ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๕ ภาษาบาลี อักษรไทย พระวินัยปิฎกเล่มที่ ๕ วินย. มหาวคฺโค (๒)

     [๑๙๓]   เอกจฺจสฺส   ภิกฺขเว   สงฺฆมชฺเฌ   ปฏิกฺโกสนา   รูหติ
เอกจฺจสฺส   น   รูหติ   ฯ  กสฺส  จ  ภิกฺขเว  สงฺฆมชฺเฌ  ปฏิกฺโกสนา
น   รูหติ  ฯ  ภิกฺขุนิยา  ภิกฺขเว  สงฺฆมชฺเฌ  ปฏิกฺโกสนา  น  รูหติ  ฯ
สิกฺขมานาย    ภิกฺขเว    ฯเปฯ   สามเณรสฺส   ภิกฺขเว   สามเณริยา
ภิกฺขเว   สิกฺขํ   ปจฺจกฺขาตกสฺส   ภิกฺขเว   อนฺติมวตฺถุํ   อชฺฌาปนฺนกสฺส
ภิกฺขเว    อุมฺมตฺตกสฺส   ภิกฺขเว   ขิตฺตจิตฺตสฺส   ภิกฺขเว   เวทนฏฺฏสฺส
ภิกฺขเว    อาปตฺติยา    อทสฺสเน   อุกฺขิตฺตกสฺส   ภิกฺขเว   อาปตฺติยา
อปฺปฏิกมฺเม      อุกฺขิตฺตกสฺส      ภิกฺขเว      ปาปิกาย     ทิฏฺฐิยา
อปฺปฏินิสฺสคฺเค      อุกฺขิตฺตกสฺส     ภิกฺขเว     ปณฺฑกสฺส     ภิกฺขเว
เถยฺยสํวาสกสฺส        ภิกฺขเว       ติตฺถิยปกฺกนฺตกสฺส       ภิกฺขเว
ติรจฺฉานคตสฺส     ภิกฺขเว     มาตุฆาตกสฺส    ภิกฺขเว    ปิตุฆาตกสฺส
ภิกฺขเว     อรหนฺตฆาตกสฺส     ภิกฺขเว     ภิกฺขุนีทูสกสฺส     ภิกฺขเว
สงฺฆเภทกสฺส    ภิกฺขเว   โลหิตุปฺปาทกสฺส   ภิกฺขเว   อุภโตพฺยญฺชนกสฺส
ภิกฺขเว    นานาสํวาสกสฺส    ภิกฺขเว   นานาสีมาย   ฐิตสฺส   ภิกฺขเว
อิทฺธิยา   เวหาเส   ฐิตสฺส  ภิกฺขเว  ยสฺส  สงฺโฆ  กมฺมํ  กโรติ  ตสฺส
[๑]-   ภิกฺขเว   สงฺฆมชฺเฌ   ปฏิกฺโกสนา   น  รูหติ  ฯ  อิเมสํ  โข
ภิกฺขเว   สงฺฆมชฺเฌ   ปฏิกฺโกสนา   น   รูหติ   ฯ  กสฺส  จ  ภิกฺขเว
สงฺฆมชฺเฌ    ปฏิกฺโกสนา   รูหติ   ฯ   ภิกฺขุสฺส   ภิกฺขเว   ปกตตฺตสฺส
สมานสํวาสกสฺส    สมานสีมาย    ฐิตสฺส    อนฺตมโส    อนนฺตริกสฺสาปิ
ภิกฺขุโน     วิญฺญาเปนฺตสฺส    สงฺฆมชฺเฌ    ปฏิกฺโกสนา    รูหติ    ฯ
อิมสฺส โข ภิกฺขเว สงฺฆมชฺเฌ ปฏิกฺโกสนา รูหติ ฯ
     [๑๙๔]   เทฺวมา   ภิกฺขเว   นิสฺสารณา  อตฺถิ  ภิกฺขเว  ปุคฺคโล
อปฺปตฺโต   นิสฺสารณํ  ตํ  เจ  สงฺโฆ  นิสฺสาเรติ  เอกจฺโจ  สุนิสฺสาริโต
เอกจฺโจ   ทุนฺนิสฺสาริโต   ฯ   กตโม   จ  ภิกฺขเว  ปุคฺคโล  อปฺปตฺโต
นิสฺสารณํ   ตํ   เจ   สงฺโฆ  นิสฺสาเรติ  ทุนฺนิสฺสาริโต  ฯ  อิธ  [๒]-
ภิกฺขเว   ภิกฺขุ   สุทฺโธ  โหติ  อนาปตฺติโก  ตํ  เจ  สงฺโฆ  นิสฺสาเรติ
ทุนฺนิสฺสาริโต    ฯ    อยํ    วุจฺจติ    ภิกฺขเว    ปุคฺคโล   อปฺปตฺโต
นิสฺสารณํ   ตํ   เจ   สงฺโฆ   นิสฺสาเรติ   ทุนฺนิสฺสาริโต   ฯ   กตโม
@เชิงอรรถ:  โป. ม. จ ฯ  ม. ยุ. ปน ฯ
จ   ภิกฺขเว   ปุคฺคโล  อปฺปตฺโต  นิสฺสารณํ  ตํ  เจ  สงฺโฆ  นิสฺสาเรติ
สุนิสฺสาริโต  ฯ  อิธ  ภิกฺขเว  ภิกฺขุ  พาโล  โหติ อพฺยตฺโต อาปตฺติพหุโล
อนปทาโน   คิหิสํสฏฺโฐ   วิหรติ   อนนุโลมิเกหิ   คิหิสํสคฺเคหิ   ตํ  เจ
สงฺโฆ   นิสฺสาเรติ   สุนิสฺสาริโต   ฯ   อยํ   วุจฺจติ  ภิกฺขเว  ปุคฺคโล
อปฺปตฺโต นิสฺสารณํ ตํ เจ สงฺโฆ นิสฺสาเรติ สุนิสฺสาริโต ฯ
