อรรถกถาเล่มที่ ๕๕ ภาษาบาลีอักษรไทย
 ปญฺจ.อ. (ปรมตฺถที.)

                       ๑๐. อนิจฺจตากถาวณฺณนา
     [๖๒๘] อิทานิ อนิจฺจตากถา นาม โหติ. ตตฺถ "อนิจฺจานํ รูปาทีนํ
อนิจฺจตาปิ รูปาทโย วิย ปรินิปฺผนฺนา"ติ เยสํ ลทฺธิ เสยฺยถาปิ อนฺธกานํ,
เต สนฺธาย ปุจฺฉา สกวาทิสฺส, ปฏิญฺญา อิตรสฺส. อถ นํ "ยทิ เต รูปาทโย
วิย อนิจฺจตา ปรินิปฺผนฺนา, ตสฺสาปิ อญฺญาย ปรินิปฺผนฺนาย อนิจฺจตาย
ภวิตพฺพนฺ"ติ โจเทตุํ ตาย อนิจฺจตายาติอาทิมาห. อิตโร ทฺวินฺนํ อนิจฺจตาย เอกโต
อภาเวน ปฏิกฺขิปิตฺวา ปุน ยสฺมา สา อนิจฺจตา นิจฺจา น โหติ, เตเนว
อนิจฺเจน สทฺธึ อนฺตรธายติ, ตสฺมา ปฏิชานาติ. อถสฺส สกวาที เลโสกาสํ
อทตฺวา ยา เตน ทุติยา อนิจฺจตา ปฏิญฺญาตา, ตายปิ ตโต ปรายปีติ
ปรมฺปรวเสน อนุปจฺเฉทโทสํ อาโรเปนฺโต ตาย ตาเยวาติอาทิมาห. ชรา
ปรินิปฺผนฺนาติอาทิ ยสฺมา อุปฺปนฺนสฺส ชรามรณโต อญฺญา อนิจฺจตา นาม
นตฺถิ, ตสฺมา อนิจฺจตาวิภาคานุยุญฺชนวเสน วุตฺตํ. ตตฺรปิ ปรวาทิโน ปุริมนเยเนว
ปฏิญฺญา จ ปฏิกฺเขโป จ เวทิตพฺพา. ๑-
     [๖๒๙] รูปํ ปรินิปฺผนฺนนฺติอาทิ เยสํ สา อนิจฺจตา, เตหิ สทฺธึ
สํสนฺทนตฺถํ วุตฺตํ. ตตฺถ "ยถา ปรินิปฺผนฺนานํ รูปาทีนํ อนิจฺจตาชรามรณานิ
อตฺถิ, เอวํ ปรินิปฺผนฺนานํ อนิจฺจตาทีนํ ตานิ นตฺถี"ติ มญฺญมาโน เอกนฺเตน
ปฏิกฺขิปติเยวาติ.
                      อนิจฺจตากถาวณฺณนา นิฏฺฐิตา.
                      เอกาทสโม วคฺโค สมตฺโต.
                           -----------

             อรรถกถาภาษาบาลีอักษรไทย เล่มที่ ๕๕ หน้า ๒๖๐-๒๖๑.
http://84000.org/tipitaka/atthapali/read_th.php?B=55&A=5869&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=55&A=5869&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=37&i=1472
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=37&A=14972
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=37&A=9751
             The Pali Tipitaka in Roman Character :-
http://84000.org/tipitaka/read/roman_read.php?B=37&A=9751
             สารบัญพระไตรปิฎกเล่มที่ ๓๖
http://84000.org/tipitaka/read/?index_37