อรรถกถาเล่มที่ ๓๕ ภาษาบาลีอักษรไทย
 ชา.อ.๑ เอกนิปาต(๑)

                      ๕ ขราทิยชาตกํ
     อฏฺฐขุรํ ขราทิเยติ อิทํ สตฺถา เชตวเน วิหรนฺโต อญฺญตรํ
ทุพฺพจภิกฺขุํ อารพฺภ กเถสิ ฯ
     โส กิร ภิกฺขุ ทุพฺพโจ โอวาทํ น คณฺหาติ ฯ อถ นํ
สตฺถา ปุจฺฉิ สจฺจํ กิร ตฺวํ ภิกฺขุ ทุพฺพโจ โอวาทํ น คณฺหสีติ ฯ
สจฺจํ ภควาติ ฯ สตฺถา ปุพฺเพปิ ตฺวํ ทุพฺพจตาย ปณฺฑิตานํ โอวาทํ
อคเหตฺวา ปาเสน พนฺโธ ชีวิตกฺขยํ ปตฺโตติ วตฺวา อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
มิโค หุตฺวา มิคคณปริวุโต อรญฺเญ วสติ ฯ อถสฺส ภคินี มิคี
ปุตฺตกํ ทสฺเสตฺวา ภาติก อยนฺเต ภาคิเนยฺโย เอกํ มิคมายํ
อุคฺคณฺหาเปหีติ ปฏิจฺฉาเปสิ ฯ โส ตํ ภาคิเนยฺยํ อสุกเวลาย
นาม อาคนฺตฺวา อุคฺคณฺหาหีติ อาห ฯ โส วุตฺตเวลาย น คจฺฉติ ฯ
ยถาเปกทิวสํ เอวํ สตฺตทิวเส อติกฺกนฺเต โส มิคมายํ อนุคฺคณฺหิตฺวา
วิจรนฺโต ปาเส พชฺฌิ ฯ มาตาปิสฺส ภาตรํ อุปสงฺกมิตฺวา กินฺเต
ภาติก ภาคิเนยฺโย มิคมายํ อุคฺคณฺหาปิโตติ ปุจฺฉิ ฯ โพธิสตฺโต
จ ตสฺส อโนวาทกสฺส มา จินฺตยิ น เต ปุตฺเตน มิคมายา
อุคฺคณฺหิตาติ วตฺวา อิทานิ ตํ อโนวทิตุกาโมว หุตฺวา อิทํ คาถมาห
          อฏฺฐขุรํ ขราทิเย       มิคํ วงฺกาติวงฺกินํ
          สตฺตกาเลหติกฺกนฺตํ      น นํ โอวทิตุสฺสเหติ ฯ
     ตตฺถ อฏฺฐขุรนฺติ เอเกกสฺมึ ปาเท ทฺวินฺนํ ทฺวินฺนํ ขุรานํ
วเสน อฏฺฐขุรํ ฯ ขราทิเยติ ตํ นาเมน อาลปติ ฯ มิคนฺติ
สพฺพสงฺคาหิกวจนํ ฯ วงฺกาติวงฺกินนฺติ มูเล วงฺกานิ อคฺเค อติวงฺกานีติ
วงฺกาติวงฺกานิ ฯ ตาทิสานิ สิงฺคานิ อสฺส อตฺถีติ วงฺกาติวงฺกํ ฯ
ตํ วงฺกาติวงฺกินํ ฯ สตฺตกาเลหติกฺกนฺตนฺติ สตฺตหิ โอวาทกาเลหิ
โอวาทํ อติกฺกนฺตํ ฯ น นํ โอวทิตุสฺสเหติ เอตํ ทุพฺพจมิคํ อหํ
โอวทิตุํ น อุสฺสหามิ เอตสฺส เม โอวาทตฺถาย จิตฺตมฺปิ น
อุปฺปชฺชตีติ ทสฺเสติ ฯ
     อถ นํ ทุพฺพจมิคํ ปาเสน พนฺธํ ลุทฺโท มาเรตฺวา มํสํ อาทาย
ปกฺกามิ ฯ
     สตฺถาปิ น ตฺวํ ภิกฺขุ อิทาเนว ทุพฺพโจ ปุพฺเพปิ ทุพฺพโจเยวาติ
อิทํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ
ตทา ภาคิเนยฺยมิโค ทุพฺพจภิกฺขุ อโหสิ ภคินี อุปฺปลวณฺณา โอวาทกมิโค
ปน อหเมว อโหสีติ ฯ
                   ขราทิยชาตกํ ปญฺจมํ ฯ
                     ------------

             อรรถกถาภาษาบาลีอักษรไทย เล่มที่ ๓๕ หน้า ๒๔๑-๒๔๓.
http://84000.org/tipitaka/atthapali/read_th.php?B=35&A=5014&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=35&A=5014&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=15
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=98
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=98
             The Pali Tipitaka in Roman Character :-
http://84000.org/tipitaka/read/roman_read.php?B=27&A=98
             สารบัญพระไตรปิฎกเล่มที่ ๒๗
http://84000.org/tipitaka/read/?index_27