บาลีอรรถกถาเล่มที่ ๓๑

๘๗. ๒. สูกรมุขเปตวตฺถุวณฺณนา กาโย เต สพฺพโสวณฺโณติ อิทํ สตฺถริ ราชคหํ อุปนิสฺสาย เวฬุวเน กลนฺทกนิวาเป วิหรนฺเต อญฺญตรํ สูกรมุขเปตํ อารพฺภ วุตฺตํ. อตีเต กิร กสฺสปสฺส ภควโต สาสเน เอโก ภิกฺขุ กาเยน สญฺญโต อโหสิ วาจาย อสญฺญโต, ภิกฺขู อกฺโกสติ ปริภาสติ. โส กาลํ กตฺวา นิรเย นิพฺพตฺโต เอกํ พุทฺธนฺตรํ ตตฺถ ปจฺจิตฺวา ตโต จวิตฺวา อิมสฺมึ พุทฺธุปฺปาเท ราชคหสมีเป คิชฺฌกูฏปพฺพตปาเท ตสฺเสว กมฺมสฺส วิปากาวเสเสน ขุปฺปิปาสาภิภูโต เปโต หุตฺวา @เชิงอรรถ: ^๑ สี.,อิ. อุปฺปชฺชติ

--------------------------------------------------------------------------------------------- หน้าที่ ๑๑.

นิพฺพตฺติ. ตสฺส กาโย สุวณฺณวณฺโณ อโหสิ, มุขํ สูกรมุขสทิสํ. อถายสฺมา นารโท คิชฺฌกูเฏ ปพฺพเต วสนฺโต ปาโตว สรีรปฏิชคฺคนํ กตฺวา ปตฺตจีวรมาทาย ราชคหํ ปิณฺฑาย คจฺฉนฺโต อนฺตรามคฺเค ตํ เปตํ ทิสฺวา เตน กตกมฺมํ ปุจฺฉนฺโต:- [๔] "กาโย เต สพฺพโสวณฺโณ สพฺพา โอภาสเต ทิสา มุขํ เต สูกรสฺเสว กึ กมฺมมกรี ปุเร"ติ คาถมาห. ตตฺถ กาโย เต สพฺพโสวณฺโณติ ตว กาโย เทโห สพฺโพ สุวณฺณวณฺโณ อุตฺตตฺตกนกสนฺนิโภ. สพฺพา โอภาสเต ทิสาติ ตสฺส ปภาย สพฺพาปิ ทิสา สมนฺตโต โอภาสติ วิชฺโชตติ. โอภาสเตติ วา อนฺโตคธเหตุอตฺถมิทํ ปทนฺติ "เต กาโย สพฺพโสวณฺโณ สพฺพา ทิสา โอภาเสติ วิชฺโชเตตี"ติ อตฺโถ ทฏฺฐพฺโพ. มุขํ เต สูกรสฺเสวาติ มุขํ ปน เต สูกรสฺส วิย, สูกรมุขสทิสํ ตว มุขนฺติ อตฺโถ. กึ กมฺมมกรี ปุเรติ "ตฺวํ ปุพฺเพ อตีตชาติยํ กีทิสํ กมฺมํ อกาสี"ติ ปุจฺฉติ. เอวํ เถเรน โส เปโต กตกมฺมํ ปุฏฺโฐ คาถาย วิสฺสชฺเชนฺโต:- [๕] "กาเยน สญฺญโต อาสึ วาจายาสิมสญฺญโต เตน เม ตาทิโส วณฺโณ ยถา ปสฺสสิ นารทา"ติ อาห. ตตฺถ กาเยน สญฺญโต อาสินฺติ กายิเกน สํยเมน สํยโต กายทฺวาริเกน สํวเรน สํวุโต อโหสึ. วาจายาสิมสญฺญโตติ วาจาย อสญฺญโต วาจสิเกน อสํวเรน สมนฺนาคโต อโหสึ. เตนาติ เตน อุภเยน สํยเมน อสํยเมน จ. เมติ มยฺหํ. เอตาทิโส ^๑- วณฺโณติ เอทิโส, ^๒- ยถา ตฺวํ นารท ปจฺจกฺขโต ปสฺสสิ, เอวรูโป, ^๓- กาเยน @เชิงอรรถ: ^๑ สี.,ม. ตาทิโส ^๒ สี.,อิ. เอตาทิโส ^๓ ม. เอวรูเปน

--------------------------------------------------------------------------------------------- หน้าที่ ๑๒.

