พระไตรปิฎกเล่มที่ ๒๒ ภาษาบาลี อักษรไทย
พระสุตตันตปิฎกเล่มที่ ๑๔ สุตฺต. องฺ. (๓): ปญฺจก-ฉกฺกนิปาตา

     [๙]   ปญฺจหิ   ภิกฺขเว   ธมฺเมหิ   สมนฺนาคโต  ภิกฺขุ  อคารโว
อปฺปติสฺโส     จวติ     นปฺปติฏฺฐาติ    สทฺธมฺเม    กตเมหิ    ปญฺจหิ
อสฺสทฺโธ   ภิกฺขเว   ภิกฺขุ   อคารโว   อปฺปติสฺโส   จวติ  นปฺปติฏฺฐาติ
สทฺธมฺเม    อหิริโก    ภิกฺขเว   ภิกฺขุ   อคารโว   อปฺปติสฺโส   จวติ
นปฺปติฏฺฐาติ    สทฺธมฺเม    อโนตฺตปฺปี    ภิกฺขเว    ภิกฺขุ    อคารโว
อปฺปติสฺโส    จวติ   นปฺปติฏฺฐาติ   สทฺธมฺเม   กุสีโต   ภิกฺขเว   ภิกฺขุ
อคารโว    อปฺปติสฺโส    จวติ    นปฺปติฏฺฐาติ    สทฺธมฺเม   ทุปฺปญฺโญ
ภิกฺขเว   ภิกฺขุ   อคารโว   อปฺปติสฺโส   จวติ   นปฺปติฏฺฐาติ  สทฺธมฺเม
อิเมหิ   โข   ภิกฺขเว   ปญฺจหิ   ธมฺเมหิ  สมนฺนาคโต  ภิกฺขุ  อคารโว
อปฺปติสฺโส จวติ นปฺปติฏฺฐาติ สทฺธมฺเม ฯ
     {๙.๑}   ปญฺจหิ   ภิกฺขเว  ธมฺเมหิ  สมนฺนาคโต  ภิกฺขุ  สคารโว
สปฺปติสฺโส   น   จวติ   ปติฏฺฐาติ   สทฺธมฺเม   กตเมหิ  ปญฺจหิ  สทฺโธ
ภิกฺขเว   ภิกฺขุ   สคารโว   สปฺปติสฺโส   น  จวติ  ปติฏฺฐาติ  สทฺธมฺเม
หิริมา     ภิกฺขเว     ภิกฺขุ    สคารโว    สปฺปติสฺโส    น    จวติ
ปติฏฺฐาติ     สทฺธมฺเม     โอตฺตปฺปี     ภิกฺขเว    ภิกฺขุ    สคารโว
สปฺปติสฺโส   น   จวติ   ปติฏฺฐาติ   สทฺธมฺเม   อารทฺธวิริโย   ภิกฺขเว
ภิกฺขุ   สคารโว   สปฺปติสฺโส   น   จวติ  ปติฏฺฐาติ  สทฺธมฺเม  ปญฺญวา
ภิกฺขเว   ภิกฺขุ   สคารโว   สปฺปติสฺโส   น  จวติ  ปติฏฺฐาติ  สทฺธมฺเม
อิเมหิ   โข   ภิกฺขเว   ปญฺจหิ   ธมฺเมหิ  สมนฺนาคโต  ภิกฺขุ  สคารโว
สปฺปติสฺโส น จวติ ปติฏฺฐาติ สทฺธมฺเมติ ฯ
     [๑๐]   ปญฺจหิ   ภิกฺขเว   ธมฺเมหิ  สมนฺนาคโต  ภิกฺขุ  อคารโว
อปฺปติสฺโส  อภพฺโพ  อิมสฺมึ  ธมฺมวินเย  วุฑฺฒึ ๑- วิรูฬฺหึ เวปุลฺลํ อาปชฺชิตุํ
กตเมหิ    ปญฺจหิ   อสฺสทฺโธ   ภิกฺขเว   ภิกฺขุ   อคารโว   อปฺปติสฺโส
อภพฺโพ   อิมสฺมึ   ธมฺมวินเย  วุฑฺฒึ  วิรูฬฺหึ  เวปุลฺลํ  อาปชฺชิตุํ  อหิริโก
ภิกฺขเว  ภิกฺขุ ... อโนตฺตปฺปี ภิกฺขเว ภิกฺขุ ... กุสีโต ภิกฺขเว ภิกฺขุ ...
