ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๔ ภาษาบาลีอักษรไทย เถรี.อ. (ปรมตฺถที.)

หน้าที่ ๒๖๒.

๑๓. วีสตินิปาต ๔๖๗. ๑. อมฺพปาลีเถรีคาถาวณฺณนา วีสตินิปาเต กาฬกา ภมรวณฺณสาทิสาติอาทิกา อมฺพปาลิยา เถริยา คาถา. อยมฺปิ ปุริมพุทฺเธสุ กตาธิการา ตตฺถ ตตฺถ ภเว วิวฏฺฏูปนิสฺสยํ กุสลํ อุปจินนฺตี สิขิสฺส ภควโต สาสเน ปพฺพชิตฺวา อุปสมฺปนฺนา หุตฺวา ภิกฺขุนิสิกฺขาปทํ สมาทาย วิหรนฺตี เอกทิวสํ สมฺพหุลาหิ ภิกฺขุนีหิ สทฺธึ เจติยํ วนฺทิตฺวา ปทกฺขิณํ กโรนฺตี ปุเรตรํ คจฺฉนฺติยา ขีณาสวตฺเถริยา ขิปนฺติยา สหสา เขฬปิณฺฑํ เจติยงฺคเณ ปติตํ ขีณาสวตฺเถริยา อปสฺสิตฺวา คตาย ๑- อยํ ปจฺฉโต คจฺฉนฺตี ตํ เขฬปิณฺฑํ ทิสฺวา "กา นาม คณิกา อิมสฺมึ ฐาเน เขฬปิณฺฑํ ปาเตสี"ติ อกฺโกสิ. สา ภิกฺขุนิกาเล สีลํ รกฺขนฺตี คพฺภวาสํ ชิคุจฺฉิตฺวา โอปปาติกตฺตภาเว จิตฺตํ ฐเปสิ. เตน ปจฺฉิมตฺตภาเว ๒- เวสาลิยํ ราชอุยฺยาเน อมฺพรุกฺขมูเล โอปปาติกา หุตฺวา นิพฺพตฺติ. ตํ ทิสฺวา อุยฺยานปาโล นครํ อุปเนสิ. อมฺพรุกฺขมูเล นิพฺพตฺตตาย สา อมฺพปาลีเตฺวว โวหรียิตฺถ. อถ นํ อภิรูปทสฺสนียํ ปาสาทิกํ วิลาสกนฺตตาทิคุณ- วิเสสสมุทิตํ ทิสฺวา สมฺพหุลา ราชกุมารา อตฺตโน อตฺตโน ปริคฺคหํ กาตุกามา อญฺญมญฺญํ กลหํ อกํสุ. เตสํ กลหวูปสมนตฺถํ ๓- ตสฺสา กมฺมสญฺโจทิตา โวหาริกา "สพฺเพสํ โหตู"ติ คณิกาฏฺฐาเน ฐเปสุํ. สา สตฺถริ ปฏิลทฺธสทฺธา อตฺตโน อุยฺยาเน วิหารํ กตฺวา พุทฺธปฺปมุขสฺส ภิกฺขุสํฆสฺส นิยฺยาเทตฺวา ปจฺฉา อตฺตโน ปุตฺตสฺส วิมลโกณฺฑญฺญตฺเถรสฺส สนฺติเก ธมฺมํ สุตฺวา ปพฺพชิตฺวา วิปสฺสนาย กมฺมํ กโรนฺตี อตฺตโน สรีรสฺส ชราชิณฺณภาวํ นิสฺสาย สํเวคชาตา สงฺขารานํ อนิจฺจตํ เอว วิภาเวนฺตี:- @เชิงอรรถ: สี. ขีณาสวตฺเถรี อปสฺสิตฺวา คตา ฉ.ม. จริมตฺตภาเว ฉ.ม. กลหวูปสมตฺถํ

--------------------------------------------------------------------------------------------- หน้าที่ ๒๖๓.

