ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๒ ภาษาบาลี อักษรไทย พระสุตตันตปิฎกเล่มที่ ๑๔ สุตฺต. องฺ. (๓): ปญฺจก-ฉกฺกนิปาตา
     [๑๗๘]   ตํ   กึ   มญฺญถ   ภิกฺขเว   อปินุ  ตุเมฺหหิ  ทิฏฺฐํ  วา
สุตํ   วา   อยํ   ปุริโส   ปาณาติปาตํ  ปหาย  ปาณาติปาตา  ปฏิวิรโต
โหติ   ๑-  ตเมนํ  ราชาโน  คเหตฺวา  ปาณาติปาตาเวรมณีเหตุ  หนนฺติ
วา  พนฺธนฺติ  วา  ปพฺพาเชนฺติ  วา  ยถาปจฺจยํ วา กโรนฺตีติ ฯ โน เหตํ
ภนฺเต ฯ
     {๑๗๘.๑}   สาธุ  ภิกฺขเว  มยาปิ  โข  เอตํ ภิกฺขเว เนว ทิฏฺฐํ น
สุตํ  อยํ  ปุริโส  ปาณาติปาตํ  ปหาย  ปาณาติปาตา  ปฏิวิรโต  โหติ ๑-
ตเมนํ  ราชาโน  คเหตฺวา  ปาณาติปาตาเวรมณีเหตุ  หนนฺติ  วา พนฺธนฺติ
วา  ปพฺพาเชนฺติ  วา  ยถาปจฺจยํ  วา กโรนฺตีติ อปิจขฺวสฺส ๒- ตเทว ๓-
@เชิงอรรถ:  ม. ปฏิวิรโตติ ฯ   ม. ยุ. อปิจขฺวาสฺส ฯ   ม. ยุ. ตเมว ฯ
ปาปกมฺมํ ปเวเทติ ๑- อยํ ปุริโส อิตฺถึ วา ปุริสํ วา ชีวิตา โวโรเปตีติ ๒-
ตเมนํ   ราชาโน   คเหตฺวา   ปาณาติปาตเหตุ   หนนฺติ   วา  พนฺธนฺติ
วา  ปพฺพาเชนฺติ  วา  ยถาปจฺจยํ  วา  กโรนฺติ  อปินุ  ตุเมฺหหิ  เอวรูปํ
ทิฏฺฐํ วา สุตํ วาติ ทิฏฺฐญฺจ โน ภนฺเต สุตญฺจ สุยฺยิสฺสติ จาติ ฯ
     {๑๗๘.๒}   ตํ  กึ มญฺญถ ภิกฺขเว อปินุ ตุเมฺหหิ ทิฏฺฐํ วา สุตํ วา อยํ
ปุริโส   อทินฺนาทานํ   ปหาย   อทินฺนาทานา   ปฏิวิรโต   โหติ  ตเมนํ
ราชาโน   คเหตฺวา  อทินฺนาทานาเวรมณีเหตุ  หนนฺติ  วา  พนฺธนฺติ  วา
ปพฺพาเชนฺติ วา ยถาปจฺจยํ วา กโรนฺตีติ ฯ โน เหตํ ภนฺเต ฯ
     {๑๗๘.๓}   สาธุ  ภิกฺขเว มยาปิ โข เอตํ ภิกฺขเว เนว ทิฏฺฐํ น สุตํ
อยํ  ปุริโส อทินฺนาทานํ ปหาย อทินฺนาทานา ปฏิวิรโต โหติ ตเมนํ ราชาโน
คเหตฺวา  อทินฺนาทานาเวรมณีเหตุ  หนนฺติ  วา  พนฺธนฺติ  วา ปพฺพาเชนฺติ
วา   ยถาปจฺจยํ  วา  กโรนฺตีติ  อปิจขฺวสฺส  ตเทว  ปาปกมฺมํ  ปเวเทติ
อยํ  ปุริโส  คามา  วา  อรญฺญา  วา  อทินฺนํ  เถยฺยสงฺขาตํ อาทิยติ ๓-
ตเมนํ   ราชาโน  คเหตฺวา  อทินฺนาทานเหตุ  หนนฺติ  วา  พนฺธนฺติ  วา
ปพฺพาเชนฺติ   วา   ยถาปจฺจยํ   วา   กโรนฺติ  อปินุ  ตุเมฺหหิ  เอวรูปํ
ทิฏฺฐํ   วา   สุตํ   วาติ   ทิฏฺฐญฺจ   โน   ภนฺเต   สุตญฺจ   สุยฺยิสฺสติ
จาติ   ฯ  ตํ  กึ  มญฺญถ  ภิกฺขเว  อปินุ  ตุเมฺหหิ  ทิฏฺฐํ  วา  สุตํ  วา
อยํ  ปุริโส  กาเมสุ  มิจฺฉาจารํ  ปหาย  กาเมสุ  มิจฺฉาจารา  ปฏิวิรโต
โหติ  ตเมนํ  ราชาโน  คเหตฺวา  กาเมสุ  มิจฺฉาจาราเวรมณีเหตุ หนนฺติ
วา  พนฺธนฺติ  วา  ปพฺพาเชนฺติ  วา  ยถาปจฺจยํ  วา  กโรนฺตีติ  ฯ  โน
@เชิงอรรถ:  ม. ยุ. ปเวเทนฺติ ฯ   ม. ยุ. โวโรเปสีติ ฯ   ม. ยุ. อาทิยีติ ฯ
เหตํ ภนฺเต ฯ
     {๑๗๘.๔}   สาธุ  ภิกฺขเว  มยาปิ  โข  เอตํ  ภิกฺขเว  เนว ทิฏฺฐํ
น   สุตํ  อยํ  ปุริโส  กาเมสุ  มิจฺฉาจารํ  ปหาย  กาเมสุ  มิจฺฉาจารา
ปฏิวิรโต  โหติ  ตเมนํ  ราชาโน คเหตฺวา กาเมสุ มิจฺฉาจาราเวรมณีเหตุ
หนนฺติ   วา  พนฺธนฺติ  วา  ปพฺพาเชนฺติ  วา  ยถาปจฺจยํ  วา  กโรนฺตีติ
