ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้า คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๑ ภาษาบาลี อักษรไทย พระสุตตันตปิฎกเล่มที่ ๓ สุตฺต. ที. ปาฏิกวคฺโค
                       ทสุตฺตรสุตฺตํ
     [๓๖๔]  เอวมฺเม   สุตํ  ฯ  เอกํ  สมยํ  ภควา  จมฺปายํ  วิหรติ
คคฺคราย   โปกฺขรณิยา   ตีเร   มหตา  ภิกฺขุสงฺเฆน  สทฺธึ  ปญฺจมตฺเตหิ
ภิกฺขุสเตหิ   ฯ   ตตฺร   โข   อายสฺมา   สารีปุตฺโต  ภิกฺขู  อามนฺเตสิ
อาวุโส  ภิกฺขเวติ  ฯ  อาวุโสติ  โข  เต  ภิกฺขู  อายสฺมโต สารีปุตฺตสฺส
ปจฺจสฺโสสุํ ฯ อายสฺมา สารีปุตฺโต เอตทโวจ
     [๓๖๕]  ทสุตฺตรํ ปวกฺขามิ         ธมฺมํ นิพฺพานปตฺติยา
                ทุกฺขสฺสนฺตกิริยาย        สพฺพคนฺถปฺปโมจนํ ฯ
     [๓๖๖]  เอโก   อาวุโส   ธมฺโม   พหุกาโร   เอโก   ธมฺโม
ภาเวตพฺโพ   เอโก   ธมฺโม   ปริญฺเญยฺโย   เอโก  ธมฺโม  ปหาตพฺโพ
เอโก   ธมฺโม   หานภาคิโย   เอโก   ธมฺโม   วิเสสภาคิโย   เอโก
ธมฺโม   ทุปฺปฏิวิชฺโฌ   เอโก   ธมฺโม   อุปฺปาเทตพฺโพ   เอโก  ธมฺโม
อภิญฺเญยฺโย เอโก ธมฺโม สจฺฉิกาตพฺโพ ฯ
     [๓๖๗]  กตโม  เอโก  ธมฺโม  พหุกาโร  ฯ  อปฺปมาโท  กุสเลสุ
ธมฺเมสุ ฯ อยํ เอโก ธมฺโม พหุกาโร ฯ
     [๓๖๘]  กตโม   เอโก   ธมฺโม   ภาเวตพฺโพ   ฯ  กายคตาสติ
สาตสหคตา ฯ อยํ เอโก ธมฺโม ภาเวตพฺโพ ฯ
     [๓๖๙]  กตโม   เอโก  ธมฺโม  ปริญฺเญยฺโย  ฯ  ผสฺโส  สาสโว
อุปาทานิโย ฯ อยํ เอโก ธมฺโม ปริญฺเญยฺโย ฯ
     [๓๗๐]  กตโม   เอโก   ธมฺโม   ปหาตพฺโพ  ฯ  อสฺมิมาโน  ฯ
อยํ เอโก ธมฺโม ปหาตพฺโพ ฯ
     [๓๗๑]  กตโม  เอโก  ธมฺโม  หานภาคิโย ฯ อโยนิโสมนสิกาโร ฯ
อยํ เอโก ธมฺโม หานภาคิโย ฯ
     [๓๗๒]  กตโม  เอโก  ธมฺโม  วิเสสภาคิโย ฯ โยนิโสมนสิกาโร ฯ
อยํ เอโก ธมฺโม วิเสสภาคิโย ฯ
     [๓๗๓]  กตโม   เอโก   ธมฺโม   ทุปฺปฏิวิชฺโฌ   ฯ   อนนฺตริโก
เจโตสมาธิ ฯ อยํ เอโก ธมฺโม ทุปฺปฏิวิชฺโฌ ฯ
     [๓๗๔]  กตโม  เอโก  ธมฺโม  อุปฺปาเทตพฺโพ  ฯ  อกุปฺปํ  ญาณํ ฯ
อยํ เอโก ธมฺโม อุปฺปาเทตพฺโพ ฯ
     [๓๗๕]  กตโม   เอโก   ธมฺโม  อภิญฺเญยฺโย  ฯ  สพฺเพ  สตฺตา
อาหารฏฺฐิติกา ฯ อยํ เอโก ธมฺโม อภิญฺเญยฺโย ฯ
     [๓๗๖]  กตโม   เอโก   ธมฺโม   สจฺฉิกาตพฺโพ   ฯ   อกุปฺปา
เจโตวิมุตฺติ   ฯ  อยํ  เอโก  ธมฺโม  สจฺฉิกาตพฺโพ  ฯ  อิติ  อิเม  ทส
ธมฺมา   ภูตา   ตจฺฉา   ตถา   อวิตถา   อนญฺญถา  สมฺมา  ตถาคเตน
อภิสมฺพุทฺธา ฯ
     [๓๗๗]  เทฺว  ธมฺมา  พหุการา  เทฺว  ธมฺมา  ภาเวตพฺพา  เทฺว
ธมฺมา    ปริญฺเญยฺยา    เทฺว    ธมฺมา    ปหาตพฺพา   เทฺว   ธมฺมา
หานภาคิยา   เทฺว   ธมฺมา   วิเสสภาคิยา   เทฺว  ธมฺมา  ทุปฺปฏิวิชฺฌา
เทฺว    ธมฺมา    อุปฺปาเทตพฺพา   เทฺว   ธมฺมา   อภิญฺเญยฺยา   เทฺว
ธมฺมา สจฺฉิกาตพฺพา ฯ
     [๓๗๘]  กตเม  เทฺว  ธมฺมา  พหุการา  ฯ  สติ  จ สมฺปชญฺญญฺจ ฯ
อิเม เทฺว ธมฺมา พหุการา ฯ
     [๓๗๙]  กตเม  เทฺว  ธมฺมา  ภาเวตพฺพา  ฯ  สมโถ  จ วิปสฺสนา
จ ฯ อิเม เทฺว ธมฺมา ภาเวตพฺพา ฯ
     [๓๘๐]  กตเม  เทฺว  ธมฺมา  ปริญฺเญยฺยา  ฯ  นามญฺจ  รูปญฺจ  ฯ
อิเม เทฺว ธมฺมา ปริญฺเญยฺยา ฯ
     [๓๘๑]  กตเม  เทฺว  ธมฺมา  ปหาตพฺพา  ฯ  อวิชฺชา  จ ภวตณฺหา
จ ฯ อิเม เทฺว ธมฺมา ปหาตพฺพา ฯ
     [๓๘๒]  กตเม   เทฺว   ธมฺมา  หานภาคิยา  ฯ  โทวจสฺสตา  จ
ปาปมิตฺตตา จ ฯ อิเม เทฺว ธมฺมา หานภาคิยา ฯ
     [๓๘๓]  กตเม   เทฺว  ธมฺมา  วิเสสภาคิยา  ฯ  โสวจสฺสตา  จ
กลฺยาณมิตฺตตา จ ฯ อิเม เทฺว ธมฺมา วิเสสภาคิยา ฯ
     [๓๘๔]  กตเม  เทฺว  ธมฺมา  ทุปฺปฏิวิชฺฌา  ฯ  โย  จ เหตุ โย จ
ปจฺจโย  สตฺตานํ  สงฺกิเลสาย  โย  จ  เหตุ  โย  จ  ปจฺจโย  สตฺตานํ
วิสุทฺธิยา ฯ อิเม เทฺว ธมฺมา ทุปฺปฏิวิชฺฌา ฯ
     [๓๘๕]  กตเม   เทฺว  ธมฺมา  อุปฺปาเทตพฺพา  ฯ  เทฺว  ญาณานิ
ขเย ญาณํ อนุปฺปาเท ญาณํ ฯ อิเม เทฺว ธมฺมา อุปฺปาเทตพฺพา ฯ
     [๓๘๖]  กตเม  เทฺว  ธมฺมา  อภิญฺเญยฺยา  ฯ เทฺว ธาตุโย สงฺขตา
จ ธาตุ อสงฺขตา จ ธาตุ ฯ อิเม เทฺว ธมฺมา อภิญฺเญยฺยา ฯ
     [๓๘๗]  กตเม  เทฺว  ธมฺมา  สจฺฉิกาตพฺพา  ฯ  วิชฺชา  จ  วิมุตฺติ
จ  ฯ  อิเม  เทฺว  ธมฺมา  สจฺฉิกาตพฺพา  ฯ  อิติ อิเม วีสติ ธมฺมา ภูตา
ตจฺฉา ตถา อวิตถา อนญฺญถา สมฺมา ตถาคเตน อภิสมฺพุทฺธา ฯ
     [๓๘๘]  ตโย   ธมฺมา   พหุการา   ตโย   ธมฺมา   ภาเวตพฺพา
ตโย   ธมฺมา   ปริญฺเญยฺยา   ตโย   ธมฺมา   ปหาตพฺพา  ตโย  ธมฺมา
หานภาคิยา   ตโย   ธมฺมา   วิเสสภาคิยา   ตโย  ธมฺมา  ทุปฺปฏิวิชฺฌา
ตโย    ธมฺมา    อุปฺปาเทตพฺพา   ตโย   ธมฺมา   อภิญฺเญยฺยา   ตโย
ธมฺมา สจฺฉิกาตพฺพา ฯ
     [๓๘๙]  กตเม   ตโย   ธมฺมา   พหุการา   ฯ   สปฺปุริสสํเสโว
สทฺธมฺมสฺสวนํ ธมฺมานุธมฺมปฏิปตฺติ ฯ อิเม ตโย ธมฺมา พหุการา ฯ
     [๓๙๐]  กตเม  ตโย  ธมฺมา  ภาเวตพฺพา  ฯ ตโย สมาธี สวิตกฺโก
สวิจาโร   สมาธิ   อวิตกฺโก   วิจารมตฺโต  สมาธิ  อวิตกฺโก  อวิจาโร
สมาธิ ฯ อิเม ตโย ธมฺมา ภาเวตพฺพา ฯ
     [๓๙๑]  กตเม   ตโย   ธมฺมา  ปริญฺเญยฺยา  ฯ  ติสฺโส  เวทนา
สุขา   เวทนา   ทุกฺขา  เวทนา  อทุกฺขมสุขา  เวทนา  ฯ  อิเม  ตโย
ธมฺมา ปริญฺเญยฺยา ฯ
     [๓๙๒]  กตเม  ตโย  ธมฺมา  ปหาตพฺพา ฯ ติสฺโส ตณฺหา กามตณฺหา
ภวตณฺหา วิภวตณฺหา ฯ อิเม ตโย ธมฺมา ปหาตพฺพา ฯ
     [๓๙๓]  กตเม   ตโย  ธมุมา  หานภาคิยา  ฯ  ตีณิ  อกุสลมูลานิ
โลโภ   อกุสลมูลํ   โทโส   อกุสลมูลํ   โมโห   อกุสลมูลํ   ฯ   อิเม
ตโย ธมฺมา หานภาคิยา ฯ
     [๓๙๔]  กตเม   ตโย  ธมฺมา  วิเสสภาคิยา  ฯ  ตีณิ  กุสลมูลานิ
อโลโภ   กุสลมูลํ   อโทโส   กุสลมูลํ   อโมโห   กุสลมูลํ   ฯ   อิเม
ตโย ธมฺมา วิเสสภาคิยา ฯ
     [๓๙๕]  กตเม  ตโย  ธมฺมา  ทุปฺปฏิวิชฺฌา ฯ ติสฺโส นิสฺสารณียา ๑-
ธาตุโย   กามานเมตํ   นิสฺสรณํ   ยทิทํ   เนกฺขมฺมํ  รูปานเมตํ  นิสฺสรณํ
ยทิทํ  อรูปํ  ยํ  โข  ปน  กิญฺจิ  ภูตํ  สงฺขตํ  ปฏิจฺจ  สมุปฺปนฺนํ  นิโรโธ
ตสฺส นิสฺสรณํ ฯ อิเม ตโย ธมฺมา ทุปฺปฏิวิชฺฌา ฯ
     [๓๙๖]  กตเม   ตโย   ธมฺมา  อุปฺปาเทตพฺพา  ฯ  ตีณิ  ญาณานิ
อตีตํสญาณํ     อนาคตํสญาณํ    ปจฺจุปฺปนฺนํสญาณํ    ฯ    อิเม    ตโย
ธมฺมา อุปฺปาเทตพฺพา ฯ
     [๓๙๗]  กตเม   ตโย   ธมฺมา  อภิญฺเญยฺยา  ฯ  ติสฺโส  ธาตุโย
กามธาตุ รูปธาตุ อรูปธาตุ ฯ อิเม ตโย ธมฺมา อภิญฺเญยฺยา ฯ
     [๓๙๘]  กตเม   ตโย   ธมฺมา  สจฺฉิกาตพฺพา  ฯ  ติสฺโส  วิชฺชา
ปุพฺเพนิวาสานุสฺสติญาณํ    วิชฺชา   สตฺตานํ   จุตูปปาเต   ญาณํ   วิชฺชา
อาสวานํ  ขเย  ญาณํ  วิชฺชา  ฯ  อิเม  ตโย  ธมฺมา  สจฺฉิกาตพฺพา  ฯ
อิติ   อิเม  ตึส  ธมฺมา  ภูตา  ตจฺฉา  ตถา  อวิตถา  อนญฺญถา  สมฺมา
ตถาคเตน อภิสมฺพุทฺธา ฯ
@เชิงอรรถ:  ม. นิสฺสรณิยา ฯ
     [๓๙๙]  จตฺตาโร  ธมฺมา  พหุการา  จตฺตาโร  ธมฺมา  ภาเวตพฺพา
จตฺตาโร   ธมฺมา   ปริญฺเญยฺยา  จตฺตาโร  ธมฺมา  ปหาตพฺพา  จตฺตาโร
ธมฺมา   หานภาคิยา   จตฺตาโร  ธมฺมา  วิเสสภาคิยา  จตฺตาโร  ธมฺมา
ทุปฺปฏิวิชฺฌา    จตฺตาโร    ธมฺมา   อุปฺปาเทตพฺพา   จตฺตาโร   ธมฺมา
อภิญฺเญยฺยา จตฺตาโร ธมฺมา สจฺฉิกาตพฺพา ฯ
     [๔๐๐]  กตเม  จตฺตาโร  ธมฺมา  พหุการา  ฯ  จตฺตาริ  จกฺกานิ
ปฏิรูปเทสวาโส     สปฺปุริสูปสฺสโย     อตฺตสมฺมาปณิธิ     ปุพฺเพ    จ
กตปุญฺญตา ฯ อิเม จตฺตาโร ธมฺมา พหุการา ฯ
     [๔๐๑]  กตเม   จตฺตาโร   ธมฺมา   ภาเวตพฺพา   ฯ  จตฺตาโร
สติปฏฺฐานา   อิธาวุโส   ภิกฺขุ   กาเย   กายานุปสฺสี   วิหรติ  อาตาปี
สมฺปชาโน   สติมา   วิเนยฺย   โลเก   อภิชฺฌาโทมนสฺสํ   ฯ  เวทนาสุ
ฯเปฯ    จิตฺเต    ฯเปฯ    ธมฺเมสุ   ธมฺมานุปสฺสี   วิหรติ   อาตาปี
สมฺปชาโน  สติมา  วิเนยฺย  โลเก  อภิชฺฌาโทมนสฺสํ  ฯ  อิเม  จตฺตาโร
ธมฺมา ภาเวตพฺพา ฯ
     [๔๐๒]  กตเม   จตฺตาโร   ธมฺมา   ปริญฺเญยฺยา   ฯ  จตฺตาโร
อาหารา  กวฬีกาโร  ๑-  อาหาโร  โอฬาริโก  วา  สุขุโม  วา ผสฺโส
ทุติโย   มโนสญฺเจตนา   ตติยา   วิญฺญาณํ   จตุตฺถํ  ฯ  อิเม  จตฺตาโร
ธมฺมา ปริญฺเญยฺยา ฯ
     [๔๐๓]  กตเม   จตฺตาโร   ธมฺมา   ปหาตพฺพา   ฯ   จตฺตาโร
@เชิงอรรถ:  ม. กพฬีกาโร ฯ ยุ. กพลิงฺกาโร ฯ
โอฆา   กาโมโฆ   ภโวโฆ   ทิฏฺโฐโฆ  อวิชฺโชโฆ  ฯ  อิเม  จตฺตาโร
ธมฺมา ปหาตพฺพา ฯ
     [๔๐๔]  กตเม  จตฺตาโร  ธมฺมา  หานภาคิยา  ฯ  จตฺตาโร โยคา
กามโยโค   ภวโยโค   ทิฏฺฐิโยโค   อวิชฺชาโยโค   ฯ  อิเม  จตฺตาโร
ธมฺมา หานภาคิยา ฯ
     [๔๐๕]  กตเม   จตฺตาโร   ธมฺมา   วิเสสภาคิยา  ฯ  จตฺตาโร
วิสํโยคา     กามโยควิสํโยโค     ภวโยควิสํโยโค    ทิฏฺฐิโยควิสํโยโค
อวิชฺชาโยควิสํโยโค ฯ อิเม จตฺตาโร ธมฺมา วิเสสภาคิยา ฯ
     [๔๐๖]  กตเม  จตฺตาโร  ธมฺมา  ทุปฺปฏิวิชฺฌา  ฯ  จตฺตาโร สมาธี
หานภาคิโย    สมาธิ    ฐิติภาคิโย    สมาธิ    วิเสสภาคิโย   สมาธิ
นิพฺเพธภาคิโย สมาธิ ฯ อิเม จตฺตาโร ธมฺมา ทุปฺปฏิวิชฺฌา ฯ
     [๔๐๗]  กตเม   จตฺตาโร   ธมฺมา   อุปฺปาเทตพฺพา  ฯ  จตฺตาริ
ญาณานิ    ธมฺเม    ญาณํ    อนฺวเย    ญาณํ   ปริจฺเจ   ๑-   ญาณํ
สมฺมติยา ญาณํ ๒- ฯ อิเม จตฺตาโร ธมฺมา อุปฺปาเทตพฺพา ฯ
     [๔๐๘]  กตเม   จตฺตาโร   ธมฺมา   อภิญฺเญยฺยา   ฯ   จตฺตาริ
อริยสจฺจานิ  ทุกฺขํ  อริยสจฺจํ  ทุกฺขสมุทโย  ๓-  อริยสจฺจํ ทุกฺขนิโรโธ ๔-
อริยสจฺจํ   ทุกฺขนิโรธคามินี   ปฏิปทา   อริยสจฺจํ   ฯ   อิเม  จตฺตาโร
ธมฺมา อภิญฺเญยฺยา ฯ
     [๔๐๙]  กตเม   จตฺตาโร   ธมฺมา   สจฺฉิกาตพฺพา   ฯ  จตฺตาริ
สามญฺญผลานิ   โสตาปตฺติผลํ   สกทาคามิผลํ  อนาคามิผลํ  อรหตฺตผลํ  ฯ
@เชิงอรรถ:  ม. ปริเย ฯ  ม. สมฺมุติยา ญาณํ ฯ ยุ. สมฺมุติญาณํ ฯ  ม. ยุ. ทุกฺขสมุทยํ ฯ
@ ม. ยุ. ทุกฺขนิโรธํ ฯ
อิเม   จตฺตาโร   ธมฺมา   สจฺฉิกาตพฺพา  ฯ  อิติ  อิเม  จตฺตาฬีส  ๑-
ธมฺมา   ภูตา   ตจฺฉา   ตถา   อวิตถา   อนญฺญถา  สมฺมา  ตถาคเตน
อภิสมฺพุทฺธา ฯ
     [๔๑๐]  ปญฺจ   ธมฺมา   พหุการา   ปญฺจ   ธมฺมา   ภาเวตพฺพา
ปญฺจ    ธมฺมา    ปริญฺเญยฺยา    ปญฺจ    ธมฺมา    ปหาตพฺพา   ปญฺจ
ธมฺมา    หานภาคิยา    ปญฺจ   ธมฺมา   วิเสสภาคิยา   ปญฺจ   ธมฺมา
ทุปฺปฏิวิชฺฌา     ปญฺจ     ธมฺมา     อุปฺปาเทตพฺพา    ปญฺจ    ธมฺมา
อภิญฺเญยฺยา ปญฺจ ธมฺมา สจฺฉิกาตพฺพา ฯ
     [๔๑๑]  กตเม   ปญฺจ  ธมฺมา  พหุการา  ฯ  ปญฺจ  ปธานิยงฺคานิ
อิธาวุโส   ภิกฺขุ   สทฺโธ   โหติ   สทฺทหติ   ตถาคตสฺส   โพธึ   อิติปิ
โส    ภควา    อรหํ    สมฺมาสมฺพุทฺโธ    วิชฺชาจรณสมฺปนฺโน   สุคโต
โลกวิทู    อนุตฺตโร    ปุริสทมฺมสารถิ   สตฺถา   เทวมนุสฺสานํ   พุทฺโธ
ภควาติ    อปฺปาพาโธ   โหติ   อปฺปาตงฺโก   สมเวปากินิยา   คหณิยา
สมนฺนาคโต     นาติสีตาย    นาจฺจุณฺหาย    มชฺฌิมาย    ปธานกฺขมาย
อสโฐ   โหติ   อมายาวี   ยถาภูตํ   อตฺตานํ   อาวิกตฺตา  สตฺถริ  วา
วิญฺญูสุ   วา   สพฺรหฺมจารีสุ   อารทฺธวิริโย   วิหรติ  อกุสลานํ  ธมฺมานํ
ปหานาย    กุสลานํ    ธมฺมานํ   อุปสมฺปทาย   ถามวา   ทฬฺหปรกฺกโม
อนิกฺขิตฺตธุโร    กุสเลสุ    ธมฺเมสุ   ปญฺญวา   โหติ   อุทยตฺถคามินิยา
ปญฺญาย   สมนฺนาคโต   อริยาย  นิพฺเพธิกาย  สมฺมาทุกฺขกฺขยคามินิยา  ฯ
อิเม ปญฺจ ธมฺมา พหุการา ฯ
@เชิงอรรถ:  ยุ. อิติเม จตฺตาฬีสํ ฯ
     [๔๑๒]  กตเม  ปญฺจ  ธมฺมา  ภาเวตพฺพา ฯ ปญฺจงฺคิโก สมฺมาสมาธิ
