พระไตรปิฎกเล่มที่ ๑๕ ภาษาบาลี อักษรไทย
พระสุตตันตปิฎกเล่มที่ ๗ สุตฺต. สํ. สคาถวคฺโค

     [๕๕๖]   อถ   โข   พฺรหฺมุโน   สหมฺปติสฺส   ภควโต   เจตสา
เจโตปริวิตกฺกมญฺญาย   เอตทโหสิ   นสฺสติ   วต   โภ  โลโก  วินสฺสติ
วต   โภ  โลโก  ยตฺร  หิ  นาม  ตถาคตสฺส  อรหโต  สมฺมาสมฺพุทฺธสฺส
อปฺโปสฺสุกฺกตาย   จิตฺตํ   นมติ   โน   ธมฺมเทสนายาติ   ฯ   อถ  โข
พฺรหฺมา   สหมฺปติ   เสยฺยถาปิ   นาม   พลวา   ปุริโส  สมฺมิญฺชิตํ  วา
พาหํ    ปสาเรยฺย    ปสาริตํ    วา   พาหํ   สมฺมิญฺเชยฺย   เอวเมว
พฺรหฺมโลเก อนฺตรหิโต ภควโต ปุรโต ปาตุรโหสิ ฯ
     {๕๕๖.๑}   อถ  โข  พฺรหฺมา  สหมฺปติ  เอกํสํ อุตฺตราสงฺคํ กริตฺวา
ทกฺขิณชานุมณฺฑลํ   ปฐวิยํ  นิหนฺตฺวา  เยน  ภควา  เตนญฺชลึ  ปณาเมตฺวา
ภควนฺตํ  เอตทโวจ  เทเสตุ  ภนฺเต  ภควา  ธมฺมํ  เทเสตุ  สุคโต ธมฺมํ
สนฺติ    สตฺตา    อปฺปรชกฺขชาติกา   อสฺสวนตา   ธมฺมสฺส   ปริหายนฺติ
ภวิสฺสนฺติ   ธมฺมสฺส   อญฺญาตาโรติ   ฯ   อิทมโวจ   พฺรหฺมา   สหมฺปติ
อิทํ วตฺวา อถาปรํ เอตทโวจ
                ปาตุรโหสิ มคเธสุ ปุพฺเพ
                ธมฺโม อสุทฺโธ สมเลหิ จินฺติโต
                อปาปุเรตํ ๓- อมตสฺส ทฺวารํ
@เชิงอรรถ: ๑ ม. อาวุฏา ฯ  ๒ ม. อิติห ฯ  ๓ ยุ. อวาปุเรตํ ฯ
                สุณนฺตุ ธมฺมํ วิมเลนานุพุทฺธํ
                เสเล ยถา ปพฺพตมุทฺธนิฏฺฐิโต
                ยถาปิ ปสฺเส ชนตํ สมนฺตโต
                ตถูปมํ ธมฺมมยํ สุเมธโส ๑-
                ปาสาทมารุยฺห สมนฺตจกฺขุ
                โสกาวติณฺณํ ชนตมเปตโสโก
                อเวกฺขสฺสุ ชาติชราภิภูตนฺติ ๒- ฯ
                อุฏฺเฐหิ วีร วิชิตสงฺคาม
                สตฺถวาห อนณ วิจร โลเก
         เทเสตุ ๓- ภควา ธมฺมํ      อญฺญาตาโร ภวิสฺสนฺตีติ ฯ
     [๕๕๗]   อถ  โข  ภควา  พฺรหฺมุโน  จ  อชฺเฌสนํ วิทิตฺวา สตฺเตสุ
จ   การุญฺญตํ   ปฏิจฺจ  พุทฺธจกฺขุนา  โลกํ  โวโลเกสิ  ฯ  อทฺทสา  โข
ภควา    พุทฺธจกฺขุนา    โลกํ    โวโลเกนฺโต    สตฺเต   อปฺปรชกฺเข
มหารชกฺเข     ติกฺขินฺทฺริเย     มุทินฺทฺริเย    สฺวากาเร    ทฺวากาเร
สุวิญฺญาปเย   ทุวิญฺญาปเย   อปฺเปกจฺเจ   ปรโลกวชฺชภยทสฺสาวิโน   ๔-
วิหรนฺเต  ฯ  เสยฺยถาปิ  นาม  อุปฺปลินิยํ  วา  ปทุมินิยํ  วา  ปุณฺฑรีกินิยํ
วา   อปฺเปกจฺจานิ   อุปฺปลานิ   วา   ปทุมานิ   วา   ปุณฺฑรีกานิ  วา
อุทเก   ชาตานิ   อุทเก   สํวฑฺฒานิ   อุทกานุคตานิ  อนฺโตนิมฺมุคฺคโปสีนิ
อปฺเปกจฺจานิ   อุปฺปลานิ   วา   ปทุมานิ   วา  ปุณฺฑรีกานิ  วา  อุทเก
ชาตานิ   อุทเก   สํวฑฺฒานิ   สโมทกํ   ฐิตานิ  อปฺเปกจฺจานิ  อุปฺปลานิ
@เชิงอรรถ: ๑ ม. ยุ. สุเมธ ฯ ๒ โป. ม. อิติสทฺโท นตฺถิ ฯ ๓ ม. เทสสฺสุ ฯ ๔ ม. ... เน ฯ
วา   ปทุมานิ   วา  ปุณฺฑรีกานิ  วา  อุทเก  ชาตานิ  อุทเก  สํวฑฺฒานิ
อุทกํ   ๑-   อจฺจุคฺคมฺม   ติฏฺฐนฺติ  ๒-  อนุปลิตฺตานิ  อุทเกน  เอวเมว
ภควา   พุทฺธจกฺขุนา   โลกํ   โวโลเกนฺโต  อทฺทส  สตฺเต  อปฺปรชกฺเข
มหารชกฺเข  ติกฺขินฺทฺริเย  มุทินฺทฺริเย  สฺวากาเร  ทฺวากาเร  สุวิญฺญาปเย
ทุวิญฺญาปเย   อปฺเปกจฺเจ   ปรโลกวชฺชภยทสฺสาวิโน   วิหรนฺเต   [๓]-
ทิสฺวาน พฺรหฺมานํ สหมฺปตึ คาถาย ปจฺจภาสิ
                อปารุตา เต ๔- อมตสฺส ทฺวารา
                เย โสตวนฺโต ปมญฺจนฺตุ สทฺธํ
                วิหึสสญฺญี ปคุณํ น ภาสึ
                ธมฺมํ ปณีตํ มนุเชสุ พฺรเหฺมติ ฯ
     [๕๕๘]   อถ   โข   พฺรหฺมา   สหมฺปติ   กตาวกาโส   โขมฺหิ
ภควตา    ธมฺมเทสนายาติ   ภควนฺตํ   อภิวาเทตฺวา   ปทกฺขิณํ   กตฺวา
ตตฺเถวนฺตรธายีติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๕ หน้าที่ ๒๐๑-๒๐๓.
https://84000.org/tipitaka/read/pali_item.php?book=15&item=556&items=3
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=15&item=556&items=3&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=15&item=556&items=3
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=15&item=556&items=3
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=15&i=556
             สารบัญพระไตรปิฎกเล่มที่ ๑๕
https://84000.org/tipitaka/read/?index_15
https://84000.org/tipitaka/english/?index_15