อปิจขฺวสฺส  ตเทว  ปาปกมฺมํ  ปเวเทติ  อยํ  ปุริโส  ปริตฺถีสุ  ปรกุมารีสุ
จาริตฺตํ  อาปชฺชติ  ๑-  ตเมนํ  ราชาโน คเหตฺวา กาเมสุ มิจฺฉาจารเหตุ
หนนฺติ   วา   พนฺธนฺติ  วา  ปพฺพาเชนฺติ  วา  ยถาปจฺจยํ  วา  กโรนฺติ
อปินุ   ตุเมฺหหิ   เอวรูปํ   ทิฏฺฐํ  วา  สุตํ  วาติ  ทิฏฺฐญฺจ  โน  ภนฺเต
สุตญฺจ สุยฺยิสฺสติ จาติ ฯ
     {๑๗๘.๕}   ตํ  กึ  มญฺญถ  ภิกฺขเว  อปินุ ตุเมฺหหิ ทิฏฺฐํ วา สุตํ วา
อยํ  ปุริโส  มุสาวาทํ  ปหาย  มุสาวาทา  ปฏิวิรโต โหติ ตเมนํ ราชาโน
คเหตฺวา   มุสาวาทาเวรมณีเหตุ  หนนฺติ  วา  พนฺธนฺติ  วา  ปพฺพาเชนฺติ
วา      ยถาปจฺจยํ      วา     กโรนฺตีติ     ฯ     โน     เหตํ
ภนฺเต ฯ
     {๑๗๘.๖}   สาธุ  ภิกฺขเว  มยาปิ  โข  เอตํ ภิกฺขเว เนว ทิฏฺฐํ น
สุตํ   อยํ  ปุริโส  มุสาวาทํ  ปหาย  มุสาวาทา  ปฏิวิรโต  โหติ  ตเมนํ
ราชาโน   คเหตฺวา   มุสาวาทาเวรมณีเหตุ   หนนฺติ  วา  พนฺธนฺติ  วา
ปพฺพาเชนฺติ  วา  ยถาปจฺจยํ  วา  กโรนฺตีติ  อปิจขฺวสฺส  ตเทว ปาปกมฺมํ
ปเวเทติ   อยํ   ปุริโส  คหปติสฺส  วา  คหปติปุตฺตสฺส  วา  มุสาวาเทน
อตฺถํ  ภญฺชติ  ๒-  ตเมนํ  ราชาโน  คเหตฺวา  มุสาวาทเหตุ  หนนฺติ วา
พนฺธนฺติ  วา  ปพฺพาเชนฺติ  วา  ยถาปจฺจยํ  วา  กโรนฺติ  อปินุ  ตุเมฺหหิ
เอวรูปํ   ทิฏฺฐํ  วา  สุตํ  วาติ  ทิฏฺฐญฺจ  โน  ภนฺเต  สุตญฺจ  สุยฺยิสฺสติ
@เชิงอรรถ:  โป. อาปชฺชตีติ ฯ ม. ยุ. อาปชฺชีติ ฯ อปรํปิ อีทิสเมว ฯ
@ โป. ยุ. ภณฺชีติ ฯ ม. ปภญฺชีติ ฯ อิโต ปรํ เอวํ ญาตพฺพํ ฯ
จาติ ฯ
     {๑๗๘.๗}   ตํ  กึ  มญฺญถ  ภิกฺขเว  อปินุ ตุเมฺหหิ ทิฏฺฐํ วา สุตํ วา
อยํ  ปุริโส  สุราเมรยมชฺชปมาทฏฺฐานํ  ปหาย  สุราเมรยมชฺชปมาทฏฺฐานา
ปฏิวิรโต    โหติ   ตเมนํ   ราชาโน   คเหตฺวา   สุราเมรยมชฺชปมา-
ทฏฺฐานาเวรมณีเหตุ   หนนฺติ   วา   พนฺธนฺติ   วา   ปพฺพาเชนฺติ  วา
ยถาปจฺจยํ วา กโรนฺตีติ ฯ โน เหตํ ภนฺเต ฯ
     {๑๗๘.๘}   สาธุ  ภิกฺขเว มยาปิ โข เอตํ ภิกฺขเว เนว ทิฏฺฐํ น สุตํ
อยํ  ปุริโส  สุราเมรยมชฺชปมาทฏฺฐานํ  ปหาย  สุราเมรยมชฺชปมาทฏฺฐานา
ปฏิวิรโต โหติ ตเมนํ ราชาโน คเหตฺวา สุราเมรยมชฺชปมาทฏฺฐานาเวรมณีเหตุ
หนนฺติ  วา พนฺธนฺติ วา ปพฺพาเชนฺติ วา ยถาปจฺจยํ วา กโรนฺตีติ อปิจขฺวสฺส
ตเทว  ปาปกมฺมํ  ปเวเทติ  อยํ ปุริโส สุราเมรยมชฺชปมาทฏฺฐานํ อนุยุตฺโต
อิตฺถึ  วา  ปุริสํ  วา  ชีวิตา  โวโรเปติ  ๑- อยํ ปุริโส สุราเมรยมชฺช-
ปมาทฏฺฐานํ  อนุยุตฺโต  คามา  วา  อรญฺญา  วา  อทินฺนํ  เถยฺยสงฺขาตํ
อาทิยติ   ๒-  อยํ  ปุริโส  สุราเมรยมชฺชปมาทฏฺฐานํ  อนุยุตฺโต  ปริตฺถีสุ
ปรกุมารีสุ   จาริตฺตํ   อาปชฺชติ   อยํ  ปุริโส  สุราเมรยมชฺชปมาทฏฺฐานํ
อนุยุตฺโต   คหปติสฺส  วา  คหปติปุตฺตสฺส  วา  มุสาวาเทน  อตฺถํ  ภญฺชติ
ตเมนํ   ราชาโน   คเหตฺวา  สุราเมรยมชฺชปมาทฏฺฐานเหตุ  หนนฺติ  วา
พนฺธนฺติ  วา  ปพฺพาเชนฺติ  วา  ยถาปจฺจยํ  วา  กโรนฺติ  อปินุ  ตุเมฺหหิ
