ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร

     [๑๑๔๓]   กตีนํ   ปุคฺคลานํ   กฐินตฺถารา   น   รูหนฺติ   กตีนํ
ปุคฺคลานํ    กฐินตฺถารา   รูหนฺติ   ฯ   ติณฺณํ   ปุคฺคลานํ   กฐินตฺถารา
น    รูหนฺติ    ติณฺณํ   ปุคฺคลานํ   กฐินตฺถารา   รูหนฺติ   ฯ   กตเมสํ
ติณฺณํ   ปุคฺคลานํ   กฐินตฺถารา   น   รูหนฺติ   ฯ  นิสฺสีมฏฺโฐ  อนุโมทติ
อนุโมทนฺโต   น  วาจํ  ภินฺทติ  วาจํ  ภินฺทนฺโต  น  ปรํ  วิญฺญาเปติ  ฯ
อิเมสํ    ติณฺณํ    ปุคฺคลานํ   กฐินตฺถารา   น   รูหนฺติ   ฯ   กตเมสํ
ติณฺณํ    ปุคฺคลานํ    กฐินตฺถารา    รูหนฺติ    ฯ   สีมฏฺโฐ   อนุโมทติ
อนุโมทนฺโต   วาจํ   ภินฺทติ   วาจํ   ภินฺทนฺโต   ปรํ   วิญฺญาเปติ   ฯ
อิเมสํ ติณฺณํ ปุคฺคลานํ กฐินตฺถารา รูหนฺติ ฯ
     [๑๑๔๔]   กติ   กฐินตฺถารา   น   รูหนฺติ   กติ   กฐินตฺถารา
รูหนฺติ    ฯ    ตโย   กฐินตฺถารา   น   รูหนฺติ   ตโย   กฐินตฺถารา
รูหนฺติ   ฯ   กตเม  ตโย  กฐินตฺถารา  น  รูหนฺติ  ฯ  วตฺถุวิปนฺนญฺเจว
โหติ    กาลวิปนฺนญฺจ   กรณวิปนฺนญฺจ   ฯ   อิเม   ตโย   กฐินตฺถารา
น   รูหนฺติ  ฯ  กตเม  ตโย  กฐินตฺถารา  รูหนฺติ  ฯ  วตฺถุสมฺปนฺนญฺเจว
โหติ   กาลสมฺปนฺนญฺจ   กรณสมฺปนฺนญฺจ   ฯ   อิเม   ตโย  กฐินตฺถารา
รูหนฺติ ฯ
     [๑๑๔๕]   กฐินํ   ชานิตพฺพํ   กฐินตฺถาโร   ชานิตพฺโพ   กฐินสฺส
อตฺถารมาโส     ชานิตพฺโพ     กฐินสฺส    อตฺถารวิปตฺติ    ชานิตพฺพา
กฐินสฺส     อตฺถารสมฺปตฺติ     ชานิตพฺพา     นิมิตฺตกมฺมํ     ชานิตพฺพํ
ปริกถา     ชานิตพฺพา    กุกฺกุกตํ    ชานิตพฺพํ    สนฺนิธิ    ชานิตพฺพา
นิสฺสคฺคิยํ ชานิตพฺพํ ฯ
     [๑๑๔๖]   กฐินํ   ชานิตพฺพนฺติ   เตสญฺเญว   ธมฺมานํ   สงฺคโห
สมวาโย   นามํ   นามกมฺมํ   นามเธยฺยํ   นิรุตฺติ   พฺยญฺชนํ   อภิลาโป
ยทิทํ   กฐินนฺติ   ฯ   กฐินสฺส   อตฺถารมาโส   ชานิตพฺโพติ  วสฺสานสฺส
ปจฺฉิโม   มาโส   ชานิตพฺโพ   ฯ   กฐินสฺส  อตฺถารวิปตฺติ  ชานิตพฺพาติ
จตุวีสติยา   อากาเรหิ   กฐินสฺส  อตฺถารวิปตฺติ  ชานิตพฺพา  ฯ  กฐินสฺส
อตฺถารสมฺปตฺติ     ชานิตพฺพาติ     สตฺตรสหิ     อากาเรหิ    กฐินสฺส
อตฺถารสมฺปตฺติ    ชานิตพฺพา    ฯ    นิมิตฺตกมฺมํ   ชานิตพฺพนฺติ   นิมิตฺตํ
กโรติ   อิมินา   ทุสฺเสน  กฐินํ  อตฺถริสฺสามีติ  ฯ  ปริกถา  ชานิตพฺพาติ
ปริกถํ    กโรติ   อิมาย   ปริกถาย   กฐินทุสฺสํ   นิพฺพตฺเตสฺสามีติ   ฯ
กุกฺกุกตํ   ชานิตพฺพนฺติ   อนาทิยทานํ   ชานิตพฺพํ  ฯ  สนฺนิธิ  ชานิตพฺพาติ
เทฺว  สนฺนิธิโย  ชานิตพฺพา  กรณสนฺนิธิ  จ  ๑-  นิจยสนฺนิธิ  จ  ๑-  ฯ