ทุปฺปญฺโญ  ภิกฺขเว  ภิกฺขุ  อคารโว  อปฺปติสฺโส  อภพฺโพ อิมสฺมึ ธมฺมวินเย
วุฑฺฒึ    วิรูฬฺหึ   เวปุลฺลํ   อาปชฺชิตุํ   อิเมหิ   โข   ภิกฺขเว   ปญฺจหิ
ธมฺเมหิ  สมนฺนาคโต  ภิกฺขุ  อคารโว อปฺปติสฺโส อภพฺโพ อิมสฺมึ ธมฺมวินเย
วุฑฺฒึ วิรูฬฺหึ เวปุลฺลํ อาปชฺชิตุํ ฯ
     {๑๐.๑}   ปญฺจหิ  ภิกฺขเว  ธมฺเมหิ  สมนฺนาคโต  ภิกฺขุ  สคารโว
สปฺปติสฺโส    ภพฺโพ    อิมสฺมึ    ธมฺมวินเย   วุฑฺฒึ   วิรูฬฺหึ   เวปุลฺลํ
อาปชฺชิตุํ   กตเมหิ  ปญฺจหิ  สทฺโธ  ภิกฺขเว  ภิกฺขุ  สคารโว  สปฺปติสฺโส
ภพฺโพ   อิมสฺมึ   ธมฺมวินเย   วุฑฺฒึ   วิรูฬฺหึ  เวปุลฺลํ  อาปชฺชิตุํ  หิริมา
ภิกฺขเว  ภิกฺขุ  ...  โอตฺตปฺปี  ภิกฺขเว ภิกฺขุ ... อารทฺธวิริโย  ภิกฺขเว
ภิกฺขุ   ...   ปญฺญวา   ภิกฺขเว   ภิกฺขุ   สคารโว  สปฺปติสฺโส  ภพฺโพ
อิมสฺมึ   ธมฺมวินเย   วุฑฺฒึ   วิรูฬฺหึ   เวปุลฺลํ   อาปชฺชิตุํ   อิเมหิ  โข
@เชิงอรรถ: ๑ โป. ม. ยุ. วุทฺธึ ฯ สพฺพตฺถ อีทิสเมว ฯ
ภิกฺขเว   ปญฺจหิ   ธมฺเมหิ   สมนฺนาคโต   ภิกฺขุ   สคารโว  สปฺปติสฺโส
ภพฺโพ อิมสฺมึ ธมฺมวินเย วุฑฺฒึ วิรูฬฺหึ เวปุลฺลํ อาปชฺชิตุนฺติ ฯ
                     เสขพลวคฺโค ปฐโม ฯ
                         ตสฺสุทฺทานํ
         สงฺขิตฺตํ วิตฺถตํ ทุกฺขํ ๑-    ภตํ สิกฺขาย ปญฺจมํ
         สมาปตฺติ จ กาเมสุ         จวนา เทฺว อคารวาติ ฯ
                       ----------
                       พลวคฺโค ทุติโย
     [๑๑]   ปุพฺพาหํ   ภิกฺขเว  อนนุสฺสุเตสุ  ธมฺเมสุ  อภิญฺญาโวสาน-
ปารมิปฺปตฺโต   ปฏิชานามิ  ปญฺจิมานิ  ภิกฺขเว  ตถาคตสฺส  ตถาคตพลานิ
เยหิ    พเลหิ    สมนฺนาคโต    ตถาคโต    อาสภณฺฐานํ   ปฏิชานาติ
ปริสาสุ    สีหนาทํ    นทติ    พฺรหฺมจกฺกํ   ปวตฺเตติ   กตมานิ   ปญฺจ
สทฺธาพลํ    หิริพลํ    โอตฺตปฺปพลํ   วิริยพลํ   ปญฺญาพลํ   อิมานิ   โข
ภิกฺขเว   ปญฺจ   ตถาคตสฺส   ตถาคตพลานิ   เยหิ  พเลหิ  สมนฺนาคโต
ตถาคโต   อาสภณฺฐานํ   ปฏิชานาติ  ปริสาสุ  สีหนาทํ  นทติ  พฺรหฺมจกฺกํ
ปวตฺเตตีติ ฯ
     [๑๒]   ปญฺจิมานิ   ภิกฺขเว  เสขพลานิ  กตมานิ  ปญฺจ  สทฺธาพลํ
หิริพลํ    โอตฺตปฺปพลํ    วิริยพลํ    ปญฺญาพลํ   อิมานิ   โข   ภิกฺขเว
ปญฺจ   เสขพลานิ   อิเมสํ   โข   ภิกฺขเว   ปญฺจนฺนํ  เสขพลานํ  เอตํ
อคฺคํ   เอตํ   สงฺคาหิกํ   เอตํ  สงฺฆาตนิยํ  ยทิทํ  ปญฺญาพลํ  เสยฺยถาปิ
@เชิงอรรถ: ๑ ม. ทุกฺขา ฯ
ภิกฺขเว   กูฏาคารสฺส   เอตํ   อคฺคํ  เอตํ  สงฺคาหิกํ  เอตํ  สงฺฆาตนิยํ
ยทิทํ   กูฏํ   เอวเมว   โข   ภิกฺขเว   อิเมสํ   ปญฺจนฺนํ   เสขพลานํ
เอตํ   อคฺคํ   เอตํ   สงฺคาหิกํ   เอตํ   สงฺฆาตนิยํ   ยทิทํ   ปญฺญาพลํ
ตสฺมา    ติห   ภิกฺขเว   เอวํ   สิกฺขิตพฺพํ   สทฺธาพเลน   สมนฺนาคตา
ภวิสฺสาม  เสขพเลน  หิริพเลน  ... โอตฺตปฺปพเลน ... วิริยพเลน ...