เอวรูปํ   ทิฏฺฐํ  วา  สุตํ  วาติ  ทิฏฺฐญฺจ  โน  ภนฺเต  สุตญฺจ  สุยฺยิสฺสติ
จาติ ฯ
@เชิงอรรถ:  ม. ยุ. โวโรเปสิ ฯ   ม. ยุ. อาทิยิ ฯ
     [๑๗๙]   อถโข  อนาถปิณฺฑิโก  คหปติ  ปญฺจมตฺเตหิ  อุปาสกสเตหิ
ปริวุโต  เยน  ภควา  เตนุปสงฺกมิ  อุปสงฺกมิตฺวา  ภควนฺตํ  อภิวาเทตฺวา
เอกมนฺตํ   นิสีทิ   ฯ   อถโข  ภควา  อายสฺมนฺตํ  สารีปุตฺตํ  อามนฺเตสิ
ยงฺกญฺจิ   สารีปุตฺต   ชาเนยฺยาถ  คิหึ  โอทาตวสนํ  ปญฺจสุ  สิกฺขาปเทสุ
สํวุตกมฺมนฺตํ      จตุนฺนญฺจ      อาภิเจตสิกานํ     ทิฏฺฐธมฺมสุขวิหารานํ
นิกามลาภึ  อกิจฺฉลาภึ  อกสิรลาภึ  โส  อากงฺขมาโน  อตฺตนาว  อตฺตานํ
พฺยากเรยฺย       ขีณนิรโยมฺหิ      ขีณติรจฺฉานโยนิ      ขีณปิตฺติวิสโย
ขีณาปายทุคฺคติวินิปาโต     โสตาปนฺโนหมสฺมิ    อวินิปาตธมฺโม    นิยโต
สมฺโพธิปรายโนติ ฯ
     {๑๗๙.๑}   กตเมสุ  ปญฺจสุ  สิกฺขาปเทสุ  สํวุตกมฺมนฺโต  โหติ  อิธ
สารีปุตฺต   อริยสาวโก   ปาณาติปาตา   ปฏิวิรโต   โหติ  อทินฺนาทานา
ปฏิวิรโต   โหติ   กาเมสุ   มิจฺฉาจารา   ปฏิวิรโต   โหติ  มุสาวาทา
ปฏิวิรโต   โหติ  สุราเมรยมชฺชปมาทฏฺฐานา  ปฏิวิรโต  โหติ  ฯ  อิเมสุ
ปญฺจสุ สิกฺขาปเทสุ สํวุตกมฺมนฺโต โหติ ฯ
     {๑๗๙.๒}   กตเมสํ   จตุนฺนํ  อาภิเจตสิกานํ  ทิฏฺฐธมฺมสุขวิหารานํ
นิกามลาภี  โหติ  อกิจฺฉลาภี  อกสิรลาภี  ฯ  อิธ  สารีปุตฺต  อริยสาวโก
พุทฺเธ   อเวจฺจปฺปสาเทน   สมนฺนาคโต  โหติ  อิติปิ  โส  ภควา  อรหํ
สมฺมาสมฺพุทฺโธ     วิชฺชาจรณสมฺปนฺโน    สุคโต    โลกวิทู    อนุตฺตโร
ปุริสทมฺมสารถิ   สตฺถา   เทวมนุสฺสานํ  พุทฺโธ  ภควาติ  อยมสฺส  ปฐโม
อาภิเจตสิโก     ทิฏฺฐธมฺมสุขวิหาโร     อธิคโต    โหติ    อวิสุทฺธสฺส
จิตฺตสฺส วิสุทฺธิยา อปริโยทาตสฺส จิตฺตสฺส ปริโยทปนาย ฯ
     {๑๗๙.๓}   ปุน จปรํ สารีปุตฺต อริยสาวโก ธมฺเม อเวจฺจปฺปสาเทน สมนฺนาคโต
โหติ   สฺวากฺขาโต   ภควตา  ธมฺโม  สนฺทิฏฺฐิโก  อกาลิโก  เอหิปสฺสิโก
โอปนยิโก   ปจฺจตฺตํ  เวทิตพฺโพ  วิญฺญูหีติ  อยมสฺส  ทุติโย  อาภิเจตสิโก
ทิฏฺฐธมฺมสุขวิหาโร    อธิคโต   โหติ   อวิสุทฺธสฺส   จิตฺตสฺส   วิสุทฺธิยา
อปริโยทาตสฺส จิตฺตสฺส ปริโยทปนาย ฯ
     {๑๗๙.๔}   ปุน  จปรํ สารีปุตฺต อริยสาวโก สงฺเฆ อเวจฺจปฺปสาเทน
สมนฺนาคโต  โหติ  สุปฏิปนฺโน  ภควโต  สาวกสงฺโฆ  อุชุปฏิปนฺโน ภควโต
สาวกสงฺโฆ  ญายปฏิปนฺโน  ภควโต  สาวกสงฺโฆ  สามีจิปฏิปนฺโน  ภควโต
สาวกสงฺโฆ  ยทิทํ  จตฺตาริ  ปุริสยุคานิ  อฏฺฐ  ปุริสปุคฺคลา  เอส ภควโต
สาวกสงฺโฆ  อาหุเนยฺโย  ปาหุเนยฺโย  ทกฺขิเณยฺโย  อญฺชลิกรณีโย อนุตฺตรํ
ปุญฺญกฺเขตฺตํ  โลกสฺสาติ  อยมสฺส  ตติโย  อาภิเจตสิโก ทิฏฺฐธมฺมสุขวิหาโร
อธิคโต   โหติ   อวิสุทฺธสฺส  จิตฺตสฺส  วิสุทฺธิยา  อปริโยทาตสฺส  จิตฺตสฺส
ปริโยทปนาย ฯ
     {๑๗๙.๕}   ปุน  จปรํ  สารีปุตฺต  อริยสาวโก  อริยกนฺเตหิ  สีเลหิ
สมนฺนาคโต  โหติ  อขณฺเฑหิ  อจฺฉิทฺเทหิ  อสพเลหิ  อกมฺมาเสหิ ภุชิสฺเสหิ
วิญฺญูปสตฺเถหิ    สมาธิสํวตฺตนิเกหิ    อยมสฺส    จตุตฺโถ   อาภิเจตสิโก