มนุสฺสสณฺฐาโน สุวณฺณวณฺโณ, มุเขน สูกรสทิโส อาสินฺติ โยชนา. วณฺณสทฺโท หิ อิธ ฉวิยํ สณฺฐาเน จ ทฏฺฐพฺโพ. เอวํ เปโต เถเรน ปุจฺฉิโต ตมตฺถํ ^๑- วิสฺสชฺเชตฺวา ตเมว การณํ กตฺวา เถรสฺส โอวาทํ เทนฺโต:- [๖] "ตํ ตฺยาหํ นารท พฺรูมิ สามํ ทิฏฺฐมิทํ ตยา มากาสิ มุขสา ปาปํ มา โข สูกรมุโข อหู"ติ คาถมาห. ตตฺถ ตนฺติ ตสฺมา. ตฺยาหนฺติ เต อหํ. นารทาติ เถรํ อาลปติ. พฺรูมีติ กเถมิ. สามนฺติ สยเมว. อิทนฺติ อตฺตโน สรีรํ สนฺธาย วทติ. อยํ เหตฺถ อตฺโถ:- ยสฺมา ภนฺเต นารท อิทํ มม สรีรํ คลโต ปฏฺฐาย เหฏฺฐา มนุสฺสสณฺฐานํ, อุปริ สูกรสณฺฐานํ ^๒- ตยา ปจฺจกฺขโตว ทิฏฺฐํ. ตสฺมา เต อหํ โอวาทวเสน วทามีติ. กินฺติ เจติ อาห ^๓- "มากาสิ มุขสา ปาปํ, มา โข สูกรมุโข อหู"ติ. ตตฺถ มาติ ปฏิเสเธ นิปาโต. มุขสาติ มุเขน. โขติ อวธารเณ, วาจาย ปาปกมฺมํ มากาสิ มา กโรหิ. มา โข สูกรมุโข อหูติ อหํ วิย สูกรมุโข มา อโหสิเยว. สเจ ปน ตฺวํ มุขโร หุตฺวา วาจาย ปาปํ กเรยฺยาสิ, เอกํเสน สูกรมุโข ภเวยฺยาสิ, ตสฺมา มากาสิ มุขสา ปาปนฺติ ผลปฏิเสธนมุเขนปิ เหตุเมว ปฏิเสเธติ. อถายสฺมา นารโท ราชคเห ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต จตุปริสมชฺเฌ นิสินฺนสฺส สตฺถุโน ตมตฺถํ อาโรเจสิ. สตฺถา "นารท ปุพฺเพว มยา โส สตฺโต ทิฏฺโฐ"ติ วตฺวา อเนกาการโวการํ วจีทุจฺจริตสนฺนิสฺสิตํ @เชิงอรรถ: ^๑ ม. ปุจฺฉิตมตฺถํ ^๒ ม. สูกรมุขสณฺฐานํ ^๓ สี. กิมิทํ เปโต อาห

--------------------------------------------------------------------------------------------- หน้าที่ ๑๓.

อาทีนวํ, วจีสุจริตปฏิสํยุตฺตํ จ อานิสํสํ ปกาเสนฺโต ธมฺมํ เทเสสิ, สา เทสนา สมฺปตฺตปริสาย สาตฺถิกา อโหสีติ. สูกรมุขเปตวตฺถุวณฺณนา นิฏฺฐิตา. ---------------

อรรถกถาภาษาบาลีอักษรไทย เล่มที่ ๓๑ หน้า ๑๐-๑๓. http://84000.org/tipitaka/atthapali/read_th.php?B=31&A=209&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=31&A=209&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=26&i=87 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=2983 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=3173 The Pali Tipitaka in Roman Character :- http://84000.org/tipitaka/read/roman_read.php?B=26&A=3173 สารบัญพระไตรปิฎกเล่มที่ ๒๖ http://84000.org/tipitaka/read/?index_26