[๒๕๒] "กาฬกา ภมรวณฺณสาทิสา เวลฺลิตคฺคา มม มุทฺธชา อหุํ เต ชราย สาณวากสาทิสา สจฺจวาทิวจนํ อนญฺญถา. [๒๕๓] วาสิโตว สุรภี กรณฺฑโก ปุปฺผปูร มม อุตฺตมงฺคภูโต ๑- ตํ ชรายถ สโลมคนฺธิกํ สจฺจวาทิวจนํ อนญฺญถา. [๒๕๔] กานนํว สหิตํ สุโรปิตํ โกจฺฉสูจิวิจิตคฺคโสภิตํ ตํ ชราย วิรลํ ตหึ ตหึ สจฺจวาทิวจนํ อนญฺญถา. [๒๕๕] กณฺหขนฺธกํ สุวณฺณมณฺฑิตํ โสภเต สุเวณีหิลงฺกตํ ตํ ชราย ขลิตํ สิรํ กตํ สจฺจวาทิวจนํ อนญฺญถา. [๒๕๖] จิตฺตการสุกตาว เลขิกา โสภเต ๒- สุ ภมุกา ปุเร มม ตา ชราย วลีหิ ปลมฺพิตา ๓- สจฺจวาทิวจนํ อนญฺญถา. @เชิงอรรถ: ฉ.ม. อุตฺตมงฺคโช ฉ.ม. โสภเร. เอวมุปริปิ ฉ.ม. วลิภิปฺปลมฺพิตา

--------------------------------------------------------------------------------------------- หน้าที่ ๒๖๔.

[๒๕๗] ภสฺสรา สุรุจิรา ยถา มณี เนตฺตเหสุมภินีลมายตา เต ชรายภิหตา น โสภเต สจฺจวาทิวจนํ อนญฺญถา. [๒๕๘] สณฺหตุงฺคสทิสี จ นาสิกา โสภเต สุ อภิโยพฺพนํ ปติ สา ชราย อุปกูลิตา วิย สจฺจวาทิวจนํ อนญฺญถา. [๒๕๙] กงฺกณํว สุกตํ สุนิฏฺฐิตํ โสภเต สุ มม กณฺณปาฬิโย ตา ชราย วลิภิปฺปลมฺพิตา สจฺจวาทิวจนํ อนญฺญถา. [๒๖๐] ปตฺตลีมกุลวณฺณสาทิสา โสภเต สุ ทนฺตา ปุเร มม เต ชราย ขณฺฑิตา จาสิตา สจฺจวาทิวจนํ อนญฺญถา. [๒๖๑] กานนมฺหิ วนสณฺฑจารินี โกกิลาว มธุรํ นิกูชิหํ ตํ ชราย ขลิตํ ตหึ ตหึ สจฺจวาทิวจนํ อนญฺญถา. [๒๖๒] สณฺหกมฺพุริว สุปฺปมชฺชิตา โสภเต สุ คีวา ปุเร มม

--------------------------------------------------------------------------------------------- หน้าที่ ๒๖๕.

สา ชราย ภคฺคา วินามิตา สจฺจวาทิวจนํ อนญฺญถา. [๒๖๓] วฏฺฏปลิฆสทิโสปมา อุโภ โสภเต สุ พาหา ปุเร มม ตา ชราย ยถา ปาฏลิพฺพลิตา สจฺจวาทิวจนํ อนญฺญถา. [๒๖๔] สณฺหมุทฺทิกสุวณฺณมณฺฑิตา โสภเต สุ หตฺถา ปุเร มม เต ชราย ยถา มูลมูลิกา สจฺจวาทิวจนํ อนญฺญถา. [๒๖๕] ปีนวฏฺฏสหิตุคฺคตา อุโภ โสภเต สุ ถนกา ปุเร มม เถวิกีว ลมฺพนฺติ โนทกา สจฺจวาทิวจนํ อนญฺญถา. [๒๖๖] กญฺจนสฺส ผลกํว สมฺมฏฺฐํ โสภเต สุ กาโย ปุเร มม โส วลีหิ สุขุมาหิ โอตโต สจฺจวาทิวจนํ อนญฺญถา. [๒๖๗] นาคโภคสทิโสปมา อุโภ โสภเต สุ อูรู ปุเร มม เต ชราย ยถา เวฬุนาฬิโย สจฺจวาทิวจนํ อนญฺญถา.

--------------------------------------------------------------------------------------------- หน้าที่ ๒๖๖.

