ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๗ ภาษาบาลีอักษรไทย ชา.อ.๓ ทุกนิปาตวณฺณนา

                    ๑๐ มหาปิงฺคลชาตกํ
     สพฺโพ ชโนติ อิทํ สตฺถา เชตวเน วิหรนฺโต เทวทตฺตํ
อารพฺภ กเถสิ ฯ
     เทวทตฺเต สตฺถริ อาฆาฏํ พนฺธิตฺวา นวมาสจฺจเยน เชตวเน
ทฺวารโกฏฺฐเก ปฐวิยํ นิมฺมุคฺเค สาวตฺถิวาสิโน จ สกลรฏฺฐวาสิโน
จ พุทฺธปฏิกณฺฏโก ๑- เทวทตฺโต ปฐวิยา คิลิโต, นิหตปจฺจามิตฺโต
@เชิงอรรถ:  ปฏิกณฺฑโกติปิ ฯเปฯ
อิทานิ สมฺมาสมฺพุทฺโธ ชาโตติ ตุฏฺฐหฏฺฐา อเหสุํ ฯ เตสํ สุตฺวา
ปรมฺปราโฆเสน สกลชมฺพุทีปวาสิโน ยกฺขภูตเทวคณา จ ตุฏฺฐหฏฺฐา
เอวเมว อาหํสุ ฯ อเถกทิวสํ ภิกฺขู ธมฺมสภายํ กถํ สมุฏฺฐาเปสุํ
อาวุโส เทวทตฺเต ปฐวิยํ นิมฺมุคฺเค พุทฺธปฏิกณฺฏโก เทวทตฺโต
ปฐวิยา คิลิโตติ มหาชโน อตฺตมโน ชาโตติ ฯ สตฺถา อาคนฺตฺวา
กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย
นามาติ วุตฺเต น ภิกฺขเว อิทาเนว เทวทตฺเต มเต มหาชโน ตุสฺสติ
เจว หสติ จ, ปุพฺเพปิ ตุสฺสติ เจว หสติ จาติ วตฺวา อตีตํ อาหริ ฯ
     อตีเต พาราณสิยํ มหาปิงฺคโล นาม ราชา อธมฺเมน วิสเมน
รชฺชํ กาเรสิ, ฉนฺทาทิวเสน ปาปกมฺมานิ กโรนฺโต ทณฺฑพลิชงฺฆ-
กหาปณาทิคหเณน อุจฺฉุยนฺเต อุจฺฉุํ วิย มหาชนํ ปีเฬสิ ฯ โส
กกฺขโฬ ผรุโส สาหสิโก ฯ ปเรสุ อนุทฺทยมตฺตมฺปิ นามสฺส
นตฺถิ ฯ เคเห อิตฺถีนมฺปิ ปุตฺตธีตานมฺปิ อมจฺจพฺราหฺมณคหปติอาทีนมฺปิ
อปฺปิโย อมนาโป อกฺขิมฺหิ ปติตรชํ วิย ภตฺตปิณฺเฑ สกฺขรา
วิย ปณฺหึ วิชฺฌิตฺวา ปวิฏฺฐกณฺฏโก วิย จ อโหสิ ฯ ตทา
โพธิสตฺโต มหาปิงฺคลสฺส ปุตฺโต หุตฺวา นิพฺพตฺติ ฯ มหาปิงฺคโล
ทีฆรตฺตํ รชฺชํ กาเรตฺวา กาลมกาสิ ฯ ตสฺมึ กาลกเต
สกลพาราณสิวาสิโน หฏฺฐตุฏฺฐา มหาหสิตํ หสิตฺวา ทารูนํ สกฏสหสฺเสน
มหาปิงฺคลํ ฌาเปตฺวา อเนเกหิ ฆฏสหสฺเสหิ อาฬาหนํ นิพฺพาเปตฺวา
โพธิสตฺตํ รชฺเช อภิสิญฺจิตฺวา ธมฺมิโก โน ราชา ลทฺโธติ
หฏฺฐตุฏฺฐา นคเร อุสฺสวเภรึ จาราเปตฺวา สมุสฺสิตธชปฏากํ นครํ
อลงฺกริตฺวา ทฺวารทฺวาเร มณฺฑปํ กาเรตฺวา วิปฺปกิณฺณลาชกุสุม-
มณฺฑิตตเลสุ อลงฺกตมณฺฑเปสุ นิสีทิตฺวา ขาทึสุ เจว ปิวึสุ จ ฯ
โพธิสตฺโตปิ อลงฺกตมหาตเล สมุสฺสิตเสตฉตฺตสฺส ปลฺลงฺกสฺส มชฺเฌ
มหายสํ อนุภวนฺโต นิสีทิ ฯ อมจฺจา จ พฺราหฺมณคหปติกา จ
รฏฺฐิกโทวาริกาทโย จ ราชานํ ปริวาเรตฺวา อฏฺฐํสุ ฯ อเถโก
โทวาริโก นาติทูเร ฐตฺวา อสฺสสนฺโต ปสฺสสนฺโต ปโรทิ ฯ
โพธิสตฺโต ตํ ทิสฺวาว สมฺม โทวาริก มม ปิตริ กาลกเต สพฺเพ
ตุฏฺฐปหฏฺฐา อุสฺสวํ กีฬนฺตา วิจรนฺติ, ตฺวํ ปน โรทมาโน ฐิโต
กึ นุ โข มม ปิตา ตเวว ปิโย อโหสิ มนาโปติ ปุจฺฉนฺโต ปฐมํ
คาถมาห
                สพฺโพ ชโน หึสิโต ปิงฺคเลน,
                ตสฺมึ มเต ปจฺจยํ เวทยนฺติ,
                ปิโย นุ เต อาสิ อกณฺหเนตฺโต,
