|
|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |
|
| |
|
|
| ฉบับหลวง ฉบับมหาจุฬาฯ บาลีอักษรไทย PaliRoman |
![อ่านหน้า[ต่าง] สุดท้าย](go4.gif)
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
ปญฺจโม เรวตพุทฺธวํโส [๖] |๖.๑| สุมนสฺส อปเรน เรวโต นาม นายโก อนุปโม อสทิโส อตุโล อุตฺตโม ชิโน ฯ |๖.๒| โสปิ ธมฺมํ ปกาเสสิ พฺรหฺมุนา อภิยาจิโต ขนฺธธาตุววตฺถานํ อปฺปวตฺตํ ภวาภเว ฯ |๖.๓| ตสฺสาภิสมยา ตีณิ อเหสุํ ธมฺมเทสเน คณนาย น วตฺตพฺโพ ปฐมาภิสมโย อหุ ฯ |๖.๔| ยทา อรินฺทมํ ราชํ วิเนสิ เรวโต มุนิ ตทา โกฏิสหสฺสานํ ทุติยาภิสมโย อหุ ฯ |๖.๕| สตฺตาหํ ปฏิสลฺลานา วุฏฺฐหิตฺวา นราสโภ โกฏิสตํ นรมรูนํ วิเนสิ อุตฺตเม ผเล ฯ @เชิงอรรถ: ๑ ม. ยุ. อสทิโส ฯ ๒ ม. อตุลานิ ฯ |๖.๖| สนฺนิปาตา ตโย อาสุํ เรวตสฺส มเหสิโน ขีณาสวานํ วิมลานํ สุวิมุตฺตาน ตาทินํ ฯ |๖.๗| อติกนฺตคณนปถา ๑- ปฐมา ๒- เย สมาคตา โกฏิสตสหสฺสานํ ทุติโย อาสิ สมาคโม ฯ |๖.๘| โย ๓- โส ปญฺญาย อสโม ตสฺส จกฺกานุวตฺตโก โส ตทา พฺยาธิโก ๔- อาสิ ปตฺโต ชีวิตสํสยํ ฯ |๖.๙| ตสฺส คิลานปุจฺฉาย เย ตทา อุปคตา มุนึ ๕- โกฏิสตสหสฺสานํ ๖- ตติโย อาสิ สมาคโม ฯ |๖.๑๐| อหํ เตน สมเยน อติเทโว นาม พฺราหฺมโณ อุปคนฺตฺวา เรวตํ พุทฺธํ สรณํ ตสฺส คญฺฉหํ ฯ |๖.๑๑| ตสฺส สีลํ สมาธิญฺจ ปญฺญาคุณมนุตฺตรํ ๗- โถมยิตฺวา ยถาถามํ ๘- อุตฺตริยํ อทาสหํ ฯ |๖.๑๒| โสปิ มํ พุทฺโธ พฺยากาสิ เรวโต โลกนายโก อปริเมยฺเย อิโต กปฺเป อยํ พุทฺโธ ภวิสฺสติ ฯ |๖.๑๓| อหุ กปิลวฺหยา รมฺมา นิกฺขมิตฺวา ตถาคโต ปธานํ ปทหิตฺวาน กตฺวา ทุกฺกรการิกํ ฯ |๖.๑๔| อชปาลรุกฺขมูลสฺมึ นิสีทิตฺวา ตถาคโต ตตฺถ ปายาสํ ปคฺคยฺห เนรญฺชรมุเปหิติ ฯ |๖.๑๕| เนรญฺชราย ตีรมฺหิ ปายาสํ อทิ โส ชิโน ปฏิยตฺตวรมคฺเคน โพธิมูลมฺหิ เอหิติ ฯ @เชิงอรรถ: ๑ ม. อติกฺกนฺตา คณนปถํ ฯ ยุ. อติกฺกนฺตา คณนปถา ฯ ๒ ม. ปฐมํ ฯ @๓ ม. โยปิ ฯ ๔ ม. ยุ. พฺยาธิโต ฯ ๕ ม. ยุ. มุนี ฯ ๖ ม. ยุ. โกฏิสหสฺสา @อรหนฺโต ฯ ๗ ม. ...มนุตฺตมํ ฯ ยุ. ...วรุตฺตมํ ฯ ๘ ยุ. ยถาโถมํ ฯ |๖.