ปญฺญาพเลน   สมนฺนาคตา   ภวิสฺสาม   เสขพเลนาติ   เอวํ   หิ   โว
ภิกฺขเว สิกฺขิตพฺพนฺติ ฯ
     [๑๓]   ปญฺจิมานิ   ภิกฺขเว   พลานิ   กตมานิ   ปญฺจ  สทฺธาพลํ
วิริยพลํ   สติพลํ   สมาธิพลํ   ปญฺญาพลํ   อิมานิ   โข   ภิกฺขเว  ปญฺจ
พลานีติ ฯ
     [๑๔]   ปญฺจิมานิ   ภิกฺขเว   พลานิ   กตมานิ   ปญฺจ  สทฺธาพลํ
วิริยพลํ   สติพลํ   สมาธิพลํ   ปญฺญาพลํ   กตมญฺจ   ภิกฺขเว   สทฺธาพลํ
อิธ   ภิกฺขเว   อริยสาวโก   สทฺโธ   โหติ  สทฺทหติ  ตถาคตสฺส  โพธึ
อิติปิ   โส   ภควา   อรหํ   สมฺมาสมฺพุทฺโธ  วิชฺชาจรณสมฺปนฺโน  สุคโต
โลกวิทู    อนุตฺตโร    ปุริสทมฺมสารถิ   สตฺถา   เทวมนุสฺสานํ   พุทฺโธ
ภควาติ   อิทํ  วุจฺจติ  ภิกฺขเว  สทฺธาพลํ  ฯ  กตมญฺจ  ภิกฺขเว  วิริยพลํ
อิธ   ภิกฺขเว   อริยสาวโก   อารทฺธวิริโย   วิหรติ  อกุสลานํ  ธมฺมานํ
ปหานาย    กุสลานํ    ธมฺมานํ   อุปสมฺปทาย   ถามวา   ทฬฺหปรกฺกโม
อนิกฺขิตฺตธุโร  กุสเลสุ  ธมฺเมสุ  อิทํ  วุจฺจติ  ภิกฺขเว  วิริยพลํ ฯ กตมญฺจ
ภิกฺขเว   สติพลํ   อิธ   ภิกฺขเว   อริยสาวโก   สติมา  โหติ  ปรเมน
สติเนปกฺเกน   สมนฺนาคโต   จิรกตํปิ   จิรภาสิตํปิ   สริตา   อนุสฺสริตา
อิทํ  วุจฺจติ  ภิกฺขเว  สติพลํ  ฯ  กตมญฺจ  ภิกฺขเว  สมาธิพลํ อิธ ภิกฺขเว
อริยสาวโก  วิวิจฺเจว  กาเมหิ  วิวิจฺจ  อกุสเลหิ ธมฺเมหิ สวิตกฺกํ สวิจารํ
วิเวกชํ  ปีติสุขํ  ปฐมํ  ฌานํ  อุปสมฺปชฺช  วิหรติ  วิตกฺกวิจารานํ  วูปสมา
อชฺฌตฺตํ   สมฺปสาทนํ   เจตโส   เอโกทิภาวํ  อวิตกฺกํ  อวิจารํ  สมาธิชํ
ปีติสุขํ  ทุติยํ  ฌานํ  อุปสมฺปชฺช  วิหรติ  ปีติยา  จ  วิราคา อุเปกฺขโก จ
วิหรติ  สโต  จ  สมฺปชาโน  สุขญฺจ  กาเยน  ปฏิสํเวเทติ  ยนฺตํ  อริยา
อาจิกฺขนฺติ  อุเปกฺขโก  สติมา  สุขวิหารีติ  ตติยํ  ฌานํ  อุปสมฺปชฺช วิหรติ
สุขสฺส   จ  ปหานา  ทุกฺขสฺส  จ  ปหานา  ปุพฺเพว  โสมนสฺสโทมนสฺสานํ
อตฺถงฺคมา     อทุกฺขมสุขํ     อุเปกฺขาสติปาริสุทฺธึ     จตุตฺถํ     ฌานํ
อุปสมฺปชฺช  วิหรติ  อิทํ  วุจฺจติ  ภิกฺขเว  สมาธิพลํ  ฯ  กตมญฺจ  ภิกฺขเว
ปญฺญาพลํ   อิธ   ภิกฺขเว   อริยสาวโก  ปญฺญวา  โหติ  อุทยตฺถคามินิยา