ปีติผรณตา        สุขผรณตา       เจโตผรณตา       อาโลกผรณตา
ปจฺจเวกฺขณานิมิตฺตํ ๑- อิเม ปญฺจ ธมฺมา ภาเวตพฺพา ฯ
     [๔๑๓]  กตเม  ปญฺจ  ธมฺมา  ปริญฺเญยฺยา  ฯ  ปญฺจุปาทานกฺขนฺธา
เสยฺยถีทํ    รูปูปาทานกฺขนฺโธ   เวทนูปาทานกฺขนฺโธ   สญฺญูปาทานกฺขนฺโธ
สงฺขารูปาทานกฺขนฺโธ   วิญฺญาณูปาทานกฺขนฺโธ   ฯ   อิเม   ปญฺจ  ธมฺมา
ปริญฺเญยฺยา ฯ
     [๔๑๔]  กตเม   ปญฺจ   ธมฺมา   ปหาตพฺพา  ฯ  ปญฺจ  นีวรณานิ
กามจฺฉนฺทนีวรณํ    พฺยาปาทนีวรณํ    ถีนมิทฺธนีวรณํ   อุทฺธจฺจกุกฺกุจฺจนีวรณํ
วิจิกิจฺฉานีวรณํ ฯ อิเม ปญฺจ ธมฺมา ปหาตพฺพา ฯ
     [๔๑๕]  กตเม   ปญฺจ  ธมฺมา  หานภาคิยา  ฯ  ปญฺจ  เจโตขีลา
อิธาวุโส   ภิกฺขุ   สตฺถริ   กงฺขติ   วิจิกิจฺฉติ  นาธิมุจฺจติ  น  สมฺปสีทติ
ตสฺส  จิตฺตํ  น  นมติ  อาตปฺปาย  อนุโยคาย  สาตจฺจาย  ปธานาย  ๒-
โย   โส   อาวุโส   ภิกฺขุ   สตฺถริ   กงฺขติ  วิจิกิจฺฉติ  นาธิมุจฺจติ  น
สมฺปสีทติ   ตสฺส   จิตฺตํ   น   นมติ  อาตปฺปาย  อนุโยคาย  สาตจฺจาย
ปธานาย   ยสฺส   จิตฺตํ   น   นมติ  อาตปฺปาย  อนุโยคาย  สาตจฺจาย
ปธานาย  อยํ  ปฐโม  เจโตขีโล  ฯ  ปุน  จปรํ  อาวุโส  ภิกฺขุ  ธมฺเม
กงฺขติ   วิจิกิจฺฉติ   นาธิมุจฺจติ   น   สมฺปสีทติ   ฯเปฯ  สงฺเฆ  กงฺขติ
ฯเปฯ   สิกฺขาย  กงฺขติ  ฯเปฯ  สพฺรหฺมจารีสุ  กุปิโต  โหติ  อนตฺตมโน
อาหตจิตฺโต    ขีลชาโต    โย   โส   อาวุโส   ภิกฺขุ   สพฺรหฺมจารีสุ
@เชิงอรรถ:  ม. ยุ. ปจฺจเวกฺขณนิมิตฺตํ ฯ  ม. ตสฺส จิตฺตํ ... ปธานายาติ อิเม ปาฐา น
@ทิสฺสนฺติ ฯ
กุปิโต   โหติ   อนตฺตมโน   อาหตจิตฺโต   ขีลชาโต   ตสฺส   จิตฺตํ  น
นมติ     อาตปฺปาย     อนุโยคาย    สาตจฺจาย    ปธานาย    ยสฺส
จิตฺตํ   น   นมติ   อาตปฺปาย   อนุโยคาย   สาตจฺจาย  ปธานาย  อยํ
ปญฺจโม เจโตขีโล ฯ อิเม ปญฺจ ธมฺมา หานภาคิยา ฯ
     [๔๑๖]  กตเม   ปญฺจ   ธมฺมา   วิเสสภาคิยา  ฯ  ปญฺจินฺทฺริยานิ
สทฺธินฺทฺริยํ  วิริยินฺทฺริยํ  สตินฺทฺริยํ  สมาธินฺทฺริยํ  ปญฺญินฺทฺริยํ ฯ อิเม
ปญฺจ ธมฺมา วิเสสภาคิยา ฯ
     [๔๑๗]  กตเม  ปญฺจ  ธมฺมา  ทุปฺปฏิวิชฺฌา  ฯ  ปญฺจ  นิสฺสารณียา
ธาตุโย  อิธาวุโส  ภิกฺขุโน  กาเม  ๑-  มนสิกโรโต  กาเมสุ  จิตฺตํ  น
ปกฺขนฺทติ   น  ปสีทติ  น  สนฺติฏฺฐติ  น  วิมุจฺจติ  เนกฺขมฺมํ  โข  ปนสฺส
มนสิกโรโต     เนกฺขมฺเม    จิตฺตํ    ปกฺขนฺทติ    ปสีทติ    สนฺติฏฺฐติ
วิมุจฺจติ  ตสฺส  ๒-  จิตฺตํ  สุคตํ  สุภาวิตํ  สุวุฏฺฐิตํ  สุวิมุตฺตํ วิสํยุตฺตํ
กาเมหิ   เย   จ   กามปจฺจยา   อุปฺปชฺชนฺติ   อาสวา  วิฆาตปริฬาหา
มุตฺโต โส เตหิ น โส ตํ เวทนํ เวเทติ อิทํ อกฺขาตํ กามานํ นิสฺสรณํ ฯ
     {๔๑๗.๑}   ปุน   จปรํ  อาวุโส  ภิกฺขุโน  พฺยาปาทํ  มนสิกโรโต
พฺยาปาเท   จิตฺตํ   น  ปกฺขนฺทติ  น  ปสีทติ  น  สนฺติฏฺฐติ  น  วิมุจฺจติ
อพฺยาปาทํ   โข   ปนสฺส   มนสิกโรโต   อพฺยาปาเท   จิตฺตํ  ปกฺขนฺทติ
ปสีทติ   สนฺติฏฺฐติ   วิมุจฺจติ   ตสฺส   จิตฺตํ   สุคตํ   สุภาวิตํ   สุวุฏฺฐิตํ
สุวิมุตฺตํ     วิสํยุตฺตํ     พฺยาปาเทน     เย    จ    พฺยาปาทปจฺจยา
อุปฺปชฺชนฺติ     อาสวา     วิฆาตปริฬาหา     มุตฺโต     โส    เตหิ
@เชิงอรรถ:  ยุ. กามํ ฯ   ม. ตสฺส ตํ ฯ สพฺพวาเรสุ อีทิสเมว ฯ
น โส ตํ เวทนํ เวเทติ อิทมกฺขาตํ พฺยาปาทสฺส นิสฺสรณํ ฯ
     {๔๑๗.๒}   ปุน   จปรํ   อาวุโส   ภิกฺขุโน  วิเหสํ  มนสิกโรโต
วิเหสาย   จิตฺตํ   น   ปกฺขนฺทติ  น  ปสีทติ  น  สนฺติฏฺฐติ  น  วิมุจฺจติ
อวิเหสํ   โข   ปนสฺส  มนสิกโรโต  อวิเหสาย  จิตฺตํ  ปกฺขนฺทติ  ปสีทติ
สนฺติฏฺฐติ   วิมุจฺจติ   ตสฺส   จิตฺตํ  สุคตํ  สุภาวิตํ  สุวุฏฺฐิตํ  สุวิมุตฺตํ
วิสํยุตฺตํ    วิเหสาย    เย   จ   วิเหสปจฺจยา   อุปฺปชฺชนฺติ   อาสวา
วิฆาตปริฬาหา  มุตฺโต  โส  เตหิ  น  โส  ตํ  เวทนํ เวเทติ อิทมกฺขาตํ
วิเหสาย นิสฺสรณํ ฯ
     {๔๑๗.๓}   ปุน   จปรํ   อาวุโส   ภิกฺขุโน   รูเป  มนสิกโรโต
รูเปสุ   จิตฺตํ   น   ปกฺขนฺทติ   น   ปสีทติ  น  สนฺติฏฺฐติ  น  วิมุจฺจติ
อรูปํ   โข   ปนสฺส   มนสิกโรโต   อรูเป   จิตฺตํ   ปกฺขนฺทติ   ปสีทติ
สนฺติฏฺฐติ    วิมุจฺจติ    ตสฺส    ตํ   จิตฺตํ   สุคตํ   สุภาวิตํ   สุวุฏฺฐิตํ
สุวิมุตฺตํ   วิสํยุตฺตํ   รูเปหิ   เย   จ   รูปปจฺจยา  อุปฺปชฺชนฺติ  อาสวา
วิฆาตปริฬาหา   มุตฺโต   โส   เตหิ   น   โส   ตํ   เวทนํ  เวเทติ
อิทมกฺขาตํ รูปานํ นิสฺสรณํ ฯ
     {๔๑๗.๔}   ปุน   จปรํ   อาวุโส  ภิกฺขุโน  สกฺกายํ  มนสิกโรโต
สกฺกาเย   จิตฺตํ   น   ปกฺขนฺทติ  น  ปสีทติ  น  สนฺติฏฺฐติ  น  วิมุจฺจติ
สกฺกายนิโรธํ    โข    ปนสฺส    มนสิกโรโต    สกฺกายนิโรเธ   จิตฺตํ
ปกฺขนฺทติ   ปสีทติ   สนฺติฏฺฐติ   วิมุจฺจติ   ตสฺส   จิตฺตํ   สุคตํ  สุภาวิตํ
สุวุฏฺฐิตํ    สุวิมุตฺตํ    วิสํยุตฺตํ   สกฺกาเยน   เย   จ   สกฺกายปจฺจยา
อุปฺปชฺชนฺติ   อาสวา   วิฆาตปริฬาหา   มุตฺโต   โส  เตหิ  น  โส  ตํ
เวทนํ   เวเทติ   อิทมกฺขาตํ   สกฺกายสฺส   นิสฺสรณํ   ฯ   อิเม  ปญฺจ
ธมฺมา ทุปฺปฏิวิชฺฌา ฯ
     [๔๑๘]  กตเม   ปญฺจ   ธมฺมา   อุปฺปาเทตพฺพา  ฯ  ปญฺจญาณิโก
สมฺมาสมาธิ   อยํ  สมาธิ  ปจฺจุปฺปนฺนสุโข  เจว  อายตึ  จ  สุขวิปาโกติ
ปจฺจตฺตํเยว   ญาณํ   อุปฺปชฺชติ   ฯ   อยํ   สมาธิ   อริโย  นิรามิโสติ
ปจฺจตฺตํเยว    ญาณํ   อุปฺปชฺชติ   ฯ   อยํ   สมาธิ   อกาปุริสเสวิโตติ
ปจฺจตฺตํเยว    ญาณํ    อุปฺปชฺชติ   ฯ   อยํ   สมาธิ   สนฺโต   ปณีโต
ปฏิปฺปสฺสทฺธิลทฺโธ   ๑-   เอโกทิภาวาธิคโต   น   จ  สสงฺขารํ  นิคยฺห
วาริตวโตติ   ๒-   ปจฺจตฺตํเยว   ญาณํ  อุปฺปชฺชติ  ฯ  โส  โข  ปนาหํ
อิมํ   สมาธึ  สโต  จ  ๓-  สมาปชฺชามิ  สโต  วุฏฺฐหามีติ  ปจฺจตฺตํเยว
ญาณํ อุปฺปชฺชติ ฯ อิเม ปญฺจ ธมฺมา อุปฺปาเทตพฺพา ฯ
     [๔๑๙]  กตเม  ปญฺจ  ธมฺมา  อภิญฺเญยฺยา  ฯ  ปญฺจ วิมุตฺตายตนานิ
อิธาวุโส  ภิกฺขุโน  สตฺถา  ธมฺมํ  เทเสติ  อญฺญตโร  วา ครุฏฺฐานิโย ๔-
สพฺรหฺมจารี   ยถา   ยถา   อาวุโส   ภิกฺขุโน   สตฺถา  ธมฺมํ  เทเสติ
อญฺญตโร   วา  ครุฏฺฐานิโย  สพฺรหฺมจารี  ตถา  ตถา  ภิกฺขุ  ๕-  ตสฺมึ
ธมฺเม  อตฺถปฏิสํเวที  จ  โหติ  ธมฺมปฏิสํเวที  จ  ตสฺส  อตฺถปฏิสํเวทิโน
ธมฺมปฏิสํเวทิโน   ปาโมชฺชํ   ชายติ   ปมุทิตสฺส   ปีติ  ชายติ  ปีติมนสฺส
กาโย   ปสฺสมฺภติ   ปสฺสทฺธกาโย  สุขํ  เวเทติ  สุขิโน  จิตฺตํ  สมาธิยติ
อิมํ ๖- ปฐมํ วิมุตฺตายตนํ ฯ
     {๔๑๙.๑}  ปุน จปรํ อาวุโส ภิกฺขุโน น เหว โข สตฺถา ธมฺมํ เทเสติ
อญฺญตโร  วา  ครุฏฺฐานิโย  สพฺรหฺมจารี  อปิจ  โข  ยถาสุตํ ยถาปริยตฺตํ
@เชิงอรรถ:  ม. ยุ. ปฏิปฺปสฺสทฺธลทฺโธ ฯ  ม. น สสงฺขารนิคยฺหวาริตคโตติ ฯ  ม. ยุ. ว ฯ
@ ยุ. ครุฏฺฐานิโก ฯ  ม. โส ฯ  ม. อิทํ ฯ
ธมฺมํ    วิตฺถาเรน   ปเรสํ   เทเสติ   ยถา   ยถา   อาวุโส   ภิกฺขุ
ยถาสุตํ   ยถาปริยตฺตํ   ธมฺมํ   วิตฺถาเรน  ปเรสํ  เทเสติ  ตถา  ตถา
โส   ตสฺมึ   ธมฺเม   อตฺถปฏิสํเวที   จ  โหติ  ธมฺมปฏิสํเวที  จ  ตสฺส
อตฺถปฏิสํเวทิโน     ธมฺมปฏิสํเวทิโน    ปาโมชฺชํ    ชายติ    ปมุทิตสฺส
ปีติ    ชายติ    ปีติมนสฺส    กาโย    ปสฺสมฺภติ   ปสฺสทฺธกาโย   สุขํ
เวเทติ สุขิโน จิตฺตํ สมาธิยติ อิทํ ทุติยํ วิมุตฺตายตนํ ฯ
     {๔๑๙.๒}  ปุน  จปรํ  อาวุโส  ภิกฺขุโน  น  เหว โข สตฺถา ธมฺมํ
เทเสติ  อญฺญตโร  วา  ครุฏฺฐานิโย  สพฺรหฺมจารี  น  เหว  โข ยถาสุตํ
ยถาปริยตฺตํ   ธมฺมํ   วิตฺถาเรน   ปเรสํ   เทเสติ  อปิจ  โข  ยถาสุตํ
ยถาปริยตฺตํ   ธมฺมํ   วิตฺถาเรน   สชฺฌายํ  กโรติ  ยถา  ยถา  อาวุโส
ภิกฺขุ   ยถาสุตํ   ยถาปริยตฺตํ   ธมฺมํ  วิตฺถาเรน  สชฺฌายํ  กโรติ  ตถา
ตถา  โส  ตสฺมึ  ธมฺเม  อตฺถปฏิสํเวที  จ  โหติ  ธมฺมปฏิสํเวที  จ ตสฺส
อตฺถปฏิสํเวทิโน   ธมฺมปฏิสํเวทิโน   ปาโมชฺชํ   ชายติ   ปมุทิตสฺส   ปีติ
ชายติ    ปีติมนสฺส   กาโย   ปสฺสมฺภติ   ปสฺสทฺธกาโย   สุขํ   เวเทติ
สุขิโน จิตฺตํ สมาธิยติ อิทํ ตติยํ วิมุตฺตายตนํ ฯ
     {๔๑๙.๓}  ปุน จปรํ อาวุโส ภิกฺขุโน น เหว โข สตฺถา ธมฺมํ เทเสติ
อญฺญตโร  วา  ครุฏฺฐานิโย  สพฺรหฺมจารี  นาปิ  ๑-  ยถาสุตํ ยถาปริยตฺตํ
ธมฺมํ  วิตฺถาเรน  ปเรสํ  เทเสติ  นาปิ  ๑-  ยถาสุตํ  ยถาปริยตฺตํ ธมฺมํ
วิตฺถาเรน   สชฺฌายํ   กโรติ   อปิจ   โข  ยถาสุตํ  ยถาปริยตฺตํ  ธมฺมํ
เจตสา    อนุวิตกฺเกติ    อนุวิจาเรติ    มนสานุเปกฺขติ   ยถา   ยถา
@เชิงอรรถ:  ยุ. นปิ ฯ
อาวุโส   ภิกฺขุ   ยถาสุตํ   ยถาปริยตฺตํ   ธมฺมํ   เจตสา   อนุวิตกฺเกติ
อนุวิจาเรติ    มนสานุเปกฺขติ    ตถา    ตถา    โส   ตสฺมึ   ธมฺเม
อตฺถปฏิสํเวที   จ   โหติ   ธมฺมปฏิสํเวที   จ   ตสฺส   อตฺถปฏิสํเวทิโน
ธมฺมปฏิสํเวทิโน     ปาโมชฺชํ     ชายติ    ปมุทิตสฺส    ปีติ    ชายติ
ปีติมนสฺส    กาโย   ปสฺสมฺภติ   ปสฺสทฺธกาโย   สุขํ   เวเทติ   สุขิโน
จิตฺตํ สมาธิยติ อิทํ จตุตฺถํ วิมุตฺตายตนํ ฯ
     {๔๑๙.๔}  ปุน จปรํ อาวุโส ภิกฺขุโน น เหว โข สตฺถา ธมฺมํ เทเสติ
อญฺญตโร   วา   ครุฏฺฐานิโย   สพฺรหฺมจารี  นาปิ  ยถาสุตํ  ยถาปริยตฺตํ
ธมฺมํ  วิตฺถาเรน  ปเรสํ  เทเสติ  นาปิ  ยถาสุตํ  ยถาปริยตฺตํ วิตฺถาเรน
สชฺฌายํ  กโรติ  นาปิ  ยถาสุตํ  ยถาปริยตฺตํ  ธมฺมํ  เจตสา  อนุวิตกฺเกติ
อนุวิจาเรติ    มนสานุเปกฺขติ    อปิจ    ขฺวสฺส   อญฺญตรํ   สมาธิมิตฺตํ
สุคฺคหิตํ   โหติ   สุมนสิกตํ   สูปธาริตํ  สุปฺปฏิวิทฺธํ  ปญฺญาย  ยถา  ยถา
อาวุโส    ภิกฺขุโน   อญฺญตรํ   สมาธิมิตฺตํ   สุคฺคหิตํ   โหติ   สุมนสิกตํ
สูปธาริตํ    สุปฺปฏิวิทฺธํ   ปญฺญาย   ตถา   ตถา   โส   ตสฺมึ   ธมฺเม
อตฺถปฏิสํเวที   จ   โหติ   ธมฺมปฏิสํเวที   จ   ตสฺส   อตฺถปฏิสํเวทิโน
ธมฺมปฏิสํเวทิโน     ปาโมชฺชํ     ชายติ    ปมุทิตสฺส    ปีติ    ชายติ
ปีติมนสฺส    กาโย   ปสฺสมฺภติ   ปสฺสทฺธกาโย   สุขํ   เวเทติ   สุขิโน
จิตฺตํ   สมาธิยติ   อิทํ   ปญฺจมํ   วิมุตฺตายตนํ   ฯ  อิเม  ปญฺจ  ธมฺมา
อภิญฺเญยฺยา ฯ
     [๔๒๐]  กตเม  ปญฺจ  ธมฺมา  สจฺฉิกาตพฺพา  ฯ  ปญฺจ  ธมฺมกฺขนฺธา
สีลกฺขนฺโธ    สมาธิกฺขนฺโธ   ปญฺญากฺขนฺโธ   วิมุตฺติกฺขนฺโธ   วิมุตฺติญาณ-
ทสฺสนกฺขนฺโธ   ฯ   อิเม   ปญฺจ  ธมฺมา  สจฺฉิกาตพฺพา  ฯ  อิติ  อิเม
ปญฺญาส   ธมฺมา   ภูตา   ตจฺฉา   ตถา   อวิตถา   อนญฺญถา   สมฺมา
ตถาคเตน อภิสมฺพุทฺธา ฯ
     [๔๒๑]  ฉ  ธมฺมา  พหุการา  ฉ  ธมฺมา  ภาเวตพฺพา  ฉ  ธมฺมา
ปริญฺเญยฺยา   ฉ   ธมฺมา   ปหาตพฺพา   ฉ   ธมฺมา   หานภาคิยา   ฉ
ธมฺมา  วิเสสภาคิยา  ฉ  ธมฺมา  ทุปฺปฏิวิชฺฌา  ฉ  ธมฺมา  อุปฺปาเทตพฺพา
ฉ ธมฺมา อภิญฺเญยฺยา ฉ ธมฺมา สจฺฉิกาตพฺพา ฯ
     [๔๒๒]  กตเม   ฉ  ธมฺมา  พหุการา  ฯ  ฉ  สาราณียา  ธมฺมา
อิธาวุโส   ภิกฺขุโน   เมตฺตํ   กายกมฺมํ  ปจฺจุปฏฺฐิตํ  โหติ  สพฺรหฺมจารีสุ
อาวิ  ๑-  เจว  รโห  จ  อยํปิ  ธมฺโม  สาราณีโย  ปิยกรโณ ครุกรโณ
สงฺคหาย     อวิวาทาย    สามคฺคิยา    เอกีภาวาย    สํวตฺตติ    ฯ
ปุน   จปรํ   อาวุโส   ภิกฺขุโน   เมตฺตํ   วจีกมฺมํ   ปจฺจุปฏฺฐิตํ   โหติ
สพฺรหฺมจารีสุ    อาวิ   เจว   รโห   จ   อยํปิ   ธมฺโม   สาราณีโย
ปิยกรโณ   ครุกรโณ   สงฺคหาย   อวิวาทาย   สามคฺคิยา   เอกีภาวาย
สํวตฺตติ   ฯ   ปุน   จปรํ   อาวุโส  ภิกฺขุโน  เมตฺตํ  มโนกมฺมํ  ฯเปฯ