นิสฺสคฺคิยํ ชานิตพฺพนฺติ กยิรมาเน อรุณํ อุทฺริยติ ๒- ฯ
     [๑๑๔๗]   กฐินตฺถาโร   ชานิตพฺโพติ   สเจ   สงฺฆสฺส  กฐินทุสฺสํ
อุปฺปนฺนํ    โหติ    สงฺเฆน    กถํ    ปฏิปชฺชิตพฺพํ   อตฺถารเกน   กถํ
ปฏิปชฺชิตพฺพํ   อนุโมทเกน   กถํ   ปฏิปชฺชิตพฺพํ  ฯ  สงฺเฆน  ญตฺติทุติเยน
กมฺเมน   กฐินตฺถารกสฺส   ภิกฺขุโน   ทาตพฺพํ   ฯ  เตน  กฐินตฺถารเกน
ภิกฺขุนา    ตทเหว    โธวิตฺวา    วิมชฺชิตฺวา   วิจาเรตฺวา   ฉินฺทิตฺวา
สิพฺเพตฺวา    รชิตฺวา   กปฺปํ   กตฺวา   กฐินํ   อตฺถริตพฺพํ   ฯ   สเจ
สงฺฆาฏิยา     กฐินํ    อตฺถริตุกาโม    โหติ    โปราณิกา    สงฺฆาฏิ
@เชิงอรรถ:  ม. วา ฯ   ม. อุฏฺฐหติ ฯ
ปจฺจุทฺธริตพฺพา    นวา    สงฺฆาฏิ   อธิฏฺฐาตพฺพา   อิมาย   สงฺฆาฏิยา
กฐินํ   อตฺถรามีติ   วาจา   ภินฺทิตพฺพา  ฯ  สเจ  อุตฺตราสงฺเคน  กฐินํ
อตฺถริตุกาโม     โหติ    โปราณโก    อุตฺตราสงฺโค    ปจฺจุทฺธริตพฺโพ
นโว    อุตฺตราสงฺโค    อธิฏฺฐาตพฺโพ   อิมินา   อุตฺตราสงฺเคน   กฐินํ
อตฺถรามีติ    วาจา    ภินฺทิตพฺพา   ฯ   สเจ   อนฺตรวาสเกน   กฐินํ
อตฺถริตุกาโม     โหติ    โปราณโก    อนฺตรวาสโก    ปจฺจุทฺธริตพฺโพ
นโว    อนฺตรวาสโก    อธิฏฺฐาตพฺโพ   อิมินา   อนฺตรวาสเกน   กฐินํ
อตฺถรามีติ   วาจา   ภินฺทิตพฺพา   ฯ   เตน   กฐินตฺถารเกน   ภิกฺขุนา
สงฺฆํ   อุปสงฺกมิตฺวา   เอกํสํ  อุตฺตราสงฺคํ  กริตฺวา  อญฺชลึ  ปคฺคเหตฺวา
เอวมสฺส    วจนีโย    อตฺถตํ    ภนฺเต    สงฺฆสฺส    กฐินํ   ธมฺมิโก
กฐินตฺถาโร อนุโมทถาติ ฯ
     {๑๑๔๗.๑}   เตหิ  อนุโมทเกหิ  ภิกฺขูหิ  เอกํสํ อุตฺตราสงฺคํ กริตฺวา
อญฺชลึ   ปคฺคเหตฺวา   เอวมสฺส   วจนีโย   อตฺถตํ   อาวุโส   สงฺฆสฺส
กฐินํ   ธมฺมิโก   กฐินตฺถาโร   อนุโมทามาติ   ฯ  เตน  กฐินตฺถารเกน
ภิกฺขุนา    สมฺพหุเล    ภิกฺขู    อุปสงฺกมิตฺวา    เอกํสํ    อุตฺตราสงฺคํ
กริตฺวา    อญฺชลึ   ปคฺคเหตฺวา   เอวมสฺส   วจนียา   อตฺถตํ   ภนฺเต
สงฺฆสฺส    กฐินํ    ธมฺมิโก    กฐินตฺถาโร    อนุโมทถาติ   ฯ   เตหิ
อนุโมทเกหิ     ภิกฺขูหิ     เอกํสํ    อุตฺตราสงฺคํ    กริตฺวา    อญฺชลึ
ปคฺคเหตฺวา  เอวมสฺส  วจนีโย  อตฺถตํ  อาวุโส  สงฺฆสฺส  กฐินํ  ธมฺมิโก
กฐินตฺถาโร    อนุโมทามาติ    ฯ    เตน    กฐินตฺถารเกน   ภิกฺขุนา
เอกํ     ภิกฺขุํ     อุปสงฺกมิตฺวา     เอกํสํ    อุตฺตราสงฺคํ    กริตฺวา
อญฺชลึ   ปคฺคเหตฺวา   เอวมสฺส   วจนีโย   อตฺถตํ   อาวุโส   สงฺฆสฺส
กฐินํ    ธมฺมิโก   กฐินตฺถาโร   อนุโมทาหีติ   ฯ   เตน   อนุโมทเกน
ภิกฺขุนา   เอกํสํ   อุตฺตราสงฺคํ   กริตฺวา  อญฺชลึ  ปคฺคเหตฺวา  เอวมสฺส
