ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๙ ภาษาบาลีอักษรไทย ชา.อ.๕ ฉกฺก-ทสกนิปาต

                       ปูติมํสชาตกํ
     น โข เม รุจฺจตีติ อิทํ สตฺถา เชตวเน วิหรนฺโต อินฺทฺริยอสํวรํ
อารพฺภ กเถสิ ฯ
     เอกสฺมึ หิ สมเย พหู ภิกฺขู อินฺทฺริเยสุ อคุตฺตทฺวารา อเหสุํ ฯ
สตฺถา อิเม ภิกฺขู โอวทิตุํ วฏฺฏตีติ อานนฺทตฺเถรสฺส วตฺวา
อนิยมวเสน ภิกฺขุสงฺฆํ สนฺนิปาตาเปตฺวา อลงฺกตปลฺลงฺกวรมชฺฌคโต
พหู ภิกฺขู อามนฺเตตฺวา ภิกฺขเว ภิกฺขุนา นาม รูปาทีสุ สุภนิมิตฺต-
วเสน นิมิตฺตํ คเหตุํ น วฏฺฏติ สเจ หิ ตสฺมึ สมเย กาลํ กโรติ
นิรยาทีสุ นิพฺพตฺติ ตสฺมา รูปาทีสุ สุภนิมิตฺตํ มา คณฺหถ ภิกฺขุนา
นาม รูปาทิโคจเรน น ภวิตพฺพํ รูปาทิโคจรา หิ ทิฏฺเฐเยว ธมฺเม
มหาวินาสํ ปาปุณนฺติ ตสฺมา วรนฺติห ภิกฺขเว ตตฺตาย อโยสลากาย
จกฺขุนฺทฺริยํ สมฺปลิมฏฺฐนฺติ วิตฺถาเรตฺวา ตุมฺหากํ รูปํ โอโลกนกาโลปิ
อตฺถิ อโนโลกนกาโลปิ โอโลกนกาเล สุภวเสน อโนโลเกตฺวา
อสุภวเสเนว โอโลเกยฺยาถ เอวํ อตฺตโน โคจรา น ปริหายิสฺสถ
โก ปน ตุมฺหากํ โคจโร จตฺตาโร สติปฏฺฐานา อริโย อฏฺฐงฺคิโก
มคฺโค นว โลกุตฺตรธมฺมา เอตสฺมึ หิ โว โคจเร โคจรตํ น
ลจฺฉติ มาโร โอตารํ สเจ ปน กิเลสวสิกา หุตฺวา สุภนิมิตฺตวเสน
โอโลกิสฺสถ ปูติมํสสิคาโล วิย อตฺตโน โคจรา ปริหายิสฺสถาติ
วตฺวา อตีตํ อาหริ
     อตีเต พาราณสิยํ พฺรหฺมทตฺเต รชฺชํ กาเรนฺเต หิมวนฺตปฺปเทเส
อรญฺญายตเน ปพฺพตคุหายํ อเนกสตา เอฬกา วสนฺติ ฯ เตสํ
วสนฏฺฐานโต อวิทูเร เอกิสฺสา คุหายํ ปูติมํโส นาม สิคาโล เวณิยา
นาม ภริยาย สทฺธึ วสติ ฯ โส เอกทิวสํ ภริยาย สทฺธึ วิจรนฺโต
เต เอฬเก ทิสฺวา เอเกนุปาเยน อิเมสํ มํสํ ขาทิตุํ วฏฺฏตีติ จินฺเตตฺวา
อุปาเยน เอเกกํ เอฬกํ มาเรสิ ฯ เต อุโภ เอฬกมํสํ ขาทนฺตา
ถามสมฺปนฺนา ถูลสรีรา อเหสุํ ฯ อนุปุพฺเพน เอฬกา ปริกฺขยํ
อคมํสุ ฯ เตสํ อนฺตเร เมณฺฑิกมาตา นาม เอกา เอฬิกา พฺยตฺตา
อโหสิ อุปายกุสลา ฯ สิคาโล ตํ มาเรตุํ อสกฺโกนฺโต เอกทิวสํ
ภริยาย สทฺธึ สมฺมนฺเตนฺโต ภทฺเท เอฬกา ขีณา อิมํ เอฬิกํ
เอเกนุปาเยน ขาทิตุํ วฏฺฏติ อยํ ปเนตฺถ อุปาโย ตฺวํ เอกิกาว
คนฺตฺวา เอตาย สทฺธึ สขี โหหิ อถ เต ตยา สทฺธึ วิสฺสาเส
