อรรถกถาเล่มที่ ๔๖ ภาษาบาลีอักษรไทย
 นิทฺ.อ.๒ (สทฺธมฺมปชฺ.)

                    ๘. เหมกมาณวสุตฺตนิทฺเทสวณฺณนา
      [๕๓] อฏฺฐเม  เหมกสุตฺเต:- เย เม ปุพฺเพ วิยากํสูติ เย พาวริอาทโย
ปุพฺเพ มยฺหํ สกํ ลทฺธึ วิยากํสุ. หุรํ โคตมสาสนาติ โคตมสาสนโต ปุพฺพตรํ.
สพฺพนฺตํ ตกฺกวฑฺฒนนฺติ สพฺพํ ตํ กามวิตกฺกาทิวฑฺฒนํ.
      เย จญฺเญ ตสฺส อาจริยาติ เย จ อญฺเญ ตสฺส พาวริยสฺส อาจเร
สิกฺขาปกา อาจริยา. เต สกํ ทิฏฺฐินฺติ เต อาจริยา อตฺตโน ทิฏฺฐึ. สกํ ขนฺตินฺติ
อตฺตโน ขมนํ. สกํ รุจินฺติ อตฺตโน โรจนํ. วิตกฺกวฑฺฒนนฺติ กามวิตกฺกาทิวิตกฺกานํ
อุปฺปาทนํ ปุนปฺปุนํ ปวตฺตนํ. สงฺกปฺปวฑฺฒนนฺติ กามสงฺกปฺปาทีนํ วฑฺฒนํ. อิมานิ
เทฺว ปทานิ สพฺพสงฺคาหิกวเสน วุตฺตานิ. อิทานิ กามวิตกฺกาทิเก สรูปโต ทสฺเสตุํ
"กามวิตกฺกวฑฺฒนนฺ"ติอาทินา นเยน นว วิตกฺเก ทสฺเสสิ.
      [๕๔] ตณฺหานิคฺฆาตนนฺติ ตณฺหาวินาสนํ.
      [๕๕-๖] อถสฺส ภควา ตํ ธมฺมํ อาจิกฺขนฺโต "อิธา"ติ คาถาทฺวยมาห. ตตฺถ
เอตทญฺญาย เย สตาติ เอตํ นิพฺพานํ ปทมจฺจุตํ "สพฺเพ สงฺขารา อนิจฺจา"ติอาทินา ๑-
นเยน วิปสฺสนฺตา อนุปุพฺเพน ชานิตฺวา เย กายานุปสฺสนาสติอาทีหิ สตา.
ทิฏฺฐธมฺมาภินิพฺพุตาติ วิทิตธมฺมตฺตา ทิฏฺฐธมฺมา จ ราคาทินิพฺพาเนน จ
อภินิพฺพุตา. เสสํ สพฺพตฺถ ปากฏเมว.
      เอวํ ภควา อิทมฺปิ สุตฺตํ อรหตฺตนิกูเฏเนว เทเสสิ, เทสนาปริโยสาเน
จ ปุพฺพสทิโส เอว ธมฺมาภิสมโย อโหสีติ.
                  สทฺธมฺมปฺปชฺโชติกาย จูฬนิทฺเทสฏฺฐกถาย
                  เหมกมาณวสุตฺตนิทฺเทสวณฺณนา นิฏฺฐิตา.
                              อฏฺฐมํ.
                         --------------
@เชิงอรรถ: ๑ ขุ.ธ. ๒๕/๒๗๗/๖๔, ขุ. เถร. ๒๖/๖๗๗/๓๖๕, อภิ. ก. ๓๗/๗๕๓/๔๔๑

             อรรถกถาภาษาบาลีอักษรไทย เล่มที่ ๔๖ หน้า ๓๔.
http://84000.org/tipitaka/atthapali/read_th.php?B=46&A=837&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=46&A=837&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=30&i=324
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=30&A=3080
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=30&A=3347
             The Pali Tipitaka in Roman Character :-
http://84000.org/tipitaka/read/roman_read.php?B=30&A=3347
             สารบัญพระไตรปิฎกเล่มที่ ๓๐
http://84000.org/tipitaka/read/?index_30