อรรถกถาเล่มที่ ๕๕ ภาษาบาลีอักษรไทย
 ปญฺจ.อ. (ปรมตฺถที.)

                            ๔. ชหติกถา
                       ๑. นสุตฺตาหรณกถาวณฺณนา
     [๒๗๙] อิทานิ ชหติกถา นาม โหติ. ตตฺถ เยสญฺจ ๑- "ฌานลาภี
ปุถุชฺชโน สห สจฺจาภิสมยา อนาคามี นาม โหติ, ตสฺส ปุถุชฺชนกาเลเยว
กามราคพฺยาปาทา ปหีนา"ติ ลทฺธิ เสยฺยถาปิ เอตรหิ สมิติยาทีนํ, ๒- เตสํ ตํ
ลทฺธึ ภินฺทิตุํ ชหติ ปุถุชฺชโนติ ปุจฺฉา สกวาทิสฺส, ฌานวิกฺขมฺภิตานํ ปน
เตสํ ปริยุฏฺฐานํ อปสฺสนฺตสฺส ปฏิญฺญา ปรวาทิสฺส. ยสฺมา ปน เตสํ
ฌานวิกฺขมฺภิตานมฺปิ อนาคามิมคฺเคเนว อจฺจนฺตํ ปหานํ โหติ, ตสฺมา ปุน
อจฺจนฺตนฺติอาทิอนุโยโค สกวาทิสฺส, ตถารูปสฺส ปหานสฺส อภาวโต ปฏิกฺเขโป
อิตรสฺส. วิกฺขมฺเภตีติ อจฺจนฺตวิกฺขมฺภนเมว สนฺธาย ปุจฺฉา สกวาทิสฺส. ตโต
ปรํ อนาคามิมคฺคฏฺเฐน สทฺธึ ปุถุชฺชนสํสนฺทนํ โหติ. ตํ อุตฺตานตฺถเมว.
     [๒๘๐] ตโต ปรํ อนาคามิผเล สณฺฐาตีติ ปุฏฺโฐ ฌานานาคามิตํ สนฺธาย
ปฏิชานาติ. อรหตฺเต สณฺฐาตีติ ปุฏฺโฐ ทสฺสนมคฺเคน อุทฺธมฺภาคิยานํ
ปหานาภาวโต ปฏิกฺขิปติ.
     อปุพฺพํ อจริมํ ตโย มคฺเคติ ปุฏฺโฐ ตถารูปาย ภาวนาย อภาวา
ปฏิกฺขิปติ. ปุน ปุฏฺโฐ ติณฺณํ มคฺคานํ กิจฺจสภาวํ ๓- สนฺธาย ปฏิชานาติ.
สามญฺญผลปุจฺฉาสุปิ เอเสว นโย. กตเมน มคฺเคนาติ ปุฏฺโฐ อนาคามิมคฺเคนาติ
ฌานานาคามิตํ สนฺธาย วทติ. ปุน สญฺโญชนปฺปหานํ ปุฏฺโฐ ติณฺณํ อนาคามิมคฺเคน
เตสํ กิเลสานํ อปฺปหีนตฺตา ๔- ปฏิกฺขิปติ. ทุติยํ ปุฏฺโฐ ปฐมมคฺคสฺเสว
ฌานานาคามิมคฺคภาวํ สนฺธาย ปฏิชานาติ. เสสเมตฺถ อุตฺตานตฺถเมวาติ.
                       ชหติกถาวณฺณนา นิฏฺฐิตา.
                            ---------
@เชิงอรรถ: ๑ ฉ.ม. เยสํ   ๒ ฉ.ม. สมฺมิติยานํ   ๓ ฉ.ม. กิจฺจสพฺภาวํ  ๔ ฉ.ม. อปฺปเหยฺยตฺตา

             อรรถกถาภาษาบาลีอักษรไทย เล่มที่ ๕๕ หน้า ๑๖๙.
http://84000.org/tipitaka/atthapali/read_th.php?B=55&A=3781&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=55&A=3781&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=37&i=286
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=37&A=3573
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=37&A=2570
             The Pali Tipitaka in Roman Character :-
http://84000.org/tipitaka/read/roman_read.php?B=37&A=2570
             สารบัญพระไตรปิฎกเล่มที่ ๓๖
http://84000.org/tipitaka/read/?index_37