เอกีภาวาย   สํวตฺตติ   ฯ  ปุน  จปรํ  อาวุโส  ภิกฺขุ  เย  เต  ลาภา
ธมฺมิกา    ธมฺมลทฺธา    อนฺตมโส    ปตฺตปริยาปนฺนมตฺตํปิ    ตถารูเปหิ
ลาเภหิ   อปฺปฏิวิภตฺตโภคี  โหติ  สีลวนฺเตหิ  สพฺรหฺมจารีหิ  สาธารณโภคี
อยํปิ     ธมฺโม     สาราณีโย     ปิยกรโณ    ครุกรโณ    สงฺคหาย
@เชิงอรรถ:  ยุ. อาวี ฯ
อวิวาทาย  สามคฺคิยา  เอกีภาวาย  สํวตฺตติ  ฯ  ปุน  จปรํ อาวุโส ภิกฺขุ
ยานิ   ตานิ   สีลานิ   อขณฺฑานิ   อจฺฉิทฺทานิ   อสพลานิ   อกมฺมาสานิ
ภุชิสฺสานิ   วิญฺญูปสตฺถานิ   อปรามฏฺฐานิ   สมาธิสํวตฺตนิกานิ   ตถารูเปสุ
สีเลสุ    สีลสามญฺญคโต   วิหรติ   สพฺรหฺมจารีหิ   อาวิ   เจว   รโห
จ   อยํปิ  ธมฺโม  สาราณีโย  ปิยกรโณ  ครุกรโณ  สงฺคหาย  อวิวาทาย
สามคฺคิยา   เอกีภาวาย   สํวตฺตติ  ฯ  ปุน  จปรํ  อาวุโส  ภิกฺขุ  ยายํ
ทิฏฺฐิ    อริยา    นิยฺยานิกา    นิยฺยาติ   ตกฺกรสฺส   สมฺมาทุกฺขกฺขยาย
ตถารูปาย     ทิฏฺฐิยา     ทิฏฺฐิสามญฺญคโต     วิหรติ    สพฺรหฺมจารีหิ
อาวิ   เจว   รโห   จ  อยํปิ  ธมฺโม  สาราณีโย  ปิยกรโณ  ครุกรโณ
สงฺคหาย   อวิวาทาย   สามคฺคิยา   เอกีภาวาย   สํวตฺตติ   ฯ   อิเม
ฉ ธมฺมา พหุการา ฯ
     [๔๒๓]  กตเม   ฉ  ธมฺมา  ภาเวตพฺพา  ฯ  ฉ  อนุสฺสติฏฺฐานานิ
พุทฺธานุสฺสติ    ธมฺมานุสฺสติ    สงฺฆานุสฺสติ    สีลานุสฺสติ    จาคานุสฺสติ
เทวตานุสฺสติ ฯ อิเม ฉ ธมฺมา ภาเวตพฺพา ฯ
     [๔๒๔]  กตเม   ฉ   ธมฺมา   ปริญฺเญยฺยา   ฯ  ฉ  อชฺฌตฺติกานิ
อายตนานิ     จกฺขฺวายตนํ     โสตายตนํ     ฆานายตนํ    ชิวฺหายตนํ
กายายตนํ มนายตนํ ฯ อิเม ฉ ธมฺมา ปริญฺเญยฺยา ฯ
     [๔๒๕]  กตเม   ฉ   ธมฺมา   ปหาตพฺพา   ฯ   ฉ  ตณฺหากายา
รูปตณฺหา   สทฺทตณฺหา   คนฺธตณฺหา   รสตณฺหา  โผฏฺฐพฺพตณฺหา
ธมฺมตณฺหา ฯ อิเม ฉ ธมฺมา ปหาตพฺพา ฯ
     [๔๒๖]  กตเม  ฉ  ธมฺมา  หานภาคิยา  ฯ  ฉ  อคารวา อิธาวุโส
ภิกฺขุ   สตฺถริ   อคารโว   วิหรติ  อปฺปติสฺโส  ธมฺเม  อคารโว  วิหรติ
อปฺปติสฺโส   สงฺเฆ   อคารโว   วิหรติ   อปฺปติสฺโส  สิกฺขาย  อคารโว
วิหรติ  อปฺปติสฺโส  อปฺปมาเท  อคารโว  วิหรติ  อปฺปติสฺโส  ปฏิสนฺถาเร
อคารโว วิหรติ อปฺปติสฺโส ฯ อิเม ฉ ธมฺมา หานภาคิยา ฯ
     [๔๒๗]  กตเม  ฉ  ธมฺมา  วิเสสภาคิยา  ฯ  ฉ  คารวา อิธาวุโส
ภิกฺขุ   สตฺถริ   สคารโว   วิหรติ  สปฺปติสฺโส  ธมฺเม  สคารโว  วิหรติ
สปฺปติสฺโส  ฯ  สงฺเฆ  ฯ  สิกฺขาย  ฯ อปฺปมาเท ฯ ปฏิสนฺถาเร สคารโว
วิหรติ สปฺปติสฺโส ฯ อิเม ฉ ธมฺมา วิเสสภาคิยา ฯ
     [๔๒๘]  กตเม  ฉ  ธมฺมา  ทุปฺปฏิวิชฺฌา  ฯ  ฉ นิสฺสารณียา ธาตุโย
อิธาวุโส  ภิกฺขุ  เอวํ  วเทยฺย เมตฺตา หิ โข เม ๑- เจโตวิมุตฺติ ภาวิตา
พหุลีกตา    ยานีกตา    วตฺถุกตา    อนุฏฺฐิตา   ปริจิตา   สุสมารทฺธา
อถ   จ  ปน  เม  พฺยาปาโท  จิตฺตํ  ปริยาทาย  ติฏฺฐตีติ  ฯ  โส  มา
เหวนฺติสฺส    วจนีโย   มา   อายสฺมา   เอวํ   อวจ   มา   ภควนฺตํ
อพฺภาจิกฺขิ   น   หิ   สาธุ   ภควโต  อพฺภกฺขานํ  น  หิ  ภควา  เอวํ
วเทยฺย   อฏฺฐานเมตํ  อาวุโส  อนวกาโส  ยํ  เมตฺตาย  เจโตวิมุตฺติยา
ภาวิตาย   พหุลีกตาย   ยานีกตาย   วตฺถุกตาย   อนุฏฺฐิตาย   ปริจิตาย
สุสมารทฺธาย    อถ    จ    ปนสฺส    พฺยาปาโท   จิตฺตํ   ปริยาทาย
ฐสฺสตีติ   ๒-   เนตํ  ฐานํ  วิชฺชติ  นิสฺสรณเญฺหตํ  อาวุโส  พฺยาปาทสฺส
ยทิทํ เมตฺตา เจโตวิมุตฺติ ๓- ฯ
     {๔๒๘.๑}  อิธ ปนาวุโส ภิกฺขุ เอวํ วเทยฺย
@เชิงอรรถ:  ม. เม อาวุโส ฯ  ม. อิติสทฺโท น ทิสฺสติ ฯ เอวมุปริ ฯ
@ ม. เจโตวิมุตฺตีติ ฯ เอวมุปริ ฯ
กรุณา   หิ   โข   เม   เจโตวิมุตฺติ   ภาวิตา   พหุลีกตา   ยานีกตา
วตฺถุกตา    อนุฏฺฐิตา    ปริจิตา   สุสมารทฺธา   อถ   จ   ปน   เม
วิเหสา    จิตฺตํ    ปริยาทาย   ติฏฺฐตีติ   ฯ   โส   มา   เหวนฺติสฺส
วจนีโย   มา   อายสฺมา   เอวํ   อวจ   มา  ภควนฺตํ  อพฺภาจิกฺขิ  น
หิ    สาธุ   ภควโต   อพฺภกฺขานํ   น   หิ   ภควา   เอวํ   วเทยฺย
อฏฺฐานเมตํ    อาวุโส    อนวกาโส    ยํ    กรุณาย   เจโตวิมุตฺติยา
ภาวิตาย      พหุลีกตาย     ยานีกตาย     วตฺถุกตาย     อนุฏฺฐิตาย
ปริจิตาย   สุสมารทฺธาย   อถ   จ   ปนสฺส  วิเหสา  จิตฺตํ  ปริยาทาย
ฐสฺสตีติ    เนตํ    ฐานํ   วิชฺชติ   นิสฺสรณเญฺหตํ   อาวุโส   วิเหสาย
ยทิทํ กรุณา เจโตวิมุตฺติ ฯ
     {๔๒๘.๒}  อิธ  ปนาวุโส  ภิกฺขุ  เอวํ  วเทยฺย  มุทิตา หิ โข เม
เจโตวิมุตฺติ    ภาวิตา    พหุลีกตา    ยานีกตา   วตฺถุกตา   อนุฏฺฐิตา
ปริจิตา   สุสมารทฺธา   อถ   จ   ปน   เม   อรติ  จิตฺตํ  ปริยาทาย
ติฏฺฐตีติ   ฯ  โส  มา  เหวนฺติสฺส  วจนีโย  มา  อายสฺมา  เอวํ  อวจ
มา   ภควนฺตํ   อพฺภาจิกฺขิ   น   หิ  สาธุ  ภควโต  อพฺภกฺขานํ  น  หิ
ภควา   เอวํ   วเทยฺย   อฏฺฐานเมตํ  อาวุโส  อนวกาโส  ยํ  มุทิตาย
เจโตวิมุตฺติยา     ภาวิตาย     พหุลีกตาย    ยานีกตาย    วตฺถุกตาย
อนุฏฺฐิตาย   ปริจิตาย   สุสมารทฺธาย   อถ   จ   ปนสฺส   อรติ  จิตฺตํ
ปริยาทาย    ฐสฺสตีติ   เนตํ   ฐานํ   วิชฺชติ   นิสฺสรณเญฺหตํ   อาวุโส
อรติยา ยทิทํ มุทิตา เจโตวิมุตฺติ ฯ
     {๔๒๘.๓}  อิธ  ปนาวุโส  ภิกฺขุ  เอวํ วเทยฺย อุเปกฺขา หิ โข เม
เจโตวิมุตฺติ    ภาวิตา    พหุลีกตา    ยานีกตา   วตฺถุกตา   อนุฏฺฐิตา
ปริจิตา   สุสมารทฺธา   อถ   จ   ปน   เม  ราโค  จิตฺตํ  ปริยาทาย
ติฏฺฐตีติ   ฯ  โส  มา  เหวนฺติสฺส  วจนีโย  มา  อายสฺมา  เอวํ  อวจ
มา   ภควนฺตํ   อพฺภาจิกฺขิ   น   หิ  สาธุ  ภควโต  อพฺภกฺขานํ  น  หิ
ภควา   เอวํ  วเทยฺย  อฏฺฐานเมตํ  อาวุโส  อนวกาโส  ยํ  อุเปกฺขาย
เจโตวิมุตฺติยา     ภาวิตาย     พหุลีกตาย    ยานีกตาย    วตฺถุกตาย
อนุฏฺฐิตาย   ปริจิตาย   สุสมารทฺธาย   อถ   จ   ปนสฺส  ราโค  จิตฺตํ
ปริยาทาย    ฐสฺสตีติ   เนตํ   ฐานํ   วิชฺชติ   นิสฺสรณเญฺหตํ   อาวุโส
ราคสฺส ยทิทํ อุเปกฺขา เจโตวิมุตฺติ ฯ
     {๔๒๘.๔}  อิธ  ปนาวุโส  ภิกฺขุ  เอวํ  วเทยฺย  อนิมิตฺตา  หิ โข
เม   เจโตวิมุตฺติ   ภาวิตา   พหุลีกตา   ยานีกตา  วตฺถุกตา  อนุฏฺฐิตา
ปริจิตา  สุสมารทฺธา  อถ  จ  ปน  เม  นิมิตฺตานุสาริ  วิญฺญาณํ โหตีติ ฯ
โส  มา  เหวนฺติสฺส  วจนีโย  มา  อายสฺมา  เอวํ  อวจ  มา  ภควนฺตํ
อพฺภาจิกฺขิ  น  หิ  สาธุ  ภควโต  อพฺภกฺขานํ  น  หิ ภควา เอวํ วเทยฺย
อฏฺฐานเมตํ    อาวุโส    อนวกาโส   ยํ   อนิมิตฺตาย   เจโตวิมุตฺติยา
ภาวิตาย   พหุลีกตาย   ยานีกตาย   วตฺถุกตาย   อนุฏฺฐิตาย   ปริจิตาย
สุสมารทฺธาย   อถ   จ   ปนสฺส   นิมิตฺตานุสาริ   วิญฺญาณํ    ภวิสฺสตีติ
เนตํ    ฐานํ   วิชฺชติ   นิสฺสรณเญฺหตํ   อาวุโส   สพฺพนิมิตฺตานํ   ยทิทํ
อนิมิตฺตา เจโตวิมุตฺติ ฯ
     {๔๒๘.๕}  อิธ ปนาวุโส ภิกฺขุ เอวํ วเทยฺย อสฺมีติ โข เม วิคเต ๑- อยมหมสฺมีติ
@เชิงอรรถ:  ม. วิคตํ ฯ ยุ. วิฆาตํ ฯ
น   สมนุปสฺสามิ   อถ   จ   ปน   เม   วิจิกิจฺฉากถงฺกถาสลฺลํ   จิตฺตํ
ปริยาทาย   ติฏฺฐตีติ   ฯ  โส  มา  เหวนฺติสฺส  วจนีโย  มา  อายสฺมา
เอวํ  อวจ  มา  ภควนฺตํ  อพฺภาจิกฺขิ  น  หิ  สาธุ  ภควโต  อพฺภกฺขานํ
น   หิ   ภควา   เอวํ   วเทยฺย  อฏฺฐานเมตํ  อาวุโส  อนวกาโส  ยํ
อสฺมีติ   วิคเต  ๑-  อยมหมสฺมีติ  น  สมนุปสฺสโต  ๒-  อถ  จ  ปนสฺส
วิจิกิจฺฉากถงฺกถาสลฺลํ    จิตฺตํ    ปริยาทาย    ฐสฺสตีติ    เนตํ   ฐานํ
วิชฺชติ       นิสฺสรณเญฺหตํ       อาวุโส      วิจิกิจฺฉากถงฺกถาสลฺลสฺส
ยทิทํ อสฺมิมานสมุคฺฆาโต ๓- ฯ อิเม ฉ ธมฺมา ทุปฺปฏิวิชฺฌา ฯ
     [๔๒๙]  กตเม   ฉ   ธมฺมา  อุปฺปาเทตพฺพา  ฯ  ฉ  สตตวิหารา
อิธาวุโส   ภิกฺขุ  จกฺขุนา  รูปํ  ทิสฺวา  เนว  สุมโน  โหติ  น  ทุมฺมโน
อุเปกฺขโก  จ  ๔-  วิหรติ  สโต สมฺปชาโน ฯ โสเตน สทฺทํ สุตฺวา ฯเปฯ
ฆาเนน   คนฺธํ   ฆายิตฺวา   ฯเปฯ   ชิวฺหาย   รสํ   สายิตฺวา  ฯเปฯ
กาเยน   โผฏฺฐพฺพํ   ผุสิตฺวา   ฯเปฯ   มนสา   ธมฺมํ   วิญฺญาย  เนว
สุมโน  โหติ  น  ทุมฺมโน  อุเปกฺขโก  จ  ๔-  วิหรติ สโต สมฺปชาโน ฯ
อิเม ฉ ธมฺมา อุปฺปาเทตพฺพา ฯ
     [๔๓๐]  กตเม   ฉ   ธมฺมา   อภิญฺเญยฺยา   ฯ  ฉ  อนุตฺตริยานิ
ทสฺสนานุตฺตริยํ      สวนานุตฺตริยํ      ลาภานุตฺตริยํ      สิกฺขานุตฺตริยํ
ปาริจริยานุตฺตริยํ อนุสฺสตานุตฺตริยํ ฯ อิเม ฉ ธมฺมา อภิญฺเญยฺยา ฯ
     [๔๓๑]  กตเม  ฉ  ธมฺมา  สจฺฉิกาตพฺพา  ฯ  ฉ  อภิญฺญา อิธาวุโส
ภิกฺขุ    อเนกวิหิตํ    อิทฺธิวิธํ   ปจฺจนุโภติ   เอโกปิ   หุตฺวา   พหุธา
@เชิงอรรถ:  ยุ. วิฆาเต ฯ  ม. ยุ. อสมนุปสฺสโต ฯ  ยุ. ยทิทมสฺมีติ มานสมุคฺฆาโต ฯ
@ ม. ยุ. จสทฺโท น ทิสฺสติ ฯ
โหติ   พหุธาปิ   หุตฺวา   เอโก   โหติ  อาวิภาวํ  ติโรภาวํ  ติโรกุฑฺฑํ
ติโรปาการํ      ติโรปพฺพตํ     อสชฺชมาโน     คจฺฉติ     เสยฺยถาปิ
อากาเส    ปฐวิยาปิ    อุมฺมุชฺชนิมฺมุชฺชํ    กโรติ   เสยฺยถาปิ   อุทเก
อุทเกปิ    อภิชฺชมาเน    คจฺฉติ    เสยฺยถาปิ    ปฐวิยา   อากาเสปิ
ปลฺลงฺเกน   จงฺกมติ   เสยฺยถาปิ   ปกฺขี   สกุโณ   อิเมปิ  จนฺทิมสุริเย
เอวํมหิทฺธิเก   เอวํมหานุภาเว   ปาณินา   ปรามสติ   ปริมชฺชติ   ยาว
พฺรหฺมโลกาปิ กาเยน วสํ วตฺเตติ ฯ
     {๔๓๑.๑}   ทิพฺพาย   โสตธาตุยา   วิสุทฺธาย  อติกฺกนฺตมานุสิกาย
อุโภ  สทฺเท  สุณาติ ทิพฺเพ จ มานุเส จ เย ทูเร สนฺติเก จ ฯ ปรสตฺตานํ
ปรปุคฺคลานํ  เจตสา  เจโต  ปริจฺจ  ชานาติ  ๑- สราคํ วา จิตฺตํ สราคํ
จิตฺตนฺติ   ปชานาติ   วีตราคํ   วา   จิตฺตํ  วีตราคํ  จิตฺตนฺติ  ปชานาติ
สโทสํ  วา  จิตฺตํ  สโทสํ  จิตฺตนฺติ  ปชานาติ  วีตโทสํ  วา จิตฺตํ วีตโทสํ
จิตฺตนฺติ   ปชานาติ   สโมหํ   วา   จิตฺตํ   สโมหํ   จิตฺตนฺติ  ปชานาติ
วีตโมหํ    วา   จิตฺตํ   วีตโมหํ   จิตฺตนฺติ   ปชานาติ   สงฺขิตฺตํ   วา
จิตฺตํ   สงฺขิตฺตํ   จิตฺตนฺติ   ปชานาติ   วิกฺขิตฺตํ   วา   จิตฺตํ  วิกฺขิตฺตํ
จิตฺตนฺติ    ปชานาติ    มหคฺคตํ    วา    จิตฺตํ    มหคฺคตํ    จิตฺตนฺติ
ปชานาติ    อมหคฺคตํ    วา    จิตฺตํ   อมหคฺคตํ   จิตฺตนฺติ   ปชานาติ
สอุตฺตรํ    วา   จิตฺตํ   สอุตฺตรํ   จิตฺตนฺติ   ปชานาติ   อนุตฺตรํ   วา
จิตฺตํ   อนุตฺตรํ   จิตฺตนฺติ   ปชานาติ   สมาหิตํ   วา   จิตฺตํ   สมาหิตํ
จิตฺตนฺติ    ปชานาติ    อสมาหิตํ    วา    จิตฺตํ   อสมาหิตํ   จิตฺตนฺติ
@เชิงอรรถ:  ม. ยุ. ปชานาติ ฯ
ปชานาติ   วิมุตฺตํ   วา   จิตฺตํ   วิมุตฺตํ   จิตฺตนฺติ   ปชานาติ  อวิมุตฺตํ
วา จิตฺตํ อวิมุตฺตํ จิตฺตนฺติ ปชานาติ ฯ [๑]-
     {๔๓๑.๒}   อเนกวิหิตํ   ปุพฺเพนิวาสํ  อนุสฺสรติ  เสยฺยถีทํ  เอกํปิ
ชาตึ  เทฺวปิ  ชาติโย  ติสฺโสปิ  ชาติโย  จตสฺโสปิ ชาติโย ปญฺจปิ ชาติโย
ทสปิ   ชาติโย   วีสํปิ   ชาติโย   ตึสํปิ   ชาติโย  จตฺตาฬีสํปิ  ชาติโย
ปญฺญาสํปิ    ชาติโย   สตํปิ   ชาติโย   สหสฺสํปิ   ชาติโย   สตสหสฺสํปิ
ชาติโย    อเนเกปิ   สํวฏฺฏกปฺเป   อเนเกปิ   วิวฏฺฏกปฺเป   อเนเกปิ
สํวฏฺฏวิวฏฺฏกปฺเป    อมุตฺราสึ    เอวํนาโม    เอวํโคตฺโต   เอวํวณฺโณ
เอวมาหาโร   เอวํสุขทุกฺขปฏิสํเวที   เอวมายุปริยนฺโต  โส  ตโต  จุโต
อมุตฺร    อุทปาทึ    ตตฺราปาสึ   เอวํนาโม   เอวํโคตฺโต   เอวํวณฺโณ
เอวมาหาโร    เอวํสุขทุกฺขปฏิสํเวที    เอวมายุปริยนฺโต    โส   ตโต
