อรรถกถาเล่มที่ ๓๙ ภาษาบาลีอักษรไทย
 ชา.อ.๕ ฉกฺก-ทสกนิปาต

                     สงฺขพฺราหฺมณชาตกํ
     พหุสฺสุโตติ อิทํ สตฺถา เชตวเน วิหรนฺโต สพฺพปริกฺขารทานํ
อารพฺภ กเถสิ ฯ
     สาวตฺถิยํ กิเรโก อุปาสโก ตถาคตสฺส ธมฺมเทสนํ สุตฺวา สตฺถริ
ปสนฺนจิตฺโต สฺวาตนาย นิมนฺเตตฺวา อตฺตโน ฆรทฺวาเร มณฺฑปํ
กาเรตฺวา อลงฺกริตฺวา ปุนทิวเส ตถาคตสฺส กาลํ อาโรจาเปสิ ฯ
สตฺถา ปน ปญฺจสตภิกฺขุปริวาโร ตตฺถ คนฺตฺวา ปญฺญตฺตปวราสเน
นิสีทิ ฯ อุปาสโก สปุตฺตทารปริชโน พุทฺธปฺปมุขสฺส ภิกฺขุสงฺฆสฺส
มหาทานํ ทตฺวา ปุน สฺวาตนายาติ เอวํ สตฺตาหํ นิมนฺเตตฺวา
มหาทานํ ปวตฺเตตฺวา สตฺตเม ทิวเส สพฺพปริกฺขารทานํ อทาสิ ฯ
ตํ ปน ททมาโน อุปาหนทานํ อุสฺสนฺนํ กตฺวา อทาสิ ฯ ทสพลสฺส
ทินฺโน อุปาหนสงฺฆาโฏ สหสฺสคฺฆนิโก อโหสิ ฯ ทฺวินฺนํ อคฺคสาวกานํ
ปญฺจสตคฺฆนิกา ฯ เสสานํ ปญฺจนฺนํ ภิกฺขุสตานํ สตคฺฆนิกา ฯ
อิติ โส สพฺพปริกฺขารทานํ ทตฺวา อตฺตโน ปริสาย สทฺธึ ภควโต
สนฺติเก นิสีทิ ฯ อถสฺส สตฺถา มธุเรน สเรน อนุโมทนํ กโรนฺโต
อุปาสก โอฬารํ เต สพฺพปริกฺขารทานํ อตฺตมโน โหหิ ปุพฺเพ
อนุปฺปนฺเน พุทฺเธ ปจฺเจกพุทฺธสฺส เอกํ อุปาหนสงฺฆาฏํ ทตฺวา นาวาย
ภินฺนาย อปฺปติฏฺเฐ มหาสมุทฺเทปิ อุปาหนทานสฺส นิสฺสนฺเทน ปติฏฺฐํ
ลภึสุ ตฺวํ ปน พุทฺธปฺปมุขสฺส ภิกฺขุสงฺฆสฺส สพฺพปริกฺขารทานํ
อทาสิ ตสฺส เต อุปาหนทานสฺส ผลํ กสฺมา น ปติฏฺฐา ภวิสฺสตีติ
วตฺวา เตน ยาจิโต อตีตํ อาหริ
     อตีเต อยํ พาราณสี โมลินี นาม อโหสิ ฯ โมลินีนคเร
พฺรหฺมทตฺเต รชฺชํ กาเรนฺเต สงฺโข นาม พฺราหฺมโณ อทฺโธ
มหทฺธโน มหาโภโค ปหูตวิตฺตูปกรโณ ปหูตธนธญฺญสุวณฺณรชโต
จตูสุ นครทฺวาเรสุ นครมชฺเฌ นิเวสนทฺวาเร จาติ ฉสุ ฐาเนสุ
ทานสาลาโย กาเรตฺวา เทวสิกํ ฉสตสหสฺสานิ วิสฺสชฺเชนฺโต
กปณทฺธิกาทีนํ มหาทานํ ปวตฺเตสิ ฯ โส เอกทิวสํ จินฺเตสิ อหํ เคเห
ธเน ขีเณ ทานํ ทาตุํ น สกฺขิสฺสามิ อปริกฺขีเณเยว ธเน
นาวาย สุวณฺณภูมึ คนฺตฺวา ธนํ อาหริสฺสามีติ ฯ โส นาวํ
พนฺธาเปตฺวา ภณฺฑสฺส ปูราเปตฺวา ปุตฺตทารํ อามนฺเตตฺวา ยาว
อหํ อาคจฺฉามิ ตาว เม ทานํ อนุปจฺฉินฺทิตฺวา ปวตฺเตยฺยาถาติ
วตฺวา ทาสกมฺมกรปริวุโต ฉตฺตํ อาทาย อุปาหนํ อารุยฺห มชฺฌนฺติก-