[๒๖๘] สณฺหนูปุรสุวณฺณมณฺฑิตา โสภเต สุ ชงฺฆา ปุเร มม ตา ชราย ติลทณฺฑการิว สจฺจวาทิวจนํ อนญฺญถา. [๒๖๙] ตูลปุณฺณสทิโสปมา อุโภ โสภเต สุ ปาทา ปุเร มม เต ชราย ผุฏิตา วลีมตา สจฺจวาทิวจนํ อนญฺญถา. [๒๗๐] เอทิโส อหุ อยํ สมุสฺสโย ชชฺชโร พหุทุขานมาลโย โสปเลปปติโต ชราฆโร สจฺจวาทิวจนํ อนญฺญถา"ติ อิมา คาถาโย อภาสิ. ตตฺถ กาฬกาติ กาฬกวณฺณา. ภมรวณฺณสาทิสาติ กาฬกา โหนฺตาปิ ภมรสทิสวณฺณา, สินิทฺธนีลาติ อตฺโถ. เวลฺลิตคฺคาติ กุญฺจิตคฺคา, มูลโต ปฏฺฐาย ยาว อคฺคา กุญฺจิตา เวลฺลิตาติ อตฺโถ. มุทฺธชาติ เกสา. ชรายาติ ชราเหตุ ชราย อุปหตโสภา. สาณวากสาทิสาติ สาณสทิสา วากสทิสา จ, สาณวากสทิสา เจว มกจิวากสทิสา จาติปิ อตฺโถ. สจฺจวาทิวจนํ อนญฺญถาติ สจฺจวาทิโน อวิตถวาทิโน สมฺมาสมฺพุทฺธสฺส "สพฺพํ รูปํ อนิจฺจํ ชราภิภูตนฺ"ติอาทิวจนํ อนญฺญถา ยถาภูตเมว, น ตตฺถ วิตถํ อตฺถีติ. วาสิโตว สุรภี กรณฺฑโกติ ปุปฺผคนฺธวาสจุณฺณาทีหิ วาสิโต วาสํ คาหาปิโต ปสาธนสมุคฺโค วิย สุคนฺธิ. ปุปฺผปูร มม อุตฺตมงฺคภูโตติ จมฺปกสุมนมลฺลิกาทิ- ปุปฺเผหิ ปูริโต ปุพฺเพ มม เกสกลาโป นิมฺมโลติ อตฺโถ. ตนฺติ อุตฺตมงฺคชํ. อถ

--------------------------------------------------------------------------------------------- หน้าที่ ๒๖๗.

ปจฺฉา เอตรหิ สโลมคนฺธิกํ ปากติกโลมคนฺธเมว ชาตํ. อถ วา สโลมคนฺธิกนฺติ เมณฺฑกโลเมหิ ๑- สมานคนฺธํ. "เอฬกโลมคนฺธิกนฺ"ติปิ ๒- วทนฺติ. กานนํว สหิตํ สุโรปิตนฺติ สุฏฺฐุ โรปิตํ สหิตํ ฆนสนฺนิเวสํ อุทฺธเมว อุฏฺฐิตํ อุชุกทีฆสาขํ อุปวนํ วิย. โกจฺฉสูวิจิตคฺคโสภิตนฺติ ปุพฺเพ โกจฺเฉน สุวณฺณสูจิยา จ เกสชฏาวิชฏเนน วิจิตคฺคํ หุตฺวา โสภิตํ, ฆนภาเวน วา โกจฺฉสทิสํ หุตฺวา ปณทนฺตสูจีหิ ๓- วิจิตคฺคตาย โสภิตํ. ตนฺติ อุตฺตมงฺคชํ. วิรลํ ตหึ ตหินฺติ ตตฺถ ตตฺถ วิรลํ วิลูนเกสํ. กณฺหขนฺธกํ สุวณฺณมณฺฑิตนฺติ สุวณฺณวชิราทีหิ วิภูสิตํ กณฺหเกสปุญฺชกํ. เย ปน "สณฺหกณฺฑกสุวณฺณมณฺฑิตนฺ"ติ วทนฺติ ๔-, เตสํ สณฺหาหิ สุวณฺณสูจีหิ ชฏาวิชฏเนน มณฺฑิตนฺติ อตฺโถ. โสภเต สุเวณีหิลงฺกตนฺติ สุนฺทเรหิ ราชรุกฺข- มาลาสทิเสหิ ๕- เกสเวณีหิ อลงฺกตํ หุตฺวา ปุพฺเพ วิราชเต. ตํ ชราย ขลิตํ สิรํ กตนฺติ ตํ ตถา โสภิตํ สิรํ อิทานิ ชราย ขลิตํ ขณฺฑิตาขณฺฑิตํ ๖- วิลูนเกสํ กตํ. จิตฺตการสุกตาว เลขิกาติ จิตฺตกาเรน สิปฺปินา นีลาย วณฺณธาตุยา สุฏฺฐุ กตา เลขา วิย. โสภเต สุ ภมุกา ปุเร มมาติ สุนฺทรา ภมุกา ปุพฺเพ มม โสภนํ คตา. วลีหิ ปลมฺพิตาติ นลาฏนฺเต อุปฺปนฺนาหิ วลีหิ ปลมฺพนฺตา ฐิตา. ภสฺสราติ ภาสุรา ๗-. สุรุจิราติ สุฏฺฐุ รุจิรา. ยถา มณีติ มณิมุทฺทิกา วิย. เนตฺตเหสุนฺติ สุเนตฺตา อเหสุํ. อภินีลมายตาติ อภินีลา หุตฺวา อายตา. เตติ เนตฺตา. ชรายภิหตาติ ชราย อภิหตา. สณฺหตุงฺคสทิสี จาติ สณฺหา ตุงฺคา เสสมุขาวยวานํ อนุรูปา จ. โสภเตติ วฏฺเฏตฺวา ฐปิตหริตาลวฏฺฏิ วิย มม นาสิกา โสภเต. สุ อภิโยพฺพนํ ปตีติ @เชิงอรรถ: สี. มตฺถกโลเมหิ ฉ.ม....โลมคนฺธนฺติปิ สี.,อิ. ผลทนฺตสูจีหิ @ ฉ.ม. ปฐนฺติ อิ. ราชรุกฺขผล... ม. ขลฺลาติกํ สี.,อิ. ปภสฺสรา