ทิฏฺฐธมฺมสุขวิหาโร    อธิคโต   โหติ   อวิสุทฺธสฺส   จิตฺตสฺส   วิสุทฺธิยา
อปริโยทาตสฺส  จิตฺตสฺส  ปริโยทปนาย  ฯ  อิเมสํ  จตุนฺนํ  อาภิเจตสิกานํ
ทิฏฺฐธมฺมสุขวิหารานํ  นิกามลาภี  โหติ  อกิจฺฉลาภี  อกสิรลาภี  ฯ ยงฺกญฺจิ
สารีปุตฺต   ชาเนยฺยาถ   คิหึ   โอทาตวสนํ  อิเมสุ  ปญฺจสุ  สิกฺขาปเทสุ
สํวุตกมฺมนฺตํ    อิเมสญฺจ   จตุนฺนํ   อาภิเจตสิกานํ   ทิฏฺฐธมฺมสุขวิหารานํ
@เชิงอรรถ:  ม. ยุ. เอตฺถนฺตเร อปรามฏฺเฐหีติ อตฺถิ ฯ
นิกามลาภึ  อกิจฺฉลาภึ  อกสิรลาภึ  โส  อากงฺขมาโน  อตฺตนาว  อตฺตานํ
พฺยากเรยฺย  ขีณนิรโยมฺหิ  ขีณติรจฺฉานโยนิ  ขีณปิตฺติวิสโย  ๑-  ขีณาปาย-
ทุคฺคติวินิปาโต โสตาปนฺโนหมสฺมิ อวินิปาตธมฺโม นิยโต สมฺโพธิปรายโนติ ฯ
         นิรเยสุ ภยํ ทิสฺวา                   ปาปานิ ปริวชฺชเย
         อริยธมฺมํ สมาทาย                 ปณฺฑิโต ปริวชฺชเย
         น หึเส ปาณภูตานิ                 วิชฺชมาเน ปรกฺกเม
         มุสา จ น ภเณ ชานํ               อทินฺนํ น ปรามเส
         เสหิ ๒- ทาเรหิ สนฺตุฏฺโฐ      ปรทารญฺจ นารเม ๓-
         เมรยํ วารุณึ ชนฺตุ                   น ปิเว จิตฺตโมหนึ
         อนุสฺสเรยฺย สมฺพุทฺธํ              ธมฺมํ จานุวิตกฺกเย ๔-
         อพฺยาปชฺฌํ หิตํ จิตฺตํ             เทวโลกาย ภาวเย
         อุปฏฺฐิเต เทยฺยธมฺเม              ปุญฺญตฺถสฺส ชิคึสโต ๕-
         สนฺเตสุ ปฐมํ ทินฺนา              วิปุลา โหติ ทกฺขิณา ฯ
         สนฺโต หเว ปวกฺขามิ             สารีปุตฺต สุโณหิ เม
         อิติ กณฺหาสุ เสตาสุ               โรหิณีสุ จารีสุ วา
         กมฺมาสาสุ สรูปาสุ                โคสุ ปาเรวตาสุ ๖- วา
         ยาสุกาสุจิ เอตาสุ                   ทนฺโต ชายติ ปุงฺคโว
         โธเรโยฺห พลสมฺปนฺโน          กลฺยาณชวนิกฺกโม
@เชิงอรรถ:  ม. ขีณเปตฺติ ... ฯ   โป. สเกหิ ฯ   ม. ยุ. อารเม ฯ
@ โป. ธมฺมํ อนุวิ ... ฯ ม. ธมฺมญฺจานุ ... ฯ  ม. ชิคีสโต ฯ
@ ยุ. ปาราปตาสุ ฯ
         ตเมว ภาเร ยุญฺชนฺติ              นาสฺส วณฺณํ ปริกฺขเร
         เอวเมว มนุสฺเสสุ                   ยสฺมึกสฺมิญฺจิ ชาติเย
         ขตฺติเย พฺราหฺมเณ เวสฺเส       สุทฺเท จณฺฑาลปุกฺกุเส
         ยาสุกาสุจิ ๑- เอตาสุ              ทนฺโต ชายติ สุพฺพโต
         ธมฺมฏฺโฐ สีลสมฺปนฺโน         สจฺจวาที หิรีมโน
         ปหีนชาติมรโณ                    พฺรหฺมจริยสฺส เกวลี
         ปนฺนภาโร วิสํยุตฺโต              กตกิจฺโจ อนาสโว
         ปารคู สพฺพธมฺมานํ               อนุปาทาย นิพฺพุโต
         ตสฺมิญฺจ วิรเช เขตฺเต            วิปุลา โหติ ทกฺขิณา ฯ
         พาลา จ อวิชานนฺตา             ทุมฺเมธา อสฺสุตาวิโน
         พหิทฺธา เทนฺติ ๒- ทานานิ    น หิ สนฺเต อุปาสเร ฯ
         เย จ สนฺเต อุปาสนฺติ             สปฺปญฺเญ ธีรสมฺมเต
