๕] ตโตติ ยถาวุตฺตโภชนาทิปฏิลาภโต ปจฺฉา. สุทฺธาติ นฺหาเนน สุทฺธสรีรา.
สุจิวสนาติ สุวิสุทฺธวตฺถนิวตฺถา. กาสิกุตฺตมธารินีติ กาสิกวตฺถโตปิ
อุตฺตมวตฺถธารินี. หสนฺตีติ "ปสฺสถ ตาว ตุมฺหากํ ทกฺขิณาย อิทํ ผลวิเสสนฺ"ติ
ปกาสนวเสน หสมานา วิมานโต นิกฺขมิ.
     อถ เต วาณิชา เอวํ ปจฺจกฺขโต ปุญฺญผลํ ทิสฺวา อจฺฉริยพฺภุตจิตฺตชาตา
ตสฺมึ อุปาสเก สญฺชาตคารวพหุมานา กตญฺชลี ตํ ปยิรุปาสึสุ, โสปิ เต ธมฺมกถาย
ภิยฺโยโส มตฺตาย ปสาเทตฺวา สรเณสุ จ สีเลสุ จ ปติฏฺฐาเปสิ. เต ตาย
วิมานเปติยา กตกมฺมํ:-
         [๖๖] "สุจิตฺตรูปํ รุจิรํ          วิมานํ เต ปภาสติ
              เทวเต ปุจฺฉิตาจิกฺข       กิสฺส กมฺมสฺสิทํ ผลนฺ"ติ
อิมาย คาถาย ปุจฺฉึสุ.
     ตตฺถ สุจิตฺตรูปนฺติ หตฺถิอสฺสอิตฺถิปุริสาทิวเสน เจว มาลากมฺมลตากมฺมาทิวเสน
จ สุฏฺฐุ วิหิตจิตฺตรูปํ. รุจิรนฺติ รมณียํ ทสฺสนียํ. กิสฺส กมฺมสฺสิทํ
ผลนฺติ กีทิสสฺส กมฺมสฺส, กึ ทานมยสฺส อุทาหุ สีลมยสฺส อิทํ ผลนฺติ อตฺโถ.
@เชิงอรรถ:  สี.,อิ. อิทํ ผลํ
     สา เตหิ เอวํ ปุฏฺฐา "มยา กตสฺส ปริตฺตกสฺส กุสลกมฺมสฺส ตาว อิทํ
ผลํ, อกุสลกมฺมสฺส ปน อายตึ นิรเย เอทิสํ ภวิสฺสตี"ติ ตทุภยํ อาจิกฺขนฺตี:-
         [๖๗] "ภิกฺขุโน จรมานสฺส        โทณินิมฺมชฺชนึ  ๑- อหํ
              อทาสึ อุชุภูตสฺส           วิปฺปสนฺเนน เจตสา.
         [๖๘] ตสฺส กมฺมสฺส กุสลสฺส       วิปากํ ทีฆมนฺตรํ
              อนุโภมิ วิมานสฺมึ          ตญฺจ ทานิ ปริตฺตกํ.
         [๖๙] อุทฺธํ จตูหิ มาเสหิ         กาลํกิริยา ภวิสฺสติ
              เอกนฺตกฏุกํ โฆรํ          นิรยํ ปปติสฺสหํ.
         [๗๐] จตุกฺกณฺณํ จตุทฺวารํ         วิภตฺตํ ภาคโส มิตํ
              อโยปาการปริยนฺตํ         อยสา ปฏิกุชฺชิตํ.
         [๗๑] ตสฺส อโยมยา ภูมิ         ชลิตา เตชสา ยุตา
              สมนฺตา โยชนสตํ          ผริตฺวา ติฏฺฐติ สพฺพทา.
         [๗๒] ตตฺถาหํ ทีฆมทฺธานํ         ทุกฺขํ เวทิสฺส เวทนํ
              ผลญฺจ ปาปกมฺมสฺส         ตสฺมา โสจามหํ ภุสนฺ"ติ
คาถาโย อภาสิ.
