บาลีอรรถกถาเล่มที่ ๓๔

๔๕๔. ๔. สุชาตาเถรีคาถาวณฺณนา อลงฺกตา สุวสนาติอาทิกา สุชาตาย เถริยา คาถา. อยมฺปิ ปุริมพุทฺเธสุ กตาธิการา ตตฺถ ตตฺถ ภเว วิวฏฺฏูปนิสฺสยํ กุสลํ อุปจินนฺตี อนุกฺกเมน สมฺภตวิโมกฺขสมฺภารา หุตฺวา อิมสฺมึ พุทฺธุปฺปาเท สาเกตนคเร เสฏฺฐิกุเล นิพฺพตฺติตฺวา วยปฺปตฺตา มาตาปิตูหิ สมานชาติกสฺส เสฏฺฐิปุตฺตสฺส ทินฺนา หุตฺวา ปติกุลํ คตา ตตฺถ เตน สทฺธึ สุขสํวาสํ วสนฺตี เอกทิวสํ อุยฺยานํ คนฺตฺวา นกฺขตฺตกีฬํ กีฬิตฺวา ปริชเนน สทฺธึ นครํ อาคจฺฉนฺตี อญฺชนวเน สตฺถารํ ทิสฺวา ปสนฺนมานสา อุปสงฺกมิตฺวา วนฺทิตฺวา เอกมนฺตํ นิสีทิ. สตฺถา ตสฺสา อนุปุพฺพิกถํ กเถตฺวา กลฺลจิตฺตตํ ญตฺวา อุปริ สามุกฺกํสิกํ ธมฺมเทสนํ ปกาเสสิ. สา เทสนาวสาเน อตฺตโน กตาธิการตาย ญาณปริปากคตตฺตา จ สตฺถุ จ เทสนาวิลาเสน ยถานิสินฺนาว สห ปฏิสมฺภิทาหิ อรหตฺตํ ปตฺวา สตฺถารํ วนฺทิตฺวา เคหํ คนฺตฺวา สามิกญฺจ มาตาปิตโร จ อนุชานาเปตฺวา สตฺถุ อาณาย ภิกฺขุนุปสฺสยํ คนฺตฺวา ภิกฺขุนีนํ สนฺติเก ปพฺพชิ. ปพฺพชิตฺวา จ อตฺตโน ปฏิปตฺตึ ปจฺจเวกฺขิตฺวา อุทานวเสน:-

--------------------------------------------------------------------------------------------- หน้าที่ ๑๗๔.

[๑๔๕] "อลงฺกตา สุวสนา มาลินี จนฺทโนกฺขิตา สพฺพาภรณสญฺฉนฺนา ทาสีคณปุรกฺขตา. [๑๔๖] อนฺนํ ปานํ จ อาทาย ขชฺชํ โภชฺชํ อนปฺปกํ เคหโต นิกฺขมิตฺวาน อุยฺยานมภิหารยึ. [๑๔๗] ตตฺถ รมิตฺวา กีฬิตฺวา อาคจฺฉนฺตี สกํ ฆรํ วิหารํ ทฏฺฐุํ ปาวิสึ ^๑- สาเกเต อญฺชนํ วนํ. [๑๔๘] ทิสฺวาน โลกปชฺโชตํ วนฺทิตฺวาน อุปาวิสึ โส เม ธมฺมมเทเสสิ อนุกมฺปาย จกฺขุมา. [๑๔๙] สุตฺวา จ โข มเหสิสฺส สจฺจํ สมฺปฏิวิชฺฌหํ ตตฺเถว วิรชํ ธมฺมํ ผุสยึ อมตํ ปทํ. [๑๕๐] ตโต วิญฺญาตสทฺธมฺมา ปพฺพชึ อนคาริยํ ติสฺโส วิชฺชา อนุปฺปตฺตา อโมฆํ พุทฺธสาสนนฺ"ติ อิมา คาถา อภาสิ. ตตฺถ อลงฺกตาติ วิภูสิตา. ตํ ปน อลงฺกตาการํ ทสฺเสตุํ "สุวสนา มาลินี จนฺทโนกฺขิตา"ติ วุตฺตํ. ตตฺถ มาลินีติ มาลาธารินี. จนฺทโนกฺขิตาติ จนฺทนานุลิตฺตา. สพฺพาภรณสญฺฉนฺนาติ หตฺถูปคาทีหิ สพฺพาภรเณหิ อลงฺการวเสน สญฺฉาทิตสรีรา. อนฺนํ ปานํ จ อาทาย, ขชฺชํ โภชฺชํ อนปฺปกนฺติ สาลิโอทนาทิอนฺนํ อมฺพปานาทิปานํ ปิฏฺฐขาทนียาทิขชฺชํ อวสิฏฺฐํ อาหารสงฺขาตํ โภชฺชญฺจ ปหูตํ คเหตฺวา. อุยฺยานมภิหารยินฺติ นกฺขตฺตกีฬาวเสน อุยฺยานํ อุปเนสึ, อนฺนปานาทึ ตตฺถ อาเนตฺวา สห ปริชเนน กีฬนฺตี รมนฺตี ปริจาเรสินฺติ อธิปฺปาโย. @เชิงอรรถ: ^๑ ม. วิหารํ ทกฺขึ ปาวิสึ, อิ. วิหารํ ทฏฺฐุํ ปาวิสึ

--------------------------------------------------------------------------------------------- หน้าที่ ๑๗๕.

สาเกเต อญฺชนํ วนนฺติ สาเกตสมีเป อญฺชนวเน วิหารํ ปาวิสึ. โลกปชฺโชตนฺติ ญาณปชฺโชเตน โลกสฺส ปชฺโชตภูตํ. ผุสยินฺติ ผุสึ, ตํ ^๑- อธิคจฺฉินฺติ อตฺโถ. เสสํ วุตฺตนยเมว. สุชาตาเถรีคาถาวณฺณนา นิฏฺฐิตา. --------------

อรรถกถาภาษาบาลีอักษรไทย เล่มที่ ๓๔ หน้า ๑๗๓-๑๗๕. http://84000.org/tipitaka/atthapali/read_th.php?B=34&A=3724&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=34&A=3724&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=26&i=454 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=9324 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=9376 The Pali Tipitaka in Roman Character :- http://84000.org/tipitaka/read/roman_read.php?B=26&A=9376 สารบัญพระไตรปิฎกเล่มที่ ๒๖ http://84000.org/tipitaka/read/?index_26