จุโต   อิธูปปนฺโนติ   อิติ   สาการํ   สอุทฺเทสํ  อเนกวิหิตํ  ปุพฺเพนิวาสํ
อนุสฺสรติ ฯ
     {๔๓๑.๓}    ทิพฺเพน    จกฺขุนา   วิสุทฺเธน   อติกฺกนฺตมานุสเกน
สตฺเต    ปสฺสติ    จวมาเน   อุปปชฺชมาเน   หีเน   ปณีเต   สุวณฺเณ
ทุพฺพณฺเณ   สุคเต   ทุคฺคเต   ยถากมฺมูปเค   สตฺเต   ปชานาติ   อิเม
วต    โภนฺโต    สตฺตา   กายทุจฺจริเตน   สมนฺนาคตา   วจีทุจฺจริเตน
สมนฺนาคตา     มโนทุจฺจริเตน    สมนฺนาคตา    อริยานํ    อุปวาทกา
มิจฺฉาทิฏฺฐิกา     มิจฺฉาทิฏฺฐิกมฺมสมาทานา     เต    กายสฺส    เภทา
ปรํ    มรณา    อปายํ    ทุคฺคตึ   วินิปาตํ   นิรยํ   อุปปนฺนา   อิเม
วา     ปน     โภนฺโต     สตฺตา     กายสุจริเตน     สมนฺนาคตา
วจีสุจริเตน        สมนฺนาคตา       มโนสุจริเตน       สมนฺนาคตา
@เชิงอรรถ:  ม. โส ฯ
อริยานํ      อนุปวาทกา     สมฺมาทิฏฺฐิกา     สมฺมาทิฏฺฐิกมฺมสมาทานา
เต   กายสฺส   เภทา   ปรํ  มรณา  สุคตึ  สคฺคํ  โลกํ  อุปปนฺนาติ  ฯ
อิติ    ทิพฺเพน    จกฺขุนา    วิสุทฺเธน    อติกฺกนฺตมานุสเกน    สตฺเต
ปสฺสติ     จวมาเน     อุปปชฺชมาเน     หีเน     ปณีเต    สุวณฺเณ
ทุพฺพณฺเณ สุคเต ทุคฺคเต ยถากมฺมูปเค สตฺเต ปชานาติ ฯ
     {๔๓๑.๔}   อาสวานํ   ขยา   อนาสวญฺเจโตวิมุตฺตึ   ปญฺญาวิมุตฺตึ
ทิฏฺเฐ  ว  ธมฺเม  สยํ  อภิญฺญา  สจฺฉิกตฺวา  อุปสมฺปชฺช  วิหรติ  ฯ อิเม
ฉ  ธมฺมา  สจฺฉิกาตพฺพา  ฯ  อิติ  อิเม  สฏฺฐิ  ธมฺมา  ภูตา ตจฺฉา ตถา
อวิตถา อนญฺญถา สมฺมา ตถาคเตน อภิสมฺพุทฺธา ฯ
     [๔๓๒]  สตฺต  ธมฺมา  พหุการา  สตฺต  ธมฺมา  ภาเวตพฺพา  สตฺต
ธมฺมา    ปริญฺเญยฺยา    สตฺต    ธมฺมา    ปหาตพฺพา   สตฺต   ธมฺมา
หานภาคิยา   สตฺต   ธมฺมา   วิเสสภาคิยา   สตฺต  ธมฺมา  ทุปฺปฏิวิชฺฌา
สตฺต    ธมฺมา    อุปฺปาเทตพฺพา   สตฺต   ธมฺมา   อภิญฺเญยฺยา   สตฺต
ธมฺมา สจฺฉิกาตพฺพา ฯ
     [๔๓๓]  กตเม  สตฺต  ธมฺมา  พหุการา  ฯ  สตฺต  อริยธนานิ  ๑-
สทฺธาธนํ   สีลธนํ   หิริธนํ   โอตฺตปฺปธนํ  สุตธนํ  จาคธนํ  ปญฺญาธนํ  ฯ
อิเม สตฺต ธมฺมา พหุการา ฯ
     [๔๓๔]  กตเม  สตฺต  ธมฺมา  ภาเวตพฺพา ฯ สตฺต สมฺโพชฺฌงฺคา ๒-
สติสมฺโพชฺฌงฺโค         ธมฺมวิจยสมฺโพชฺฌงฺโค        วิริยสมฺโพชฺฌงฺโค
ปีติสมฺโพชฺฌงฺโค         ปสฺสทฺธิสมฺโพชฺฌงฺโค        สมาธิสมฺโพชฺฌงฺโค
@เชิงอรรถ:  ยุ. ธนานิ ฯ   ยุ. โพชฺฌงฺคา ฯ
อุเปกฺขาสมฺโพชฺฌงฺโค ฯ อิเม สตฺต ธมฺมา ภาเวตพฺพา ฯ
     [๔๓๕]  กตเม  สตฺต  ธมฺมา  ปริญฺเญยฺยา  ฯ  สตฺต วิญฺญาณฏฺฐิติโย
สนฺตาวุโส     สตฺตา     นานตฺตกายา    นานตฺตสญฺญิโน    เสยฺยถาปิ
มนุสฺสา   เอกจฺเจ   จ   เทวา  เอกจฺเจ  จ  วินิปาติกา  อยํ  ปฐมา
วิญฺญาณฏฺฐิติ    ฯ   สนฺตาวุโส   สตฺตา   นานตฺตกายา   เอกตฺตสญฺญิโน
เสยฺยถาปิ    เทวา    พฺรหฺมกายิกา    ปฐมาภินิพฺพตฺตา   อยํ   ทุติยา
วิญฺญาณฏฺฐิติ    ฯ   สนฺตาวุโส   สตฺตา   เอกตฺตกายา   นานตฺตสญฺญิโน
เสยฺยถาปิ   เทวา  อาภสฺสรา  อยํ  ตติยา  วิญฺญาณฏฺฐิติ  ฯ  สนฺตาวุโส
สตฺตา   เอกตฺตกายา   เอกตฺตสญฺญิโน   เสยฺยถาปิ   เทวา   สุภกิณฺหา
อยํ   จตุตฺถา   ๑-   วิญฺญาณฏฺฐิติ   ฯ   สนฺตาวุโส   สตฺตา   สพฺพโส
รูปสญฺญานํ    สมติกฺกมา    ปฏิฆสญฺญานํ    อตฺถงฺคมา    นานตฺตสญฺญานํ
อมนสิการา     อนนฺโต    อากาโสติ    อากาสานญฺจายตนูปคา    อยํ
ปญฺจมี   วิญฺญาณฏฺฐิติ  ฯ  สนฺตาวุโส  สตฺตา  สพฺพโส  อากาสานญฺจายตนํ
สมติกฺกมฺม      อนนฺตํ     วิญฺญาณนฺติ     วิญฺญาณญฺจายตนูปคา     อยํ
ฉฏฺฐี   วิญฺญาณฏฺฐิติ   ฯ   สนฺตาวุโส   สตฺตา  สพฺพโส  วิญฺญาณญฺจายตนํ
สมติกฺกมฺม     นตฺถิ    กิญฺจีติ    อากิญฺจญฺญายตนูปคา    อยํ    สตฺตมี
วิญฺญาณฏฺฐิติ ฯ อิเม สตฺต ธมฺมา ปริญฺเญยฺยา ฯ
     [๔๓๖]  กตเม  สตฺต  ธมฺมา  ปหาตพฺพา  ฯ  สตฺต  อนุสยา กาม-
ราคานุสโย   ปฏิฆานุสโย   ทิฏฺฐานุสโย   วิจิกิจฺฉานุสโย   มานานุสโย
@เชิงอรรถ:  ม. จตุตฺถี ฯ
ภวราคานุสโย อวิชฺชานุสโย ฯ อิเม สตฺต ธมฺมา ปหาตพฺพา ฯ
     [๔๓๗]  กตเม   สตฺต  ธมฺมา  หานภาคิยา  ฯ  สตฺต  อสทฺธมฺมา
อิธาวุโส   ภิกฺขุ   อสฺสทฺโธ   โหติ   อหิริโก   โหติ  อโนตฺตปฺปี  โหติ
อปฺปสฺสุโต    โหติ    กุสีโต    โหติ    มุฏฺฐสฺสติ    โหติ   ทุปฺปญฺโญ
โหติ ฯ อิเม สตฺต ธมฺมา หานภาคิยา ฯ
     [๔๓๘]  กตเม  สตฺต  ธมฺมา  วิเสสภาคิยา  ฯ  สตฺต  สทฺธมฺมา
อิธาวุโส   ภิกฺขุ   สทฺโธ   โหติ   หิริโก   ๑-  โหติ  โอตฺตปฺปี  โหติ
พหุสฺสุโต   โหติ   อารทฺธวิริโย   โหติ   อุปฏฺฐิตสฺสติ   โหติ   ปญฺญวา
โหติ ฯ อิเม สตฺต ธมฺมา วิเสสภาคิยา ฯ
     [๔๓๙]  กตเม  สตฺต  ธมฺมา  ทุปฺปฏิวิชฺฌา  ฯ  สตฺต  สปฺปุริสธมฺมา
อิธาวุโส    ภิกฺขุ    ธมฺมญฺญู    โหติ    อตฺถญฺญู    อตฺตญฺญู   มตฺตญฺญู
กาลญฺญู   ปริสญฺญู   ปุคฺคลปโรปรญฺญู   ๒-   ฯ   อิเม   สตฺต   ธมฺมา
ทุปฺปฏิวิชฺฌา ฯ
     [๔๔๐]  กตเม   สตฺต   ธมฺมา  อุปฺปาเทตพฺพา  ฯ  สตฺต  สญฺญา
อนิจฺจสญฺญา   อนตฺตสญฺญา   อสุภสญฺญา   อาทีนวสญฺญา   ปหานสญฺญา
วิราคสญฺญา นิโรธสญฺญา ฯ อิเม สตฺต ธมฺมา อุปฺปาเทตพฺพา ฯ
     [๔๔๑]  กตเม  สตฺต  ธมฺมา  อภิญฺเญยฺยา  ฯ  สตฺต  นิทฺทสวตฺถูนิ
อิธาวุโส    ภิกฺขุ    สิกฺขาสมาทาเน    ติพฺพจฺฉนฺโท   โหติ   อายติญฺจ
สิกฺขาสมาทาเน    อวิคตเปโม    ธมฺมนิสนฺติยา    ติพฺพจฺฉนฺโท    โหติ
@เชิงอรรถ:  ม. ยุ. หิริมา ฯ  ม. ยุ. ธมมฺญฺญู จ โหติ ... ปุคฺคลญฺญู จ อิจฺเจวํ จ สทฺโท
@ทิสฺสติ ฯ
อายติญฺจ    ธมฺมนิสนฺติยา    อวิคตเปโม    อิจฺฉาวินเย    ติพฺพจฺฉนฺโท
โหติ   อายติญฺจ   อิจฺฉาวินเย   อวิคตเปโม   ปฏิสลฺลาเน  ติพฺพจฺฉนฺโท
โหติ   อายติญฺจ   ปฏิสลฺลาเน   อวิคตเปโม   วิริยารมฺเภ  ติพฺพจฺฉนฺโท
โหติ   อายติญฺจ   วิริยารมฺเภ   อวิคตเปโม   สติเนปกฺเก  ติพฺพจฺฉนฺโท
โหติ   อายติญฺจ   สติเนปกฺเก   อวิคตเปโม  ทิฏฺฐิปฏิเวเธ  ติพฺพจฺฉนฺโท
โหติ   อายติญฺจ   ทิฏฺฐิปฏิเวเธ   อวิคตเปโม   ฯ  อิเม  สตฺต  ธมฺมา
อภิญฺเญยฺยา ฯ
     [๔๔๒]  กตเม  สตฺต  ธมฺมา  สจฺฉิกาตพฺพา  ฯ  สตฺต ขีณาสวพลานิ
อิธาวุโส   ขีณาสวสฺส   ภิกฺขุโน   อนิจฺจโต   สพฺเพ  สงฺขารา  ยถาภูตํ
สมฺมปฺปญฺญาย    สุทิฏฺฐา    โหนฺติ    ยํปาวุโส    ขีณาสวสฺส   ภิกฺขุโน
อนิจฺจโต    สพฺเพ    สงฺขารา    ยถาภูตํ    สมฺมปฺปญฺญาย    สุทิฏฺฐา
โหนฺติ   อิทํ   ๑-   ขีณาสวสฺส   ภิกฺขุโน  พลํ  โหติ  ยํ  พลํ  อาคมฺม
ขีณาสโว ภิกฺขุ อาสวานํ ขยํ ปฏิชานาติ ขีณา เม อาสวาติ ฯ
     {๔๔๒.๑}  ปุน  จปรํ  อาวุโส  ขีณาสวสฺส ภิกฺขุโน องฺคารกาสูปมา
กามา   ยถาภูตํ   สมฺมปฺปญฺญาย   สุทิฏฺฐา  โหนฺติ  ยํปาวุโส  ขีณาสวสฺส
ภิกฺขุโน    องฺคารกาสูปมา   กามา   ยถาภูตํ   สมฺมปฺปญฺญาย   สุทิฏฺฐา
โหนฺติ  อิทํ  ขีณาสวสฺส  ภิกฺขุโน  พลํ  โหติ  ยํ  พลํ  อาคมฺม  ขีณาสโว
ภิกฺขุ อาสวานํ ขยํ ปฏิชานาติ ขีณา เม อาสวาติ ฯ
     {๔๔๒.๒}  ปุน จปรํ อาวุโส ขีณาสวสฺส ภิกฺขุโน วิเวกนินฺนํ จิตฺตํ โหติ
วิเวกโปณํ   วิเวกปพฺภารํ   วิเวกฏฺฐํ  เนกฺขมฺมาภิรตํ  พฺยนฺตีภูตํ  สพฺพโส
@เชิงอรรถ:  ม. ยุ. อิทมฺปิ ฯ
อาสวฏฺฐานิเยหิ   ธมฺเมหิ   ยํปาวุโส   ขีณาสวสฺส   ภิกฺขุโน  วิเวกนินฺนํ
จิตฺตํ    โหติ    วิเวกโปณํ   วิเวกปพฺภารํ   วิเวกฏฺฐํ   เนกฺขมฺมาภิรตํ
พฺยนฺตีภูตํ    สพฺพโส    อาสวฏฺฐานิเยหิ    ธมฺเมหิ   อิทํปิ   ขีณาสวสฺส
ภิกฺขุโน   พลํ   โหติ  ยํ  พลํ  อาคมฺม  ขีณาสโว  ภิกฺขุ  อาสวานํ  ขยํ
ปฏิชานาติ ขีณา เม อาสวาติ ฯ
     {๔๔๒.๓}  ปุน   จปรํ   อาวุโส  ขีณาสวสฺส  ภิกฺขุโน  จตฺตาโร
สติปฏฺฐานา    ภาวิตา    โหนฺติ    สุภาวิตา    ยํปาวุโส   ขีณาสวสฺส
ภิกฺขุโน   จตฺตาโร   สติปฏฺฐานา   ภาวิตา   โหนฺติ   สุภาวิตา   อิทํปิ
ขีณาสวสฺส   ภิกฺขุโน   พลํ   โหติ   ยํ   พลํ  อาคมฺม  ขีณาสโว  ภิกฺขุ
อาสวานํ ขยํ ปฏิชานาติ ขีณา เม อาสวาติ ฯ
     {๔๔๒.๔}  ปุน  จปรํ  อาวุโส  ขีณาสวสฺส  ภิกฺขุโน  ปญฺจินฺทฺริยานิ
ภาวิตานิ    โหนฺติ    สุภาวิตานิ    ยํปาวุโส    ขีณาสวสฺส    ภิกฺขุโน
ปญฺจินฺทฺริยานิ    ภาวิตานิ    โหนฺติ    สุภาวิตานิ    อิทํปิ   ขีณาสวสฺส
ภิกฺขุโน   พลํ   โหติ  ยํ  พลํ  อาคมฺม  ขีณาสโว  ภิกฺขุ  อาสวานํ  ขยํ
ปฏิชานาติ ขีณา เม อาสวาติ ฯ
     {๔๔๒.๕}  ปุน  จปรํ  อาวุโส  ขีณาสวสฺส ภิกฺขุโน สตฺต โพชฺฌงฺคา
ภาวิตา    โหนฺติ   สุภาวิตา   ยํปาวุโส   ขีณาสวสฺส   ภิกฺขุโน   สตฺต
โพชฺฌงฺคา   ภาวิตา   โหนฺติ   สุภาวิตา   อิทํปิ   ขีณาสวสฺส   ภิกฺขุโน
พลํ  โหติ  ยํ  พลํ  อาคมฺม  ขีณาสโว  ภิกฺขุ  อาสวานํ  ขยํ  ปฏิชานาติ
ขีณา เม อาสวาติ ฯ
     {๔๔๒.๖}  ปุน  จปรํ  อาวุโส ขีณาสวสฺส ภิกฺขุโน อริโย อฏฺฐงฺคิโก
มคฺโค   ภาวิโต  โหติ  สุภาวิโต  ยํปาวุโส  ขีณาสวสฺส  ภิกฺขุโน  อริโย
อฏฺฐงฺคิโก    มคฺโค    ภาวิโต   โหติ   สุภาวิโต   อิทํปิ   ขีณาสวสฺส
ภิกฺขุโน   พลํ   โหติ   ยํ   พลํ   อาคมฺม   ขีณาสโว  ภิกฺขุ  อาสวานํ
ขยํ   ปฏิชานาติ   ขีณา   เม   อาสวาติ   ฯ   อิเม   สตฺต   ธมฺมา
สจฺฉิกาตพฺพา   ฯ   อิติ   อิเม   สตฺตติ   ธมฺมา   ภูตา  ตจฺฉา  ตถา
อวิตถา อนญฺญถา สมฺมา ตถาคเตน อภิสมฺพุทฺธา ฯ
                    ปฐมภาณวารํ ๑- ฯ
     [๔๔๓]  อฏฺฐ   ธมฺมา   พหุการา   อฏฺฐ   ธมฺมา   ภาเวตพฺพา
อฏฺฐ    ธมฺมา    ปริญฺเญยฺยา    อฏฺฐ    ธมฺมา    ปหาตพฺพา   อฏฺฐ
ธมฺมา    หานภาคิยา    อฏฺฐ   ธมฺมา   วิเสสภาคิยา   อฏฺฐ   ธมฺมา
ทุปฺปฏิวิชฺฌา     อฏฺฐ     ธมฺมา     อุปฺปาเทตพฺพา    อฏฺฐ    ธมฺมา
อภิญฺเญยฺยา อฏฺฐ ธมฺมา สจฺฉิกาตพฺพา ฯ
     [๔๔๔]  กตเม   อฏฺฐ   ธมฺมา  พหุการา  ฯ  อฏฺฐ  เหตู  อฏฺฐ
ปจฺจยา    อาทิพฺรหฺมจริยกาย    ปญฺญาย    อปฺปฏิลทฺธาย    ปฏิลาภาย
ปฏิลทฺธาย   ภิยฺโยภาวาย   เวปุลฺลาย   ภาวนาย  ปาริปูริยา  สํวตฺตนฺติ
กตเม  อฏฺฐ  ๒-  อิธาวุโส  ภิกฺขุ  ๓- สตฺถารํ วา ๔- อุปนิสฺสาย วิหรติ
อญฺญตรํ   วา   ครุฏฺฐานิยํ   สพฺรหฺมจารึ   ยตฺถสฺส   ติพฺพํ   หิโรตฺตปฺปํ
ปจฺจุปฏฺฐิตํ  โหติ  เปมญฺจ  คารโว  จ  อยํ  ปฐโม  เหตุ ปฐโม ปจฺจโย
อาทิพฺรหฺมจริยกาย    ปญฺญาย    อปฺปฏิลทฺธาย   ปฏิลาภาย   ปฏิลทฺธาย
ภิยฺโยภาวาย เวปุลฺลาย ภาวนาย ปาริปูริยา สํวตฺตติ ฯ
     {๔๔๔.๑}  ตํ โข ปน สตฺถารํ อุปนิสฺสาย วิหรติ อญฺญตรํ วา ครุฏฺฐานิยํ
@เชิงอรรถ:  ม. ปฐมภาณวาโร นิฏฺฐิโต ฯ ยุ. ปฐมกภาณวารํ นิฏฺฐิตํ ฯ  ยุ. กตเม อฏฺฐาติ
@น ทิสฺสติ ฯ  ยุ. ภิกฺขูติ น ทิสฺสติ ฯ  ม. ยุ. วาสทฺโท น ทิสฺสติ ฯ
สพฺรหฺมจารึ   ยตฺถสฺส   ติพฺพํ   หิโรตฺตปฺปํ   ปจฺจุปฏฺฐิตํ   โหติ  เปมญฺจ
คารโว   จ   เต   กาเลน   กาลํ  อุปสงฺกมิตฺวา  ปริปุจฺฉติ  ปริปญฺหติ
อิทํ   ภนฺเต   กถํ   อิมสฺส   โก   อตฺโถติ   ตสฺส   เต  อายสฺมนฺโต
อวิวฏญฺเจว   วิวรนฺติ   อนุตฺตานีกตญฺจ   อุตฺตานึ  กโรนฺติ  อเนกวิหิเตสุ
จ    กงฺขฏฺฐานิเยสุ    ธมฺเมสุ    กงฺขํ   ปฏิวิโนเทนฺติ   อยํ   ทุติโย
เหตุ    ทุติโย   ปจฺจโย   อาทิพฺรหฺมจริยกาย   ปญฺญาย   อปฺปฏิลทฺธาย
ปฏิลาภาย     ปฏิลทฺธาย     ภิยฺโยภาวาย     เวปุลฺลาย    ภาวนาย
ปาริปูริยา สํวตฺตติ ฯ
     {๔๔๔.๒}  ตํ  โข  ปน  ธมฺมํ สุตฺวา ทฺวเยน วูปกาเสน สมฺปาเทติ