สมเย ปฏนคามาภิมุโข ปายาสิ ฯ ตสฺมึ ขเณ คนฺธมาทเน เอโก
ปจฺเจกพุทฺโธ อาวชฺเชตฺวา ตํ ธนาหรณตฺถาย คจฺฉนฺตํ ทิสฺวา
มหาปุริโส ธนํ อาหริตุํ คจฺฉติ ภวิสฺสติ นุ โข อสฺส สมุทฺเท
อนฺตราโย โนติ อาวชฺเชตฺวา ภวิสฺสตีติ ญตฺวา เอส มํ ทิสฺวา
ฉตฺตญฺจ อุปาหนญฺจ มยฺหํ ทตฺวา อุปาหนทานสฺส นิสฺสนฺเทน
สมุทฺเท ภินฺนาย นาวาย ปติฏฺฐํ ลภิสฺสติ กริสฺสามิสฺส อนุคฺคหนฺติ
อากาเสนาคนฺตฺวา ตสฺส อวิทูเร โอตริตฺวา จณฺฑวาตาตเปน
องฺคารสทิสํ อุณฺหํ วาลุกํ มทฺทนฺโต ตสฺส อภิมุโข อาคมิ ฯ โส
ตํ ทิสฺวาว ปุญฺญกฺเขตฺตํ เม อาคตํ อชฺช มยา เอตฺถ
ทานพีชํ โรเปตุํ วฏฺฏตีติ ตุฏฺฐจิตฺโต เวเคน อุปสงฺกมิตฺวา ตํ
วนฺทิตฺวา ภนฺเต มยฺหํ อนุคฺคหณตฺถาย โถกํ มคฺคา โอกฺกมฺม
อิมํ รุกฺขมูลํ อุปคจฺฉถาติ วตฺวา ตสฺมึ รุกฺขมูเล อุปสงฺกมนฺเต
รุกฺขมูเล วาลุกํ อุสฺสาเปตฺวา อุตฺตราสงฺคํ ปญฺญเปตฺวา ปจฺเจกพุทฺธํ
วนฺทิตฺวา วาสิตปริสาวิเตน อุทเกน ปาเท โธวิตฺวา คนฺธเตเลน
มกฺเขตฺวา อตฺตโน อุปาหนา โอมุญฺจิตฺวา ปุญฺเชตฺวา คนฺธเตเลน
มกฺเขตฺวา ตสฺส ปาเทสุ ปฏิมุญฺจิตฺวา ภนฺเต อิมา อุปาหนา
อารุยฺห ฉตฺตํ มตฺถเก กตฺวา คจฺฉถาติ ฉตฺตอุปาหนํ อทาสิ ฯ
โส ตสฺส อนุคฺคหณตฺถาย ตํ คเหตฺวา ปสาทสํวฑฺฒนตฺถํ ปสฺสนฺตสฺเสว
เวหาสํ อุปฺปติตฺวา คนฺธมาทนเมว อคมาสิ ฯ โพธิสตฺโตปิ ตํ
ทิสฺวา อติปสนฺนจิตฺโต ปฏนํ คนฺตฺวา นาวํ อภิรูหิ ฯ อถสฺส
มหาสมุทฺทํ ปฏิปนฺนสฺส สตฺตเม ทิวเส นาวา วิวรมทาสิ ฯ อุทกํ
อุสฺสิญฺจิตุํ นาสกฺขึสุ ฯ มหาชโน มรณภยภีโต อตฺตโน อตฺตโน
เทวตาโย นมสฺสิตฺวา มหาวิรวํ วิรวิ ฯ มหาสตฺโต เอกํ อุปฏฺฐากํ
คเหตฺวา สกลสรีรํ เตเลน มกฺเขตฺวา สปฺปินา สทฺธึ สกฺขรจุณฺณํ
ยาวทตฺถํ ขาทิตฺวา ตมฺปิ ขาทาเปตฺวา เตน สทฺธึ กูปกสฺส ยฏฺฐิมตฺถกํ
อารุยฺห อิมาย ทิสาย อมฺหากํ นครนฺติ ทิสํ ววฏฺฐเปตฺวา
มจฺฉกจฺฉปปริปนฺถโต อตฺตานํ โมเจนฺโต เตน สทฺธึ อุสภมตฺตํ
อติกฺกมิตฺวา ปติ ฯ มหาชโน มหาวินาสํ ปาปุณิ ฯ มหาสตฺโต
ปน อุปฏฺฐาเกน สทฺธึ สมุทฺทํ ตริตุํ อารภิ ฯ ตสฺส ตรนฺตสฺเสว
สตฺต ทิวสา คตา ฯ โส ตสฺมิมฺปิ กาเล โลโณทเกน มุขํ
วิกฺขาเลตฺวา อุโปสถิโก อโหสิเยว ฯ ตทา ปน จตูหิ โลกปาเลหิ
มณิเมขลา นาม เทวธีตา สเจ นาวาย ภินฺนาย ติสรณคตา