วจนีโย    อตฺถตํ    อาวุโส   สงฺฆสฺส   กฐินํ   ธมฺมิโก   กฐินตฺถาโร
อนุโมทามีติ ฯ
     [๑๑๔๘]   สงฺโฆ   กฐินํ  อตฺถรติ  คโณ  กฐินํ  อตฺถรติ  ปุคฺคโล
กฐินํ   อตฺถรตีติ   ฯ   น   สงฺโฆ   กฐินํ   อตฺถรติ   น  คโณ  กฐินํ
อตฺถรติ   ปุคฺคโล   กฐินํ   อตฺถรตีติ   ฯ   หญฺจิ   น   สงฺโฆ   กฐินํ
อตฺถรติ    น    คโณ    กฐินํ    อตฺถรติ   ปุคฺคโล   กฐินํ   อตฺถรติ
สงฺฆสฺส    อนตฺถตํ    โหติ    กฐินํ   คณสฺส   อนตฺถตํ   โหติ   กฐินํ
ปุคฺคลสฺส    อตฺถตํ   โหติ   กฐินํ   ฯ   สงฺโฆ   ปาติโมกฺขํ   อุทฺทิสติ
คโณ ปาติโมกฺขํ อุทฺทิสติ ปุคฺคโล ปาติโมกฺขํ อุทฺทิสฺสตีติ ฯ
     {๑๑๔๘.๑}   น  สงฺโฆ  ปาติโมกฺขํ  อุทฺทิสติ  น  คโณ  ปาติโมกฺขํ
อุทฺทิสติ  ปุคฺคโล  ปาติโมกฺขํ  อุทฺทิสตีติ  ฯ  หญฺจิ  น  สงฺโฆ  ปาติโมกฺขํ
อุทฺทิสติ    น    คโณ    ปาติโมกฺขํ    อุทฺทิสติ   ปุคฺคโล   ปาติโมกฺขํ
อุทฺทิสติ    สงฺฆสฺส   อนุทฺทิฏฺฐํ   โหติ   ปาติโมกฺขํ   คณสฺส   อนุทฺทิฏฺฐํ
โหติ    ปาติโมกฺขํ    ปุคฺคลสฺส    อุทฺทิฏฺฐํ    โหติ    ปาติโมกฺขํ   ฯ
สงฺฆสฺส    สามคฺคิยา    คณสฺส    สามคฺคิยา    ปุคฺคลสฺส    อุทฺเทสา
สงฺฆสฺส   อุทฺทิฏฺฐํ   โหติ  ปาติโมกฺขํ  คณสฺส  อุททิฏฺฐํ  โหติ  ปาติโมกฺขํ
ปุคฺคลสฺส  อุทฺทิฏฺฐํ  โหติ  ปาติโมกฺขํ  ฯ  เอวเมว น สงฺโฆ กฐินํ อตฺถรติ
น    คโณ    กฐินํ    อตฺถรติ    ปุคฺคโล   กฐินํ   อตฺถรติ   สงฺฆสฺส
อนุโมทนาย    คณสฺส    อนุโมทนาย    ปุคฺคลสฺส   อตฺถารา   สงฺฆสฺส
อตฺถตํ    โหติ    กฐินํ    คณสฺส    อตฺถตํ   โหติ   กฐินํ   ปุคฺคลสฺส
อตฺถตํ โหติ กฐินนฺติ ฯ
     [๑๑๔๙]      ปกฺกมนนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
                       กตโม ปลิโพโธ ปฐมํ ฉิชฺชติ ฯ
                       ปกฺกมนนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ วิสฺสชฺชิสฺสํ
                       จีวรปลิโพโธ ปฐมํ ฉิชฺชติ
           ตสฺส สห พหิสีมคมนา อาวาสปลิโพโธ ฉิชฺชติ ฯ
     [๑๑๕๐]      นิฏฺฐานนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
                       กตโม ปลิโพโธ ปฐมํ ฉิชฺชติ ฯ
                       นิฏฺฐานนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ วิสฺสชฺชิสฺสํ
                       อาวาสปลิโพโธ ปฐมํ ฉิชฺชติ
                       จีวเร นิฏฺฐิเต จีวรปลิโพโธ ฉิชฺชติ ฯ
     [๑๑๕๑]      สนฺนิฏฺฐานนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
                       กตโม ปลิโพโธ ปฐมํ ฉิชฺชติ ฯ
                       สนฺนิฏฺฐานนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ วิสฺสชฺชิสฺสํ
                       เทฺว ปลิโพธา อปุพฺพํ อจริมํ ฉิชฺชนฺติ ฯ
     [๑๑๕๒]      นาสนนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
                       กตโม ปลิโพโธ ปฐมํ ฉิชฺชติ ฯ
                       นาสนนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ วิสฺสชฺชิสฺสํ
                       อาวาสปลิโพโธ ปฐมํ ฉิชฺชติ
                       จีวเร นฏฺเฐ จีวรปลิโพโธ ฉิชฺชติ ฯ
     [๑๑๕๓]      สวนนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
                       กตโม ปลิโพโธ ปฐมํ ฉิชฺชติ ฯ
                       สวนนฺติโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ วิสฺสชฺชิสฺสํ
                       จีวรปลิโพโธ ปฐมํ ฉิชฺชติ
            ตสฺส สห สวเนน อาวาสปลิโพโธ ฉิชฺชติ ฯ
     [๑๑๕๔]      อาสาวจฺเฉทิโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
                       กตโม ปลิโพโธ ปฐมํ ฉิชฺชติ ฯ
                       อาสาวจฺเฉทิโก กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ วิสฺสชฺชิสฺสํ
                       อาวาสปลิโพโธ ปฐมํ ฉิชฺชติ
            จีวราสาย อุปจฺฉินฺนาย จีวรปลิโพโธ ฉิชฺชติ ฯ
     [๑๑๕๕]      สีมาติกฺกนฺติโก ๑- กฐินุทฺธาโร
                       วุตฺโต อาทิจฺจพนฺธุนา
                       เอตญฺจ ตาหํ ปุจฺฉามิ
@เชิงอรรถ:  ม. สีมาติกฺกมนนฺติโก ฯ
                     กตโม ปลิโพโธ ปฐมํ ฉิชฺชติ ฯ
                     สีมาติกฺกนฺติโก ๑- กฐินุทฺธาโร
                     วุตฺโต อาทิจฺจพนฺธุนา
                     เอตญฺจ ตาหํ วิสฺสชฺชิสฺสํ
                     จีวรปลิโพโธ ปฐมํ ฉิชฺชติ
           ตสฺส พหิสีมคตสฺส ๒- อาวาสปลิโพโธ ฉิชฺชติ ฯ
     [๑๑๕๖]    สหุพฺภาโร กฐินุทฺธาโร
                     วุตฺโต อาทิจฺจพนฺธุนา
                     เอตญฺจ ตาหํ ปุจฺฉามิ
                     กตโม ปลิโพโธ ปฐมํ ฉิชฺชติ ฯ
                     สหุพฺภาโร กฐินุทฺธาโร
                     วุตฺโต อาทิจฺจพนฺธุนา
                     เอตญฺจ ตาหํ วิสฺสชฺชิสฺสํ
               เทฺว ปลิโพธา อปุพฺพํ อจริมํ ฉิชฺชนฺตีติ ฯ
     [๑๑๕๗]   กติ    กฐินุทฺธารา   สงฺฆาธีนา   กติ   กฐินุทฺธารา
ปุคฺคลาธีนา   กติ   กฐินุทฺธารา   เนว  สงฺฆาธีนา  น  ปุคฺคลาธีนา  ฯ