๑๖| ตโต ปทกฺขิณํ กตฺวา โพธิมณฺฑํ อนุตฺตรํ อสฺสตฺถรุกฺขมูลมฺหิ พุชฺฌิสฺสติ มหายโส ฯ |๖.๑๗| อิมสฺส ชนิกา มาตา มายา นาม ภวิสฺสติ ปิตา สุทฺโธทโน นาม อยํ เหสฺสติ โคตโม ฯ |๖.๑๘| อนาสวา วีตราคา สนฺตจิตฺตา สมาหิตา โกลิโต อุปติสฺโส จ อคฺคา เหสฺสนฺติ สาวกา อานนฺโท นามุปฏฺฐาโก อุปฏฺฐิสฺสติมํ ชินํ ฯ |๖.๑๙| เขมา อุปฺปลวณฺณา จ อคฺคา เหสฺสนฺติ สาวิกา อนาสวา วีตราคา สนฺตจิตฺตา สมาหิตา ฯ |๖.๒๐| โพธิ ตสฺส ภควโต อสฺสตฺโถติ ปวุจฺจติ จิตฺโต จ หตฺถาฬวโก อคฺคา เหสฺสนฺตุปฏฺฐกา ฯ |๖.๒๑| นนฺทมาตา จ อุตฺตรา อคฺคา เหสฺสนฺตุปฏฺฐิกา อายุ วสฺสสตํ ตสฺส โคตมสฺส ยสสฺสิโน ฯ |๖.๒๒| อิทํ สุตฺวาน วจนํ อสมสฺส มเหสิโน อาโมทิตา นรมรู พุทฺธวีชงฺกุโร อยํ ฯ |๖.๒๓| อุกฺกุฏฺฐิสทฺทา วตฺตนฺติ อปฺโผเฏนฺติ หสนฺติ จ กตญฺชลี นมสฺสนฺติ ทสสหสฺสี สเทวกา ฯ |๖.๒๔| ยทิมสฺส โลกนาถสฺส วิรชฺฌิสฺสาม สาสนํ อนาคตมฺหิ อทฺธาเน เหสฺสาม สมฺมุขา อิมํ ฯ |๖.๒๕| ยถา มนุสฺสา นทึ ตรนฺตา ปฏิติตฺถํ วิรชฺฌิย เหฏฺฐาติตฺถํ คเหตฺวาน อุตฺตรนฺติ มหานทึ ฯ |๖.๒๖| เอวเมว มยํ สพฺเพ ยทิ มุญฺจามิมํ ชินํ อนาคตมฺหิ อทฺธาเน เหสฺสาม สมฺมุขา อิมํ ฯ |๖.๒๗| ตสฺสาปิ วจนํ สุตฺวา ภิยฺโย จิตฺตํ ปสาทยึ อุตฺตรึ วตฺตมธิฏฺฐาสึ ทสปารมิปูริยา ฯ |๖.๒๘| ตทาปิ ตํ พุทฺธธมฺมํ สริตฺวา อนุพฺรูหยึ อาหริสฺสามิ ตํ ธมฺมํ ยํ มยฺหํ อภิปตฺถิตํ ฯ |๖.๒๙| นครํ สุธญฺญกํ ๑- นาม วิปุโล นาม ขตฺติโย วิปุลา นาม ชนิกา เรวตสฺส มเหสิโน ฯ |๖.๓๐| ฉพฺพสฺสสหสฺสานิ ๒- อคารํ อชฺฌาวสิ โส สุทสฺสโน จ ๓- รตนคฺฆิ อาเวโฬ จ วิภูสิโต ปุญฺญกมฺมาภินิพฺพตฺตา ตโย ปาสาทมุตฺตมา ฯ |๖.๓๑| เตตฺตึสสตสหสฺสานิ ๔- นาริโย สมลงฺกตา สุทสฺสนา นาม นารี ๕- วรุโณ นาม อตฺรโช ฯ |๖.๓๒| นิมิตฺเต จตุโร ทิสฺวา รถยาเนน นิกฺขมิ อนูนสตฺตมาสานิ ปธานํ ปทหี ชิโน ฯ |๖.๓๓| พฺรหฺมุนา ยาจิโต สนฺโต เรวโต โลกนายโก วตฺตจกฺโก มหาวีโร วรุณาราเม วสี ๖- ชิโน ฯ @เชิงอรรถ: ๑ ม. สุธญฺญวตี ฯ ๒ ม. ฉ จ วสฺสสหสฺสานิ ฯ ยุ. ฉพฺพสฺสสตสหสฺสานิ ฯ @๓ ม. จสทฺโท นตฺถิ ฯ ๔ ม. เตตฺตึส จ สหสฺสานิ ฯ ยุ. เตตฺตึสสหสฺสานิ ฯ @๕ ยุ. เทวี ฯ ๖ ม. สิริฆเร ฯ ยุ. สิริฆเณ ฯ |๖.