         สทฺธา จ เนสํ สุคเต                มูลชาตา ปติฏฺฐิตา
         เทวโลกญฺจ เต ยนฺติ              กุเล วา อิธ ชายเร
         อนุปุพฺเพน นิพฺพานํ              อธิคจฺฉนฺติ ปณฺฑิตาติ ฯ
     [๑๘๐]   เอกํ  สมยํ ภควา โกสเลสุ จาริกํ จรติ มหตา ภิกฺขุสงฺเฆน
สทฺธึ    อทฺทสา    โข    ภควา    อทฺธานมคฺคปฏิปนฺโน    อญฺญตรสฺมึ
ปเทเส   มหนฺตํ  สาลวนํ  ทิสฺวาน  มคฺคา  โอกฺกมฺม  เยน  ตํ  สาลวนํ
เตนุปสงฺกมิ   อุปสงฺกมิตฺวา   ตํ   สาลวนํ   อชฺโฌคาเหตฺวา  อญฺญตรสฺมึ
ปเทเส  สิตํ  ปาตฺวากาสิ  ฯ  อถโข  อายสมฺโต  อานนฺทสฺส  เอตทโหสิ
@เชิงอรรถ:  โป. ยุ. กาสุ จ ฯ   โป. ม. ททนฺติ ฯ
โก   นุ   โข   เหตุ   โก  ปจฺจโย  ภควโต  สิตสฺส  ปาตุกมฺมาย  น
อการเณน  ตถาคตา  สิตํ  ปาตุกโรนฺตีติ  ฯ  อถโข  อายสฺมา  อานนฺโท
ภควนฺตํ   เอตทโวจ  โก  นุ  โข  ภนฺเต  เหตุ  โก  ปจฺจโย  ภควโต
สิตสฺส ปาตุกมฺมาย น อการเณน ตถาคตา สิตํ ปาตุกโรนฺตีติ ฯ
     {๑๘๐.๑}   ภูตปุพฺพํ  อานนฺท  อิมสฺมึ ปเทเส นครํ อโหสิ อิทฺธญฺเจว
ผีตญฺจ   พหุชนํ  อากิณฺณมนุสฺสํ  ตํ  โข  ปนานนฺท  นครํ  กสฺสโป  ภควา
อรหํ   สมฺมาสมฺพุทฺโธ  อุปนิสฺสาย  วิหรติ  ๑-  กสฺสปสฺส  โข  ปนานนฺท
ภควโต   อรหโต   สมฺมาสมฺพุทฺธสฺส   ภเวสี   นาม   อุปาสโก  อโหสิ
สีเลสุ   อปริปูรการี   ภเวสินา   โข  อานนฺท  อุปาสเกน  ปญฺจมตฺตานิ
อุปาสกสตานิ   ปฏิเทสิตานิ   สมาทปิตานิ  อเหสุํ  สีเลสุ  อปริปูรการิโน
อถโข   อานนฺท   ภเวสิสฺส   อุปาสกสฺส   เอตทโหสิ  อหํ  โข  อิเมสํ
ปญฺจนฺนํ     อุปาสกสตานํ     พหูปกาโร     ปุพฺพงฺคโม    สมาทเปตา
อหญฺจมฺหิ   สีเลสุ   อปริปูรการี   อิมานิปิ   ปญฺจ  อุปาสกสตานิ  สีเลสุ
อปริปูรการิโน    อิจฺเจตํ    สมสมํ   นตฺถิ   กิญฺจิ   อติเรกํ   หนฺทาหํ
อติเรกายาติ ฯ
     {๑๘๐.๒}   อถโข  อานนฺท  ภเวสี  ๒-  อุปาสโก เยน ตานิ ปญฺจ
อุปาสกสตานิ   เตนุปสงฺกมิ   อุปสงฺกมิตฺวา   ตานิ   ปญฺจ  อุปาสกสตานิ
เอตทโวจ  อชฺชตคฺเค  มํ  อายสฺมนฺโต  สีเลสุ  ปริปูรการึ  ธาเรถาติ ฯ
อถโข     อานนฺท     เตสํ    ปญฺจนฺนํ    อุปาสกสตานํ    เอตทโหสิ
อยฺโย   โข   ภเวสี   อมฺหากํ   พหูปกาโร   ปุพฺพงฺคโม   สมาทเปตา
@เชิงอรรถ:  ม. ยุ. วิหาสิ ฯ   ม. ยุ. คเวสี ฯ
อยฺโย   หิ   นาม   ภเวสี   ๑-   สีเลสุ  ปริปูรการี  ภวิสฺสติ  กิมงฺคํ
ปน   มยนฺติ   ฯ   อถโข   อานนฺท   ตานิ  ปญฺจ  อุปาสกสตานิ  เยน
ภเวสี    อุปาสโก    เตนุปสงฺกมึสุ    อุปสงฺกมิตฺวา   ภเวสึ   อุปาสกํ
เอตทโวจุํ   อชฺชตคฺเค   อยฺโย   ภเวสี   อิมานิปิ  ปญฺจ  อุปาสกสตานิ
สีเลสุ    ปริปูรการิโน    ธาเรตูติ   ฯ   อถโข   อานนฺท   ภเวสิสฺส
อุปาสกสฺส    เอตทโหสิ   อหํ   โข   อิเมสํ   ปญฺจนฺนํ   อุปาสกสตานํ
พหูปกาโร    ปุพฺพงฺคโม   สมาทเปตา   อหญฺจมฺหิ   สีเลสุ   ปริปูรการี
อิมานิปิ  ๒-  ปญฺจ  อุปาสกสตานิ  สีเลสุ  ปริปูรการิโน  อิจฺเจตํ  สมสมํ
นตฺถิ กิญฺจิ อติเรกํ หนฺทาหํ อติเรกายาติ ฯ