วา สีลสมฺปนฺนา วา มาตาปิตุปติเทวตา วา มนุสฺสา ทุกฺขปฺปตฺตา
โหนฺติ เต รกฺเขยฺยาสีติ สมุทฺเท อารกฺขนตฺถาย ฐปิตา โหติ ฯ
สา อตฺตโน อิสฺสริเยน สตฺตาหํ ปมชฺชิตฺวา สตฺตเม ทิวเส สมุทฺทํ
โอโลเกนฺตี สีลาจารสํยุตฺตํ สงฺขพฺราหฺมณํ ทิสฺวา อิมสฺส สตฺตโม
ทิวโส สมุทฺเท ปติตสฺส สเจ โส มริสฺสติ อติวิย คารยฺหํ เม
ภวิสฺสตีติ สํวิคฺคมานหทยา หุตฺวา เอกํ สุวณฺณปาฏึ นานคฺครส-
ทิพฺพโภชนสฺส ปูเรตฺวา วาตเวเคน ตตฺถ คนฺตฺวา ตสฺส ปุรโต
อากาเส ฐตฺวา พฺราหฺมณ ตฺวํ สตฺตาหํ นิราหาโร อิมํ
ทิพฺพโภชนํ ภุญฺชาติ อาห ฯ โส ตํ โอโลเกตฺวา อปเนหิ ตว
ภตฺตํ อหํ อุโปสถิโกติ อาห ฯ อถสฺส อุปฏฺฐาโก ปจฺฉโต
อาคจฺฉนฺโต เทวตํ อทิสฺวา สทฺทเมว สุตฺวา อยํ พฺราหฺมโณ
ปกติสุขุมาโล สตฺตาหํ นิราหารตาย ทุกฺขิโต มรณภเยน วิปฺปลปติ
มญฺเญ อสฺสาเสสฺสามิ นนฺติ จินฺเตตฺวา ปฐมํ คาถมาห
                พหุสฺสุโต สุตธมฺโมสิ สงฺข
                ทิฏฺฐา ตยา สมณพฺราหฺมณา จ
                อถกฺขเณ ทสฺสยเส วิลาปํ
                อญฺโญ นุ โก เต ปฏิมนฺตโก มยาติ ฯ
     ตตฺถ สุตธมฺโมสีติ ธมฺโมปิ ตยา ธมฺมิกสมณพฺราหฺมณานํ
สนฺติเก สุโต ฯ ทิฏฺฐาติ เตสํ ปจฺจเย ททนฺเตน เวยฺยาวจฺจํ
กโรนฺเตน ธมฺมิกสมณพฺราหฺมณา จ ตยา ทิฏฺฐา เอวํ กโรนฺโตปิ
ปสฺสนฺโตปิ เต น ปสฺสสิเยว ฯ อถกฺขเณติ อถ อกฺขเณ สลฺลเปนฺตสฺส
กสฺสจิ อภาเวน วจนสฺส อโนกาเส ฯ ทสฺสยเสติ อหํ อุโปสถิโกติ
วทนฺโต วิลาปํ ทสฺเสสิ ฯ ปฏิมนฺตโกติ มยา อญฺโญ โก ตว
ปฏิมนฺตโก วจนทายโก กึการณา เอวํ วิลปสีติ ฯ
     โส ตสฺส วจนํ สุตฺวา อิมสฺส สา เทวตา น ปญฺญายติ
มญฺเญติ จินฺเตตฺวา สมฺม นาหํ มรณภยสฺส ภายามิ อตฺถิ
ปน เม อญฺโญ ปฏิมนฺตโกติ วตฺวา ทุติยํ คาถมาห
                สุพฺภา สุภา สุปฺปฏิมุกฺกกมฺพู
                ปคฺคยฺห โสวณฺณมยาย ปาฏิยา
                ภุญฺชสฺสุ ภตฺตํ อิติ มํ วเทติ
                สทฺธา วิตฺตา ตมหํ โนติ พฺรูมีติ ฯ
     ตตฺถ สุพฺภาติ สุภมุขา ฯ สุภาติ ปาสาทิกา อุตฺตมรูปธรา ฯ
สุปฺปฏิมุกฺกกมฺพูติ มุกฺกสุวณฺณาลงฺการา ฯ ปคฺคยฺหาติ สุวณฺณปาฏิยา
ภตฺตํ คเหตฺวา อุกฺขิปิตฺวา ฯ สทฺธา วิตฺตาติ สทฺธา เจว
ตุฏฺฐจิตฺตา จ ฯ สทฺธา วิตฺตนฺติปิ ปาโฐ ฯ ตสฺสตฺโถ สทฺธาติ