--------------------------------------------------------------------------------------------- หน้าที่ ๒๖๘.

สุนฺทเร อภินวโยพฺพนกาเล สา นาสิกา อิทานิ ชราย นิวาริตโสภตาย ปริเสทิตา ๑- วิย วรตฺตา วิย จ ชาตา. กงฺกณํว สุกตํ สุนิฏฺฐิตนฺติ สุปริกมฺมกตํ สุวณฺณกงฺกณํ วิย วฏฺฏุลภาวํ สนฺธาย วทติ. โสภเตติ โสภนฺเต. "โสภนฺเต"ติ วา ปาโฐ. สุอิติ นิปาตมตฺตํ. กณฺณปาฬิโยติ กณฺณคนฺธา ๒-. วลิภิปฺปลมฺพิตาติ ตหึ ตหึ อุปฺปนฺนวลีหิ วลิตา หุตฺวา วฏฺฏนิยา ๓- ปณามิตวตฺถขนฺธา ภสฺสนฺตา ๔- โอลมฺพนฺติ. ปตฺตลีมกุลวณฺณสาทิสาติ กทลิมกุลสทิสวณฺณสณฺฐานา. ขณฺฑิตาติ เภทนปตเนหิ ขณฺฑิตา ขณฺฑภาวํ คตา. อสิตาติ วณฺณเภเทน อสิตภาวํ คตา. กานนมฺหิ วนสณฺฑจารินี, โกกิลาว มธุรํ นิกูชิหนฺติ วนสณฺเฑ โคจรจรเณน ๕- วนสณฺฑจารินี กานเน อนุสงฺคีตนิวาสินี โกกิลา วิย มธุราลาปํ นิกูชิหํ. ตนฺติ ตํ นิกูชิตํ อาลาปํ. ขลิตํ ตหึ ตหินฺติ ขณฺฑทนฺตาทิภาเวน ตตฺถ ตตฺถ ปกฺขลิตํ ชาตํ. สณฺหกมฺพุริว สุปฺปมชฺชิตาติ สุฏฺฐุ ปมชฺชิตา สณฺหา สุวณฺณสงฺขา วิย. สา ชราย ภคฺคา วินามิตาติ มํสปริกฺขเยน วิภูตสราชาลตาย ๖- ภคฺคา หุตฺวา วินตา. วฏฺฏปลิฆสทิโสปมาติ วฏฺเฏน ปลิฆทณฺเฑน สมสมา. ตาติ ตา อุโภปิ พาหาโย. ยถา ปาฏลิพฺพลิตาติ ชชฺชรภาเวน ปลิตปาฏลิสาขาสทิสา. สณฺหมุทฺทิกสุวณฺณมณฺฑิตาติ สุวณฺณมยาหิ มฏฺฐภาสุราหิ ๗- มุทฺทิกาหิ วิภูสิตา. ยถา มูลมูลิกาติ มูลกกณฺฑสทิสา ๘-. @เชิงอรรถ: ม. ปฏิเสธิกา สี. กณฺณปตฺตา, ม. กณฺณพนฺธา สี. วทฺธนิยา @ สี. อาสตฺตา, ฉ.ม. ปณามิตวตฺถขนฺธา วิย ภสฺสนฺตา สี. โคจรํ จรตีติ @ ฉ.ม. วิภูตสิราชาลตาย สี. มฏฺฏภาสุราหิ สี. มูลกขณฺฑสทิสา

--------------------------------------------------------------------------------------------- หน้าที่ ๒๖๙.

