ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๓๕ ภาษาบาลีอักษรไทย ชา.อ.๑ เอกนิปาต(๑)

                       ๙ นนฺทชาตกํ
     มญฺเญ โสวณฺณโย ราสีติ อิทํ สตฺถา เชตวเน วิหรนฺโต
สารีปุตฺตตฺเถรสฺส สทฺธิวิหาริกํ อารพฺภ กเถสิ ฯ
     โส กิร ภิกฺขุ สุวโจ อโหสิ วจนกฺขโม เถรสฺส มหนฺเตน
อุสฺสาเหน อุปการํ กโรติ ฯ อเถกํ สมยํ เถโร สตฺถารํ อาปุจฺฉิตฺวา
จาริกํ ปกฺกนฺโต ทกฺขิณาคิริชนปทํ อคมาสิ ฯ โส ภิกฺขุ ตตฺถ

--------------------------------------------------------------------------------------------- หน้าที่ ๓๓๕.

คตกาเล มานตฺถทฺโธ หุตฺวา เถรสฺส วจนํ น กโรติ ฯ อาวุโส อิทํ นาม กโรหีติ วุตฺเต ปน เถรสฺส ปฏิปกฺโข อโหสิ ฯ เถโร ตสฺส อชฺฌาสยํ น ชานาติ ฯ โส ตตฺถ จาริกํ จริตฺวา ปุน เชตวนํ อาคโต ฯ โส ภิกฺขุ เถรสฺส เชตวนวิหารํ อาคตกาลโต ปฏฺฐาย ปุน ตาทิโสว ชาโต ฯ เถโร ตถาคตสฺส อาโรเจสิ ภนฺเต มยฺหํ เอโก สทฺธิวิหาริโก เอกสฺมึ ฐาเน สเตน กีตทาโส วิย อโหสิ เอกสฺมึ ฐาเน มานตฺถทฺโธ หุตฺวา อิทนฺนาม กโรหีติ วุตฺเต ปฏิปกฺโข โหตีติ ฯ สตฺถา นายํ สารีปุตฺต ภิกฺขุ อิทาเนว เอวํสีโล ปุพฺเพเปส เอกํ ฐานํ คโต สเตน กีตทาโส วิย โหติ เอกํ ฐานํ คโต ปฏิปกฺโข ปฏิสตฺตุ โหตีติ วตฺวา เถเรน ยาจิโต อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต เอกสฺมึ กุฏุมฺพิกกุเล ปฏิสนฺธึ คณฺหิ ฯ ตสฺเสโก สหายโก กุฏุมฺพิโก สยํ มหลฺลโก ฯ ภริยา ปนสฺส ตรุณี ฯ สา ตํ นิสฺสาย ปุตฺตํ ปฏิลภิ ฯ โส จินฺเตสิ อยํ อิตฺถี ตรุณตฺตาว มม อจฺจเยน กญฺจิเทว ปุริสํ คเหตฺวา อิมํ มม ธนํ วินาเสยฺย ปุตฺตสฺส เม น ทเทยฺย ยนฺนูนาหํ อิมํ ธนํ ปฐวีคตํ กเรยฺยนฺติ ฯ ฆเร นนฺทํ นาม ทาสํ คเหตฺวา อรญฺญํ คนฺตฺวา เอกสฺมึ ฐาเน ตํ ธนํ นิทหิตฺวา ตสฺส อาจิกฺขิตฺวา ตาต นนฺท อิมํ ธนํ มม อจฺจเยน มยฺหํ ปุตฺตสฺส อาจิกฺเขยฺยาสิ มา ธนํ ปริจฺจชีติ โอวทิตฺวา กาลมกาสิ ฯ ปุตฺโตปิสฺส อนุกฺกเมน วยปฺปตฺโต ชาโต ฯ อถ นํ มาตา อาห ตาต ตว ปิตา นนฺททาสํ คเหตฺวา ธนํ นิเธสิ ตํ อาหราเปตฺวา กุฏุมฺพํ

--------------------------------------------------------------------------------------------- หน้าที่ ๓๓๖.