สทฺทหนฺตํ ฯ วิตฺตนฺติ ตุฏฺฐจิตฺตํ ฯ ตมหํ โนติ ตํ อหํ เทวตํ
อุโปสถิกตฺตา ปฏิกฺขิปนฺโต โนติ พฺรูมิ น วิลปามิ สมฺมาติ ฯ
     อถสฺส โส ตติยํ คาถมาห
                เอตาทิสํ พฺราหฺมณ ทิสฺวาน ยกฺขํ
                ปุจฺฉเยฺย โปโส สุขมาสึสมาโน
                อุฏฺเฐหิ นํ ปญฺชลิกาภิปุจฺฉ
                เทวี นุสิ ตฺวํ อุท มานุสีติ ฯ
     ตตฺถ สุขมาสึสมาโนติ เอตาทิสํ ยกฺขํ ทิสฺวา อตฺตโน สุขํ
อาสึสนฺโต ปณฺฑิโต ปุริโส อมฺหากํ สุขํ ภวิสฺสติ น ภวิสฺสตีติ
ปุจฺเฉยฺย ฯ อุฏฺเฐหีติ อุทกโต อุฏฺฐหนฺตาการํ ทสฺเสนฺโต อุฏฺเฐหิ ฯ
ปญฺชลิกาภิปุจฺฉาติ ปญฺชลิโก หุตฺวา อภิปุจฺฉ ฯ อุท มานุสีติ
อุทาหุ มหิทฺธิกา มานุสี ตฺวนฺติ ฯ
     โพธิสตฺโต ยุตฺตํ กเถตีติ ตํ ปุจฺฉนฺโต จตุตฺถํ คาถมาห
                ยํ ตฺวํ สุเขนาภิสเมกฺขเส มํ
                ภุญฺชสฺสุ ภตฺตํ อิติ มํ วเทสิ
                ปุจฺฉามิ ตํ นาริ มหานุภาเว
                เทวี นุสิ ตฺวํ อุท มานุสีติ ฯ
     ตตฺถ ยํ ตฺวนฺติ ยสฺมา ตฺวํ สุเขน มํ ฯ อภิสเมกฺขเสติ
ปิยจกฺขุนา โอโลเกสิ ฯ ปุจฺฉามิ ตนฺติ เตน การเณน ตํ ปุจฺฉามิ ฯ
     ตโต เทวตา เทฺว คาถา อภาสิ
                เทวี อหํ สงฺข มหานุภาวา
                อิธาคตา สาครวาริมชฺเฌ
                อนุกมฺปิกา โน จ ปทุฏฺฐจิตฺตา
                ตเวว อตฺถาย อิธาคตาสฺมิ ฯ
                อิธนฺนปานํ สยนาสนญฺจ
                ยานานิ นานาวิวิธานิ สงฺข
                สพฺพสฺส ตฺยาหํ ปฏิปาทยามิ
                ยํกิญฺจิ ตุมฺหํ มนสาภิปตฺถิตนฺติ ฯ
     ตตฺถ อิธาติ อิมสฺมึ สมุทฺเท ฯ นานาวิวิธานีติ พหูนิ จ
อเนกปฺปการานิ จ หตฺถิยานอสฺสยานาทีนิ อตฺถิ ฯ สพฺพสฺส ตฺยาหนฺติ
ตสฺส อนฺนปานาทิโน สพฺพสฺส สามิกํ กตฺวา ตนฺเต อนฺนปานาทึ
ปฏิปาทยามิ ททามิ ฯ ยํกิญฺจีติ อญฺญมฺปิ ยํกิญฺจิ ตว มนสา
อิจฺฉิตํ ตํ สพฺพํ เต ทมฺมีติ ฯ
     ตํ สุตฺวา มหาสตฺโต อยํ เทวตา สมุทฺทปิฏฺเฐ มยฺหํ
อิทญฺจิทญฺจ ทมฺมีติ วทติ กึ นุ โข เอสา มยา กเตน
ปุญฺญกมฺเมน ทาตุกามา อุทาหุ อตฺตโน พเลน ปุจฺฉิสฺสามิ ตาว
นนฺติ จินฺเตตฺวา ปุจฺฉนฺโต สตฺตมํ คาถมาห