     [๑๙๕]   เทฺวมา   ภิกฺขเว   โอสารณา  อตฺถิ  ภิกฺขเว  ปุคฺคโล
อปฺปตฺโต   โอสารณํ   ตํ  เจ  สงฺโฆ  โอสาเรติ  เอกจฺโจ  โสสาริโต
เอกจฺโจ   โทสาริโต   ฯ   กตโม   จ   ภิกฺขเว   ปุคฺคโล  อปฺปตฺโต
โอสารณํ    ตํ   เจ   สงฺโฆ   โอสาเรติ   โทสาริโต   ฯ   ปณฺฑโก
ภิกฺขเว   อปฺปตฺโต  โอสารณํ  ตญฺเจ  สงฺโฆ  โอสาเรติ  โทสาริโต  ฯ
เถยฺยสํวาสโก     ภิกฺขเว     ฯเปฯ     ติตฺถิยปกฺกนฺตโก     ภิกฺขเว
ติรจฺฉานคโต    ภิกฺขเว   มาตุฆาตโก   ภิกฺขเว   ปิตุฆาตโก   ภิกฺขเว
อรหนฺตฆาตโก     ภิกฺขเว     ภิกฺขุนีทูสโก     ภิกฺขเว    สงฺฆเภทโก
ภิกฺขเว     โลหิตุปฺปาทโก     ภิกฺขเว     อุภโตพฺยญฺชนโก    ภิกฺขเว
อปฺปตฺโต   โอสารณํ   ตํ   เจ   สงฺโฆ   โอสาเรติ   โทสาริโต   ฯ
อยํ   วุจฺจติ   ภิกฺขเว   ปุคฺคโล   อปฺปตฺโต  โอสารณํ  ตํ  เจ  สงฺโฆ
โอสาเรติ   โทสาริโต   ฯ   กตโม   จ   ภิกฺขเว  ปุคฺคโล  อปฺปตฺโต
โอสารณํ  ตํ  เจ  สงฺโฆ  โอสาเรติ  โสสาริโต  [๑]-  ฯ หตฺถจฺฉินฺโน
ภิกฺขเว  อปฺปตฺโต  โอสารณํ  ตํ  เจ  สงฺโฆ  โอสาเรติ  โสสาริโต  ฯ
ปาทจฺฉินฺโน      ภิกฺขเว      ฯเปฯ     หตฺถปาทจฺฉินฺโน     ภิกฺขเว
@เชิงอรรถ:  ม. ยุ. อิเม วุจฺจนฺติ ภิกฺขเว ปุคฺคลา อปฺปตฺตา โอสารณํ เต เจ สงฺโฆ โอสาเรติ
@โทสาริตา ฯ
กณฺณจฺฉินฺโน     ภิกฺขเว     นาสจฺฉินฺโน    ภิกฺขเว    กณฺณนาสจฺฉินฺโน
ภิกฺขเว   องฺคุลิจฺฉินฺโน   ภิกฺขเว   อฬจฺฉินฺโน   ภิกฺขเว   กณฺฑรจฺฉินฺโน
ภิกฺขเว    ผณหตฺถโก   ภิกฺขเว   ขุชฺโช   ภิกฺขเว   วามโน   ภิกฺขเว
คลคณฺฑี     ภิกฺขเว    ลกฺขณาหโต    ภิกฺขเว    กสาหโต    ภิกฺขเว
ลิขิตโก   ภิกฺขเว   สีปที   ๑-  ภิกฺขเว  ปาปโรคี  ภิกฺขเว  ปริสทูสโก
ภิกฺขเว   กาโณ   ภิกฺขเว   กุณี   ภิกฺขเว   ขญฺโช  ภิกฺขเว  ปกฺขหโต
ภิกฺขเว    ฉินฺนิริยปโถ    ภิกฺขเว    ชราทุพฺพโล    ภิกฺขเว    อนฺโธ
ภิกฺขเว   มูโค  ภิกฺขเว  พธิโร  ภิกฺขเว  อนฺธมูโค  ภิกฺขเว  อนฺธพธิโร
ภิกฺขเว    มูคพธิโร    ภิกฺขเว    อนฺธมูคพธิโร    ภิกฺขเว   อปฺปตฺโต
โอสารณํ   ตํ   เจ   สงฺโฆ   โอสาเรติ   โสสาริโต  ฯ  อยํ  วุจฺจติ
ภิกฺขเว   ปุคฺคโล   อปฺปตฺโต   โอสารณํ   ตํ   เจ  สงฺโฆ  โอสาเรติ
โสสาริโต [๒]- ฯ
                      วาสภคามภาณวารํ ปฐมํ ๓-

             เนื้อความพระไตรปิฎกฉบับภาษาบาลี อักษรไทย เล่มที่ ๕ หน้าที่ ๒๖๒-๒๖๕. https://84000.org/tipitaka/read/pali_read.php?B=5&A=5438&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=5&A=5438&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=5&item=193&items=3              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=5&siri=52              สารบัญพระไตรปิฎกเล่มที่ ๕ https://84000.org/tipitaka/read/?index_5 https://84000.org/tipitaka/english/?index_5

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]