อรรถกถาเล่มที่ ๓๖ ภาษาบาลีอักษรไทย
 ชา.อ.๒ เอกนิปาต(๒)

                     ๔. ทุราชานชาตกํ
     มา สุ นนฺทิ อิจฺฉติ มนฺติ อิทํ สตฺถา เชตวเน วิหรนฺโต
เอกํ อุปาสกํ อารพฺภ กเถสิ ฯ
     เอโก กิร สาวตฺถีวาสี อุปาสโก ตีสุ สรเณสุ ปญฺจสุ
สีเลสุ ปติฏฺฐิโต พุทฺธมามโก ธมฺมมามโก สงฺฆมามโก ฯ ภริยา
ปนสฺส ทุสฺสีลา ปาปธมฺมา ยํ ทิวสํ มิจฺฉาจารํ จรติ ตํ ทิวสํ
สตกีตทาสี วิย โหติ มิจฺฉาจารสฺส ปน อกตทิวเส สามินี วิย
โหติ จณฺฑา ผรุสา ฯ โส ตสฺสา ภาวํ ชานิตุํ น สกฺโกติ ฯ
อถ ตาย อุพฺพาฬฺโห พุทฺธุปฏฺฐานํ น คจฺฉติ ฯ อถ นํ เอกทิวสํ
คนฺธปุปฺผาทีนิ อาทาย อาคนฺตฺวา วนฺทิตฺวา นิสินฺนํ สตฺถา อาห
กินฺนุ โข ตฺวํ อุปาสก สตฺตฏฺฐทิวเส พุทฺธุปฏฺฐานํ นาคจฺฉสีติ ฯ
ฆรณี เม ภนฺเต เอกสฺมึ ทิวเส สตกีตทาสี วิย เอกสฺมึ สามินี
วิย จณฺฑา ผรุสา อหํ ตสฺสา ภาวํ ชานิตุํ น สกฺโกมิ สฺวาหํ
ตาย อุพฺพาฬฺโห พุทฺธุปฏฺฐานํ นาคจฺฉามีติ ฯ อถสฺส วจนํ สุตฺวา
สตฺถา อุปาสก มาตุคามสฺส ภาโว นาม ทุชฺชาโน ปุพฺเพปิ
เต ปณฺฑิตา กถยึสุ ตฺวํ ปน ตํ ภวสงฺเขปคตตฺตา สลฺลกฺเขตุํ
น สกฺโกสีติ วตฺวา เตน ยาจิโต อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
ทิสาปาโมกฺโข อาจริโย หุตฺวา ปญฺจมาณวกสตานิ สิปฺปํ สิกฺขาเปสิ ฯ
อเถโก ติโรรฏฺฐวาสิโก พฺราหฺมณมาณโว อาคนฺตฺวา ตสฺส สนฺติเก
สิปฺปํ อุคฺคณฺหนฺโต เอกาย อิตฺถิยา ปฏิพทฺธจิตฺโต หุตฺวา ตํ
ภริยํ กตฺวา ตสฺมึเยว พาราณสีนคเร วสนฺโต เทฺว ติสฺโส เวลา
อาจริยสฺส อุปฏฺฐานํ น คจฺฉติ ฯ สา ปนสฺส ภริยา ทุสฺสีลา
ปาปธมฺมา มิจฺฉาจารํ จิณฺณทิวเส ทาสี วิย โหติ อจิณฺณทิวเส
สามินี วิย จณฺฑา ผรุสา โหติ ฯ โส ตสฺสา ภาวํ ชานิตุํ
อสกฺโกนฺโต ตาย อุพฺพาฬฺโห อากุลจิตฺโต อาจริยสฺส อุปฏฺฐานํ
น คจฺฉติ ฯ อถ นํ สตฺตฏฺฐทิวเส อติกฺกมิตฺวา อาคตํ กึ
มาณว น ปญฺญายสีติ อาจริโย ปุจฺฉิ ฯ โส ภริยา มํ
อาจริย เอกทิวสํ อิจฺฉติ ปฏฺเฐติ ทาสี วิย นิหตมานา โหติ
เอกทิวสํ สามินี วิย ถทฺธา ผรุสา อหํ ตสฺสา ภาวํ ชานิตุํ
น สกฺโกมิ ตาย อุพฺพาฬฺโห อากุลจิตฺโต ตุมฺหากํ อุปฏฺฐานํ
นาคโตมฺหีติ ฯ อาจริโย เอวเมตํ มาณว อิตฺถี นาม ทุสฺสีลา
อนาจารํ จิณฺณทิวเส สามิกํ อนุวตฺตติ ทาสี วิย นิหตมานา โหติ
อจิณฺณทิวเส ปน มานตฺถทฺธา หุตฺวา สามิกํ น คเณติ เอวํ
อิตฺถิโย นาเมตา อนาจารา ทุสฺสีลา ตาสํ ภาโว นาม ทุชฺชาโน
