อรรถกถาเล่มที่ ๓๕ ภาษาบาลีอักษรไทย
 ชา.อ.๑ เอกนิปาต(๑)

                      ๔ อาชญฺญชาตกํ
     ยทา ยทาติ อิทํ สตฺถา เชตวเน วิหรนฺโต โอสฺสฏฺฐวิริยเมว
ภิกฺขุํ อารพฺภ กเถสิ ฯ
     ตํ ปน ภิกฺขุํ สตฺถา อามนฺเตตฺวา ภิกฺขุ ปุพฺเพ ปณฺฑิตา
อนายตเนปิ ลทฺธปฺปหาราปิ หุตฺวา วิริยํ อกํสูติ วตฺวา อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต ปุริมนเยเนว สตฺต
ราชาโน นครํ ปริวารยึสุ ฯ อเถโก รถิกโยโธ เทฺว ภาติกสินฺธเว
รเถ โยเชตฺวา นครา นิกฺขมฺม ฉ พลโกฏฺฐเก ภินฺทิตฺวา ฉ
ราชาโน อคฺคเหสิ ฯ ตสฺมึ ขเณ เชฏฺฐกอสฺโส ปหารํ ลภิ ฯ
สารถิโก รถํ เปเสนฺโต ราชทฺวารํ อาคนฺตฺวา เชฏฺฐกภาติกํ รถา
โมเจตฺวา สนฺนาหํ สิถิลํ กตฺวา เอเกน ปสฺเสน นิปชฺชาเปตฺวา
อญฺญํ อสฺสํ สนฺนยฺหิตุํ อารทฺโธ ฯ โพธิสตฺโต ตํ ทิสฺวา ปุริมนเยเนว
จินฺเตตฺวา สารถิกํ ปกฺโกสาเปตฺวา นิปนฺนโกว อิมํ คาถมาห
         ยทา ยทา ยตฺถ ยทา      ยตฺถ ยตฺถ ยทา ยทา
         อาชญฺโญ กุรุเต เวคํ      หายนฺติ ตตฺถ วาฬวาติ ฯ
      ตตฺถ ยทา ยทาติ ปุพฺพณฺหาทีสุ ยสฺมึ ยสฺมึ กาเล ฯ ยตฺถาติ
ยสฺมึ ฐาเน มคฺเค วา สงฺคามสีเส วา ฯ ยทาติ ยสฺมึ ขเณ ฯ
ยตฺถ ยตฺถาติ สตฺตนฺนํ พลโกฏฺฐกานํ วเสน พหูสุ ยุทฺธมณฺฑเลสุ ฯ
ยทา ยทาติ ยสฺมึ ยสฺมึ กาเล ปหารํ ลทฺธกาเล วา อลทฺธกาเล วา ฯ
อาชญฺโญ กุรุเต เวคนฺติ สารถิสฺส จิตฺตรุจิตํ การณํ อาชานนสภาโว
อาชญฺโญ วรสินฺธโว เวคํ กโรติ วายมติ วิริยํ อารภติ ฯ หายนฺติ
ตตฺถ วาฬวาติ ตสฺมึ เวเค กริยมาเน อิตเร วฬวสงฺขาตา ขฬุงฺกสฺสา
หายนฺติ ปริหายนฺติ ตสฺมา อิมสฺมึ รเถ มญฺเญว โยเชหีติ อาห ฯ
     สารถิ โพธิสตฺตํ อุฏฺฐาเปตฺวา โยเชตฺวา สตฺตมํ พลโกฏฺฐกํ
ภินฺทิตฺวา สตฺตมํ ราชานํ อาทาย รถํ ปาเชนฺโต ราชทฺวารํ อาคนฺตฺวา
สินฺธวํ โมเจสิ ฯ โพธิสตฺโต เอเกน ปสฺเสน นิปนฺโน ปุริมนเยเนว
รญฺโญ โอวาทํ ทตฺวา นิรุชฺฌิ ฯ ราชา ตสฺส สรีรกิจฺจํ กาเรตฺวา
รถิกสฺส สมฺมานํ กตฺวา ธมฺเมน สเมน รชฺชํ กาเรตฺวา ยถากมฺมงฺคโต ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสสิ ฯ
สจฺจปริโยสาเน โส ภิกฺขุ อรหตฺเต ปติฏฺฐาสิ ฯ สตฺถา ชาตกํ
สโมธาเนสิ ตทา ราชา อานนฺทตฺเถโร อโหสิ สารถิ สารีปุตฺโต
อสฺโส ปน อหเมว สมฺมาสมฺพุทฺโธติ ฯ
                   อาชญฺญชาตกํ จตุตฺถํ ฯ
                      ----------

             อรรถกถาภาษาบาลีอักษรไทย เล่มที่ ๓๕ หน้า ๒๗๒-๒๗๓.
http://84000.org/tipitaka/atthapali/read_th.php?B=35&A=5623&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=35&A=5623&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=24
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=162
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=159
             The Pali Tipitaka in Roman Character :-
http://84000.org/tipitaka/read/roman_read.php?B=27&A=159
             สารบัญพระไตรปิฎกเล่มที่ ๒๗
http://84000.org/tipitaka/read/?index_27