ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๔ ภาษาบาลีอักษรไทย เถรี.อ. (ปรมตฺถที.)

หน้าที่ ๓๑.

๒. ทุกนิปาต ๔๒๐. ๑. อภิรูปนนฺทาเถรีคาถาวณฺณนา ทุกนิปาเต อาตุรํ อสุจึ ปูตินฺติอาทิกา อภิรูปนนฺทาย สิกฺขมานาย คาถา. อยํ กิร วิปสฺสิสฺส ภควโต กาเล พนฺธุมตีนคเร คหปติมหาสาลสฺส ธีตา หุตฺวา สตฺถุ สนฺติเก ธมฺมํ สุตฺวา สรเณสุ จ สีเลสุ จ ปติฏฺฐิตา สตฺถริ ปรินิพฺพุเต ธาตุเจติยํ ๑- รตนปฏิมณฺฑิเตน สุวณฺณจฺฉตฺเตน ปูชํ กตฺวา กาลํ กตฺวา สคฺเค นิพฺพตฺติตฺวา อปราปรํ สุคตีสุเยว ๒- สํสรนฺตี อิมสฺมึ พุทฺธุปฺปาเท กปิลวตฺถุนคเร เขมกสฺส สกฺกสฺส อคฺคมเหสิยา กุจฺฉิสฺมึ นิพฺพตฺติ, นนฺทาติสฺสา นามํ อโหสิ. สา อตฺตภาวสฺส อติวิย รูปโสภคฺคปฺปตฺติยา อภิรูปา ทสฺสนียา ปาสาทิกา อภิรูปนนฺทา นามาเตฺวว ปญฺญายิตฺถ. ตสฺสา วยปฺปตฺตาย วาเรยฺยทิวเสเยว ๓- ปรมภูโต ๔- สกฺยกุมาโร กาลมกาสิ. อถ นํ มาตาปิตโร อกามํ ปพฺพาเชสุํ. สา ปพฺพชิตฺวาปิ รูปํ นิสฺสาย อุปฺปนฺนมทา "สตฺถา รูปํ วิวณฺเณติ ครหติ อเนกปริยาเยน รูเป อาทีนวํ ทสฺเสตี"ติ พุทฺธุปฏฺฐานํ น คจฺฉติ. ภควา ตสฺสา ญาณปริปากํ ญตฺวา มหาปชาปตึ อาณาเปสิ "สพฺพาปิ ภิกฺขุนิโย ปฏิปาฏิยา โอวาทํ คหิตุํ อาคจฺฉนฺตู"ติ. สา อตฺตโน วาเร สมฺปตฺเต อญฺญํ เปเสสิ. ภควา "วาเร สมฺปตฺเต อตฺตนาว อาคนฺตพฺพํ, น อญฺญา เปเสตพฺพา"ติ อาห. สา สตฺถุ อาณํ ลงฺฆิตุํ อสกฺโกนฺตี ภิกฺขุนีหิ สทฺธึ พุทฺธุปฏฺฐานํ อคมาสิ. ภควา อิทฺธิยา เอกํ อภิรูปํ อิตฺถิรูปํ มาเปตฺวา ปุน ชราชิณฺณํ ทสฺเสตฺวา สํเวคํ อุปฺปาเทตฺวา:- [๑๙] "อาตุรํ อสุจึ ปูตึ ปสฺส นนฺเท สมุสฺสยํ อสุภาย จิตฺตํ ภาเวหิ เอกคฺคํ สุสมาหิตํ. @เชิงอรรถ: สี. รตนเจติยํ ก. สุคติยํเยว อิ. ธเรยฺยทิวเสเยว ฉ.ม. วรภูโต

--------------------------------------------------------------------------------------------- หน้าที่ ๓๒.