     {๑๘๐.๓}   อถโข  อานนฺท  ภเวสี  อุปาสโก  เยน  ตานิ  ปญฺจ
อุปาสกสตานิ   เตนุปสงฺกมิ   อุปสงฺกมิตฺวา   ตานิ   ปญฺจ  อุปาสกสตานิ
เอตทโวจ  อชฺชตคฺเค  มํ  อายสฺมนฺโต พฺรหฺมจารึ ธาเรถ อาราจารึ วิรตํ
เมถุนา   คามธมฺมาติ  ฯ  อถโข  อานนฺท  เตสํ  ปญฺจนฺนํ  อุปาสกสตานํ
เอตทโหสิ  อยฺโย  โข  ภเวสี  อมฺหากํ พหูปกาโร ปุพฺพงฺคโม สมาทเปตา
อยฺโย  หิ  นาม  ภเวสี  พฺรหฺมจารี  ภวิสฺสติ  อาราจารี  วิรโต เมถุนา
คามธมฺมา   กิมงฺคํ   ปน   มยนฺติ   ฯ   อถโข   อานนฺท  ตานิ  ปญฺจ
อุปาสกสตานิ   เยน   ภเวสี   อุปาสโก   เตนุปสงฺกมึสุ   อุปสงฺกมิตฺวา
ภเวสึ    อุปาสกํ   เอตทโวจุํ   อชฺชตคฺเค   อยฺโย   ภเวสี   อิมานิปิ
@เชิงอรรถ:  ม. ยุ. คเวสี ฯ สพฺพตฺถ อีทิสเมว ฯ   ยุ. อิมานิ จ ฯ
ปญฺจ   อุปาสกสตานิ   พฺรหฺมจาริโน  ธาเรตุ  อาราจาริโน  วิรเต  ๑-
เมถุนา  คามธมฺมาติ  ฯ  อถโข  อานนฺท  ภเวสิสฺส อุปาสกสฺส เอตทโหสิ
อหํ    โข   อิเมสํ   ปญฺจนฺนํ   อุปาสกสตานํ   พหูปกาโร   ปุพฺพงฺคโม
สมาทเปตา   อหญฺจมฺหิ  สีเลสุ  ปริปูรการี  อิมานิปิ  ปญฺจ  อุปาสกสตานิ
สีเลสุ    ปริปูรการิโน    อหญฺจมฺหิ    พฺรหฺมจารี   อาราจารี   วิรโต
เมถุนา    คามธมฺมา    อิมานิปิ   ปญฺจ   อุปาสกสตานิ   พฺรหฺมจาริโน
อาราจาริโน   วิรตา   เมถุนา   คามธมฺมา   อิจฺเจตํ   สมสมํ   นตฺถิ
กิญฺจิ อติเรกํ หนฺทาหํ อติเรกายาติ ฯ
     {๑๘๐.๔}   อถโข  อานนฺท  ภเวสี  อุปาสโก  เยน  ตานิ  ปญฺจ
อุปาสกสตานิ   เตนุปสงฺกมิ   อุปสงฺกมิตฺวา   ตานิ   ปญฺจ  อุปาสกสตานิ
เอตทโวจ    อชฺชตคฺเค    มํ    อายสฺมนฺโต    เอกภตฺติกํ    ธาเรถ
รตฺตูปรตํ   วิรตํ   วิกาลโภชนาติ   ฯ   อถโข  อานนฺท  เตสํ  ปญฺจนฺนํ
อุปาสกสตานํ    เอตทโหสิ    อยฺโย    โข    ภเวสี   อมฺหากํ   ๒-
พหูปกาโร    ปุพฺพงฺคโม    สมาทเปตา    อยฺโย   หิ   นาม   ภเวสี
เอกภตฺติโก    ภวิสฺสติ    รตฺตูปรโต    วิรโต   วิกาลโภชนา   กิมงฺคํ
ปน   มยนฺติ   ฯ   อถโข   อานนฺท   ตานิ  ปญฺจ  อุปาสกสตานิ  เยน
ภเวสี    อุปาสโก    เตนุปสงฺกมึสุ    อุปสงฺกมิตฺวา   ภเวสึ   อุปาสกํ
เอตทโวจุํ   อชฺชตคฺเค   อยฺโย   ภเวสี   อิมานิปิ  ปญฺจ  อุปาสกสตานิ
เอกภตฺติเก   ธาเรตุ   รตฺตูปรเต   วิรเต   วิกาลโภชนาติ  ฯ  อถโข
อานนฺท    ภเวสิสฺส    อุปาสกสฺส    เอตทโหสิ    อหํ   โข   อิเมสํ
@เชิงอรรถ:  โป. ม วิรตา ฯ   ม. อยํ สทฺโท นตฺถิ ฯ
ปญฺจนฺนํ     อุปาสกสตานํ     พหูปกาโร     ปุพฺพงฺคโม    สมาทเปตา
อหญฺจมฺหิ   สีเลสุ   ปริปูรการี   อิมานิปิ   ปญฺจ   อุปาสกสตานิ  สีเลสุ
ปริปูรการิโน    อหญฺจมฺหิ    พฺรหฺมจารี   อาราจารี   วิรโต   เมถุนา
คามธมฺมา   อิมานิปิ   ปญฺจ   อุปาสกสตานิ  พฺรหฺมจาริโน  อาราจาริโน
วิรตา    เมถุนา    คามธมฺมา    อหญฺจมฺหิ   เอกภตฺติโก   รตฺตูปรโต
วิรโต    วิกาลโภชนา    อิมานิปิ   ปญฺจ   อุปาสกสตานิ   เอกภตฺติกา