อุปฺปนฺเน อหํ มตาลยํ กริตฺวา นิปชฺชิสฺสามิ ตฺวํ เอตํ
อุปสงฺกมิตฺวา เอฬิเก สามิโย เม มโต อหญฺจ อนาถา ฐเปตฺวา ตํ
เม อญฺโญ ญาตโก นตฺถิ เอหิ โรทิตฺวา กนฺทิตฺวา ตสฺส สรีรกิจฺจํ
กริสฺสามาติ วตฺวา ตํ คณฺหิตฺวา อาคจฺเฉยฺยาสิ อถ นํ อหํ
อุปฺปติตฺวา คีวายํ ฑํสิตฺวา มาเรสฺสามีติ ฯ สา สาธูติ สมฺปฏิจฺฉิตฺวา
ตาย สทฺธึ สขีภาวํ กตฺวา วิสฺสาเส อุปฺปนฺเน เอฬิกํ ตถา อโวจ ฯ
อาฬิ อลํ ตว สามิเกน สพฺเพ มม ญาตกา ขาทิตา ภายามิ
น สกฺโกมิ คนฺตุนฺติ อาห ฯ อาฬิ มา ภายิ มตโก กึ กริสฺสตีติ ฯ
ขรมนฺโต เต สามิโก ภายามิวาหนฺติ สา เอวํ วตฺวาปิ ตาย
ปุนปฺปุนํ ยาจิยมานา อทฺธา มโต ภวิสฺสตีติ สมฺปฏิจฺฉิตฺวา ตาย
สทฺธึ ปายาสิ ฯ คจฺฉนฺตี ปน โก ชานาติ กึ ภวิสฺสตีติ ตสฺมึ
อาสงฺกาย สิคาลึ ปุรโต กตฺวา สิคาลํ ปริคฺคณฺหนฺตีเยว คจฺฉติ ฯ
สิคาโล ตาสํ ปทสทฺทํ สุตฺวา อาคตา นุ โข เอฬิกาติ สีสํ
อุกฺขิปิตฺวา อกฺขีนิ ปริวตฺเตตฺวา โอโลเกสิ ฯ เอฬิกา ตํ ตถา กโรนฺตํ
ทิสฺวา อยํ ปาปธมฺโม มํ วญฺเจตฺวา มาเรตุกาโม มตาลยํ
ทสฺเสตฺวา นิปนฺโนติ นิวตฺติตฺวา สิคาลิยา กสฺมา ปลายสีติ วุตฺเต
การณํ กเถนฺตี ปฐมํ คาถมาห
        น โข รุจฺจติ เม อาฬิ    ปูติมํสสฺส เปกฺขนา
        เอตาทิสา สขารสฺมา     อารกา ปริวชฺชเยติ ฯ
     ตตฺถ อาฬีติ อาลปนํ ฯ สเข สหายิเกติ อตฺโถ ฯ เอตาทิสา
  สขารสฺมาติ เอวรูปา สหายกา อปกฺกมิตฺวา ตํ สหายกํ อารกา
  ปริวชฺเชถาติ อตฺโถ ฯ
     เอวญฺจ ปน วตฺวา สา นิวตฺติตฺวา อตฺตโน วสนฏฺฐานเมว
  คตา ฯ สิคาลีปิ ตํ นิวตฺเตตุํ อสกฺโกนฺตี ตสฺสา กุชฺฌิตฺวา อตฺตโน
  สามิกสฺเสว สนฺติกํ คนฺตฺวา ปชฺฌายมานา นิสีทิ ฯ อถ นํ สิคาโล
  ครหนฺโต ทุติยํ คาถมาห
        อุมฺมตฺติกา อยํ เวณิ      วณฺเณติ ปติโน สขึ
        ปชฺฌายติ ปฏิคจฺฉติ       อาคตํ เมณฺฑิมาตรนฺติ ฯ
     ตตฺถ เวณีติ ตสฺสา นามํ ฯ วณฺเณติ ปติโน สขินฺติ ปฐมเมว
อตฺตโน สขึ เอฬิกํ มยิ สิเนหาวิสฺสาสิกา อาคจฺฉิสฺสติ ปติโน
สนฺติกํ มตาลยํ กโรหีติ ปติโน สนฺติเก วณฺเณติ อถ นํ อิทานิ
อาคตํ มม สนฺติกํ อนาคนฺตฺวาว ปฏิคจฺฉติ เมณฺฑิมาตรํ ปชฺฌายติ
อนุโสจตีติ ฯ
     ตํ สุตฺวา สิคาลี ตติยํ คาถมาห
        ตฺวํ โขสิ สมฺม อุมฺมตฺโต   ทุมฺเมโธ อวิจกฺขโณ