                ยํกิญฺจิ ยิฏฺฐญฺจ หุตญฺจ มยฺหํ
                สพฺพสฺส โน อิสฺสรา ตฺวํ สุคตฺเต
                สุสฺโสณิ สุพฺภา สุวิลากมชฺเฌ
                กิสฺส เม กมฺมสฺส อยํ วิปาโกติ ฯ
     ตตฺถ ยิฏฺฐนฺติ ทานวเสน ยชิตํ ฯ หุตนฺติ อาหุนนปาหุนวเสน
ทินฺนํ ฯ สพฺพสฺส โน อิสฺสรา ตฺวนฺติ ตสฺส อมฺหากํ ปุญฺญกมฺมสฺส
สพฺพสฺส ตฺวํ อิสฺสรา อิมสฺส อยํ วิปาโก อิมสฺส อยนฺติ
ชานิตุํ สมตฺถาติ อตฺโถ ฯ สุสฺโสณีติ สุนฺทรอูรุลกฺขเณ ฯ สุพฺภาติ
สุนฺทรภมุเก ฯ สุวิลากมชฺเฌติ สุฏฺฐุวิลคฺคิตตนุมชฺเฌ ฯ กิสฺส เมติ
มยา กตกมฺเมสุ กิสฺส กมฺมสฺส อยํ วิปาโก เยนาหํ อปฺปติฏฺเฐ
มหาสมุทฺเท ปติฏฺฐํ ลภามีติ ฯ
     ตํ สุตฺวา เทวธีตา อยํ พฺราหฺมโณ ยนฺเตน กุสลกมฺมํ กตํ
ตมหํ ชานามีติ สญฺญาย ปุจฺฉติ มญฺเญ กเถสฺสามิ ทานิสฺสาติ
กเถนฺตี อฏฺฐมํ คาถมาห
                ฆมฺเม ปเถ พฺราหฺมณ เอกภิกฺขุํ
                อุคฺฆฏฺฏปาทํ ตสิตํ กิลนฺตํ
                ปฏิปาทยิ  สงฺข อุปาหนานิ
                สา ทกฺขิณา กามทุหา ตวชฺชาติ ฯ
     ตตฺถ เอกภิกฺขุนฺติ ตํ ปจฺเจกพุทฺธํ สนฺธายาห ฯ อุคฺฆฏฺฏปาทนฺติ
อุณฺหวาลุกาย ฆฏฺฏิตปาทํ ฯ ตสิตนฺติ ปิปาสิตํ ฯ ปฏิปาทยีติ
ปฏิปาทยีติ ปฏิปาเทสิ โยเชสีติ อตฺโถ ฯ กามทุหาติ สพฺพกามทายิกา ฯ
     ตํ สุตฺวา มหาสตฺโต เอวรูเปปิ นาม อปฺปติฏฺเฐ มหาสมุทฺเท
มยา ทินฺนํ อุปาหนทานํ มม สพฺพกามททํ ชาตํ อโห สุทินฺนํ
เม ปจฺเจกพุทฺธสฺส ทานนฺติ ตุฏฺฐจิตฺโต นวมํ คาถมาห
                สา โหตุ นาวา ผลกูปปนฺนา
                อนวสฺสุตา เอรกวาตยุตฺตา
                อญฺญสฺส ยานสฺส น เหตฺถ ภูมิ
                อชฺเชว มํ โมลินึ ปาปยสฺสูติ ฯ
     ตสฺสตฺโถ เทวเต เอวํ สนฺเต มยฺหํ เอกํ นาวํ มาเปหิ
ขุทฺทกํ ปน เอกํ โทณิปฺปมาณํ นาวํ มาเปหิ ยํ ปน มาเปสฺสสิ
สา โหตุ นาวา พหูหิ สุสิพฺพิเตหิ ผลเกหิ อุปปนฺนา อุทกปฺปเวสนา-
ภาเวน อนวสฺสุตา เอรเกน สมฺมา คเหตฺวา คจฺฉนฺเตน วาเตน
ปยุตฺตา ฐเปตฺวา ทิพฺพนาวํ อญฺญสฺส ยานสฺส เอตฺถ ภูมิ นตฺถิ
ตาย ปน นาวาย อชฺเชว มํ โมลินีนครํ ปาเหสีติ ฯ
     เทวตา ตสฺส วจนํ สุตฺวา ตุฏฺฐจิตฺตา สตฺตรตนมยํ นาวํ
มาเปสิ ฯ สา ทีฆโต อฏฺฐอุสภา อโหสิ วิตฺถารโต จตุอุสภา