เอโก  กฐินุทฺธาโร  สงฺฆาธีโน  อนฺตรุพฺภาโร  ฯ  จตฺตาโร  กฐินุทฺธารา
ปุคฺคลาธีนา      ปกฺกมนนฺติโก      นิฏฺฐานนฺติโก      สนฺนิฏฺฐานนฺติโก
สีมาติกฺกนฺติโก    ฯ   จตฺตาโร   กฐินุทฺธารา   เนว   สงฺฆาธีนา   น
ปุคฺคลาธีนา นาสนนฺติโก สวนนฺติโก อาสาวจฺเฉทิโก สหุพฺภาโร ฯ
@เชิงอรรถ:  ม. สีมาติกฺกมนฺติโก ฯ
     [๑๑๕๘]   กติ  กฐินุทฺธารา  อนฺโตสีมาย อุทฺธริยนฺติ กติ กฐินุทฺธารา
พหิสีมาย  อุทฺธริยนฺติ  ๑-  กติ  กฐินุทฺธารา  สิยา อนฺโตสีมาย อุทฺธริยนฺติ
สิยา  พหิสีมาย  อุทฺธริยนฺติ ๑- ฯ เทฺว กฐินุทฺธารา อนฺโตสีมาย อุทฺธริยนฺติ
อนฺตรุพฺภาโร  สหุพฺภาโร  ฯ  ตโย  กฐินุทฺธารา  พหิสีมาย อุทฺธริยนฺติ ๑-
ปกฺกมนนฺติโก  สวนนฺติโก  สีมาติกฺกนฺติโก  ฯ  จตฺตาโร  กฐินุทฺธารา สิยา
อนฺโตสีมาย   อุทฺธริยนฺติ  สิยา  พหิสีมาย  อุทฺธริยนฺติ  ๑-  นิฏฺฐานนฺติโก
สนฺนิฏฺฐานนฺติโก นาสนนฺติโก อาสาวจฺเฉทิโก ฯ
     [๑๑๕๙]   กติ   กฐินุทฺธารา   เอกุปฺปาทา   เอกนิโรธา   กติ
กฐินุทฺธารา  เอกุปฺปาทา  นานานิโรธา  ฯ  เทฺว กฐินุทฺธารา เอกุปฺปาทา
เอกนิโรธา      อนฺตรุพฺภาโร      สหุพฺภาโร      ฯ      อวเสสา
กฐินุทฺธารา เอกุปฺปาทา นานานิโรธาติ ฯ
                            กฐินเภทํ ๒- นิฏฺฐิตํ ฯ
                                  ตสฺสุทฺทานํ
     [๑๑๖๐]   กสฺส กินฺติ ปณฺณรส ธมฺมา   นิทานเหตุปจฺจยา
                  สงฺคหมูลมาทิ จ                  อฏฺฐปุคฺคลเภทา
                  ติณฺณํ ตโย ชานิตพฺพา         อตฺถารอุทฺเทเสน จ
                  ปลิโพธาธินา สีมา จ            อุปฺปาทนิโรเธน จาติ ๓- ฯ
                                ปริวารํ นิฏฺฐิตํ ฯ
@เชิงอรรถ:  ม. ยุ. อุทฺธริยฺยนฺติ ฯ   ม. ยุ. กฐินเภโท นิฏฺฐิโต ฯ
@ มรมฺมร ยุโรปิยโปตฺถเกสุ อาคตุทฺทานํ เยภุยฺเยน วิสทิสํ โหติ ฯ อิจฺฉนฺเตน
@ตตฺถ โอโลเกตพฺพํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๘ หน้าที่ ๔๓๔-๔๔๒. https://84000.org/tipitaka/read/pali_read.php?B=8&A=8757&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=8&A=8757&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=8&item=1143&items=18              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=8&siri=105              ศึกษาอรรถกถานี้ได้ที่ :- https://84000.org/tipitaka/attha/attha.php?b=8&i=1143              สารบัญพระไตรปิฎกเล่มที่ ๘ https://84000.org/tipitaka/read/?index_8 https://84000.org/tipitaka/english/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]