[๒๐] อนิมิตฺตญฺจ ภาเวหิ มานานุสฺสยมุชฺชห ตโต มานาภิสมยา อุปสนฺตา จริสฺสสี"ติ อิมา เทฺว คาถา อภาสิ. ตาสํ อตฺโถ เหฏฺฐา วุตฺตนโย เอว. คาถาปริโยสาเน อภิรูปนนฺทา อรหตฺตํ ปาปุณิ. เตน วุตฺตํ อปทาเน ๑-:- "นคเร ๒- อรุณวติยา อรุโณ นาม ขตฺติโย ๒- ตสฺส รญฺโญ อหุํ ภริยา เอกชฺฌํ จารยามหํ. รโหคตา นิสีทิตฺวา เอวํ จินฺเตสหํ ตทา อาทาย คมนียํ หิ กุสลํ นตฺถิ เม กตํ. มหาภิตาปํ กฏุกํ โฆรรูปํ สุทารุณํ นิรยํ นูน คจฺฉามิ เอตฺถ เม นตฺถิ สํสโย. เอวาหํ จินฺตยิตฺวาน ปหํเสตฺวาน มานสํ ราชานํ อุปคนฺตฺวาน อิทํ วจนมพฺรวึ. อิตฺถี นาม มยํ เทว ปุริสานุคตา สทา เอกํ เม สมณํ เทหิ โภชยิสฺสามิ ขตฺติย. อทาสิ เม มหาราชา ๓- สมณํ ภาวิตินฺทฺริยํ ตสฺส ปตฺตํ คเหตฺวาน ปรมนฺเนน ปูรยึ. ปูรยิตฺวา ปรมนฺนํ สหสฺสคฺฆนเกนหํ วตฺถยุเคน ฉาเทตฺวา อทาสึ ตุฏฺฐมานสา. เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสมคจฺฉหํ. @เชิงอรรถ: นตฺถิทํ ปาฬิยํ, อฏฺฐุปฺปตฺติยา จ น สเมติ, อภิรูปนนฺทาเถรีอปทานมฺปน อตฺถิ, @อฏฺฐุปฺปตฺติยา จ สเมติ, ขุ.อป. ๓๓/๕๗/๔๑๓ ๒-๒ ฉ.ม. นคเร พนฺธุมติยา พนฺธุมา @นาม ขตฺติโย สี. ตทา ราชา

--------------------------------------------------------------------------------------------- หน้าที่ ๓๓.

สหสฺสํ เทวราชูนํ มเหสิตฺตมการยึ สหสฺสํ จกฺกวตฺตีนํ มเหสิตฺตมการยึ. ปเทสรชฺชํ วิปุลํ คณนาโต อสงฺขิยํ นานาวิธํ พหุํ ปุญฺญํ ตสฺส กมฺมผลา ๑- ตโต. อุปฺปลสฺเสว เม วณฺณา อภิรูปา สุทสฺสนา อิตฺถี สพฺพงฺคสมฺปนฺนา อภิชาตา ชุตินฺธรา. ปจฺฉิเม ภวสมฺปตฺเต อชายึ สากิเย กุเล นารีสหสฺสปาโมกฺขา สุทฺโธทนสุตสฺสหํ. นิพฺพินฺทิตฺวา อคาเรหํ ปพฺพชึ อนคาริยํ สตฺตมึ รตฺตึ สมฺปตฺวา จตุสจฺจํ อปาปุณึ. จีวรปิณฺฑปาตํ จ ปจฺจยํ จ เสนาสนํ ปริเมตุํ น สกฺโกมิ ปิณฺฑปาตสฺสิทํ ผลํ. ยํ มยฺหํ ปุริมํ กมฺมํ กุสลํ ชนิตํ มุนิ ตุยฺหตฺถาย มหาวีร ปริจิณฺณํ พหุํ มยา. เอกตึเส อิโต กปฺเป ยํ ทานมททึ ตทา ทุคฺคตึ นาภิชานามิ ปิณฺฑปาตสฺสิทํ ผลํ. ทุเว คตี ๒- ปชานามิ เทวตฺตํ อถ มานุสํ อญฺญํ คตึ น ชานามิ ปิณฺฑปาตสฺสิทํ ผลํ. อุจฺเจ กุเล ปชานามิ ตโย สาเล มหาธเน อญฺญํ กุลํ น ชานามิ ปิณฺฑปาตสฺสิทํ ผลํ. @เชิงอรรถ: ม. กมฺมผลํ ก. คตึ

--------------------------------------------------------------------------------------------- หน้าที่ ๓๔.

ภวาภเว สํสริตฺวา สุกฺกมูเลน โจทิตา อมนาปํ น ปสฺสามิ โสมนสฺสกตํ ผลํ. อิทฺธีสุ จ วสี โหมิ ทิพฺพาย โสตธาตุยา เจโตปริยญาณสฺส วสี โหมิ มหามุเน. ปุพฺเพนิวาสํ ชานามิ ทิพฺพจกฺขุ วิโสธิตํ สพฺพาสวปริกฺขีณา นตฺถิ ทานิ ปุนพฺภโว. อตฺถธมฺมนิรุตฺตีสุ ปฏิภาเน ตเถว จ ญาณํ มม มหาวีร อุปฺปนฺนํ ตว สนฺติเก. กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ. อรหตฺตํ ปตฺวา ปน สา สยมฺปิ อุทานวเสน ตาเยว คาถา อภาสิ, อิทเมว จสฺสา อญฺญาพฺยากรณํ อโหสีติ. อภิรูปนนฺทาเถรีคาถาวณฺณนา นิฏฺฐิตา. ---------------------

             อรรถกถาภาษาบาลีอักษรไทย เล่มที่ ๓๔ หน้า ๓๑-๓๔. http://84000.org/tipitaka/atthapali/read_th.php?B=34&A=658&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=34&A=658&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=26&i=420              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=8976              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=9044              The Pali Tipitaka in Roman Character :- http://84000.org/tipitaka/read/roman_read.php?B=26&A=9044              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]