รตฺตูปรตา    วิรตา    วิกาลโภชนา   อิจฺเจตํ   สมสมํ   นตฺถิ   กิญฺจิ
อติเรกํ หนฺทาหํ อติเรกายาติ ฯ
     {๑๘๐.๕}   อถโข  อานนฺท  ภเวสี  อุปาสโก  เยน กสฺสโป ภควา
อรหํ    สมฺมาสมฺพุทฺโธ   เตนุปสงฺกมิ   อุปสงฺกมิตฺวา   กสฺสปํ   ภควนฺตํ
อรหนฺตํ   สมฺมาสมฺพุทฺธํ  เอตทโวจ  ลเภยฺยาหํ  ภนฺเต  ภควโต  สนฺติเก
ปพฺพชฺชํ  ลเภยฺยํ  อุปสมฺปทนฺติ  ฯ  อลตฺถ  โข  อานนฺท  ภเวสี อุปาสโก
กสฺสปสฺส   ภควโต   อรหโต  สมฺมาสมฺพุทฺธสฺส  สนฺติเก  ปพฺพชฺชํ  อลตฺถ
อุปสมฺปทํ  อจิรูปสมฺปนฺโน  โข  ปนานนฺท  ภเวสี  ภิกฺขุ  เอโก  วูปกฏฺโฐ
อปฺปมตฺโต    อาตาปี    ปหิตตฺโต   วิหรนฺโต   นจิรสฺเสว   ยสฺสตฺถาย
กุลปุตฺตา    สมฺมเทว    อคารสฺมา    อนคาริยํ   ปพฺพชนฺติ   ตทนุตฺตรํ
พฺรหฺมจริยปริโยสานํ    ทิฏฺเฐว    ธมฺเม    สยํ   อภิญฺญา   สจฺฉิกตฺวา
อุปสมฺปชฺช   วิหาสิ   ขีณา  ชาติ  วุสิตํ  พฺรหฺมจริยํ  กตํ  กรณียํ  นาปรํ
อิตฺถตฺตายาติ    อพฺภญฺญาสิ   อญฺญตโร   จ   ปนานนฺท   ภเวสี   ภิกฺขุ
อรหตํ อโหสิ ฯ
     {๑๘๐.๖}   อถโข  อานนฺท  เตสํ  ปญฺจนฺนํ อุปาสกสตานํ เอตทโหสิ
อยฺโย  โข  ภเวสี  อมฺหากํ  พหูปกาโร  ปุพฺพงฺคโม สมาทเปตา อยฺโย หิ
นาม  ภเวสี  เกสมสฺสุํ  โอหาเรตฺวา  กาสายานิ  วตฺถานิ  อจฺฉาเทตฺวา
อคารสฺมา   อนคาริยํ   ปพฺพชิสฺสติ   กิมงฺคํ   ปน   มยนฺติ   ฯ  อถโข
อานนฺท   ตานิ   ปญฺจ   อุปาสกสตานิ   เยน   กสฺสโป   ภควา  อรหํ
สมฺมาสมฺพุทฺโธ     เตนุปสงฺกมึสุ     อุปสงฺกมิตฺวา    กสฺสปํ    ภควนฺตํ
อรหนฺตํ   สมฺมาสมฺพุทฺธํ   เอตทโวจุํ   ลเภยฺยาม   มยํ  ภนฺเต  ภควโต
สนฺติเก    ปพฺพชฺชํ   ลเภยฺยาม   อุปสมฺปทนฺติ   อลภึสุ   โข   อานนฺท
ตานิ     ปญฺจ     อุปาสกสตานิ     กสฺสปสฺส     ภควโต    อรหโต
สมฺมาสมฺพุทฺธสฺส สนฺติเก ปพฺพชฺชํ อลภึสุ อุปสมฺปทํ
     {๑๘๐.๗}   อถโข  อานนฺท  ภเวสิสฺส  ภิกฺขุโน  เอตทโหสิ อหํ โข
อิมสฺส    อนุตฺตรสฺส    วิมุตฺติสุขสฺส    นิกามลาภี   [๑]-   อกิจฺฉลาภี
อกสิรลาภี    อโหวติมานิปิ    ปญฺจ    ภิกฺขุสตานิ   อิมสฺส   อนุตฺตรสฺส
วิมุตฺติสุขสฺส    นิกามลาภิโน    อสฺสุ    อกิจฺฉลาภิโน    อกสิรลาภิโนติ
อถโข   อานนฺท   ตานิ   ปญฺจ   ภิกฺขุสตานิ   เอเกกา  ๒-  วูปกฏฺฐา
อปฺปมตฺตา      อาตาปิโน      ปหิตตฺตา     วิหรนฺตา     นจิรสฺเสว
ยสฺสตฺถาย    กุลปุตฺตา    สมฺมเทว   อคารสฺมา   อนคาริยํ   ปพฺพชนฺติ
ตทนุตฺตรํ      พฺรหฺมจริยปริโยสานํ      ทิฏฺเฐว      ธมฺเม      สยํ
อภิญฺญา    สจฺฉิกตฺวา    อุปสมฺปชฺช    วิหรึสุ    ขีณา    ชาติ   วุสิตํ
พฺรหฺมจริยํ    กตํ    กรณียํ    นาปรํ   อิตฺถตฺตายาติ   อพฺภญฺญึสุ   อิติ
@เชิงอรรถ:  ม. โหติ ฯ   ม. ยุ อยํ ปาโฐ นตฺถิ ฯ
โข   อานนฺท   ตานิ   ปญฺจ  ภิกฺขุสตานิ  ภเวสิปมุขานิ  อุตฺตรุตฺตรึ  ๑-
ปณีตปณีตํ   วายมมานา   อนุตฺตรํ   วิมุตฺตึ   สจฺฉากํสุ   ฯ  ตสฺมา  ติห
อานนฺท   เอวํ   สิกฺขิตพฺพํ   อุตฺตรุตฺตรึ   ๑-   ปณีตปณีตํ   วายมมานา