๓๔| วรุโณ พฺรหฺมเทโว จ อเหสุํ อคฺคสาวกา สมฺภโว นามุปฏฺฐาโก เรวตสฺส มเหสิโน ฯ |๖.๓๕| ภทฺทา เจว สุภทฺทา จ อเหสุํ อคฺคสาวิกา โสปิ พุทฺโธ อสมสโม นาคมูเล อพุชฺฌถ ฯ |๖.๓๖| วรุโณ ๑- จ สรโภ จ อเหสุํ อคฺคุปฏฺฐกา ปาลา ๒- จ อุปปาลา จ อเหสุํ อคฺคุปฏฺฐิกา ฯ |๖.๓๗| อุจฺจตฺตเนน โส พุทฺโธ อสีติหตฺถมุคฺคโต โอภาเสสิ ๓- ทิสา สพฺพา อินฺทเกตุว อุคฺคโต ฯ |๖.๓๘| ตสฺส สรีเร นิพฺพตฺตา ปภามาลา อนุตฺตรา ทิวา วา ยทิวา รตฺตึ สมนฺตา ผรติ ๔- โยชนํ ฯ |๖.๓๙| สฏฺฐิวสฺสสหสฺสานิ อายุ วิชฺชติ ตาวเท ตาวตา ติฏฺฐมาโน โส ตาเรสิ ชนตํ พหุํ ฯ |๖.๔๐| ทสฺสยิตฺวา พุทฺธพลํ อมตํ โลเก ปกาสยิ ๕- นิพฺพาสิ อนุปาทาโน ยถคฺคุปาทานสงฺขยา ฯ |๖.๔๑| โส จ กาโย รตนนิโภ โส จ ธมฺโม อสาทิโส สพฺพํ สมนฺตรหิตํ นนุ ริตฺตา สพฺพสงฺขาราติ ฯ |๖.๔๒| เรวโต ยสธโร พุทฺโธ นิพฺพุโต โส มหาปุญฺโญ ๖- ธาตุวิตฺถาริกํ อาสิ เตสุ เตสุ ปเทสโตติ ฯ เรวตพุทฺธวํโส ปญฺจโม ฯ @เชิงอรรถ: ๑ ม. ยุ. ปทุโม กุญฺชโร เจว ฯ ๒ ม. ยุ. สิริมา เจว ยสวตี ฯ ๓ ม. ยุ. @โอภาเสติ ฯ ๔ ยุ. ผริ ฯ ๕ ม. ยุ. ปกาสยํ ฯ ๖ ม. มหาปุเร ฯ ยุ. มหามุนิ ฯ
เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๔๕๓-๔๕๗. https://84000.org/tipitaka/read/pali_read.php?B=33&A=9317&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=9317&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.2&item=6&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=197 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=186 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=51&A=5256 The Pali Atthakatha in Roman :- https://84000.org/tipitaka/atthapali/read_rm.php?B=51&A=5256 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33
![อ่านหน้า[ต่าง] แรก](go1.gif) ![อ่านหน้า[ต่าง] ที่แล้ว](go2.gif)   ![อ่านหน้า[ต่าง] ถัดไป](go3.gif)  |
|
บันทึก ๖ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]