กายวูปกาเสน  จ  จิตฺตวูปกาเสน  จ  อยํ  ตติโย  เหตุ  ตติโย ปจฺจโย
อาทิพฺรหฺมจริยกาย    ปญฺญาย    อปฺปฏิลทฺธาย   ปฏิลาภาย   ปฏิลทฺธาย
ภิยฺโยภาวาย เวปุลฺลาย ภาวนาย ปาริปูริยา สํวตฺตติ ฯ
     {๔๔๔.๓}  ปุน  จปรํ อาวุโส ภิกฺขุ สีลวา โหติ ปาติโมกฺขสํวรสํวุโต
วิหรติ   อาจารโคจรสมฺปนฺโน  อนุมตฺเตสุ  วชฺเชสุ  ภยทสฺสาวี  สมาทาย
สิกฺขติ  สิกฺขาปเทสุ  อยํ  จตุตฺโถ เหตุ จตุตฺโถ ปจฺจโย อาทิพฺรหฺมจริยกาย
ปญฺญาย     อปฺปฏิลทฺธาย     ปฏิลาภาย    ปฏิลทฺธาย    ภิยฺโยภาวาย
เวปุลฺลาย ภาวนาย ปาริปูริยา สํวตฺตติ ฯ
     {๔๔๔.๔}  ปุน   จปรํ  อาวุโส  ภิกฺขุ  พหุสฺสุโต  โหติ  สุตธโร
สุตสนฺนิจโย    เย    เต    ธมฺมา    อาทิกลฺยาณา    มชฺเฌกลฺยาณา
ปริโยสานกลฺยาณา     สาตฺถํ     สพฺยญฺชนํ    เกวลปริปุณฺณํ    ปริสุทฺธํ
พฺรหฺมจริยํ    อภิวทนฺติ    ตถารูปาสฺส    ธมฺมา    พหุสฺสุตา    โหนฺติ
ธตา   วจสา   ปริจิตา   มนสานุเปกฺขิตา   ทิฏฺฐิยา   สุปฺปฏิวิทฺธา  อยํ
ปญฺจโม    เหตุ    ปญฺจโม    ปจฺจโย    อาทิพฺรหฺมจริยกาย   ปญฺญาย
อปฺปฏิลทฺธาย    ปฏิลาภาย    ปฏิลทฺธาย    ภิยฺโยภาวาย    เวปุลฺลาย
ภาวนาย ปาริปูริยา สํวตฺตติ ฯ
     {๔๔๔.๕}  ปุน  จปรํ  อาวุโส  ภิกฺขุ อารทฺธวิริโย วิหรติ อกุสลานํ
ธมฺมานํ  ปหานาย  กุสลานํ  ธมฺมานํ  อุปสมฺปทาย  ถามวา ทฬฺหปรกฺกโม
อนิกฺขิตฺตธุโร   กุสเลสุ   ธมฺเมสุ   อยํ  ฉฏฺโฐ  เหตุ  ฉฏฺโฐ  ปจฺจโย
อาทิพฺรหฺมจริยกาย    ปญฺญาย   อปฺปฏิลทฺธาย   ปฏิลาภาย   ปฏิลทฺธาย
ภิยฺโยภาวาย เวปุลฺลาย ภาวนาย ปาริปูริยา สํวตฺตติ ฯ
     {๔๔๔.๖}  ปุน จปรํ อาวุโส ภิกฺขุ สติมา โหติ ปรเมน สติเนปกฺเกน
สมนฺนาคโต  จิรกตํปิ  จิรภาสิตํปิ  สริตา  อนุสฺสริตา  อยํ  สตฺตโม  เหตุ
สตฺตโม     ปจฺจโย     อาทิพฺรหฺมจริยกาย    ปญฺญาย    อปฺปฏิลทฺธาย
ปฏิลาภาย     ปฏิลทฺธาย     ภิยฺโยภาวาย     เวปุลฺลาย    ภาวนาย
ปาริปูริยา สํวตฺตติ ฯ
     {๔๔๔.๗}  ปุน   จปรํ  อาวุโส  ภิกฺขุ  ปญฺจสุ  อุปาทานกฺขนฺเธสุ
อุทยพฺพยานุปสฺสี   วิหรติ   อิติ   รูปํ  อิติ  รูปสฺส  สมุทโย  อิติ  รูปสฺส
อตฺถงฺคโม   อิติ   เวทนา   อิติ   เวทนาย   สมุทโย   อิติ  เวทนาย
อตฺถงฺคโม    อิติ    สญฺญา   อิติ   สญฺญาย   สมุทโย   อิติ   สญฺญาย
อตฺถงฺคโม   อิติ   สงฺขารา   อิติ  สงฺขารานํ  สมุทโย  อิติ  สงฺขารานํ
อตฺถงฺคโม     อิติ    วิญฺญาณํ    อิติ    วิญฺญาณสฺส    สมุทโย    อิติ
วิญฺญาณสฺส   อตฺถงฺคโม   ๑-  ฯ  อยํ  อฏฺฐโม  เหตุ  อฏฺฐโม  ปจฺจโย
@เชิงอรรถ:  ม. ยุ. อตฺถงฺคโมติ ฯ
อาทิพฺรหฺมจริยกาย    ปญฺญาย    อปฺปฏิลทฺธาย   ปฏิลาภาย   ปฏิลทฺธาย
ภิยฺโยภาวาย  เวปุลฺลาย  ภาวนาย  ปาริปูริยา  สํวตฺตติ  ฯ  อิเม  อฏฺฐ
ธมฺมา พหุการา ฯ
     [๔๔๕]  กตเม  อฏฺฐ  ธมฺมา  ภาเวตพฺพา  ฯ  อริโย  อฏฺฐงฺคิโก
มคฺโค     เสยฺยถีทํ     สมฺมาทิฏฺฐิ     สมฺมาสงฺกปฺโป     สมฺมาวาจา
สมฺมากมฺมนฺโต       สมฺมาอาชีโว       สมฺมาวายาโม      สมฺมาสติ
สมฺมาสมาธิ ฯ อิเม อฏฺฐ ธมฺมา ภาเวตพฺพา ฯ
     [๔๔๖]  กตเม   อฏฺฐ  ธมฺมา  ปริญฺเญยฺยา  ฯ  อฏฺฐ  โลกธมฺมา
ลาโภ  จ  อลาโภ  จ  ยโส  จ  อยโส  จ  นินฺทา  จ ปสํสา จ สุขญฺจ
ทุกฺขญฺจ ฯ อิเม อฏฺฐ ธมฺมา ปริญฺเญยฺยา ฯ
     [๔๔๗]  กตเม   อฏฺฐ   ธมฺมา   ปหาตพฺพา  ฯ  อฏฺฐ  มิจฺฉตฺตา
มิจฺฉาทิฏฺฐิ       มิจฺฉาสงฺกปฺโป       มิจฺฉาวาจา      มิจฺฉากมฺมนฺโต
มิจฺฉาอาชีโว    มิจฺฉาวายาโม    มิจฺฉาสติ    มิจฺฉาสมาธิ   ฯ   อิเม
อฏฺฐ ธมฺมา ปหาตพฺพา ฯ
     [๔๔๘]  กตเม   อฏฺฐ  ธมฺมา  หานภาคิยา  ฯ  อฏฺฐ  กุสีตวตฺถูนิ
อิธาวุโส   ภิกฺขุนา   กมฺมํ   กาตพฺพํ   โหติ   ตสฺส  เอวํ  โหติ  กมฺมํ
โข   เม   กาตพฺพํ   ภวิสฺสติ  กมฺมํ  โข  ปน  เม  กโรนฺตสฺส  กาโย
กิลมิสฺสติ   หนฺทาหํ   นิปชฺชามีติ   ฯ   โส  นิปชฺชติ  น  วิริยํ  อารภติ
อปฺปตฺตสฺส   ปตฺติยา   อนธิคตสฺส   อธิคมาย   อสจฺฉิกตสฺส  สจฺฉิกิริยาย
อิทํ ปฐมํ กุสีตวตฺถุ ฯ
     {๔๔๘.๑}  ปุน    จปรํ    อาวุโส    ภิกฺขุนา    กมฺมํ   กตํ
โหติ   ตสฺส  เอวํ  โหติ  อหํ  โข  กมฺมํ  อกาสึ  กมฺมํ  โข  ปน  เม
กโรนฺตสฺส   กาโย   กิลนฺโต   หนฺทาหํ   นิปชฺชามีติ   ฯ  โส  นิปชฺชติ
น   วิริยํ   อารภติ   ฯเปฯ   อสจฺฉิกตสฺส   สจฺฉิกิริยาย   อิทํ   ทุติยํ
กุสีตวตฺถุ ฯ
     {๔๔๘.๒}  ปุน  จปรํ  อาวุโส  ภิกฺขุนา  มคฺโค  คนฺตพฺโพ  โหติ
ตสฺส  เอวํ  โหติ  มคฺโค  โข  เม  คนฺตพฺโพ  ภวิสฺสติ มคฺคํ โข ปน เม
คจฺฉนฺตสฺส   กาโย   กิลมิสฺสติ   หนฺทาหํ   นิปชฺชามีติ  ฯ  โส  นิปชฺชติ
น   วิริยํ   อารภติ   ฯเปฯ   อสจฺฉิกตสฺส   สจฺฉิกิริยาย   อิทํ   ตติยํ
กุสีตวตฺถุ ฯ
     {๔๔๘.๓}  ปุน  จปรํ  อาวุโส ภิกฺขุนา มคฺโค คโต โหติ ตสฺส เอวํ
โหติ  อหํ  โข  มคฺคํ  อคมาสึ มคฺคํ โข ปน เม คจฺฉนฺตสฺส กาโย กิลนฺโต
หนฺทาหํ  นิปชฺชามีติ  ฯ  โส  นิปชฺชติ  น วิริยํ อารภติ ฯเปฯ อสจฺฉิกตสฺส
สจฺฉิกิริยาย อิทํ จตุตฺถํ กุสีตวตฺถุ ฯ
     {๔๔๘.๔}  ปุน  จปรํ  อาวุโส  ภิกฺขุ  คามํ  วา นิคมํ วา ปิณฺฑาย
จรนฺโต  น  ลภติ  ลูขสฺส  วา  ปณีตสฺส  วา  โภชนสฺส ยาวทตฺถํ ปาริปูรึ
ตสฺส  เอวํ  โหติ  อหํ  โข  คามํ  วา นิคมํ วา ปิณฺฑาย จรนฺโต นาลตฺถํ
ลูขสฺส  วา  ปณีตสฺส  วา  โภชนสฺส  ยาวทตฺถํ  ปาริปูรึ  ตสฺส เม กาโย
กิลนฺโต   อกมฺมญฺโญ   หนฺทาหํ   นิปชฺชามีติ  ฯ  โส  นิปชฺชติ  น  วิริยํ
อารภติ ฯเปฯ อสจฺฉิกตสฺส สจฺฉิกิริยาย อิทํ ปญฺจมํ กุสีตวตฺถุ ฯ
     {๔๔๘.๕}  ปุน  จปรํ  อาวุโส  ภิกฺขุ  คามํ  วา นิคมํ วา ปิณฺฑาย
จรนฺโต    ลภติ   ลูขสฺส   วา   ปณีตสฺส   วา   โภชนสฺส   ยาวทตฺถํ
ปาริปูรึ   ตสฺส   เอวํ  โหติ  อหํ  โข  คามํ  วา  นิคมํ  วา  ปิณฺฑาย
จรนฺโต   อลตฺถํ   ลูขสฺส   วา   ปณีตสฺส   วา   โภชนสฺส   ยาวทตฺถํ
ปาริปูรึ   ตสฺส   เม   กาโย   ครุโก   อกมฺมญฺโญ   มาสาจิตํ  มญฺเญ
หนฺทาหํ   นิปชฺชามีติ   ฯ   โส   นิปชฺชติ   น   วิริยํ  อารภติ  ฯเปฯ
อสจฺฉิกตสฺส สจฺฉิกิริยาย อิทํ ฉฏฺฐํ กุสีตวตฺถุ ฯ
     {๔๔๘.๖}  ปุน  จปรํ  อาวุโส  ภิกฺขุโน อุปฺปนฺโน โหติ อปฺปมตฺตโก
อาพาโธ  ตสฺส  เอวํ  โหติ อุปฺปนฺโน โข ปน ๑- เม อยํ ๒- อปฺปมตฺตโก
อาพาโธ    อตฺถิ   กปฺโป   นิปชฺชิตุํ   หนฺทาหํ   นิปชฺชามีติ   ฯ   โส
นิปชฺชติ ฯเปฯ อสจฺฉิกตสฺส สจฺฉิกิริยาย อิทํ สตฺตมํ กุสีตวตฺถุ ฯ
     {๔๔๘.๗}  ปุน   จปรํ   อาวุโส  ภิกฺขุ  คิลานา  วุฏฺฐิโต  โหติ
อจิรวุฏฺฐิโต   เคลญฺญา   ตสฺส   เอวํ   โหติ   อหํ   คิลานา  วุฏฺฐิโต
อจิรวุฏฺฐิโต   เคลญฺญา   ตสฺส  เม  กาโย  ทุพฺพโล  อกมฺมญฺโญ  [๓]-
หนฺทาหํ   นิปชฺชามีติ   ฯ   โส  นิปชฺชติ  น  วิริยํ  อารภติ  อปฺปตฺตสฺส
ปตฺติยา    อนธิคตสฺส    อธิคมาย    อสจฺฉิกตสฺส    สจฺฉิกิริยาย   อิทํ
อฏฺฐมํ กุสีตวตฺถุ ฯ อิเม อฏฺฐ ธมฺมา หานภาคิยา ฯ
     [๔๔๙]  กตเม อฏฺฐ ธมฺมา วิเสสภาคิยา ฯ อฏฺฐ อารพฺภวตฺถูนิ อิธาวุโส
ภิกฺขุนา  กมฺมํ  กาตพฺพํ โหติ ตสฺส เอวํ โหติ กมฺมํ โข เม กาตพฺพํ ภวิสฺสติ
กมฺมํ  โข  ปน เม กโรนฺตสฺส ๔- น สุกรํ พุทฺธานํ สาสนํ มนสิกาตุํ หนฺทาหํ
วิรยํ   อารภามิ  อปฺปตฺตสฺส  ปตฺติยา  อนธิคตสฺส  อธิคมาย  อสจฺฉิกตสฺส
@เชิงอรรถ:  ม. ยุ. ปนสทฺโท น ทิสฺสติ ฯ  ม. ยุ. อยนฺติ ปาโฐ น ทิสฺสติ ฯ  ม. อตฺถิ
@กปฺโป นิปชฺชิตุํ ฯ  ม. ยุ. กโรนฺเตน ฯ
สจฺฉิกิริยายาติ    ฯ    โส    วิริยํ    อารภติ   อปฺปตฺตสฺส   ปตฺติยา
อนธิคตสฺส     อธิคมาย    อสจฺฉิกตสฺส    สจฺฉิกิริยาย    อิทํ    ปฐมํ
อารพฺภวตฺถุ ฯ
     {๔๔๙.๑}  ปุน  จปรํ  อาวุโส  ภิกฺขุนา  กมฺมํ  กตํ  โหติ  ตสฺส
เอวํ   โหติ   อหํ   โข   กมฺมํ   อกาสึ  กมฺมํ  โข  ปนาหํ  กโรนฺโต
นาสกฺขึ    พุทฺธานํ    สาสนํ    มนสิกาตุํ   หนฺทาหํ   วิริยํ   อารภามิ
อปฺปตฺตสฺส      ปตฺติยา      อนธิคตสฺส     อธิคมาย     อสจฺฉิกตสฺส
สจฺฉิกิริยายาติ ฯเปฯ อิทํ ทุติยํ อารพฺภวตฺถุ ฯ
     {๔๔๙.๒}  ปุน   จปรํ  อาวุโส  ภิกฺขุโน  ๑-  มคฺโค  คนฺตพฺโพ
โหติ  ตสฺส  เอวํ  โหติ  มคฺโค  โข  เม  คนฺตพฺโพ  ภวิสฺสติ  มคฺคํ โข
ปน   เม   คจฺฉนฺเตน   น   สุกรํ  พุทฺธานํ  สาสนํ  มนสิกาตุํ  หนฺทาหํ
วิริยํ   อารภามิ  อปฺปตฺตสฺส  ปตฺติยา  อนธิคตสฺส  อธิคมาย  อสจฺฉิกตสฺส
สจฺฉิกิริยายาติ   ฯ  โส  วิริยํ  อารภติ  อปฺปตฺตสฺส  ปตฺติยา  อนธิคตสฺส
อธิคมาย อสจฺฉิกตสฺส สจฺฉิกิริยาย อิทํ ตติยํ อารพฺภวตฺถุ ฯ
     {๔๔๙.๓}  ปุน  จปรํ  อาวุโส ภิกฺขุนา มคฺโค คโต โหติ ตสฺส เอวํ
โหติ   อหํ   โข  มคฺคํ  อคมาสึ  มคฺคํ  โข  ปนาหํ  คจฺฉนฺโต  นาสกฺขึ
พุทฺธานํ    สาสนํ   มนสิกาตุํ   หนฺทาหํ   วิริยํ   อารภามิ   อปฺปตฺตสฺส
ปตฺติยา    อนธิคตสฺส    อธิคมาย    อสจฺฉิกตสฺส   สจฺฉิกิริยายาติ   ฯ
โส    วิริยํ    อารภติ   อปฺปตฺตสฺส   ปตฺติยา   อนธิคตสฺส   อธิคมาย
อสจฺฉิกตสฺส สจฺฉิกิริยาย อิทํ จตุตฺถํ อารพฺภวตฺถุ ฯ
     {๔๔๙.๔}  ปุน จปรํ อาวุโส ภิกฺขุ คามํ วา นิคมํ วา ปิณฺฑาย จรนฺโต
@เชิงอรรถ:  ม. ยุ. ภิกฺขุนา ฯ
น   ลภติ   ลูขสฺส   วา   ปณีตสฺส   วา  โภชนสฺส  ยาวทตฺถํ  ปาริปูรึ
ตสฺส   เอวํ   โหติ   อหํ   โข   ปน  คามํ  วา  นิคมํ  วา  ปิณฺฑาย
จรนฺโต   นาลตฺถํ   ลูขสฺส   วา   ปณีตสฺส   วา   โภชนสฺส  ยาวทตฺถํ
ปาริปูรึ    ตสฺส    เม   กาโย   ลหุโก   กมฺมญฺโญ   หนฺทาหํ   วิริยํ
อารภามิ   ฯเปฯ   อสจฺฉิกตสฺส  สจฺฉิกิริยายาติ  ฯ  โส  วิริยํ  อารภติ
อปฺปตฺตสฺส   ปตฺติยา   อนธิคตสฺส   อธิคมาย   อสจฺฉิกตสฺส  สจฺฉิกิริยาย
อิทํ ปญฺจมํ อารพฺภวตฺถุ ฯ
     {๔๔๙.๕}  ปุน  จปรํ  อาวุโส  ภิกฺขุ  คามํ  วา นิคมํ วา ปิณฺฑาย
จรนฺโต   ลภติ  ลูขสฺส  วา  ปณีตสฺส  วา  โภชนสฺส  ยาวทตฺถํ  ปาริปูรึ
ตสฺส  เอวํ  โหติ  อหํ  โข  คามํ  วา  นิคมํ วา ปิณฺฑาย จรนฺโต อลตฺถํ
ลูขสฺส  วา  ปณีตสฺส  วา  โภชนสฺส  ยาวทตฺถํ  ปาริปูรึ  ตสฺส เม กาโย
พลวา    กมฺมญฺโญ   หนฺทาหํ   วิริยํ   อารภามิ   อปฺปตฺตสฺส   ปตฺติยา
อนธิคตสฺส   อธิคมาย   อสจฺฉิกตสฺส   สจฺฉิกิริยายาติ   ฯ   โส   วิริยํ
อารภติ    อปฺปตฺตสฺส    ปตฺติยา   อนธิคตสฺส   อธิคมาย   อสจฺฉิกตสฺส
สจฺฉิกิริยาย อิทํ ฉฏฺฐํ อารพฺภวตฺถุ ฯ
     {๔๔๙.๖}  ปุน  จปรํ  อาวุโส  ภิกฺขุโน อุปฺปนฺโน โหติ อปฺปมตฺตโก
อาพาโธ  ตสฺส  เอวํ  โหติ อุปฺปนฺโน โข เม [๑]- อปฺปมตฺตโก อาพาโธ
ฐานํ  โข  ปเนตํ วิชฺชติ ยํ เม อาพาโธ ปวฑฺเฒยฺย หนฺทาหํ วิริยํ อารภามิ
อปฺปตฺตสฺส  ปตฺติยา  อนธิคตสฺส  อธิคมาย  อสจฺฉิกตสฺส  สจฺฉิกิริยายาติ ฯ
โส  วิริยํ  อารภติ  อปฺปตฺตสฺส  ปตฺติยา  ฯเปฯ  อสจฺฉิกตสฺส สจฺฉิกิริยาย
@เชิงอรรถ:  ยุ. อยํ ฯ
อิทํ สตฺตมํ อารพฺภวตฺถุ ฯ
     {๔๔๙.๗}  ปุน จปรํ อาวุโส ภิกฺขุ คิลานา วุฏฺฐิโต โหติ อจิรวุฏฺฐิโต
เคลญฺญา  ตสฺส  เอวํ  โหติ อหํ โข คิลานา วุฏฺฐิโต อจิรวุฏฺฐิโต เคลญฺญา
ฐานํ  โข  ปเนตํ  วิชฺชติ  ยํ  เม อาพาโธ ปจฺจุทาวตฺเตยฺย หนฺทาหํ วิริยํ
อารภามิ    อปฺปตฺตสฺส   ปตฺติยา   อนธิคตสฺส   อธิคมาย   อสจฺฉิกตสฺส
สจฺฉิกิริยายาติ   ฯ  โส  วิริยํ  อารภติ  อปฺปตฺตสฺส  ปตฺติยา  อนธิคตสฺส
อธิคมาย   อสจฺฉิกตสฺส   สจฺฉิกิริยาย   อิทํ   อฏฺฐมํ   อารพฺภวตฺถุ   ฯ
อิเม อฏฺฐ ธมฺมา วิเสสภาคิยา ฯ
