อรรถกถาเล่มที่ ๓๗ ภาษาบาลีอักษรไทย
 ชา.อ.๓ ทุกนิปาตวณฺณนา

                      ๑๐ ทุทฺททชาตกํ
     ทุทฺททํ ททมานานนฺติ อิทํ สตฺถา เชตวเน วิหรนฺโต คณทานํ
อารพฺภ กเถสิ ฯ
     สาวตฺถิยํ กิร เทฺว สหายกา กุฏุมฺพิกปุตฺตา ฉนฺทกํ สํหริตฺวา
สพฺพปริกฺขารทานํ สชฺเชตฺวา พุทฺธปฺปมุขํ ภิกฺขุสงฺฆํ นิมนฺเตตฺวา
สตฺตาหํ มหาทานํ ปวตฺเตตฺวา สตฺตเม ทิวเส สพฺพปริกฺขารํ อทํสุ ฯ
เตสุ คณเชฏฺฐโก สตฺถารํ วนฺทิตฺวา เอกมนฺเต นิสีทิตฺวา ภนฺเต
อิมสฺมึ ทาเน พหุทายกาปิ อตฺถิ อปฺปทายกาปิ, เตสมฺปิ สพฺเพสํ
อิทํ ทานํ มหปฺผลํ โหตูติ ทานํ นิยฺยาเทติ ฯ สตฺถา ตุมฺเหหิ โข
อุปาสกา พุทฺธปฺปมุขสฺส ภิกฺขุสงฺฆสฺส ทานํ ทตฺวา เอวํ นิยฺยาเทนฺเตหิ
มหากมฺมํ กตํ, โปราณกปณฺฑิตาปิ ทานํ ทตฺวา เอวเมว
นิยฺยาเทสุนฺติ วตฺวา เตน ยาจิโต อตีตํ อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
กาสิกรฏฺเฐ พฺราหฺมณกุเล นิพฺพตฺติตฺวา วยปฺปตฺโต ตกฺกสิลายํ
สพฺพสิปฺปานิ อุคฺคณฺหิตฺวา ฆราวาสํ ปหาย อิสิปพฺพชฺชํ ปพฺพชิตฺวา
คณสตฺถา หุตฺวา หิมวนฺตปฺปเทเส จิรํ วสิตฺวา โลณมฺพิลเสวนตฺถาย
ชนปทจาริกญฺจรมาโน พาราณสิยํ คนฺตฺวา ราชุยฺยาเน วสิตฺวา
ปุนทิวเส ทฺวารคาเม สปริโส ปิณฺฑาย จริ ฯ มนุสฺสา ภิกฺขํ อทํสุ ฯ
ปุนทิวเส พาราณสิยํ จริ ฯ มนุสฺสา สมฺปิยายมานา ภิกฺขํ ทตฺวา
คณพนฺเธน ฉนฺทกํ สํหริตฺวา ทานํ สชฺเชตฺวา อิสิคณสฺส มหาทานํ
ปวตฺตยึสุ ฯ ทานปริโยสาเน คณเชฏฺฐโก เอวเมว วตฺวา อิมินา
นิยาเมน ทานํ นิยฺยาเทสิ ฯ โพธิสตฺโต อาวุโส จิตฺตปฺปสาเท สติ,
อปฺปกํ นาม ทานํ นตฺถีติ วตฺวา อนุโมทนํ กโรนฺโต อิมา คาถา
อโวจ
            ทุทฺททํ ททมานานํ      ทุกฺกรํ กมฺมกุพฺพตํ
            อสนฺโต นานุกุพฺพนฺติ,   สตํ ธมฺโม ทุรนฺนโย,
            ตสฺมา สตญฺจ อสตญฺจ   นานา โหติ อิโต คติ,
            อสนฺโต นิรยํ ยนฺติ,    สนฺโต สคฺคปรายนาติ ฯ
     ตตฺถ ทุทฺททนฺติ ทานํ นาม โลภาทิโทสวสิเกหิ อปณฺฑิเตหิ
ทาตุํ น สกฺกา, ตสฺมา ทุทฺททนฺติ วุจฺจติ, ตํ ททมานานํ ฯ กุพฺพตนฺติ
ตเทว ทานกมฺมํ สพฺเพหิ กาตุํ น สกฺกา ฯ ทุกฺกรนฺติ ตํ กุรุมานานํ ฯ
อสนฺโตติ อปณฺฑิตา พาลา ฯ นานุกุพฺพนฺตีติ ตํ กมฺมํ นานุกโรนฺติ ฯ
สตํ ธมฺโมติ ปณฺฑิตานํ สภาโว ฯ ทานํ สนฺธาเยตํ วุตฺตํ ฯ ทุรนฺนโยติ
ผลสมฺพนฺธวเสน ทุชฺชาโน เอวรูปสฺส ทานสฺส เอวรูโป ผลวิปาโก
โหตีติ ทุรนฺนโย ทุรานุโพโธ ฯ อปิ จ ทุรนฺนโยติ ทุราธิคโม ฯ
อปณฺฑิเตหิ ทานํ อทตฺวา ทานผลํ นาม ลทฺธุํ น สกฺกาติปิ อตฺโถ ฯ
นานา โหติ อิโต คตีติ อิโต จวิตฺวา ปรโลกํ คจฺฉนฺตานํ ตํ
ปฏิสนฺธิคหณํ นานา โหตีติ ฯ อสนฺโต นิรยํ ยนฺตีติ อปณฺฑิตา ทุสฺสีลา
ทานํ อทตฺวา สีลํ อรกฺขิตฺวา นิรยํ คจฺฉนฺติ ฯ สนฺโต สคฺคปรายนาติ
ปณฺฑิตา ปน ทานํ ทตฺวา สีลํ รกฺขิตฺวา อุโปสถกมฺมํ กตฺวา
ตีณิ สุจริตานิ ปูเรตฺวา สคฺคปรายนา โหนฺติ มหนฺตํ สุขสมฺปตฺตึ
อนุภวนฺตีติ ฯ
     เอวํ โพธิสตฺโต อนุโมทนํ กตฺวา จตฺตาโร วสฺสิเก มาเส
ตตฺเถว วสิตฺวา วสฺสาติกฺกเม หิมวนฺตํ คนฺตฺวา ฌานํ นิพฺพตฺเตตฺวา
อปริหีนชฺฌาโน พฺรหฺมโลกูปโค อโหสิ ฯ
     สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา
อิสิคณา พุทฺธปริสา อเหสุํ, คณสตฺถา ปน อหเมวาติ ฯ
                    ทุทฺททชาตกํ ทสมํ ฯ
                  กลฺยาณธมฺมวคฺโค ตติโย ฯ
                    --------------
@เชิงอรรถ:
@*** หน้านี้ไม่มีข้อมูล ***

             อรรถกถาภาษาบาลีอักษรไทย เล่มที่ ๓๗ หน้า ๑๑๑-๑๑๔.
http://84000.org/tipitaka/atthapali/read_th.php?B=37&A=2217&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=37&A=2217&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=209
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=1293
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=1278
             The Pali Tipitaka in Roman Character :-
http://84000.org/tipitaka/read/roman_read.php?B=27&A=1278
             สารบัญพระไตรปิฎกเล่มที่ ๒๗
http://84000.org/tipitaka/read/?index_27