คมฺภีรโต วีสติยฏฺฐิกา ตสฺสา อินฺทนีลมณิมยา ตโย กูปกา ฯ
โสวณฺณมยานิ โยตฺตานิ รชตมยานิ สิตฺตตานิ โสวณฺณมยาเนว
ผิยาริตฺตานิ อเหสุํ ฯ เทวตา ตํ นาวํ สตฺตนฺนํ รตนานํ ปูเรตฺวา
พฺราหฺมณํ อาลิงฺคิตฺวา อลงฺกตนาวาย อาโรเปสิ ฯ อุปฏฺฐากํ ปนสฺส
น โอโลเกสิ ฯ พฺราหฺมโณ อตฺตนา กตกลฺยาณโต ตสฺส ปตฺตึ
อทาสิ ฯ โส อนุโมทิ ฯ ตทา เทวตา ตมฺปิ อาลิงฺคิตฺวา นาวาย
ปติฏฺฐเปสิ ฯ อถ นํ นาวํ โมลินีนครํ เนตฺวา พฺราหฺมณสฺส ฆเร
ธนํ ปติฏฺฐาเปตฺวา อตฺตโน วสนฏฺฐานเมว อคมาสิ ฯ
     สตฺถา อภิสมฺพุทฺโธ หุตฺวา
                สา ตุฏฺฐจิตฺตา สุมนา ปตีตา
                นาวํ สุจิตฺตํ อภินิมฺมินิตฺวา
                อาทาย สงฺขํ ปุริเสน สทฺธึ
                อุปานยี นครํ สาธุรมฺมนฺติ
อิมํ โอสานคาถํ อภาสิ ฯ
     ตตฺถ สาติ ภิกฺขเว สา เทวตา ตตฺถ สมุทฺทมชฺเฌ ตสฺส
วจนํ สุตฺวา ตุฏฺฐสงฺขาตาย ปีติยา สมนฺนาคตา ฯ สุมนาติ สุนฺทรมนา
ปาโมชฺเชน ปหิตจิตฺตา หุตฺวา วิจิตฺรนาวํ นิมฺมินิตฺวา พฺราหฺมณํ
ปริจาริเกน สทฺธึ อาทาย ฯ สาธุรมฺมนฺติ อติรมณียํ นครํ อุปานยิ ฯ
     พฺราหฺมโณปิ ยาวชีวํ อมิตธนํ เคหํ อชฺฌาวสนฺโต ทานํ ทตฺวา
สีลํ รกฺขิตฺวา ชีวิตปริโยสาเน สปริโส เทวนครํ ปูเรสิ ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ
สโมธาเนสิ ฯ สจฺจปริโยสาเน อุปาสโก โสตาปตฺติผเล ปติฏฺฐหิ ฯ
ตทา เทวตา อุปฺปลวณฺณา อโหสิ อุปฏฺฐากปุริโส อานนฺโท สงฺข-
พฺราหฺมโณ ปน อหเมวาติ ฯ
                 สงฺขพฺราหฺมณชาตกํ จตุตฺถํ ฯ

             อรรถกถาภาษาบาลีอักษรไทย เล่มที่ ๓๙ หน้า ๔๓๘-๔๔๗.
http://84000.org/tipitaka/atthapali/read_th.php?B=39&A=8842&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=39&A=8842&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=1357
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=5577
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=5646
             The Pali Tipitaka in Roman Character :-
http://84000.org/tipitaka/read/roman_read.php?B=27&A=5646
             สารบัญพระไตรปิฎกเล่มที่ ๒๗
http://84000.org/tipitaka/read/?index_27