    #[๖๗] ตตฺถ ภิกฺขุโน จรมานสฺสาติ อญฺญตรสฺส ภินฺนกิเลสสฺส ภิกฺขุโน
ภิกฺขาย จรนฺตสฺส. โทณินิมฺมชฺชนินฺติ วิสฺสนฺทมานเตลํ ปิญฺญากํ. อุชุภูตสฺสาติ
จิตฺตชิมฺหวงฺกกุฏิลภาวกรานํ กิเลสานํ อภาเวน อุชุภาวปฺปตฺตสฺส. วิปฺปสนฺเนน
เจตสาติ กมฺมผลสทฺธาย สุฏฺฐุ ปสนฺเนน จิตฺเตน.
@เชิงอรรถ:  สี.,อิ. โทณินิมฺมชฺชนํ
    #[๖๘-๖๙] ทีฆมนฺตรนฺติ มกาโร ปทสนฺธิกโร, ทีฆอนฺตรํ ทีฆกาลนฺติ อตฺโถ.
ตญฺจ ทานิ ปริตฺตกนฺติ ตญฺจ ปุญฺญผลํ วิปกฺกวิปากตฺตา กมฺมสฺส อิทานิ ปริตฺตกํ
อปฺปาวเสสํ, นจิเรเนว อิโต ภวิสฺสามีติ อตฺโถ. เตนาห "อุทฺธํ จตูหิ มาเสหิ,
กาลํกิริยา ภวิสฺสตี"ติ. จตูหิ มาเสหิ อุทฺธํ จตุนฺนํ มาสานํ อุปริ ปญฺจเม มาเส
มม กาลํกิริยา ภวิสฺสตีติ ทสฺเสติ. เอกนฺตกฏุกนฺติ เอกนฺเตเนว
อนิฏฺฐฉผสฺสายตนิกภาวโต  ๑- เอกนฺตทุกฺขนฺติ อตฺโถ. โฆรนฺติ ทารุณํ. นิรยนฺติ
นตฺถิ เอตฺถ อโย สุขนฺติ กตฺวา "นิรยนฺ"ติ ลทฺธนามํ นรกํ. ปปติสฺสหนฺติ
ปปติสฺสามิ อหํ.
    #[๗๐] "นิรยนฺ"ติ เจตฺถ อวีจิมหานิรยสฺส อธิปฺเปตตฺตา ตํ สรูปโต ทสฺเสตุํ
"จตุกฺกณฺณนฺ"ติอาทิมาห. ตตฺถ จตุกฺกณฺณนฺติ จตุกฺโกณํ. จตุทฺวารนฺติ จตูสุ
ทิสาสุ จตูหิ ทฺวาเรหิ ยุตฺตํ. วิภตฺตนฺติ สุฏฺฐุ วิภตฺตํ. ภาคโสติ ภาคโต.
มิตนฺติ ตุลิตํ. อโยปาการปริยนฺตนฺติ อโยมเยน ปากาเรน ปริกฺขิตฺตํ. อยสา
ปฏิกุชฺชิตนฺติ อโยปฏเลเนว อุปริ ปิหิตํ.
    #[๗๑-๗๒] เตชสา ยุตาติ สมนฺตโต สมุฏฺฐิตชาเลน มหตา อคฺคินา นิรนฺตรํ
สมายุตชาลา. สมนฺตา โยชนสตนฺติ เอวํ ปน สมนฺตา พหิ สพฺพทิสาสุ โยชนสตํ
โยชนานํ สตํ. สพฺพทาติ สพฺพกาลํ. ผริตฺวา ติฏฺฐตีติ พฺยาเปตฺวา ติฏฺฐติ. ตตฺถาติ
ตสฺมึ มหานิรเย. เวทิสฺสนฺติ เวทิสฺสามิ อนุภวิสฺสามิ. ผลญฺจ ปาปกมฺมสฺสาติ อิทํ
อีทิสํ ทุกฺขานุภวนํ มยา เอว กตสฺส ปาปสฺส กมฺมสฺส ผลนฺติ อตฺโถ.