     [๔๕๐]  กตเม   อฏฺฐ   ธมฺมา   ทุปฺปฏิวิชฺฌา  ฯ  อฏฺฐ  อกฺขณา
อสมยา   พฺรหฺมจริยวาสาย   อิธาวุโส   ตถาคโต  จ  โลเก  อุปฺปนฺโน
โหติ    อรหํ    สมฺมาสมฺพุทฺโธ    ธมฺโม    จ    เทสิยติ   อุปสมิโก
ปรินิพฺพานิโก    สมฺโพธคามี   สุคตปฺปเวทิโต   อยญฺจ   ปุคฺคโล   นิรยํ
อุปปนฺโน โหติ อยํ ปฐโม อกฺขโณ อสมโย พฺรหฺมจริยวาสาย ฯ
     {๔๕๐.๑}  ปุน   จปรํ  อาวุโส  ตถาคโต  จ  โลเก  อุปฺปนฺโน
โหติ    อรหํ    สมฺมาสมฺพุทฺโธ    ธมฺโม    จ    เทสิยติ   อุปสมิโก
ปรินิพฺพานิโก     สมฺโพธคามี     สุคตปฺปเวทิโต     อยญฺจ    ปุคฺคโล
ติรจฺฉานโยนึ    อุปปนฺโน    โหติ    อยํ   ทุติโย   อกฺขโณ   อสมโย
พฺรหฺมจริยวาสาย ฯ
     {๔๕๐.๒}  ปุน   จปรํ  อาวุโส  ตถาคโต  จ  โลเก  อุปฺปนฺโน
โหติ    อรหํ    สมฺมาสมฺพุทฺโธ    ธมฺโม    จ    เทสิยติ   อุปสมิโก
ปรินิพฺพานิโก     สมฺโพธคามี     สุคตปฺปเวทิโต     อยญฺจ    ปุคฺคโล
ปิตฺติวิสยํ    อุปปนฺโน    โหติ    อยํ    ตติโย    อกฺขโณ    อสมโย
พฺรหฺมจริยวาสาย ฯ
     {๔๕๐.๓}  ปุน   จปรํ  อาวุโส  ตถาคโต  จ  โลเก  อุปฺปนฺโน
โหติ   อรหํ   สมฺมาสมฺพุทฺโธ   ธมฺโม   จ   เทสิยติ  อุปสมิโก  ฯเปฯ
อยญฺจ    ปุคฺคโล    อญฺญตรํ   ทีฆายุกํ   เทวนิกายํ   อุปปนฺโน   โหติ
อยํ จตุตฺโถ อกฺขโณ อสมโย พฺรหฺมจริยวาสาย ฯ
     {๔๕๐.๔}  ปุน  จปรํ  อาวุโส  ตถาคโต  จ โลเก อุปฺปนฺโน โหติ
อรหํ   สมฺมาสมฺพุทฺโธ   ธมฺโม   จ   เทสิยติ   ฯเปฯ  อยญฺจ  ปุคฺคโล
ปจฺจนฺติเมสุ  ชนปเทสุ  ปจฺจาชาโต  โหติ  มิลกฺขเกสุ  ๑- อวิญฺญาตาเรสุ
ยตฺถ   นตฺถิ  คติ  ภิกฺขูนํ  ภิกฺขุนีนํ  อุปาสกานํ  อุปาสิกานํ  อยํ  ปญฺจโม
อกฺขโณ อสมโย พฺรหฺมจริยวาสาย ฯ
     {๔๕๐.๕}  ปุน  จปรํ  อาวุโส  ตถาคโต  จ โลเก อุปฺปนฺโน โหติ
อรหํ   สมฺมาสมฺพุทฺโธ   ฯเปฯ   อยญฺจ   ปุคฺคโล   มชฺฌิเมสุ  ชนปเทสุ
ปจฺจาชาโต  โหติ  โส  จ  โหติ  มิจฺฉาทิฏฺฐิ ๒- วิปรีตทสฺสโน นตฺถิ ทินฺนํ
นตฺถิ   ยิฏฺฐํ  นตฺถิ  หุตํ  นตฺถิ  สุกตทุกฺกฏานํ  กมฺมานํ  ผลวิปาโก  นตฺถิ
อยํ  โลโก  นตฺถิ  ปโร  โลโก  นตฺถิ  มาตา  นตฺถิ  ปิตา  นตฺถิ สตฺตา
โอปปาติกา   นตฺถิ   โลเก   สมณพฺราหฺมณา  สมฺมคฺคตา  สมฺมาปฏิปนฺนา
เย   อิมญฺจ   โลกํ  ปรญฺจ  โลกํ  สยํ  อภิญฺญา  สจฺฉิกตฺวา  ปเวเทนฺติ
อยํ ฉฏฺโฐ อกฺขโณ อสมโย พฺรหฺมจริยวาสาย ฯ
     {๔๕๐.๖}  ปุน จปรํ อาวุโส ตถาคโต จ โลเก อุปฺปนฺโน โหติ อรหํ
สมฺมาสมฺพุทฺโธ  ฯเปฯ  อยญฺจ  ปุคฺคโล  มชฺฌิเมสุ  ชนปเทสุ  ปจฺจาชาโต
@เชิงอรรถ:  ม. มิลกฺเขสุ ฯ   ม. มิจฺฉาทิฏฺฐิโก ฯ
โหติ    โส    จ    โหติ   ทุปฺปญฺโญ   ชโฬ   เอลมูโค   นปฺปฏิพโล
สุภาสิตทุพฺภาสิตานํ      อตฺถมญฺญาตุํ      อยํ     สตฺตโม     อกฺขโณ
อสมโย พฺรหฺมจริยวาสาย ฯ
     {๔๕๐.๗}  ปุน  จปรํ  อาวุโส  ตถาคโต  จ  โลเก  น อุปฺปนฺโน
โหติ    อรหํ   สมฺมาสมฺพุทฺโธ   ธมฺโม   จ   น   เทสิยติ   อุปสมิโก
ปรินิพฺพานิโก     สมฺโพธคามี     สุคตปฺปเวทิโต     อยญฺจ    ปุคฺคโล
มชฺฌิเมสุ   ชนปเทสุ   ปจฺจาชาโต   โหติ   โส   จ   ปญฺญวา  อชโฬ
อเนลมูโค     ปฏิพโล     สุภาสิตทุพฺภาสิตานํ     อตฺถมญฺญาตุํ     อยํ
อฏฺฐโม   อกฺขโณ   อสมโย   พฺรหฺมจริยวาสาย  ฯ  อิเม  อฏฺฐ  ธมฺมา
ทุปฺปฏิวิชฺฌา ฯ
     [๔๕๑]  กตเม    อฏฺฐ    ธมฺมา   อุปฺปาเทตพฺพา   ฯ   อฏฺฐ
มหาปุริสวิตกฺกา    อปฺปิจฺฉสฺสายํ    ธมฺโม    นายํ   ธมฺโม   มหิจฺฉสฺส
สนฺตุฏฺฐสฺสายํ    ธมฺโม    นายํ    ธมฺโม   อสนฺตุฏฺฐสฺส   ปวิวิตฺตสฺสายํ
ธมฺโม    นายํ    ธมฺโม   สงฺคณิการามสฺส   อารทฺธวิริยสฺสายํ   ธมฺโม
นายํ    ธมฺโม    กุสีตสฺส   อุปฏฺฐิตสฺสติสฺสายํ   ธมฺโม   นายํ   ธมฺโม
มุฏฺฐสฺสติสฺส    สมาหิตสฺสายํ    ธมฺโม    นายํ    ธมฺโม   อสมาหิตสฺส
ปญฺญวโต   อยํ   ธมฺโม   นายํ  ธมฺโม  ทุปฺปญฺญสฺส  นิปฺปปญฺจารามสฺสายํ
ธมฺโม   นิปฺปปญฺจรติโน   นายํ  ธมฺโม  ปปญฺจารามสฺส  ปปญฺจรติโนติ  ฯ
อิเม อฏฺฐ ธมฺมา อุปฺปาเทตพฺพา ฯ
     [๔๕๒]  กตเม  อฏฺฐ  ธมฺมา  อภิญฺเญยฺยา  ฯ  อฏฺฐ  อภิภายตนานิ
อชฺฌตฺตํรูปสญฺญี   เอโก  พหิทฺธารูปานิ  ปสฺสติ  ปริตฺตานิ  สุวณฺณทุพฺพณฺณานิ
ตานิ    อภิภุยฺย   ชานามิ   ปสฺสามีติ   เอวํสญฺญี   โหติ   อิทํ   ปฐมํ
อภิภายตนํ      ฯ      อชฺฌตฺตํรูปสญฺญี      เอโก      พหิทฺธารูปานิ
ปสฺสติ      อปฺปมาณานิ      สุวณฺณทุพฺพณฺณานิ      ตานิ      อภิภุยฺย
ชานามิ ปสฺสามีติ เอวํสญฺญี โหติ อิทํ ทุติยํ อภิภายตนํ ฯ
     {๔๕๒.๑}   อชฺฌตฺตํอรูปสญฺญี    เอโก    พหิทฺธารูปานิ   ปสฺสติ
ปริตฺตานิ    สุวณฺณทุพฺพณฺณานิ    ตานิ    อภิภุยฺย    ชานามิ   ปสฺสามีติ
เอวํสญฺญี โหติ อิทํ ตติยํ อภิภายตนํ ฯ
     {๔๕๒.๒}   อชฺฌตฺตํอรูปสญฺญี    เอโก    พหิทฺธารูปานิ   ปสฺสติ
อปฺปมาณานิ      สุวณฺณทุพฺพณฺณานิ      ตานิ      อภิภุยฺย     ชานามิ
ปสฺสามีติ เอวํสญฺญี โหติ อิทํ จตุตฺถํ อภิภายตนํ ฯ
     {๔๕๒.๓}  อชฺฌตฺตํอรูปสญฺญี  เอโก  พหิทฺธารูปานิ  ปสฺสติ  นีลานิ
นีลวณฺณานิ   นีลนิทสฺสนานิ   นีลนิภาสานิ   เสยฺยถาปิ  นาม  อุมฺมารปุปฺผํ
นีลํ   นีลวณฺณํ   นีลนิทสฺสนํ   นีลนิภาสํ   เสยฺยถาปิ  วา  ปน  ตํ  วตฺถํ
พาราณเสยฺยกํ   อุภโตภาควิมฏฺฐํ   นีลํ   นีลวณฺณํ   นีลนิทสฺสนํ  นีลนิภาสํ
เอวเมว    อชฺฌตฺตํอรูปสญฺญี    เอโก   พหิทฺธารูปานิ   ปสฺสติ   นีลานิ
นีลวณฺณานิ    นีลนิทสฺสนานิ    นีลนิภาสานิ    ตานิ   อภิภุยฺย   ชานามิ
ปสฺสามีติ เอวํสญฺญี โหติ อิทํ ปญฺจมํ อภิภายตนํ ฯ
     {๔๕๒.๔}  อชฺฌตฺตํอรูปสญฺญี    เอโก    พหิทฺธารูปานิ   ปสฺสติ
ปีตานิ    ปีตวณฺณานิ    ปีตนิทสฺสนานิ   ปีตนิภาสานิ   เสยฺยถาปิ   นาม
กณฺณิการปุปฺผํ   ปีตํ   ปีตวณฺณํ   ปีตนิทสฺสนํ   ปีตนิภาสํ   เสยฺยถาปิ  วา
ปน  ตํ  วตฺถํ  พาราณเสยฺยกํ  อุภโตภาควิมฏฺฐํ  ปีตํ  ปีตวณฺณํ  ปีตนิทสฺสนํ
ปีตนิภาสํ   เอวเมว   อชฺฌตฺตํอรูปสญฺญี   เอโก   พหิทฺธารูปานิ   ปสฺสติ
ปีตานิ    ปีตวณฺณานิ    ปีตนิทสฺสนานิ    ปีตนิภาสานิ    ตานิ   อภิภุยฺย
ชานามิ ปสฺสามีติ เอวํสญฺญี โหติ อิทํ ฉฏฺฐํ อภิภายตนํ ฯ
     {๔๕๒.๕}  อชฺฌตฺตํอรูปสญฺญี    เอโก    พหิทฺธารูปานิ   ปสฺสติ
โลหิตกานิ     โลหิตกวณฺณานิ     โลหิตกนิทสฺสนานิ     โลหิตกนิภาสานิ
เสยฺยถาปิ   นาม   พนฺธุชีวกปุปฺผํ   โลหิตกํ  โลหิตกวณฺณํ  โลหิตกนิทสฺสนํ
โลหิตกนิภาสํ  เสยฺยถาปิ  วา  ปน ตํ วตฺถํ พาราณเสยฺยกํ อุภโตภาควิมฏฺฐํ
โลหิตกํ     โลหิตกวณฺณํ    โลหิตกนิทสฺสนํ    โลหิตกนิภาสํ    เอวเมว
อชฺฌตฺตํอรูปสญฺญี     เอโก     พหิทฺธารูปานิ     ปสฺสติ     โลหิตกานิ
โลหิตกวณฺณานิ    โลหิตกนิทสฺสนานิ    โลหิตกนิภาสานิ   ตานิ   อภิภุยฺย
ชานามิ ปสฺสามีติ เอวํสญฺญี โหติ  อิทํ สตฺตมํ อภิภายตนํ ฯ
     {๔๕๒.๖}  อชฺฌตฺตํอรูปสญฺญี    เอโก    พหิทฺธารูปานิ   ปสฺสติ
โอทาตานิ     โอทาตวณฺณานิ     โอทาตนิทสฺสนานิ     โอทาตนิภาสานิ
เสยฺยถาปิ  นาม  โอสธิตารกา  โอทาตา  โอทาตวณฺณา  โอทาตนิทสฺสนา
โอทาตนิภาสา  เสยฺยถาปิ  วา  ปน  ตํ  วตฺถํ พาราณเสยฺยกํ อุภโตภาค-
วิมฏฺฐํ     โอทาตํ     โอทาตวณฺณํ    โอทาตนิทสฺสนํ    โอทาตนิภาสํ
เอวเมว   อชฺฌตฺตํอรูปสญฺญี   เอโก   พหิทฺธารูปานิ   ปสฺสติ  โอทาตานิ
โอทาตวณฺณานิ    โอทาตนิทสฺสนานิ    โอทาตนิภาสานิ   ตานิ   อภิภุยฺย
ชานามิ   ปสฺสามีติ   เอวํสญฺญี  โหติ  อิทํ  อฏฺฐมํ  อภิภายตนํ  ฯ  อิเม
อฏฺฐ ธมฺมา อภิญฺเญยฺยา ฯ
     [๔๕๓]  กตเม   อฏฺฐ  ธมฺมา  สจฺฉิกาตพฺพา  ฯ  อฏฺฐ  วิโมกฺขา
รูปี   รูปานิ   ปสฺสติ   อยํ   ปฐโม   วิโมกฺโข   ฯ   อชฺฌตฺตํอรูปสญฺญี
เอโก   พหิทฺธารูปานิ   ปสฺสติ   อยํ   ทุติโย   วิโมกฺโข  ฯ  สุภนฺเตว
อธิมุตฺโต   โหติ   อยํ   ตติโย   วิโมกฺโข   ฯ   สพฺพโส   รูปสญฺญานํ
สมติกฺกมา    ปฏิฆสญฺญานํ    อตฺถงฺคมา    นานตฺตสญฺญานํ   อมนสิการา
อนนฺโต    อากาโสติ    อากาสานญฺจายตนํ   อุปสมฺปชฺช   วิหรติ   อยํ
จตุตฺโถ    วิโมกฺโข    ฯ    สพฺพโส   อากาสานญฺจายตนํ   สมติกฺกมฺม
อนนฺตํ    วิญฺญาณนฺติ    วิญฺญาณญฺจายตนํ    อุปสมฺปชฺช    วิหรติ    อยํ
ปญฺจโม    วิโมกฺโข    ฯ    สพฺพโส    วิญฺญาณญฺจายตนํ    สมติกฺกมฺม
นตฺถิ    กิญฺจีติ    อากิญฺจญฺญายตนํ   อุปสมฺปชฺช   วิหรติ   อยํ   ฉฏฺโฐ
วิโมกฺโข    ฯ    สพฺพโส   อากิญฺจญฺญายตนํ   สมติกฺกมฺม   เนวสญฺญา-
นาสญฺญายตนํ    อุปสมฺปชฺช    วิหรติ   อยํ   สตฺตโม   วิโมกฺโข   ฯ
สพฺพโส     เนวสญฺญานาสญฺญายตนํ     สมติกฺกมฺม    สญฺญาเวทยิตนิโรธํ
อุปสมฺปชฺช   วิหรติ   อยํ   อฏฺฐโม   วิโมกฺโข  ฯ  อิเม  อฏฺฐ  ธมฺมา
สจฺฉิกาตพฺพา   ฯ   อิติ   อิเม   อสีติ   ธมฺมา   ภูตา   คจฺฉา  ตถา
อวิตถา อนญฺญถา สมฺมา ตถาคเตน อภิสมฺพุทฺธา ฯ
     [๔๕๔]  นว  ธมฺมา  พหุการา  นว  ธมฺมา  ภาเวตพฺพา นว ธมฺมา
ปริญฺเญยฺยา   นว   ธมฺมา   ปหาตพฺพา   นว  ธมฺมา  หานภาคิยา  นว
ธมฺมา  วิเสสภาคิยา  นว  ธมฺมา  ทุปฺปฏิวิชฺฌา  นว ธมฺมา อุปฺปาเทตพฺพา
นว ธมฺมา อภิญฺเญยฺยา นว ธมฺมา สจฺฉิกาตพฺพา ฯ
     [๔๕๕]  กตเม  นว ธมฺมา พหุการา ฯ นว โยนิโสมนสิการมูลิกา ๑-
ธมฺมา    โยนิโส    มนสิกโรโต   ปาโมชฺชํ   ชายติ   ปมุทิตสฺส   ปีติ
ชายติ    ปีติมนสฺส   กาโย   ปสฺสมฺภติ   ปสฺสทฺธกาโย   สุขํ   เวเทติ
สุขิโน  จิตฺตํ  สมาธิยติ  สมาหิตจิตฺโต  ๒-  ยถาภูตํ  ชานาติ  ๓- ปสฺสติ
ยถาภูตํ   ชานํ   ปสฺสํ   สยํ  ๔-  นิพฺพินฺทติ  นิพฺพินฺทํ  วิรชฺชติ  วิราคา
วิมุจฺจติ ฯ อิเม นว ธมฺมา พหุการา ฯ
     [๔๕๖]  กตเม  นว  ธมฺมา ภาเวตพฺพา ฯ นว ปาริสุทฺธิปธานิยงฺคานิ
สีลวิสุทฺธิ     ปาริสุทฺธิปธานิยงฺคํ     จิตฺตวิสุทฺธิ     ปาริสุทฺธิปธานิยงฺคํ
ทิฏฺฐิวิสุทฺธิ  ปาริสุทฺธิปธานิยงฺคํ   กงฺขาวิตรณวิสุทฺธิ  ปาริสุทฺธิปธานิยงฺคํ
มคฺคามคฺคญาณทสฺสนวิสุทฺธิ      ปาริสุทฺธิปธานิยงฺคํ     ปฏิปทาญาณทสฺสน-
วิสุทฺธิ     ปาริสุทฺธิปธานิยงฺคํ    ญาณทสฺสนวิสุทฺธิ    ปาริสุทฺธิปธานิยงฺคํ
ปญฺญาวิสุทฺธิ   ปาริสุทฺธิปธานิยงฺคํ  วิมุตฺติวิสุทฺธิ  ปาริสุทฺธิปธานิยงฺคํ  ฯ
อิเม นว ธมฺมา ภาเวตพฺพา ฯ
     [๔๕๗]  กตเม   นว   ธมฺมา  ปริญฺเญยฺยา  ฯ  นว  สตฺตาวาสา
สนฺตาวุโส   สตฺตา   นานตฺตกายา   นานตฺตสญฺญิโน  เสยฺยถาปิ  มนุสฺสา
เอกจฺเจ  จ  เทวา  เอกจฺเจ  จ  วินิปาติกา  อยํ ปฐโม สตฺตาวาโส ฯ
สนฺตาวุโส   สตฺตา   นานตฺตกายา   เอกตฺตสญฺญิโน   เสยฺยถาปิ  เทวา
พฺรหฺมกายิกา    ปฐมาภินิพฺพตฺตา    อยํ    ทุติโย    สตฺตาวาโส    ฯ
สนฺตาวุโส   สตฺตา   เอกตฺตกายา   นานตฺตสญฺญิโน   เสยฺยถาปิ  เทวา
อาภสฺสรา  อยํ  ตติโย  สตฺตาวาโส  ฯ  สนฺตาวุโส  สตฺตา เอกตฺตกายา
@เชิงอรรถ:  ม. ยุ. ...มูลกา ฯ  ม. สมาหิเต จิตฺเต ฯ ยุ. สมาหิเตน จิตฺเตน ฯ
@ ยุ. ปชานาติ ฯ  ม. ยุ. อยํ น ทิสฺสติ ฯ
เอกตฺตสญฺญิโน     เสยฺยถาปิ    เทวา    สุภกิณฺหา    อยํ    จตุตฺโถ
สตฺตาวาโส    ฯ    สนฺตาวุโส    สตฺตา    อสญฺญิโน   อปฺปฏิสํเวทิโน
เสยฺยถาปิ    เทวา    อสญฺญิสตฺตา   อยํ   ปญฺจโม   สตฺตาวาโส   ฯ
สนฺตาวุโส    สตฺตา    สพฺพโส   รูปสญฺญานํ   สมติกฺกมา   ปฏิฆสญฺญานํ