        โส ตฺวํ มตาลยํ กตฺวา    อกาเลน วิเปกฺขสีติ ฯ
     ตตฺถ อวิจกฺขโณติ วิจารณปญฺญารหิโต ฯ อกาเลน วิเปกฺขสีติ
เอฬิกาย อตฺตโน สนฺติกํ อนาคตํเยว โอโลเกสีติ อตฺโถ ฯ
     อยํ อภิสมฺพุทฺธคาถา อโหสิ
        น อกาเล วิเปกฺเขยฺย    กาเล เปกฺเขยฺย ปณฺฑิโต
        ปูติมํโสว ปชฺฌาติ        โย อกาเล วิเปกฺขตีติ ฯ
     ตตฺถ อกาเลติ กามคุเณ อารพฺภ สุภวเสน จิตฺตุปฺปาทกาเล ฯ
อยํ หิ ภิกฺขุโน รูปํ โอโลเกตุํ อกาโล นาม ฯ กาเลติ อสุภวเสน
อนุสฺสติวเสน วา กสิณวเสน วา รูปคฺคหณกาเล ฯ อยํ หิ ภิกฺขุโน
รูปํ โอโลเกตุํ กาโล นาม ฯ ตตฺถ อกาเลติ สารตฺตกาเล รูปํ
โอโลเกนฺตา มหาวินาสํ ปาปุณนฺตีติ หริตจชาตกโลมสกสฺสปชาตกาทีหิ
ทีเปตพฺพํ ฯ กาเลติ อสุภวเสน โอโลเกนฺโต อรหตฺเต ปติฏฺฐหตีติ
อสุภกมฺมิกติสฺสตฺเถรวตฺถุนา กเถตพฺพํ ฯ ปูติมํโสว ปชฺฌาตีติ ภิกฺขเว
ยถา ปูติมํสสิคาโล อกาเล เอฬิกํ โอโลเกนฺโต อตฺตโน โคจรา
ปริหีโน ปชฺฌายติ เอวํ ภิกฺขุ อกาเล สุภวเสน รูปํ โอโลเกตฺวา
สติปฏฺฐานาทิโคจรา ปริหีโน ทิฏฺฐธมฺเมปิ สมฺปราเยปิ ปชฺฌายติ
กิลมติ ฯ
     เวณีปิ โข สิคาลี ปูติมํสํ อสฺสาเสตฺวา สามิ มา จินฺเตสิ
อหํ ตํ ปุนปิ อุปาเยน อาเนสฺสามิ ตฺวํ อาคตกาเล อปฺปมตฺโต
คณฺเหยฺยาสีติ วตฺวา ตสฺสา สนฺติกํ คนฺตฺวา อาฬิ ตว อาคตภาโวเยว
โน อตฺถาย ชาโต ตว อาคตกาลสฺมึเยว หิ สามิโก สตึ ปฏิลภิ
อิทานิ ชีวติ เอหิ เตน สทฺธึ ปฏิสนฺถารํ กโรหีติ วตฺวา ปญฺจมํ
คาถมาห
        ปิยํ โข อาฬิ เม โหตุ    ปุณฺณปตฺตํ ททาหิ เม
        ปติ สญฺชีวิโต มยฺหํ       เอยฺยาสิ ปิยปุจฺฉิตาติ ฯ
     ตตฺถ ปุณฺณปตฺตํ ททาหิ เมติ ปิยกานํ อาคตสฺส มยฺหํ
ตุฏฺฐิทานํ เทหิ ฯ ปติ สญฺชีวิโตติ มยฺหํ สามิโก สญฺชีวิโต อุฏฺฐิโต
อโรโคติ อตฺโถ ฯ เอยฺยาสีติ มยา สทฺธิญฺเญว อาคจฺฉ ฯ
     เอฬิกา อยํ ปาปธมฺมา มํ วญฺเจตุกามา อยุตฺตํ โข ปฏิ-
ปกฺขกรณํ อุปาเยเนว นํ วญฺเจสฺสามีติ จินฺเตตฺวา ฉฏฺฐมํ คาถมาห
        ปิยํ โข อาฬิ เต โหตุ    ปุณฺณปตฺตํ ททามิ เต
        มหตา ปริวาเรน        เอสฺสํ กยิราถ โภชนนฺติ ฯ
     ตตฺถ เอสฺสนฺติ อาคมิสฺสามิ อาคจฺฉมานา จ อตฺตโน รกฺขํ
กตฺวา มหนฺเตน ปริวาเรน อาคจฺฉิสฺสามีติ ฯ
