อรรถกถาเล่มที่ ๓๖ ภาษาบาลีอักษรไทย
 ชา.อ.๒ เอกนิปาต(๒)

                      ๕. โรหิณีชาตกํ
     เสยฺโย อมิตฺโตติ อิทํ สตฺถา เชตวเน วิหรนฺโต เอกํ
อนาถปิณฺฑิกเสฏฺฐิโน ทาสึ อารพฺภ กเถสิ ฯ
     อนาถปิณฺฑิกสฺส กิร เอกา โรหิณี นาม ทาสี อโหสิ ฯ
ตสฺสา วีหิปฺปหรณฏฺฐาเน อาคนฺตฺวา มหลฺลิกา มาตา นิปชฺชิ ฯ ตํ
มกฺขิกา สมฺปริวาเรตฺวา สูจิยา วิชฺฌิยมานา วิย ขาทนฺติ ฯ สา
ธีตรํ อาห อมฺม มกฺขิกา มํ ขาทนฺติ เอตา วาเรหีติ ฯ สา
วาเรสฺสามิ อมฺมาติ มุสลํ อุกฺขิปิตฺวา มาตุ สรีเร มกฺขิกา
มาเรตฺวา วินาสํ ปาเปสฺสามีติ มาตรํ มุสเลน ปหริตฺวา ชีวิตกฺขยํ
ปาเปสิ ฯ ตํ ทิสฺวา มาตา เม มตาติ โรทิตุํ อารภิ ฯ ตํ
ปวุตฺตึ เสฏฺฐิสฺส อาโรเจสุํ ฯ เสฏฺฐี ตสฺสา สรีรกิจฺจํ กาเรตฺวา
วิหารํ คนฺตฺวา สพฺพํ ปวุตฺตึ สตฺถุ อาโรเจสิ ฯ สตฺถา น โข
คหปติ เอสา มาตุ สรีเร มกฺขิกา มาเรสฺสามีติ อิทาเนว มุสเลน
ปหริตฺวา มาตรํ มาเรสิ ปุพฺเพปิ มาเรสิเยวาติ วตฺวา เตน ยาจิโต
อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
เสฏฺฐิกุเล นิพฺพตฺติตฺวา ปิตุ อจฺจเยน เสฏฺฐิฏฺฐานํ สมฺปาปุณิ ฯ
ตสฺสาปิ เอกา โรหิณีเยว นาม ทาสี อโหสิ ฯ สาปิ อตฺตโน
วีหิปฺปหรณฏฺฐานํ อาคนฺตฺวา นิปนฺนํ มาตรํ มกฺขิกา เม อมฺม
วาเรหีติ วุตฺตา เอวเมว มุสเลน ปหริตฺวา มาตรํ ชีวิตกฺขยํ
ปาเปตฺวา โรทิตุํ อารภิ ฯ โพธิสตฺโต ตํ ปวุตฺตึ สุตฺวา อมิตฺโตปิ
หิ อิมสฺมึ โลเก ปณฺฑิโตว เสยฺโยติ จินฺเตตฺวา อิมํ คาถมาห
     เสยฺโย อมิตฺโต เมธาวี       ยญฺเจ พาลานุกมฺปโก
     ปสฺส โรหิณิกํ ชมฺมึ           มาตรํ หนฺตฺวาน โสจตีติ ฯ
     ตตฺถ เมธาวีติ ปณฺฑิโต ญาณี วิภาวี ฯ ยญฺเจ
พาลานุกมฺปโกติ เอตฺถ ยนฺติ ลิงฺควิปลฺลาโส กโต ฯ เจติ นามตฺเถ
นิปาโต ฯ โย นาม พาโล อนุกมฺปโก ตโต สตคุเณน
สหสฺสคุเณน ปณฺฑิโต อมิตฺโต โหนฺโตปิ เสยฺโยเยวาติ อตฺโถ ฯ อถวา ฯ
ยนฺติ ปฏิเสธตฺเถ นิปาโต  ฯ โน เจ  พาลานุกมฺปโกติ อตฺโถ ฯ
ชมฺมินฺติ ลามิกํ ทนฺธํ ฯ มาตรํ หนฺตฺวาน โสจตีติ มกฺขิกํ
มาเรสฺสามีติ มาตรํ หนฺตฺวา อิทานิ อยํ พาลา สยเมว โรทติ
ปริเทวติ ฯ อิมินา การเณน อิมสฺมึ โลเก อมิตฺโตปิ ปณฺฑิโตว
เสยฺโย โหตีติ ฯ โพธิสตฺโต ปณฺฑิตํ ปสํสนฺโต อิมาย คาถาย
ธมฺมํ เทเสสิ ฯ
     สตฺถา น โข คหปติ เอสา อิทาเนว มกฺขิกา มาเรสฺสามีติ
มาตรํ ฆาเตสิ ปุพฺเพปิ ฆาเตสิเยวาติ อิมํ ธมฺมเทสนํ อาหริตฺวา
อนุสนฺธึ ฆเฏตฺวา ชาตกํ สโมธาเนสิ ตทา มาตาเยว มาตา
อโหสิ ธีตาเยว จ ธีตา มหาเสฏฺฐี ปน อหเมว อโหสีติ ฯ
                    โรหิณีชาตกํ ปญฺจมํ ฯ
                   ----------------

             อรรถกถาภาษาบาลีอักษรไทย เล่มที่ ๓๖ หน้า ๒๑-๒๒.
http://84000.org/tipitaka/atthapali/read_th.php?B=36&A=412&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=36&A=412&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=45
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=300
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=298
             The Pali Tipitaka in Roman Character :-
http://84000.org/tipitaka/read/roman_read.php?B=27&A=298
             สารบัญพระไตรปิฎกเล่มที่ ๒๗
http://84000.org/tipitaka/read/?index_27