อนุตฺตรํ วิมุตฺตึ สจฺฉิกริสฺสามาติ เอวํ หิ โว อานนฺท สิกฺขิตพฺพนฺติ ฯ
                    อุปาสกวคฺโค ตติโย ฯ
                        ตสฺสุทฺทานํ
       สารชฺชํ วิสารโท นิรยํ        เอวํ จณฺฑาลปญฺจมํ
       ปีติ วณิชฺชา ราชาโน         คิหี เจว ภเวสินาติ ฯ
                    --------------
                    อรญฺญวคฺโค จตุตฺโถ
     [๑๘๑]   ปญฺจิเม  ภิกฺขเว  อารญฺญกา  ๓-  กตเม  ปญฺจ มนฺทตฺตา
โมมูหตฺตา    อารญฺญโก    โหติ   ปาปิจฺโฉ   อิจฺฉาปกโต   อารญฺญโก
โหติ    อุมฺมาทา   จิตฺตกฺเขปา   อารญฺญโก   โหติ   วณฺณิตํ   พุทฺเธหิ
พุทฺธสาวเกหีติ     อารญฺญโก     โหติ     อปฺปิจฺฉตญฺเญว     นิสฺสาย
สนฺตุฏฺฐิญฺเญว   นิสฺสาย   สลฺเลขญฺเญว   นิสฺสาย  ปวิเวกญฺเญว  นิสฺสาย
อิทมตฺถิตญฺเญว   นิสฺสาย   อารญฺญโก   โหติ  อิเม  โข  ภิกฺขเว  ปญฺจ
อารญฺญกา  ฯ  อิเมสํ  โข  ภิกฺขเว ปญฺจนฺนํ อารญฺญกานํ ยฺวายํ อารญฺญโก
อปฺปิจฺฉตญฺเญว   นิสฺสาย   สนฺตุฏฺฐิญฺเญว  นิสฺสาย  สลฺเลขญฺเญว  นิสฺสาย
ปวิเวกญฺเญว    นิสฺสาย   อิทมตฺถิตญฺเญว   นิสฺสาย   อารญฺญโก   โหติ
@เชิงอรรถ:  โป. ม. อุตฺตรุตฺตริ ฯ   ม. อารญฺญิกา ฯ สพฺพตฺถ อีทิสเมว ฯ
อยํ   อิเมสํ  ปญฺจนฺนํ  อารญฺญกานํ  อคฺโค  จ  เสฏฺโฐ  จ  โมกฺโข  จ
อุตฺตโม   จ   ปวโร  จ  เสยฺยถาปิ  ภิกฺขเว  ควา  ขีรํ  ขีรมฺหา  ทธิ
ทธิมฺหา     นวนีตํ     นวนีตมฺหา     สปฺปิ    สปฺปิมฺหา    สปฺปิมณฺโฑ
สปฺปิมณฺโฑ   ๑-   ตตฺถ   อคฺคมกฺขายติ  เอวเมว  โข  ภิกฺขเว  อิเมสํ
ปญฺจนฺนํ      อารญฺญกานํ     ยฺวายํ     อารญฺญโก     อปฺปิจฺฉตญฺเญว
นิสฺสาย      สนฺตุฏฺฐิญฺเญว      นิสฺสาย     สลฺเลขญฺเญว     นิสฺสาย
ปวิเวกญฺเญว     นิสฺสาย     อิทมตฺถิตญฺเญว     นิสฺสาย    อารญฺญโก
โหติ   อยํ   อิเมสํ   ปญฺจนฺนํ   อารญฺญกานํ   อคฺโค   จ  เสฏฺโฐ  จ
โมกฺโข จ อุตฺตโม จ ปวโร จาติ ฯ
     [๑๘๒]   ปญฺจิเม ภิกฺขเว ปํสุกูลิกา ฯเปฯ
     [๑๘๓]   ปญฺจิเม ภิกฺขเว รุกฺขมูลิกา ฯเปฯ
     [๑๘๔]   ปญฺจิเม ภิกฺขเว โสสานิกา ฯเปฯ
     [๑๘๕]   ปญฺจิเม ภิกฺขเว อพฺโภกาสิกา ฯเปฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๒ หน้าที่ ๒๓๒-๒๔๖. https://84000.org/tipitaka/read/pali_item.php?book=22&item=178&items=8              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=22&item=178&items=8&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=22&item=178&items=8              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=22&item=178&items=8              ศึกษาอรรถกถานี้ได้ที่ :- https://84000.org/tipitaka/attha/attha.php?b=22&i=178              สารบัญพระไตรปิฎกเล่มที่ ๒๒ https://84000.org/tipitaka/read/?index_22 https://84000.org/tipitaka/english/?index_22

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]