ปีนวฏฺฏสหิตุคฺคตาติ ปีนา วฏฺฏา อญฺญมญฺญํ สหิตาว หุตฺวา อุคฺคตา อุทฺธมุขา. โสภเต สุ ถนกา ปุเร มมาติ มม อุโภปิ ถนา ยถาวุตฺตรูปา หุตฺวา สุวณฺณกลสิโย วิย โสภึสุ. ปุถุตฺเต หิ อิทํ เอกวจนํ, อตีตตฺเถ จ วตฺตมานวจนํ. เถวิกีว ลมฺพนฺติ โนทกาติ เต อุโภปิ เม ถนา อนุทกา ๑- คลิตชลา เวณุทณฺฑเก ฐปิตอุทกภสฺตา วิย ลมฺพนฺติ. กญฺจนสฺส ผลกํว สมฺมฏฺฐนฺติ ชาตหิงฺคุลเกน ๒- มกฺขิตฺวา จิรปริมชฺชิตํ โสวณฺณผลกํ วิย โสภเต. โส วลีหิ สุขุมาหิ โอตโตติ โส มม กาโย อิทานิ สุขุมาหิ วลีหิ ตหึ ตหึ วิตโต วลิตฺตจํ อาปนฺโน. นาคโภคสทิโสปมาติ หตฺถินาคสฺส หตฺเถน สมูปมา ๓-. หตฺโถ หิ อิธ ภุญฺชติ เอเตนาติ โภโคติ วุตฺโต. เตติ อูรุโย. ยถา เวฬุนาฬิโยติ อิทานิ เวฬุปพฺพสทิสา อเหสุํ. สณฺหนูปุรสุวณฺณมณฺฑิตาติ สินิทฺธมฏฺเฐหิ ๔- สุวณฺณนูปุเรหิ วิภูสิตา. ชงฺฆาติ อฏฺฐิชงฺฆาโย. ตาติ ตา ชงฺฆาโย. ติลทณฺฑการิวาติ อปฺปมํสโลหิตตฺตา กิสภาเวน ลูนาวสิฏฺฐวิสุกฺขติลทณฺฑกา วิย อเหสุํ. รกาโร ปทสนฺธิกโร. ตูลปุณฺณสทิโสปมาติ มุทุสินิทฺธภาเวน สิมฺพลิตูลปุณฺณปลิ ๕- คุณฺฐิตอุปาหน- สทิสา. เต มม ปาทา อิทานิ ผุฏิตา ผลิตา ภิชฺชิตา ๖- วลีมตา วลิมนฺโต ชาตา. เอทิโสติ เอวรูโป. อหุ อโหสิ ยถาวุตฺตปฺปกาโร. อยํ สมุสฺสโยติ อยํ มม กาโย. ชชฺชโรติ สิถิลาพนฺโธ. พหุทุขานมาลโยติ ชราทิเหตุกานํ พหูนํ ทุกฺขานํ อาลยภูโต. โสปเลปปติโตติ โส อยํ สมุสฺสโย อปเลปปติโต อภิสงฺขาราเลปปริกฺขเยน ปติโต ปาตาภิมุโขติ อตฺโถ. โสปิ อเลปปติโตติ วา ปทวิภาโค, โส เอว อตฺโถ. @เชิงอรรถ: ฉ.ม. โนทกา ฉ.ม. ชาติหิงฺคุลเกน ฉ.ม. สมสมา @ สี. สินิทฺธมฏฺเฏหิ สี....ตูลปุณฺณปฬิ... ฉ.ม. อยํ ปาโฐ น ทิสฺสติ

--------------------------------------------------------------------------------------------- หน้าที่ ๒๗๐.