                กสฺมา นุ ตฺวํ โรทสิ ทฺวารปาลาติ ฯ
     ตตฺถ หึสิโตติ นานปฺปกาเรหิ ทณฺฑพลิอาทีหิ ปีฬิโต ฯ
ปิงฺคเลนาติ ปิงฺคลกฺเขน ฯ ตสฺส กิร เทฺวปิ อกฺขีนิ นิพฺพิฏฺฐปิงฺคลานิ
พิฬาลกฺขิวณฺณานิ อเหสุํ ฯ เตเนวสฺส ปิงฺคโลติ นามํ อกํสุ ฯ
ปจฺจยํ เวทยนฺตีติ ปีติโย ปเวทยนฺติ ฯ อกณฺหเนตฺโตติ ปิงฺคลเนตฺโต ฯ
กสฺมา นุ ตฺวนฺติ เกน การเณน ตฺวํ โรทสิ ฯ อฏฺฐกถายํ
ปน กสฺมา ตุวนฺติปิ ปาโฐ ฯ
     โส ตสฺส วจนํ สุตฺวา นาหํ มหาปิงฺคโล มโตติ โรทามิ,
สีสํ เม สุขํ ชาตํ, ปิงฺคลราชา หิ ปาสาทา โอตรนฺโต จ อาโรหนฺโต
จ กมฺมารมุฏฺฐิกาย หนนฺโต วิย มยฺหํ สีเส อฏฺฐฏฺฐ ขฏเก เทติ,
โส ปรโลกํ คนฺตฺวาปิ มม สีเส ททมาโน วิย นิรยปาลานมฺปิ
ยมสฺสาปิ สีเส ขฏเก ทสฺสติ, อถ นํ เต อติวิย อยํ อมฺเห
พาธตีติ ปุน อิเธว อาเนตฺวา วิสฺสชฺเชยฺยุํ, อถ เม โส ปุนปิ
สีเส ขฏเก ทเทยฺยาติ ภเยน อหํ โรทามีติ อิมมตฺถํ ปกาเสนฺโต
ทุติยํ คาถมาห
               น เม ปิโย อาสิ อกณฺหเนตฺโต,
               ภายามิ ปจฺจาคมนาย ตสฺส,
               อิโต คโต หึเสยฺย มจฺจุราชํ,
               โส หึสิโต อาเนยฺย ปุน อิธาติ ฯ
     อถ นํ โพธิสตฺโต โส ราชา ทารูนํ สกฏสหสฺเสน ทฑฺโฒ
อุทกสฺส ฆฏสเตหิ ปริสิตฺโต, สาปิสฺส อาฬาหนภูมิ สมนฺตโต
ปริกฺขิตฺตา, ปกติยา จ ปรโลกํ คโต นาม อญฺญตฺถ คโตว,
โส ปุน เตเนว สรีเรน น อาคจฺฉติ, มา ตฺวํ ภายีติ ตํ
สมสฺสาเสนฺโต อิมํ คาถมาห
        ทฑฺโฒ วาหสหสฺเสหิ    สิตฺโต ฆฏสเตหิ โส,
        ปริกฺขิตฺตา จ สา ภูมิ,  มา ภายิ, นาคมิสฺสตีติ ฯ
     ตโต ปฏฺฐาย โทวาริโก อสฺสาสํ ปฏิลภิ ฯ โพธิสตฺโต
ธมฺเมน รชฺชํ กาเรตฺวา ทานาทีนิ ปุญฺญานิ กตฺวา ยถากมฺมํ
คโต ฯ
     สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ
ตทา มหาปิงฺคโล เทวทตฺโต อโหสิ, ปุตฺโต ปน อหเมวาติ ฯ
                   มหาปิงฺคลชาตกํ ทสมํ ฯ
                   อุปาหนวคฺโค นวโม ฯ
                      -----------
@เชิงอรรถ:
@*** หน้านี้ไม่มีข้อมูล ***


             อรรถกถาภาษาบาลีอักษรไทย เล่มที่ ๓๗ หน้า ๓๑๙-๓๒๔. http://84000.org/tipitaka/atthapali/read_th.php?B=37&A=6334&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=37&A=6334&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=329              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=1865              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=1856              The Pali Tipitaka in Roman Character :- http://84000.org/tipitaka/read/roman_read.php?B=27&A=1856              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]