ตาสุ อิจฺฉนฺตีสุปิ อนิจฺฉนฺตีสุปิ มชฺฌตฺเตเนว ภวิตพฺพนฺติ วตฺวา
ตสฺโสวาทวเสน อิมํ คาถมาห
         มา สุ นนฺทิ อิจฺฉติ มํ    มา สุ โสจิ น อิจฺฉติ
         ถีนํ ภาโว ทุราชาโน    มจฺฉสฺเสโวทเก คตนฺติ ฯ
     ตตฺถ มา สุ นนฺทิ อิจฺฉติ มนฺติ สุกาโร นิปาตมตฺตํ
อยํ อิตฺถี มํ อิจฺฉติ ปฏฺเฐติ มยิ สิเนหํ กโรตีติ มา ตุสฺสิ ฯ
มา สุ โสจิ น อิจฺฉตีติ อยํ มํ น อิจฺฉตีติปิ มา โสจิ ฯ
ตสฺสา อิจฺฉมานาย นนฺทึ อนิจฺฉมานาย โสกํ อกตฺวา มชฺฌตฺโตว
โหตีติ ทีเปติ ฯ ถีนํ ภาโว ทุราชาโนติ อิตฺถีนํ ภาโว นาม
อิตฺถีมายาย ปฏิจฺฉนฺนตฺตา ทุราชาโน ฯ ยถา กึ ฯ มจฺฉสฺเสโวทเก
คตนฺติ ยถา มจฺฉสฺส คมนํ อุทเกน ปฏิจฺฉนฺนตฺตา ทุชฺชานํ
เตเนว โส เกวฏฺเฏ อาคเต อุทเกน คมนํ ปฏิจฺฉาเทตฺวา ปลายติ
อตฺตานํ คณฺหิตุํ น เทติ เอวเมว อิตฺถิโย มหนฺตมฺปิ ทุสฺสีลกมฺมํ
กตฺวา มยํ เอวรูปํ น กโรมาติ อตฺตนา กตกมฺมํ อิตฺถีมายาย
ปฏิจฺฉาเทตฺวา สามิเก วญฺเจนฺติ เอวํ อิตฺถิโย นาเมตา ปาปธมฺมา
ทุราจารา ตาสุ มชฺฌตฺโตเยว สุขิโต โหตีติ ฯ
     เอวํ โพธิสตฺโต อนฺเตวาสิกสฺส โอวาทํ อทาสิ ฯ ตโต ปฏฺฐาย
โส ตสฺสา อุปริ มชฺฌตฺโต อโหสิ ฯ สาปิสฺส ภริยา อาจริเยน
กิร เม ทุสฺสีลภาโว ญาโตติ ตโต ปฏฺฐาย น อนาจารํ จรติ ฯ
     ตสฺสาปิ อุปาสกสฺส อิตฺถี สมฺมาสมฺพุทฺเธน กิร มยฺหํ
ทุราจารภาโว ญาโตติ ตโต ปฏฺฐาย ปาปกมฺมํ นาม น อกาสิ ฯ
     สตฺถาปิ อิมํ ธมฺมเทสนํ อาหริตฺวา สจฺจานิ ปกาเสสิ ฯ
สจฺจปริโยสาเน อุปาสโก โสตาปตฺติผเล ปติฏฺฐหิ ฯ สตฺถา อนุสนฺธึ
ฆเฏตฺวา ชาตกํ สโมธาเนสิ ตทา ชายปติกาเยว ชายปติกา
อาจริโย ปน อหเมว อโหสีติ ฯ
                   ทุราชานชาตกํ จตุตฺถํ ฯ
                      ----------

             อรรถกถาภาษาบาลีอักษรไทย เล่มที่ ๓๖ หน้า ๙๕-๙๗.
http://84000.org/tipitaka/atthapali/read_th.php?B=36&A=1883&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=36&A=1883&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=64
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=423
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=415
             The Pali Tipitaka in Roman Character :-
http://84000.org/tipitaka/read/roman_read.php?B=27&A=415
             สารบัญพระไตรปิฎกเล่มที่ ๒๗
http://84000.org/tipitaka/read/?index_27