ปญฺญาย    สมนฺนาคโต   อริยาย   นิพฺเพธิกาย   สมฺมาทุกฺขกฺขยคามินิยา
อิทํ วุจฺจติ ภิกฺขเว ปญฺญาพลํ ฯ อิมานิ โข ภิกฺขเว ปญฺจ พลานีติ ฯ
     [๑๕]   ปญฺจิมานิ   ภิกฺขเว   พลานิ   กตมานิ   ปญฺจ  สทฺธาพลํ
วิริยพลํ   สติพลํ   สมาธิพลํ   ปญฺญาพลํ   กตฺถ   จ  ภิกฺขเว  สทฺธาพลํ
ทฏฺฐพฺพํ    จตูสุ   โสตาปตฺติยงฺเคสุ   เอตฺถ   สทฺธาพลํ   ทฏฺฐพฺพํ   ฯ
กตฺถ   จ   ภิกฺขเว   วิริยพลํ   ทฏฺฐพฺพํ   จตูสุ  สมฺมปฺปธาเนสุ  เอตฺถ
วิริยพลํ    ทฏฺฐพฺพํ    กตฺถ    จ   ภิกฺขเว   สติพลํ   ทฏฺฐพฺพํ   จตูสุ
สติปฏฺฐาเนสุ   เอตฺถ  สติพลํ  ทฏฺฐพฺพํ  ฯ  กตฺถ  จ  ภิกฺขเว  สมาธิพลํ
ทฏฺฐพฺพํ   จตูสุ   ฌาเนสุ   เอตฺถ   สมาธิพลํ   ทฏฺฐพฺพํ   ฯ  กตฺถ  จ
ภิกฺขเว   ปญฺญาพลํ   ทฏฺฐพฺพํ   จตูสุ   อริยสจฺเจสุ   เอตฺถ   ปญฺญาพลํ
ทฏฺฐพฺพํ ฯ อิมานิ โข ภิกฺขเว ปญฺจ พลานีติ ฯ
     [๑๖]   ปญฺจิมานิ   ภิกฺขเว   พลานิ   กตมานิ   ปญฺจ  สทฺธาพลํ
วิริยพลํ   สติพลํ   สมาธิพลํ   ปญฺญาพลํ  ฯ  อิมานิ  โข  ภิกฺขเว  ปญฺจ
พลานิ   ฯ   อิเมสํ   โข  ภิกฺขเว  ปญฺจนฺนํ  พลานํ  เอตํ  อคฺคํ  เอตํ
สงฺคาหิกํ   เอตํ   สงฺฆาตนิยํ   ยทิทํ  ปญฺญาพลํ  ฯ  เสยฺยถาปิ  ภิกฺขเว
กูฏาคารสฺส   เอตํ  อคฺคํ  เอตํ  สงฺคาหิกํ  เอตํ  สงฺฆาตนิยํ  ยทิทํ  กูฏํ
เอวเมว   โข   ภิกฺขเว   อิเมสํ   ปญฺจนฺนํ  พลานํ  เอตํ  อคฺคํ  เอตํ
สงฺคาหิกํ เอตํ สงฺฆาตนิยํ ยทิทํ ปญฺญาพลนฺติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๒ หน้าที่ ๘-๑๓.
https://84000.org/tipitaka/read/pali_item.php?book=22&item=9&items=8
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=22&item=9&items=8&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=22&item=9&items=8
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=22&item=9&items=8
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=22&i=9
             สารบัญพระไตรปิฎกเล่มที่ ๒๒
https://84000.org/tipitaka/read/?index_22
https://84000.org/tipitaka/english/?index_22