ชราฆโรติ ชิณฺณฆรสทิโส. ชราย วา ฆรภูโต อโหสิ. ตสฺมา สจฺจวาทิโน ธมฺมานํ ยถาภูตํ สภาวํ สมฺมเทว ญตฺวา กถนโต อวิตถวาทิโน สมฺมาสมฺพุทฺธสฺส มม สตฺถุ วจนํ อนญฺญถา. เอวมยํ เถรี อตฺตโน อตฺตภาเว อนิจฺจตาย สลฺลกฺขณมุเขน สพฺเพสุปิ เตภูมกธมฺเมสุ อนิจฺจตํ อุปธาเรตฺวา ตทนุสาเรน ตตฺถ ทุกฺขลกฺขณํ อนตฺตลกฺขณญฺจ อาโรเปตฺวา วิปสฺสนํ อุสฺสุกฺกาเปนฺตี มคฺคปฏิปาฏิยา อรหตฺตํ ปาปุณิ. เตน วุตฺตํ อปทาเน ๑-:- "โย รํสิผุสิตาเวโฬ ผุสฺโส นาม มหามุนิ ตสฺสาหํ ภคินี อาสึ อชายึ ขตฺติเย กุเล. ตสฺส ธมฺมํ สุณิตฺวาหํ วิปฺปสนฺเนน เจตสา มหาทานํ ททิตฺวาน ปตฺถยึ รูปสมฺปทํ. เอกตึเส อิโต กปฺเป สิขี โลกคฺคนายโก อุปฺปนฺโน โลกปชฺโชโต ติโลกสรโณ ชิโน. ตทารุณปุเร รมฺเม พฺรหฺมญฺญกุลสมฺภวา วิมุตฺตจิตฺตํ กุปิตา ภิกฺขุนึ อภิสาปยึ. เวสิกาว อนาจารา ชินสาสนทูสิกา เอวํ อกฺโกสยิตฺวาน เตน ปาเปน กมฺมุนา. ทารุณํ นิรยํ คนฺตฺวา มหาทุกฺขสมปฺปิตา ตโต จุตา มนุสฺเสสุ อุปปนฺนา ตปสฺสินี. @เชิงอรรถ: ขุ.อป. ๓๓/๒๐๔/๔๓๑

--------------------------------------------------------------------------------------------- หน้าที่ ๒๗๑.

ทสชาติสหสฺสานิ คณิกตฺตํ อการยึ ตมฺหา ปาปา น มุจฺจิสฺสํ ภุตฺวา ทุฏฺฐวิสํ ยถา. พฺรหฺมเวสมเสวิสฺสํ ๑- กสฺสเป ชินสาสเน เตน กมฺมวิปาเกน อชายึ ติทเส ปุเร. ปจฺฉิเม ภเว สมฺปตฺเต อโหสึ โอปปาติกา อมฺพสาขนฺตเร ชาตา อมฺพปาลีติ เตนหํ. ปริวุตา ปาณโกฏีหิ ปพฺพชึ ชินสาสเน ปตฺตาหํ อจลํ ฐานํ ธีตา พุทฺธสฺส โอรสา. อิทฺธีสุ จ วสี โหมิ โสตธาตุวิสุทฺธิยา เจโตปริยญาณสฺส วสี โหมิ มหามุนิ. ปุพฺเพนิวาสํ ชานามิ ทิพฺพจกฺขุ วิโสธิตํ สพฺพาสวปริกฺขีณา นตฺถิ ทานิ ปุนพฺภโว. อตฺถธมฺมนิรุตฺตีสุ ปฏิภาเน ตเถว จ ญาณํ เม วิมลํ สุทฺธํ พุทฺธเสฏฺฐสฺส วาหสา. กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา. สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ. @เชิงอรรถ: ฉ.ม. พฺรหฺมจริยมเสวิสํ

--------------------------------------------------------------------------------------------- หน้าที่ ๒๗๒.

ปฏิสมฺภิทา จตสฺโส วิโมกฺขาปิ จ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺ"ติ. อรหตฺตํ ปน ปตฺวา อตฺตโน ปฏิปตฺตึ ปจฺจเวกฺขิตฺวา อุทานวเสน ตา เอว คาถา ปจฺจุทาหาสีติ. อมฺพปาลีเถรีคาถาวณฺณนา นิฏฺฐิตา. ------------------

             อรรถกถาภาษาบาลีอักษรไทย เล่มที่ ๓๔ หน้า ๒๖๒-๒๗๒. http://84000.org/tipitaka/atthapali/read_th.php?B=34&A=5613&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=34&A=5613&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=26&i=467              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=9609              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=9643              The Pali Tipitaka in Roman Character :- http://84000.org/tipitaka/read/roman_read.php?B=26&A=9643              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]