     เอวํ ตาย อตฺตนา กตกมฺมผเล ๒- อายตึ เนรยิกภเย จ ปกาสิเต โส อุปาสโก
กรุณาสญฺโจทิตมานโส "หนฺทสฺสาหํ ๓- ปติฏฺฐา ภเวยฺยนฺ"ติ จินฺเตตฺวา อาห "เทวเต
ตฺวํ มยฺหํ เอกสฺส ทานวเสน ๔- สพฺพกามสมิทฺธา อุฬารสมฺปตฺติยุตฺตา ชาตา, อิทานิ
ปน อิเมสํ อุปาสกานํ ทานํ ทตฺวา สตฺถุ จ คุเณ อนุสฺสริตฺวา นิรยูปปตฺติโต
มุจฺจิสฺสสี"ติ สา เปตี หฏฺฐตุฏฺฐา "สาธู"ติ วตฺวา เต ทิพฺเพน อนฺนปาเนน
@เชิงอรรถ:  สี.,อิ. อนิฏฺฐํ, ตโต เปตโยนิกภาวโต   ม. อตฺตโน กมฺมผเล  ม. ตสฺสาหํ
@ ม. ทาเนน อิทาเนว
สนฺตปฺเปตฺวา ทิพฺพานิ วตฺถานิ นานาวิธานิ รตนานิ จ อทาสิ, ภควนฺตญฺจ
อุทฺทิสฺส ทิพฺพํ ทุสฺสยุคํ เตสํ หตฺเถ ทตฺวา "อญฺญตรา ภนฺเต วิมานเปตี ภควโต
ปาเท สิรสา วนฺทตีติ สาวตฺถึ คนฺตฺวา สตฺถารํ มม วจเนน วนฺทถา"ติ วนฺทนญฺจ
เปเสสิ, ตญฺจ นาวํ อตฺตโน อิทฺธานุภาเวน เตหิ อิจฺฉิตปฏฺฏนํ ตํ ทิวสเมว
อุปเนสิ.
     อถ เต วาณิชา ตโต ปฏฺฏนโต อนุกฺกเมน สาวตฺถึ ปตฺวา เชตวนํ ปวิสิตฺวา
สตฺถุ ตํ ทุสฺสยุคํ ทตฺวา วนฺทนญฺจ นิเวเทตฺวา อาทิโต ปฏฺฐาย ตํ ปวตฺตึ
ภควโต อาโรเจสุํ. สตฺถา ตมตฺถํ อฏฺฐุปฺปตฺตึ กตฺวา สมฺปตฺตปริสาย วิตฺถาเรน
ธมฺมํ เทเสสิ. สา เทสนา มหาชนสฺส สาตฺถิกา ชาตา. เต ปน อุปาสกา
ทุติยทิวเส พุทฺธปฺปมุขสฺส ภิกฺขุสํฆสฺส มหาทานํ ทตฺวา ตสฺสา ทกฺขิณํ อาทิสึสุ,
สา เจ ตโต เปตโลกโต จวิตฺวา วิวิธรตนวิชฺโชติเต ตาวตึสภวเน กนกวิมาเน
อจฺฉราสหสฺสปริวารา นิพฺพตฺตีติ.
                    ขลฺลาฏิยเปติวตฺถุวณฺณนา นิฏฺฐิตา.
                       -------------------


             อรรถกถาภาษาบาลีอักษรไทย เล่มที่ ๓๑ หน้า ๕๐-๕๗. http://84000.org/tipitaka/atthapali/read_th.php?B=31&A=1097&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=31&A=1097&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=26&i=95              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=3141              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=3323              The Pali Tipitaka in Roman Character :- http://84000.org/tipitaka/read/roman_read.php?B=26&A=3323              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]