อตฺถงฺคมา     นานตฺตสญฺญานํ     อมนสิการา    อนนฺโต    อากาโสติ
อากาสานญฺจายตนูปคา    อยํ    ฉฏฺโฐ   สตฺตาวาโส   ฯ   สนฺตาวุโส
สตฺตา      สพฺพโส      อากาสานญฺจายตนํ     สมติกฺกมฺม     อนนฺตํ
วิญฺญาณนฺติ    วิญฺญาณญฺจายตนูปคา    อยํ    สตฺตโม   สตฺตาวาโส   ฯ
สนฺตาวุโส    สตฺตา    สพฺพโส    วิญฺญาณญฺจายตนํ   สมติกฺกมฺม   นตฺถิ
กิญฺจีติ     อากิญฺจญฺญายตนูปคา    อยํ    อฏฺฐโม    สตฺตาวาโส    ฯ
สนฺตาวุโส      สตฺตา     สพฺพโส     อากิญฺจญฺญายตนํ     สมติกฺกมฺม
สนฺตเมตํ       ปณีตเมตนฺติ       ๑-      เนวสญฺญานาสญฺญายตนูปคา
อยํ นวโม สตฺตาวาโส ฯ อิเม นว ธมฺมา ปริญฺเญยฺยา ฯ
     [๔๕๘]  กตเม  นว  ธมฺมา  ปหาตพฺพา  ฯ  นว ตณฺหามูลิกา ธมฺมา
ตณฺหํ   ปฏิจฺจ   ปริเยสนา   ปริเยสนํ   ปฏิจฺจ   ลาโภ   ลาภํ  ปฏิจฺจ
วินิจฺฉโย   วินิจฺฉยํ   ปฏิจฺจ   ฉนฺทราโค   ฉนฺทราคํ  ปฏิจฺจ  อชฺโฌสานํ
อชฺโฌสานํ    ปฏิจฺจ   ปริคฺคโห   ปริคฺคหํ   ปฏิจฺจ   มจฺฉริยํ   มจฺฉริยํ
ปฏิจฺจ    อารกฺโข    อารกฺขาธิกรณํ    ปฏิจฺจ    ทณฺฑาทานสตฺถาทาน-
กลหวิคฺคหวิวาทตุวํตุวํเปสุญฺญมุสาวาทา         อเนเก        ปาปกา
อกุสลา ธมฺมา สํวตฺตนฺติ ๒- ฯ อิเม นว ธมฺมา ปหาตพฺพา ฯ
@เชิงอรรถ:  ม. ยุ. สนฺตเมตํ ปณีตเมตนฺตีติ น ทิสฺสติ ฯ  ยุ. สมฺภวนฺติ ฯ
     [๔๕๙]  กตเม   นว  ธมฺมา  หานภาคิยา  ฯ  นว  อาฆาตวตฺถูนิ
อนตฺถํ   เม   อจรีติ  อาฆาตํ  พนฺธติ  ฯ  อนตฺถํ  เม  จรตีติ  อาฆาตํ
พนฺธติ   ฯ   อนตฺถํ   เม   จริสฺสตีติ  อาฆาตํ  พนฺธติ  ฯ  ปิยสฺส  เม
มนาปสฺส   อนตฺถํ   อจรีติ   อาฆาตํ  พนฺธติ  ฯ  ปิยสฺส  เม  มนาปสฺส
อนตฺถํ   จรตีติ   อาฆาตํ   พนฺธติ   ฯ   ปิยสฺส  เม  มนาปสฺส  อนตฺถํ
จริสฺสตีติ   อาฆาตํ   พนฺธติ   ฯ   อปฺปิยสฺส   เม   อมนาปสฺส   อตฺถํ
อจรีติ   อาฆาตํ   พนฺธติ   ฯ  อปฺปิยสฺส  เม  อมนาปสฺส  อตฺถํ  จรตีติ
อาฆาตํ  พนฺธติ  ฯ  อปฺปิยสฺส  เม  อมนาปสฺส  อตฺถํ  จริสฺสตีติ  อาฆาตํ
พนฺธติ ฯ อิเม นว ธมฺมา หานภาคิยา ฯ
     [๔๖๐]  กตเม  นว  ธมฺมา  วิเสสภาคิยา  ฯ  นว อาฆาตปฏิวินยา
อนตฺถํ  เม  อจรีติ  ๑-  ตํ  กุเตตฺถ  ลพฺภาติ อาฆาตํ ปฏิวิเนติ ฯ อนตฺถํ
เม  จรตีติ  ๑-  ตํ  กุเตตฺถ  ลพฺภาติ  อาฆาตํ  ปฏิวิเนติ  ฯ อนตฺถํ เม
จริสฺสตีติ  ๒-  ตํ  กุเตตฺถ  ลพฺภาติ  อาฆาตํ  ปฏิวิเนติ  ฯ  ปิยสฺส  เม
มนาปสฺส  อนตฺถํ  อจรีติ  ๑-  ตํ  กุเตตฺถ  ลพฺภาติ  อาฆาตํ ปฏิวิเนติ ฯ
ปิยสฺส  เม  มนาปสฺส  อนตฺถํ  จรตีติ  ๑-  ตํ  กุเตตฺถ  ลพฺภาติ อาฆาตํ
ปฏิวิเนติ  ฯ  ปิยสฺส  เม  มนาปสฺส  อนตฺถํ  จริสฺสตีติ  ๒-  ตํ  กุเตตฺถ
ลพฺภาติ   อาฆาตํ   ปฏิวิเนติ   ฯ   อปฺปิยสฺส   เม   อมนาปสฺส  อตฺถํ
อจรีติ  ๑-  ตํ  กุเตตฺถ  ลพฺภาติ  อาฆาตํ  ปฏิวิเนติ  ฯ  อปฺปิยสฺส  เม
อมนาปสฺส  อตฺถํ  จรตีติ  ๑-  ตํ  กุเตตฺถ  ลพฺภาติ  อาฆาตํ ปฏิวิเนติ ฯ
อปฺปิยสฺส   เม   อมนาปสฺส  อตฺถํ  จริสฺสตีติ  ๒-  ตํ  กุเตตฺถ  ลพฺภาติ
@เชิงอรรถ:  ม. ยุ. อิติสทฺโท น ทิสฺสติ ฯ  ม. อิติสทฺโท น ทิสฺสติ ฯ
อาฆาตํ ปฏิวิเนติ ฯ อิเม นว ธมฺมา วิเสสภาคิยา ฯ
     [๔๖๑]  กตเม   นว   ธมฺมา   ทุปฺปฏิวิชฺฌา   ฯ  นว  นานตฺตา
ธาตุนานตฺตํ    ปฏิจฺจ    อุปฺปชฺชติ   ผสฺสนานตฺตํ   ผสฺสนานตฺตํ   ปฏิจฺจ
อุปฺปชฺชติ     เวทนานานตฺตํ     เวทนานานตฺตํ     ปฏิจฺจ    อุปฺปชฺชติ
สญฺญานานตฺตํ     สญฺญานานตฺตํ    ปฏิจฺจ    อุปฺปชฺชติ    สงฺกปฺปนานตฺตํ
สงฺกปฺปนานตฺตํ     ปฏิจฺจ     อุปฺปชฺชติ     ฉนฺทนานตฺตํ    ฉนฺทนานตฺตํ
ปฏิจฺจ      อุปฺปชฺชติ     ปริฬาหนานตฺตํ     ปริฬาหนานตฺตํ     ปฏิจฺจ
อุปฺปชฺชติ    ปริเยสนานานตฺตํ    ปริเยสนานานตฺตํ    ปฏิจฺจ   อุปฺปชฺชติ
ลาภนานตฺตํ ฯ อิเม นว ธมฺมา ทุปฺปฏิวิชฺฌา ฯ
     [๔๖๒]  กตเม   นว   ธมฺมา   อุปฺปาเทตพฺพา   ฯ  นว  สญฺญา
อสุภสญฺญา     มรณสญฺญา     อาหาเร     ปฏิกูลสญฺญา     สพฺพโลเก
อนภิรตสญฺญา    ๑-    อนิจฺจสญฺญา    อนิจฺเจ    ทุกฺขสญฺญา    ทุกฺเข
อนตฺตสญฺญา    ปหานสญฺญา    วิราคสญฺญา    ฯ   อิเม   นว   ธมฺมา
อุปฺปาเทตพฺพา ฯ
     [๔๖๓]  กตเม  นว  ธมฺมา  อภิญฺเญยฺยา  ฯ  นว  อนุปุพฺพวิหารา
อิธาวุโส  ภิกฺขุ  วิวิจฺจเจว  กาเมหิ  วิวิจฺจ  อกุสเลหิ  ธมฺเมหิ  สวิตกฺกํ
สวิจารํ   วิเวกชํ  ปีติสุขํ  ปฐมชฺฌานํ  อุปสมฺปชฺช  วิหรติ  วิตกฺกวิจารานํ
วูปสมา    อชฺฌตฺตํ    สมฺปสาทนํ    เจตโส    เอโกทิภาวํ    อวิตกฺกํ
อวิจารํ   สมาธิชํ   ปีติสุขํ   ทุติยชฺฌานํ   อุปสมฺปชฺช  วิหรติ  ปีติยา  จ
วิราคา   อุเปกฺขโก   จ  วิหรติ  สโต  จ  สมฺปชาโน  สุขญฺจ  กาเยน
@เชิงอรรถ:  ม. ยุ. อนภิรติสญฺญา ฯ
ปฏิสํเวเทติ   ยนฺตํ   อริยา   อาจิกฺขนฺติ  อุเปกฺขโก  สติมา  สุขวิหารีติ
ตติยชฺฌานํ   อุปสมฺปชฺช   วิหรติ   สุขสฺส   จ   ปหานา   ทุกฺขสฺส   จ
ปหานา    ปุพฺเพ    ว   โสมนสฺสโทมนสฺสานํ   อตฺถงฺคมา   อทุกฺขมสุขํ
อุเปกฺขาสติปาริสุทฺธึ     จตุตฺถชฺฌานํ    อุปสมฺปชฺช    วิหรติ    สพฺพโส
รูปสญฺญานํ    สมติกฺกมา    ปฏิฆสญฺญานํ    อตฺถงฺคมา    นานตฺตสญฺญานํ
อมนสิการา    อนนฺโต    อากาโสติ    อากาสานญฺจายตนํ   อุปสมฺปชฺช
วิหรติ      สพฺพโส      อากาสานญฺจายตนํ     สมติกฺกมฺม     อนนฺตํ
วิญฺญาณนฺติ      วิญฺญาณญฺจายตนํ     อุปสมฺปชฺช     วิหรติ     สพฺพโส
วิญฺญาณญฺจายตนํ     สมติกฺกมฺม     นตฺถิ     กิญฺจีติ    อากิญฺจญฺญายตนํ
อุปสมฺปชฺช      วิหรติ     สพฺพโส     อากิญฺจญฺญายตนํ     สมติกฺกมฺม
เนวสญฺญานาสญฺญายตนํ        อุปสมฺปชฺช        วิหรติ       สพฺพโส
เนวสญฺญานาสญฺญายตนํ          สมติกฺกมฺม         สญฺญาเวทยิตนิโรธํ
อุปสมฺปชฺช วิหรติ ฯ อิเม นว ธมฺมา อภิญฺเญยฺยา ฯ
     [๔๖๔]  กตเม  นว  ธมฺมา  สจฺฉิกาตพฺพา  ฯ  นว  อนุปุพฺพนิโรธา
ปฐมํ   ฌานํ   สมาปนฺนสฺส   กามสญฺญา   นิรุทฺธา   โหติ   ทุติยํ  ฌานํ
สมาปนฺนสฺส   วิตกฺกวิจารา   นิรุทฺธา   โหนฺติ  ตติยํ  ฌานํ  สมาปนฺนสฺส
ปีติ    นิรุทฺธา   โหติ   จตุตฺถํ   ฌานํ   สมาปนฺนสฺส   อสฺสาสปสฺสาสา
นิรุทฺธา     โหนฺติ     อากาสานญฺจายตนํ     สมาปนฺนสฺส    รูปสญฺญา
นิรุทฺธา    โหติ    วิญฺญาณญฺจายตนํ   สมาปนฺนสฺส   อากาสานญฺจายตน-
สญฺญา      นิรุทฺธา      โหติ      อากิญฺจญฺญายตนํ     สมาปนฺนสฺส
วิญฺญาณญฺจายตนสญฺญา      นิรุทฺธา     โหติ     เนวสญฺญานาสญฺญายตนํ
สมาปนฺนสฺส    อากิญฺจญฺญายตนสญฺญา    นิรุทฺธา   โหติ   สญฺญาเวทยิต-
นิโรธํ  สมาปนฺนสฺส  สญฺญา  จ  เวทนา  จ  นิรุทฺธา โหนฺติ ฯ อิเม นว
ธมฺมา   สจฺฉิกาตพฺพา  ฯ  อิติ  อิเม  นวุติ  ธมฺมา  ภูตา  ตจฺฉา  ตถา
อวิตถา อนญฺญถา สมฺมา ตถาคเตน อภิสมฺพุทฺธา ฯ
     [๔๖๕]  ทส   ธมฺมา   พหุการา   ทส  ธมฺมา  ภาเวตพฺพา  ทส
ธมฺมา    ปริญฺเญยฺยา    ทส    ธมฺมา    ปหาตพฺพา    ทส    ธมฺมา
หานภาคิยา   ทส   ธมฺมา   วิเสสภาคิยา   ทส   ธมฺมา   ทุปฺปฏิวิชฺฌา
ทส   ธมฺมา   อุปฺปาเทตพฺพา   ทส   ธมฺมา   อภิญฺเญยฺยา  ทส  ธมฺมา
สจฺฉิกาตพฺพา ฯ
     [๔๖๖]  กตเม  ทส  ธมฺมา  พหุการา  ฯ  ทส  นาถกรณา  ธมฺมา
อิธาวุโส  ภิกฺขุ  สีลวา  โหติ  ปาติโมกฺขสํวรสํวุโต  วิหรติ อาจารโคจร-
สมฺปนฺโน    อนุมตฺเตสุ    วชฺเชสุ    ภยทสฺสาวี    สมาทาย   สิกฺขติ
สิกฺขาปเทสุ   ฯ   ยํปาวุโส   ภิกฺขุ   สีลวา  โหติ  ปาติโมกฺขสํวรสํวุโต
วิหรติ     อาจารโคจรสมฺปนฺโน    อนุมตฺเตสุ    วชฺเชสุ    ภยทสฺสาวี
สมาทาย สิกฺขติ สิกฺขาปเทสุ อยํ ธมฺโม นาถกรโณ ฯ
     {๔๖๖.๑}  ปุน จปรํ อาวุโส ภิกฺขุ พหุสฺสุโต โหติ สุตธโร สุตสนฺนิจโย
เย   เต   ธมฺมา   อาทิกลฺยาณา   มชฺเฌกลฺยาณา   ปริโยสานกลฺยาณา
สาตฺถํ    สพฺยญฺชนํ    เกวลปริปุณฺณํ    ปริสุทฺธํ   พฺรหฺมจริยํ   อภิวทนฺติ
ตถารูปาสฺส    ธมฺมา    พหุสฺสุตา    โหนฺติ   ธตา   วจสา   ปริจิตา
มนสานุเปกฺขิตา   ทิฏฺฐิยา   สุปฺปฏิวิทฺธา   ฯ  ยํปาวุโส  ภิกฺขุ  พหุสฺสุโต
โหติ ฯเปฯ ทิฏฺฐิยา สุปฺปฏิวิทฺธา อยํปิ ธมฺโม นาถกรโณ ฯ
     {๔๖๖.๒}  ปุน จปรํ อาวุโส ภิกฺขุ กลฺยาณมิตฺโต โหติ กลฺยาณสหาโย
กลฺยาณสมฺปวงฺโก     ฯ    ยํปาวุโส    ภิกฺขุ    กลฺยาณมิตฺโต    โหติ
กลฺยาณสหาโย กลฺยาณสมฺปวงฺโก อยํปิ ธมฺโม นาถกรโณ ฯ
     {๔๖๖.๓}  ปุน  จปรํ  อาวุโส  ภิกฺขุ  สุวโจ โหติ โสวจสฺสกรเณหิ
ธมฺเมหิ  สมนฺนาคโต  ขโม  โหติ  ปทกฺขิณคฺคาหี  อนุสาสนึ  ฯ  ยํปาวุโส
ภิกฺขุ   สุวโจ   โหติ   โสวจสฺสกรเณหิ   ธมฺเมหิ   สมนฺนาคโต   ขโม
โหติ ปทกฺขิณคฺคาหี อนุสาสนึ อยํปิ ธมฺโม นาถกรโณ ฯ
     {๔๖๖.๔}  ปุน  จปรํ  อาวุโส  ภิกฺขุ  ยานิ  ตานิ  สพฺรหฺมจารีนํ
อุจฺจาวจานิ  กึกรณียานิ  ตตฺถ  ทกฺโข  โหติ  อนลโส ตตฺรุปายาย วีมํสาย
สมนฺนาคโต   อลํ  กาตุํ  อลํ  สํวิธาตุํ  ฯ  ยํปาวุโส  ภิกฺขุ  ยานิ  ตานิ
สพฺรหฺมจารีนํ   อุจฺจาวจานิ   กึกรณียานิ   ตตฺถ   ทกฺโข  โหติ  อนลโส
ตตฺรุปายาย   วีมํสาย   สมนฺนาคโต   อลํ   กาตุํ   อลํ  สํวิธาตุํ  อยํปิ
ธมฺโม นาถกรโณ ฯ
     {๔๖๖.๕}  ปุน  จปรํ  อาวุโส ภิกฺขุ ธมฺมกาโม โหติ ปิยสมุทาหาโร
อภิธมฺเม   อภิวินเย   โอฬารปาโมชฺโช  ฯ  ยํปาวุโส  ภิกฺขุ  ธมฺมกาโม
โหติ   ปิยสมุทาหาโร   อภิธมฺเม   อภิวินเย   โอฬารปาโมชฺโช   อยํปิ
ธมฺโม นาถกรโณ ฯ
     {๔๖๖.๖}  ปุน  จปรํ  อาวุโส  ภิกฺขุ  สนฺตุฏฺโฐ โหติ อิตรีตรจีวร-
ปิณฺฑปาตเสนาสนคิลานปจฺจยเภสชฺชปริกฺขาเรหิ       ฯ       ยํปาวุโส
ภิกฺขุ     สนฺตุฏฺโฐ     โหติ    อิตรีตรจีวรปิณฺฑปาตเสนาสนคิลานปจฺจย-
เภสชฺชปริกฺขาเรหิ     อยํปิ     ธมฺโม     นาถกรโณ     ฯ    ปุน
จปรํ    อาวุโส    ภิกฺขุ   อารทฺธวิริโย   วิหรติ   อกุสลานํ   ธมฺมานํ
ปหานาย    กุสลานํ    ธมฺมานํ   อุปสมฺปทาย   ถามวา   ทฬฺหปรกฺกโม
อนิกฺขิตฺตธุโร   กุสเลสุ   ธมฺเมสุ   ฯ   ยํปาวุโส   ภิกฺขุ  อารทฺธวิริโย
วิหรติ ฯเปฯ อยํปิ ธมฺโม นาถกรโณ ฯ
     {๔๖๖.๗}  ปุน จปรํ อาวุโส ภิกฺขุ สติมา โหติ ปรเมน สติเนปกฺเกน
สมนฺนาคโต  จิรกตํปิ  จิรภาสิตํปิ  สริตา  อนุสฺสริตา  ฯ  ยํปาวุโส  ภิกฺขุ
สติมา   โหติ   ปรเมน  สติเนปกฺเกน  สมนฺนาคโต  จิรกตํปิ  จิรภาสิตํปิ
สริตา อนุสฺสริตา อยํปิ ธมฺโม นาถกรโณ ฯ
     {๔๖๖.๘}  ปุน  จปรํ  อาวุโส  ภิกฺขุ ปญฺญวา โหติ อุทยตฺถคามินิยา
ปญฺญาย   สมนฺนาคโต   อริยาย  นิพฺเพธิกาย  สมฺมาทุกฺขกฺขยคามินิยา  ฯ
ยํปาวุโส    ภิกฺขุ    ปญฺญวา    โหติ   ฯเปฯ   สมฺมาทุกฺขกฺขยคามินิยา
อยํปิ ธมฺโม นาถกรโณ ฯ อิเม ทส ธมฺมา พหุการา ฯ
     [๔๖๗]  กตเม   ทส  ธมฺมา  ภาเวตพฺพา  ฯ  ทส  กสิณายตนานิ
ปฐวีกสิณเมโก  สญฺชานาติ  อุทฺธํ  อโธ จ ๑- ติริยํ อนฺวยํ ๒- อปฺปมาณํ ฯ
อาโปกสิณเมโก    สญฺชานาติ    ฯ   เตโชกสิณเมโก   สญฺชานาติ   ฯ
วาโยกสิณเมโก    สญฺชานาติ    ฯ    นีลกสิณเมโก    สญฺชานาติ   ฯ
ปีตกสิณเมโก    สญฺชานาติ    ฯ    โลหิตกสิณเมโก    สญฺชานาติ   ฯ
โอทาตกสิณเมโก   สญฺชานาติ   ฯ   อากาสกสิณเมโก   สญฺชานาติ   ฯ
วิญฺญาณกสิณเมโก    สญฺชานาติ    อุทฺธํ    อโธ    จ   ติริยํ   อนฺวยํ
@เชิงอรรถ:  ม. ยุ. จสทฺโท นตฺถิ ฯ  ม. ยุ. อทฺวยํ ฯ
อปฺปมาณํ ฯ อิเม ทส ธมฺมา ภาเวตพฺพา ฯ
     [๔๖๘]  กตเม  ทส  ธมฺมา  ปริญฺเญยฺยา ฯ ทสายตนานิ จกฺขฺวายตนํ
