อรรถกถาเล่มที่ ๕๕ ภาษาบาลีอักษรไทย
 ปญฺจ.อ. (ปรมตฺถที.)

                     ๑๕-๑๘. ญาตกานุโยคาทิวณฺณนา
     [๑๙๗] อิทานิ มาตาติอาทิโก ญาตกานุโยโค. ขตฺติโยติอาทิโก ชาติอนุโยโค.
คหฏฺโฐ ปพฺพชิโตติ ปฏิปตฺติอนุโยโค. เทโว มนุสฺโสติ อุปปตฺติอนุโยโค.
โสตาปนฺโนติอาทิโก ปฏิเวธานุโยโค, อริยานุโยโคติปิ วุจฺจติ. เต สพฺเพ
อุตฺตานตฺถาเยว. "อรหา หุตฺวา น อรหา"ติ ปเนตฺถ โมฆปญฺหตฺตา น วุตฺตํ.
     [๒๐๖] จตฺตาโร ปุริสยุคาติอาทิ สํฆานุโยโค, โสปิ อุตฺตานตฺโถเอว.
     [๒๐๙] สงฺขโตติอาทิ สจฺฉิกฏฺฐสภาวานุโยโค. ตตฺถ ตติยา โกฏีติ ปุจฺฉา
สกวาทิสฺส. ตถารูปสฺส สจฺฉิกฏฺฐสฺส อภาวโต ปฏิกฺเขโป ปรวาทิสฺส. ปุน ปุฏฺฐสฺส ๑-
ปุคฺคลํ สนฺธาย ปฏิญฺญา ตสฺเสว.
@เชิงอรรถ: ๑ ฉ.ม. ปุฏฺโฐ
     [๒๑๑] อญฺโญ ปุคฺคโลติ ปเญฺหปิ สงฺขเตหิ ขนฺเธหิ อญฺญตฺตํ อนิจฺฉนฺโต
ปฏิกฺเขโป ตสฺเสว.
     [๒๑๒] ขนฺธา สงฺขตาติอาทิ สงฺขตาสงฺขตานิ สรูเปน ทสฺเสตฺวา
อญฺญตฺตปุจฺฉนตฺถํ วุตฺตํ.
     [๒๑๓] รูปํ สงฺขตนฺติอาทิ ขนฺเธ วิภาคโต ทสฺเสตฺวา อญฺญตฺตปุจฺฉนตฺถํ
วุตฺตํ.
     [๒๑๔] ปุคฺคลสฺส อุปฺปาโทติ ปุจฺฉา สกวาทิสฺส, "ชาติธมฺมา ชราธมฺมา,
อโถ มรณธมฺมิโน"ติอาทีสุ วุตฺตวเสน ๑- ปฏิญฺญา ปรวาทิสฺส. สงฺขตภาวํ ปนสฺส
โส น อิจฺฉติ, ตสฺมา ปฏิกฺขิปติ.
     [๒๑๕] ปุน น อุปฺปาโท ปญฺญายตีติอาทินา นเยน ปุฏฺโฐ "ทุกฺขเมว
หิ สมฺโภติ, ทุกฺขํ ติฏฺฐติ เวติ จา"ติอาทิวจนโต ๒- ปุคฺคลสฺส อุปฺปาทาทโย
นาม น ยุชฺชนฺตีติ ปฏิชานาติ.
     [๒๑๖] อตฺถตฺถมฺหีติ อตฺถํ วุจฺจติ นิพฺพานํ, ตตฺถ อตฺถีติ ปุจฺฉติ.
ตสฺส อตฺถิตาย สสฺสตํ, นตฺถิตาย อุจฺเฉโท อาปชฺชติ. ตทุภยมฺปิ อนิจฺฉนฺโต
ปจฺฉา ปฏิกฺขิปติ.
                     ญาตกานุโยคาทิวณฺณนา นิฏฺฐิตา.
                           -----------

             อรรถกถาภาษาบาลีอักษรไทย เล่มที่ ๕๕ หน้า ๑๕๖-๑๕๗.
http://84000.org/tipitaka/atthapali/read_th.php?B=55&A=3501&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=55&A=3501&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=37&i=166
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=37&A=1762
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=37&A=1423
             The Pali Tipitaka in Roman Character :-
http://84000.org/tipitaka/read/roman_read.php?B=37&A=1423
             สารบัญพระไตรปิฎกเล่มที่ ๓๖
http://84000.org/tipitaka/read/?index_37