     อถ นํ สิคาลี ปริวารํ ปุจฺฉนฺตี สตฺตมํ คาถมาห
        กีทิโส ตุยฺหํ ปริวาโร     เยสํ กาหามิ โภชนํ
        กึนามกา จ เต สพฺเพ    เต เม อกฺขาหิ ปุจฺฉิตาติ ฯ
     สา อาจิกฺขนฺตี อฏฺฐมํ คาถมาห
        มาลิโย จตุรกฺขา จ      ปิงฺคโล อถ ชมฺพุโก
        เอทิโส มยฺหํ ปริวาโร    เตสํ กยิราสิ โภชนนฺติ ฯ
     ตตฺถ เต เมติ เต ปริวาเร มยฺหํ อาจิกฺขิ ฯ มาลิโยติ อาทีนิ
จตุนฺนํ สุนขานํ นามานิ ฯ
     ตตฺถ เอเกกํ ปญฺจ ปญฺจ สุนขสตาน ปริวาเรนฺติ ฯ เอวํ
ทฺวีหิ สุนขสหสฺเสหิ ปริวาริตา อาคมิสฺสามีติ วตฺวา สเจ เต
โภชนํ น ลภิสฺสนฺติ ตุมฺเห เทฺวปิ ชเน มาเรตฺวา ขาทิสฺสนฺตีติ
อาห ฯ ตํ สุตฺวา สิคาลี ภีตา อลํ อิมิสฺสา ตตฺถ คมเนน อุปาเยนสฺสา
อนาคมนเมว กริสฺสามีติ จินฺเตตฺวา นวมํ คาถมาห
        นิกฺขนฺตาย อคารสฺมา     (นิรารกฺขํ) ภณฺฑกมฺปิ วินสฺสติ
        อาโรคฺยํ อาฬิโน วชฺชํ    ตฺวํ อิเธว วส มา คมาติ ฯ
     ตสฺสตฺโถ อาฬิ ตว เคเห พหุภณฺฑกํ อตฺถิ ตํ เต นิกฺขนฺตาย
อคารสฺมา นิรารกฺขํ ภณฺฑกํ วินสฺสติ อหเมว เต อาฬิโน สหายกสฺส
อาโรคฺยํ วชฺชํ วทิสฺสามิ ตฺวํ อิเธว วส มา คมาติ ฯ
     เอวญฺจ ปน วตฺวา มรณภยภีตา เวเคน สามิกสฺส สนฺติกํ
คนฺตฺวา ตํ คเหตฺวา ปลายิ ฯ เต ปน ตํ ฐานํ อาคนฺตุํ นาสกฺขึสุ ฯ
     สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา
อหํ ตสฺมึ ฐาเน วนเชฏฺฐรุกฺเข นิพฺพตฺตเทวตา อโหสินฺติ ฯ
                  ปูติมํสชาตกํ เอกาทสมํ ฯ


             อรรถกถาภาษาบาลีอักษรไทย เล่มที่ ๓๙ หน้า ๔๐๔-๔๐๙. http://84000.org/tipitaka/atthapali/read_th.php?B=39&A=8161&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=39&A=8161&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=1301              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=5390              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=5448              The Pali Tipitaka in Roman Character :- http://84000.org/tipitaka/read/roman_read.php?B=27&A=5448              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]