รูปายตนํ   โสตายตนํ   สทฺทายตนํ   ฆานายตนํ   คนฺธายตนํ  ชิวฺหายตนํ
รสายตนํ กายายตนํ โผฏฺฐพฺพายตนํ ฯ อิเม ทส ธมฺมา ปริญฺเญยฺยา ฯ
     [๔๖๙]  กตเม  ทส  ธมฺมา  ปหาตพฺพา  ฯ ทส มิจฺฉตฺตา มิจฺฉาทิฏฺฐิ
มิจฺฉาสงฺกปฺโป      มิจฺฉาวาจา      มิจฺฉากมฺมนฺโต      มิจฺฉาอาชีโว
มิจฺฉาวายาโม   มิจฺฉาสติ   มิจฺฉาสมาธิ   มิจฺฉาญาณํ   มิจฺฉาวิมุตฺติ   ฯ
อิเม ทส ธมฺมา ปหาตพฺพา ฯ
     [๔๗๐]  กตเม  ทส  ธมฺมา  หานภาคิยา  ฯ  ทส  อกุสลกมฺมปถา
ปาณาติปาโต     อทินฺนาทานํ     กาเมสุ    มิจฺฉาจาโร    มุสาวาโท
ปิสุณา   วาจา   ผรุสา   วาจา   สมฺผปฺปลาโป   อภิชฺฌา   พฺยาปาโท
มิจฺฉาทิฏฺฐิ ฯ อิเม ทส ธมฺมา หานภาคิยา ฯ
     [๔๗๑]  กตเม  ทส  ธมฺมา  วิเสสภาคิยา  ฯ  ทส  กุสลกมฺมปถา
ปาณาติปาตา      เวรมณี      อทินฺนาทานา     เวรมณี     กาเมสุ
มิจฺฉาจารา    เวรมณี    มุสาวาทา    เวรมณี    ปิสุณาย    วาจาย
เวรมณี     ผรุสาย    วาจาย    เวรมณี    สมฺผปฺปลาปา    เวรมณี
อนภิชฺฌา อพฺยาปาโท สมฺมาทิฏฺฐิ ฯ อิเม ทส ธมฺมา วิเสสภาคิยา ฯ
     [๔๗๒]  กตเม   ทส   ธมฺมา   ทุปฺปฏิวิชฺฌา  ฯ  ทส  อริยวาสา
อิธาวุโส   ภิกฺขุ   ปญฺจงฺควิปฺปหีโน  โหติ  ฉฬงฺคสมนฺนาคโต  เอการกฺโข
จตุราปสฺเสโน    ปนุณฺณปจฺเจกสจฺโจ   สมวยสฏฺเฐสโน   อนาวิลสงฺกปฺโป
ปสฺสทฺธกายสงฺขาโร สุวิมุตฺตจิตฺโต สุวิมุตฺตปญฺโญ ฯ
     {๔๗๒.๑}  กถญฺจาวุโส  ภิกฺขุ  ปญฺจงฺควิปฺปหีโน  โหติ  ฯ อิธาวุโส
ภิกฺขุโน   กามจฺฉนฺโท   ปหีโน  โหติ  พฺยาปาโท  ปหีโน  โหติ  ถีนมิทฺธํ
ปหีนํ  โหติ  อุทฺธจฺจกุกฺกุจฺจํ  ปหีนํ  โหติ  วิจิกิจฺฉา  ปหีนา  โหติ ฯ เอวํ
โข อาวุโส ภิกฺขุ ปญฺจงฺควิปฺปหีโน โหติ ฯ
     {๔๗๒.๒}  กถญฺจาวุโส  ภิกฺขุ  ฉฬงฺคสมนฺนาคโต  โหติ ฯ อิธาวุโส
ภิกฺขุ  จกฺขุนา  รูปํ  ทิสฺวา  เนว  สุมโน  โหติ  น ทุมฺมโน อุเปกฺขโก จ
วิหรติ   สโต  สมฺปชาโน  ฯ  โสเตน  สทฺทํ  สุตฺวา  ฯ  ฆาเนน  คนฺธํ
ฆายิตฺวา  ฯ  ชิวฺหาย  รสํ  สายิตฺวา  ฯ  กาเยน  โผฏฺฐพฺพํ  ผุสิตฺวา ฯ
มนสา   ธมฺมํ  วิญฺญาย  เนว  สุมโน  โหติ  น  ทุมฺมโน  อุเปกฺขโก  จ
วิหรติ สโต สมฺปชาโน ฯ เอวํ โข อาวุโส ภิกฺขุ ฉฬงฺคสมนฺนาคโต โหติ ฯ
     {๔๗๒.๓}  กถญฺจาวุโส  ภิกฺขุ  เอการกฺโข  โหติ ฯ อิธาวุโส ภิกฺขุ
สตารกฺเขน เจตสา สมนฺนาคโต โหติ ฯ เอวํ โข อาวุโส ภิกฺขุ เอการกฺโข
โหติ  ฯ กถญฺจาวุโส ภิกฺขุ จตุราปสฺเสโน โหติ ฯ อิธาวุโส ภิกฺขุ สงฺขาเยกํ
ปฏิเสวติ สงฺขาเยกํ อธิวาเสติ สงฺขาเยกํ ปริวชฺเชติ สงฺขาเยกํ วิโนเทติ ฯ
เอวํ โข อาวุโส ภิกฺขุ จตุราปสฺเสโน โหติ ฯ
     {๔๗๒.๔}  กถญฺจาวุโส ภิกฺขุ ปนุณฺณปจฺเจกสจฺโจ โหติ ฯ อิธาวุโส ภิกฺขุนา ๑-
@เชิงอรรถ:  ม. ยุ. ภิกฺขุโน ฯ เอวมุปริ ฯ
ยานิ   ตานิ   ปุถุสมณพฺราหฺมณานํ  ปุถุปจฺเจกสจฺจานิ  สพฺพานิ  ตานิ  ๑-
นุณฺณานิ    โหนฺติ    ปนุณฺณานิ   จตฺตานิ   วนฺตานิ   มุตฺตานิ   ปหีนานิ
ปฏินิสฺสฏฺฐานิ ฯ เอวํ โข อาวุโส ภิกฺขุ ปนุณฺณปจฺเจกสจฺโจ โหติ ฯ
     {๔๗๒.๕}  กถญฺจาวุโส  ภิกฺขุ  สมวยสฏฺเฐสโน  โหติ  ฯ อิธาวุโส
ภิกฺขุนา  กาเมสนา  ปหีนา  โหติ  ภเวสนา  ปหีนา โหติ พฺรหฺมจริเยสนา
ปฏินิสฺสฏฺฐา ๒- โหติ ๓- ฯ เอวํ โข อาวุโส ภิกฺขุ สมวยสฏฺเฐสโน โหติ ฯ
     {๔๗๒.๖}  กถญฺจาวุโส  ภิกฺขุ  อนาวิลสงฺกปฺโป  โหติ  ฯ อิธาวุโส
ภิกฺขุนา   กามสงฺกปฺโป   ปหีโน   โหติ  พฺยาปาทสงฺกปฺโป  ปหีโน  โหติ
วิหึสาสงฺกปฺโป  ปหีโน  โหติ  ฯ  เอวํ  โข อาวุโส ภิกฺขุ อนาวิลสงฺกปฺโป
โหติ ฯ
     {๔๗๒.๗}  กถญฺจาวุโส  ภิกฺขุ ปสฺสทฺธกายสงฺขาโร โหติ ฯ อิธาวุโส
ภิกฺขุ  สุขสฺส  จ  ปหานา ทุกฺขสฺส จ ปหานา ปุพฺเพ ว โสมนสฺสโทมนสฺสานํ
อตฺถงฺคมา   อทุกฺขมสุขํ   อุเปกฺขาสติปาริสุทฺธึ   จตุตฺถชฺฌานํ   อุปสมฺปชฺช
วิหรติ ฯ เอวํ โข อาวุโส ภิกฺขุ  ปสฺสทฺธกายสงฺขาโร โหติ ฯ
     {๔๗๒.๘}  กถญฺจาวุโส  ภิกฺขุ  สุวิมุตฺตจิตฺโต  โหติ  ฯ  อิธาวุโส
ภิกฺขุโน  ราคา  จิตฺตํ  วิมุตฺตํ  โหติ  โทสา  จิตฺตํ  วิมุตฺตํ  โหติ  โมหา
จิตฺตํ วิมุตฺตํ โหติ ฯ เอวํ โข อาวุโส ภิกฺขุ สุวิมุตฺตจิตฺโต โหติ ฯ
     {๔๗๒.๙}  กถญฺจาวุโส ภิกฺขุ สุวิมุตฺตปญฺโญ โหติ ฯ อิธาวุโส ภิกฺขุ ราโค
เม  ปหีโน  อุจฺฉินฺนมูโล  ตาลาวตฺถุกโต  อนภาวงฺคโต  อายตึ อนุปฺปาท-
ธมฺโมติ ปชานาติ ฯ โทโส เม ปหีโน ฯเปฯ โมโห เม ปหีโน อุจฺฉินฺนมูโล
@เชิงอรรถ:  ยุ. สพฺพานิสฺสตานิ ฯ  ม. ยุ. ปฏิปฺปสฺสทฺธา ฯ  ม. ยุ. อยํ น ทิสฺสติ ฯ
ตาลาวตฺถุกโต   อนภาวงฺคโต   อายตึ   อนุปฺปาทธมฺโมติ   ปชานาติ  ฯ
เอวํ   โข   อาวุโส  ภิกฺขุ  สุวิมุตฺตปญฺโญ  โหติ  ฯ  อิเม  ทส  ธมฺมา
ทุปฺปฏิวิชฺฌา ฯ
     [๔๗๓]  กตเม   ทส   ธมฺมา   อุปฺปาเทตพฺพา   ฯ  ทส  สญฺญา
อสุภสญฺญา    มรณสญฺญา    อาหาเร  ปฏิกูลสญฺญา    สพฺพโลเก
อนภิรตสญฺญา    อนิจฺจสญฺญา    อนิจฺเจ  ทุกฺขสญฺญา   ทุกฺเข
อนตฺตสญฺญา      ปหานสญฺญา   วิราคสญฺญา    นิโรธสญฺญา   ฯ
อิเม ทส ธมฺมา อุปฺปาเทตพฺพา ฯ
     [๔๗๔]  กตเม  ทส  ธมฺมา  อภิญฺเญยฺยา  ฯ  ทส นิชฺชิณฺณวตฺถูนิ ๑-
สมฺมาทิฏฺฐิสฺส   มิจฺฉาทิฏฺฐิ   นิชฺชิณฺณา   โหติ  เย  จ  มิจฺฉาทิฏฺฐิปจฺจยา
อเนเก   ปาปกา   อกุสลา   ธมฺมา  สมฺภวนฺติ  เตปสฺส  ๒-  นิชฺชิณฺณา
โหนฺติ   สมฺมาทิฏฺฐิปจฺจยา   จ   อเนเก  กุสลา  ธมฺมา  ภาวนาปาริปูรึ
คจฺฉนฺติ ฯ
     {๔๗๔.๑}  สมฺมาสงฺกปฺปสฺส  มิจฺฉาสงฺกปฺโป  นิชฺชิณฺโณ  โหติ  เย
จ   มิจฺฉาสงฺกปฺปปจฺจยา   อเนเก   ปาปกา  อกุสลา  ธมฺมา  สมฺภวนฺติ
เตปสฺส   นิชฺชิณฺณา   โหนฺติ   สมฺมาสงฺกปฺปปจฺจยา   จ  อเนเก  กุสลา
ธมฺมา ภาวนาปาริปูรึ คจฺฉนฺติ ฯ
     {๔๗๔.๒}  สมฺมาวาจสฺส   มิจฺฉาวาจา  นิชฺชิณฺณา  โหติ  เย  จ
มิจฺฉาวาจาปจฺจยา    อเนเก    ปาปกา   อกุสลา   ธมฺมา   สมฺภวนฺติ
เตปสฺส   นิชฺชิณฺณา   โหนฺติ   สมฺมาวาจาปจฺจยา   จ   อเนเก  กุสลา
ธมฺมา   ภาวนาปาริปูรึ   คจฺฉนฺติ   ฯ   สมฺมากมฺมนฺตสฺส  มิจฺฉากมฺมนฺโต
@เชิงอรรถ:  ม. ยุ. นิชฺชรวตฺถูนิ ฯ  ม. ยุ. เต จสฺส ฯ เอวมุปริ ฯ
นิชฺชิณฺโณ  โหติ  เย  จ  มิจฺฉากมฺมนฺตปจฺจยา  อเนเก  ปาปกา  อกุสลา
ธมฺมา    สมฺภวนฺติ   เตปสฺส   นิชฺชิณฺณา   โหนฺติ   สมฺมากมฺมนฺตปจฺจยา
จ อเนเก กุสลา ธมฺมา ภาวนาปาริปูรึ คจฺฉนฺติ ฯ
     {๔๗๔.๓}  สมฺมาอาชีวสฺส  มิจฺฉาอาชีโว  นิชฺชิณฺโณ  โหติ  เย  จ
มิจฺฉาอาชีวปจฺจยา    อเนเก    ปาปกา   อกุสลา   ธมฺมา   สมฺภวนฺติ
เตปสฺส   นิชฺชิณฺณา   โหนฺติ   สมฺมาอาชีวปจฺจยา   จ   อเนเก  กุสลา
ธมฺมา ภาวนาปาริปูรึ คจฺฉนฺติ ฯ
     {๔๗๔.๔}  สมฺมาวายามสฺส  มิจฺฉาวายาโม  นิชฺชิณฺโณ  โหติ  เย
จ   มิจฺฉาวายามปจฺจยา   อเนเก   ปาปกา  อกุสลา  ธมฺมา  สมฺภวนฺติ
เตปสฺส   นิชฺชิณฺณา   โหนฺติ   สมฺมาวายามปจฺจยา   จ  อเนเก  กุสลา
ธมฺมา ภาวนาปาริปูรึ คจฺฉนฺติ ฯ
     {๔๗๔.๕}  สมฺมาสติสฺส   มิจฺฉาสติ   นิชฺชิณฺณา   โหติ   เย  จ
มิจฺฉาสติปจฺจยา   อเนเก   ปาปกา  อกุสลา  ธมฺมา  สมฺภวนฺติ  เตปสฺส
นิชฺชิณฺณา    โหนฺติ    สมฺมาสติปจฺจยา   จ   อเนเก   กุสลา   ธมฺมา
ภาวนาปาริปูรึ คจฺฉนฺติ ฯ
     {๔๗๔.๖}  สมฺมาสมาธิสฺส   มิจฺฉาสมาธิ   นิชฺชิณฺโณ   โหติ  เย
จ   มิจฺฉาสมาธิปจฺจยา   อเนเก   ปาปกา   อกุสลา  ธมฺมา  สมฺภวนฺติ
เตปสฺส   นิชฺชิณฺณา   โหนฺติ   สมฺมาสมาธิปจฺจยา   จ   อเนเก  กุสลา
ธมฺมา ภาวนาปาริปูรึ คจฺฉนฺติ ฯ
     {๔๗๔.๗}  สมฺมาญาณสฺส มิจฺฉาญาณํ นิชฺชิณฺณํ โหติ เย จ มิจฺฉาญาณ-
ปจฺจยา อเนเก ปาปกา อกุสลา ธมฺมา สมฺภวนฺติ เตปสฺส  นิชฺชิณฺณา โหนฺติ
สมฺมาญาณปจฺจยา  จ  อเนเก  กุสลา  ธมฺมา  ภาวนาปาริปูรึ  คจฺฉนฺติ ฯ
สมฺมาวิมุตฺตสฺส  มิจฺฉาวิมุตฺติ  นิชฺชิณฺณา  โหติ  เย  จ  มิจฺฉาวิมุตฺติปจฺจยา
อเนเก    ปาปกา   อกุสลา   ธมฺมา   สมฺภวนฺติ   เตปสฺส   นิชฺชิณฺณา
โหนฺติ   สมฺมาวิมุตฺติปจฺจยา   จ  อเนเก  กุสลา  ธมฺมา  ภาวนาปาริปูรึ
คจฺฉนฺติ ฯ อิเม ทส ธมฺมา อภิญฺเญยฺยา ฯ
     [๔๗๕]  กตเม   ทส   ธมฺมา   สจฺฉิกาตพฺพา  ฯ  ทส  อเสกฺขา
ธมฺมา    อเสกฺขา   สมฺมาทิฏฺฐิ   อเสกฺโข   สมฺมาสงฺกปฺโป   อเสกฺขา
สมฺมาวาจา    อเสกฺโข    สมฺมากมฺมนฺโต    อเสกฺโข    สมฺมาอาชีโว
อเสกฺโข   สมฺมาวายาโม   อเสกฺขา   สมฺมาสติ  อเสกฺโข  สมฺมาสมาธิ
อเสกฺขํ   สมฺมาญาณํ   อเสกฺขา   สมฺมาวิมุตฺติ   ฯ   อิเม  ทส  ธมฺมา
สจฺฉิกาตพฺพา  ฯ  อิติ  อิเม  สตธมฺมา  ๑-  ภูตา  ตจฺฉา  ตถา อวิตถา
อนญฺญถา   สมฺมา   ตถาคเตน   อภิสมฺพุทฺธาติ   ฯ  อิทมโวจ  อายสฺมา
สารีปุตฺโต   ฯ   อตฺตมนา   เต  ภิกฺขู  อายสฺมโต  สารีปุตฺตสฺส  ภาสิตํ
อภินนฺทุนฺติ ฯ
                ทสุตฺตรสุตฺตํ นิฏฺฐิตํ เอกาทสมํ ฯ
                     ปาฏิกวคฺโค นิฏฺฐิโต ฯ
                             ----------
                                     ตสฺสุทฺทานํ
            ปาฏิกญฺจ อุทุมฺพรํ               จกฺกวตฺติ จ อคฺคญฺญํ
            สมฺปสาทญฺจ ปาสาทํ            ลกฺขเณน สิงฺคาลกํ
@เชิงอรรถ:  ยุ. อิติเม สตํ ธมฺมา ฯ
            อาฏานาฏิยํ สงฺคีติ              ทสุตฺตเรน เอกาทสาติ ๑- ฯ
            จตุตฺตึสสุตฺตปติมณฺฑิโต      ทีฆนิกาโย นิฏฺฐิโต ๒- ฯ
                                      -----------
            จตุตฺตึเส จ สุตฺตนฺตา           ติวคฺโค ยสฺส สงฺคโห
            เอส ทีฆนิกาโยติ                ปฐโม อนุโลมิโก ฯ
            กสฺมา ปเนส                      ทีฆนิกาโยติ วุจฺจติ ฯ
            ทีฆปฺปมาณานํ สุตฺตานํ        สมูหโต นิวาสโต
            สมูหนิวาสาหิ                    ทีฆนิกาโยติ วุจฺจติ ฯ
@เชิงอรรถ:  สีหลโปตฺถเก ปาฏิกวคฺคสฺส
@           ปาฏิโกทุมฺพรี เจว             จกฺกวตฺติ อคญฺญกํ
@           สมฺปสาทญฺจ ปาสาทํ          มหาปุริสลกฺขณํ
@           สิงฺคาลกญฺจ อาฏานาฏิยกํ   สงฺคีติญฺจ ทสุตฺตรํ
@           เอกาทสหิ สุตฺเตหิ              ปาฏิกวคฺโคติ วุจฺจตีติ
@อีทิสุทฺทานํ ทิสฺสติ ฯ
@  ม.       ปาถิโก จ อุทุมฺพรํ          จกฺกวตฺติ อคญฺญกํ
@           สมฺปสาทนปาสาทํ           มหาปุริสลกฺขณํ
@           สิงฺคาลาฏานฏิยกํ            สงฺคีติ จ ทสุตฺตรํ
@           เอกาทสหิ สุตฺเตหิ            ปาถิกวคฺโคติ วุจฺจติ ฯ
@ ม. ปาถิกวคฺคปาลิ นิฏฺฐิตา ฯ ยุ. ทีฆนิกายํ นิฏฺฐิตํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๑ หน้าที่ ๒๘๘-๓๔๓. https://84000.org/tipitaka/read/pali_item.php?book=11&item=364&items=112              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=11&item=364&items=112&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=11&item=364&items=112              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=11&item=364&items=112              ศึกษาอรรถกถานี้ได้ที่ :- https://84000.org/tipitaka/attha/attha.php?b=11&i=364              สารบัญพระไตรปิฎกเล่มที่ ๑๑ https://84000.org/tipitaka/read/?index_11 https://84000.org/tipitaka/english/?index_11

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้า คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]