Atthakatha Book 55 : PALI ROMAN
Pañca.A. (paramatthadī.)

                         8. Samādhikathāvaṇṇanā
     [625-626] Idāni samādhikathā nāma hoti. Tattha yesaṃ ekacittakkhaṇe
uppannāpi ekaggatā samādhānaṭṭhena samādhīti aggahetvā "satta rattindivāni
ekantasukhaṃ paṭisaṃvedī viharitun"tiādivacanaṃ 1- nissāya "cittasantati samādhī"ti
laddhi seyyathāpi sabbatthikavādānañceva uttarāpathakānañca, te sandhāya
cittasantatīti pucchā sakavādissa, paṭiññā itarassa. Atha naṃ "yadi cittasantati
samādhi, cittasantati nāma atītāpi atthi, anāgatāpi atthi. Na hi ekaṃ
paccuppannacittameva cittasantati nāma hoti, kinte sabbāpi sā samādhī"ti
codetuṃ atītātiādimāha, itaro tathā anicchanto paṭikkhipati.
     Nanu atītaṃ niruddhantiādi "cittasantatiyaṃ paccuppannameva cittaṃ kiccakaraṃ,
atītānāgataṃ niruddhattā anuppannattā ca natthi, kathaṃ taṃ samādhi nāma hotī"ti
dassetuṃ vuttaṃ. Ekacittakkhaṇikoti pucchā paravādissa. Tato yā sakasamaye
"samādhiṃ bhikkhave bhāvethā"tiādīsu paccuppannakusalacittasampayuttā ekaggatā
samādhīti vuttā, taṃ sandhāya paṭiññā sakavādissa. Cakkhuviññāṇasamaṅgītiādi
"ekacittakkhaṇiko"ti vacanamattaṃ gahetvā chalena vuttaṃ, teneva sakavādinā
@Footnote: 1 Ma.mū. 12/180/142
Paṭikkhittaṃ. Nanu vuttaṃ bhagavatāti suttaṃ purimapacchimavasena vattamānassa samādhissa
abbokiṇṇataṃ sādheti, na santatiyā samādhibhāvaṃ, tasmā asādhakanti.
                       Samādhikathāvaṇṇanā niṭṭhitā.
                           ----------


             The Pali Atthakatha in Roman Book 55 page 259-260.
http://84000.org/tipitaka/atthapali/rm_line.php?B=55&A=5837
             อรรถกถาบาลีอักษรไทย :-
http://84000.org/tipitaka/atthapali/read_th.php?B=55&A=5837
             อ่านอรรถกถาแปลไทย :-
http://84000.org/tipitaka/attha/attha.php?b=37&i=1466
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=37&A=14898
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=37&A=9709
             The Pali Tipitaka in Roman Character :-
http://84000.org/tipitaka/read/roman_read.php?B=37&A=9709
             Contents of The Tipitaka Volume 36
http://84000.org/tipitaka/read/?index_37