สณฺฐเปหีติ ฯ โส เอกทิวสํ นนฺทํ อาห มาตุล อตฺถิ กิญฺจิ มยฺหํ ปิตรา ธนํ นิทหิตนฺติ ฯ อาม สามีติ ฯ กหํ นิทหิตนฺติ ฯ อรญฺเญ สามีติ ฯ เตนหิ คจฺฉามาติ กุทฺทาลปิฏกํ อาทาย นิธิฏฺฐานํ คนฺตฺวา กหํ มาตุล ธนนฺติ อาห ฯ นนฺโท อารุยฺห ธนมตฺถเก ฐตฺวา ธนํ นิสฺสาย มานํ อุปฺปาเทตฺวา อเร ทาสีปุตฺตเจตก กุโต เต อิมสฺมึ ฐาเน ธนนฺติ กุมารํ อกฺโกสติ ฯ กุมาโร ตสฺส ผรุสวจนํ อสุณนฺโต วิย เตนหิ คจฺฉามาติ ตํ คเหตฺวา ปฏินิวตฺติตฺวา ปุน เทฺว ตโย ทิวเส อติกฺกมิตฺวา อคมาสิ ฯ นนฺโท ตเถว อกฺโกสติ ฯ กุมาโร เตน สทฺธึ ผรุสวจนํ อวตฺวา อยํ ทาโส อิโต ปฏฺฐาย ธนํ อาจิกฺขิสฺสามีติ คจฺฉติ คนฺตฺวา ปน อกฺโกสติ ตตฺถ การณํ น ชานามิ อตฺถิ นุ โข ปน เม ปิตุ สหาโย กุฏุมฺพิโก ตํ ปฏิปุจฺฉิตฺวา ชานิสฺสามีติ โพธิสตฺตสฺส สนฺติกํ คนฺตฺวา สพฺพํ ตํ ปวุตฺตึ อาโรเจตฺวา กินฺนุ โข ตาต การณนฺติ ปุจฺฉิ ฯ โพธิสตฺโต ยสฺมึ เต ตาต ฐาเน ฐิโต นนฺโท อกฺโกสติ ตตฺเถว ปิตุ สนฺตกํ ธนํ ตสฺมา ยทา เต นนฺโท อกฺโกสติ ตทา นํ เอหิ อเร ทาสก อกฺโกสสีติ อากฑฺฒิตฺวา กุทฺทาลํ คเหตฺวา ตณฺฐานํ ภินฺทิตฺวา กุลสนฺตกํ ธนํ นีหริตฺวา ทาสํ อุกฺขิปาเปตฺวา ธนํ อาหราติ วตฺวา อิมํ คาถมาห มญฺเญ โสวณฺณโย ราสิ โสวณฺณมาลา จ นนฺทโก ยตฺถ ทาโส อามชาโต ฐิโต ถุลฺลานิ คชฺชตีติ ฯ ตตฺถ มญฺเญติ เอวํ อหํ ชานามิ ฯ โสวณฺณโยติ สุนฺทโร

--------------------------------------------------------------------------------------------- หน้าที่ ๓๓๗.

วณฺโณ เอเตสนฺติ สุวณฺณานิ ฯ กานิ ตานิ ฯ รชตมณิกาญฺจนปวาฬาทีนิ รตนานิ ฯ อิมสฺมึ หิ ฐาเน สพฺพาเนตานิ สุวณฺณานีติ อธิปฺเปตานิ ฯ เตสํ ราสิ โสวณฺณโย ราสิ ฯ โสวณฺณมาลา จาติ ตุยฺหํ ปิตุ สนฺตกา สุวณฺณมาลาปิ จ เอตฺเถวาติ มญฺญามิ ฯ นนฺทโก ยตฺถ ทาโสติ ยสฺมึ ฐาเน ฐิโต นนฺทโก ทาโส ฯ อามชาโตติ อาม อหํ โว ทาสีติ เอวํ ทาสพฺยํ อุปคตาย อามทาสีสงฺขาตาย ทาสิยา ปุตฺโต ฯ ฐิโต ถุลฺลานิ คชฺชตีติ โส ยสฺมึ ฐาเน ฐิโต ถุลฺลานิ ผรุสวจนานิ วทติ ตตฺเถว เต กุลธนํ เอวมหนฺตํ มญฺญามีติ โพธิสตฺโต กุมารสฺส ธนคหณุปายํ อาจิกฺขิ ฯ กุมาโร โพธิสตฺตํ วนฺทิตฺวา ฆรํ คนฺตฺวา นนฺทํ อาทาย นิธิฏฺฐานํ คนฺตฺวา ยถานุสิฏฺฐํ ปฏิปชฺชิตฺวา ตํ ธนํ อาหริตฺวา กุฏุมฺพํ สณฺฐเปตฺวา โพธิสตฺตสฺส โอวาเท ฐตฺวา ทานาทีนิ ปุญฺญานิ กตฺวา ชีวิตปริโยสาเน ยถากมฺมํ คโต ฯ สตฺถา ปุพฺเพเปโส เอวํสีโลเยวาติ วตฺวา อิมํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ ตทา นนฺโท สารีปุตฺตสฺส สทฺธิวิหาริโก อโหสิ กุฏุมฺพิกปุตฺโต สารีปุตฺโต ปณฺฑิตกุฏุมฺพิโก ปน อหเมวาติ ฯ นนฺทชาตกํ นวมํ ฯ ----------


             อรรถกถาภาษาบาลีอักษรไทย เล่มที่ ๓๕ หน้า ๓๓๔-๓๓๗. http://84000.org/tipitaka/atthapali/th_line.php?B=35&A=6891&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=35&A=6891&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=27&i=39              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=257              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=253              The Pali Tipitaka in Roman Character :- http://84000.org/tipitaka/read/roman_read.php?B=27&A=253              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]