บาลี ข้อ 26-33 พระไตรปิฎกเล่มที่ 3

                                 จตุตฺถปาราชิกํ
     [๒๖]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส   อาราเม   ฯ   เตน   โข   ปน  สมเยน  ฉพฺพคฺคิยา
ภิกฺขุนิโย    ^[๑]-   อวสฺสุตสฺส   ปุริสปุคฺคลสฺส   หตฺถคหณํปิ   สาทิยนฺติ
สงฺฆาฏิกณฺณคหณํปิ    สาทิยนฺติ    สนฺติฏฺฐนฺติปิ    สลฺลปนฺติปิ    สงฺเกตํปิ
คจฺฉนฺติ   ปุริสสฺสปิ   อพฺภาคมนํ   สาทิยนฺติ   ฉนฺนํปิ  อนุปวิสนฺติ  กายํปิ
ตทตฺถาย อุปสํหรนฺติ เอตสฺส อสทฺธมฺมสฺส ปฏิเสวนตฺถาย ฯ
     {๒๖.๑}   ยา  ตา  ภิกฺขุนิโย อปฺปิจฺฉา ฯเปฯ ตา อุชฺฌายนฺติ ขียนฺติ
วิปาเจนฺติ   กถํ   หิ  นาม  ฉพฺพคฺคิยา  ภิกฺขุนิโย  อวสฺสุตา  อวสฺสุตสฺส
ปุริสปุคฺคลสฺส       หตฺถคหณํปิ      สาทิยิสฺสนฺติ      สงฺฆาฏิกณฺณคหณํปิ
สาทิยิสฺสนฺติ  สนฺติฏฺฐิสฺสนฺติปิ  ^๒-  สลฺลปิสฺสนฺติปิ  สงฺเกตํปิ  คจฺฉิสฺสนฺติ
ปุริสสฺสปิ    อพฺภาคมนํ    สาทิยิสฺสนฺติ   ฉนฺนํปิ   อนุปวิสิสฺสนฺติ   กายํปิ
ตทตฺถาย    อุปสํหริสฺสนฺติ    เอตสฺส    อสทฺธมฺมสฺส   ปฏิเสวนตฺถายาติ
ฯเปฯ   สจฺจํ  กิร  ภิกฺขเว  ฉพฺพคฺคิยา  ภิกฺขุนิโย  อวสฺสุตา  อวสฺสุตสฺส
ปุริสปุคฺคลสฺส       หตฺถคหณํปิ       สาทิยนฺติ       สงฺฆาฏิกณฺณคหณํปิ
สาทิยนฺติ    สนฺติฏฺฐนฺติปิ    สลฺลปนฺติปิ   สงฺเกตํปิ   คจฺฉนฺติ   ปุริสสฺสปิ
อพฺภาคมนํ   สาทิยนฺติ   ฉนฺนํปิ  อนุปวิสนฺติ  กายํปิ  ตทตฺถาย  อุปสํหรนฺติ
เอตสฺส    อสทฺธมฺมสฺส    ปฏิเสวนตฺถายาติ   ฯ   สจฺจํ   ภควาติ   ฯ
@เชิงอรรถ: ^๑ ม. อวสฺสุตา ฯ  ^๒ สณฺฐสฺสนฺติปีติ อมฺหากํ มติ ฯ
วิครหิ   พุทฺโธ   ภควา   กถํ  หิ  นาม  ภิกฺขเว  ฉพฺพคฺคิยา  ภิกฺขุนิโย
อวสฺสุตา     อวสฺสุตสฺส     ปุริสปุคฺคลสฺส    หตฺถคหณํปิ    สาทิยิสฺสนฺติ
สงฺฆาฏิกณฺณคหณํปิ      สาทิยิสฺสนฺติ     สนฺติฏฺฐิสฺสนฺติปิ     สลฺลปิสฺสนฺติปิ
สงฺเกตํปิ    คจฺฉนฺติ    ปุริสสฺสปิ    อพฺภาคมนํ    สาทิยิสฺสนฺติ   ฉนฺนํปิ
อนุปวิสิสฺสนฺติ   กายํปิ   ตทตฺถาย   อุปสํหริสฺสนฺติ   เอตสฺส  อสทฺธมฺมสฺส
ปฏิเสวนตฺถาย  เนตํ  ภิกฺขเว  อปฺปสนฺนานํ  วา  ปสาทาย ฯเปฯ เอวญฺจ
ปน ภิกฺขเว ภิกฺขุนิโย อิมํ สิกฺขาปทํ อุทฺทิสนฺตุ
     {๒๖.๒}   ยา   ปน  ภิกฺขุนี  อวสฺสุตา  อวสฺสุตสฺส  ปุริสปุคฺคลสฺส
หตฺถคหณํ  วา  สาทิเยยฺย  สงฺฆาฏิกณฺณคหณํ  วา  สาทิเยยฺย  สนฺติฏฺเฐยฺย
วา   สลฺลเปยฺย  วา  สงฺเกตํ  วา  คจฺเฉยฺย  ปุริสสฺส  วา  อพฺภาคมนํ
สาทิเยยฺย   ฉนฺนํ   วา  อนุปวิเสยฺย  กายํ  วา  ตทตฺถาย  อุปสํหเรยฺย
เอตสฺส    อสทฺธมฺมสฺส    ปฏิเสวนตฺถาย    อยมฺปิ   ปาราชิกา   โหติ
อสํวาสา อฏฺฐวตฺถุกาติ ฯ
     [๒๗]   ยา   ปนาติ  ยา  ยาทิสา  ฯเปฯ  ภิกฺขุนีติ  ฯเปฯ  อยํ
อิมสฺมึ   อตฺเถ   อธิปฺเปตา   ภิกฺขุนีติ   ฯ   อวสฺสุตา  นาม  สารตฺตา
อเปกฺขวตี  ^๑-  ปฏิพทฺธจิตฺตา  ฯ  อวสฺสุโต  นาม  สารตฺโต  อเปกฺขวา
ปฏิพทฺธจิตฺโต   ฯ   ปุริสปุคฺคโล   นาม   มนุสฺสปุริโส   น   ยกฺโข  น
เปโต   น   ติรจฺฉานคโต   วิญฺญู   ปฏิพโล  กายสํสคฺคํ  สมาปชฺชิตุํ  ฯ
@เชิงอรรถ: ^๑ ม. ยุ. อเปกฺขวา ฯ
หตฺถคหณํ   วา   สาทิเยยฺยาติ   หตฺโถ   นาม  กปฺปุรํ  อุปาทาย  ยาว
อคฺคนขา    ฯ    เอตสฺส    อสทฺธมฺมสฺส    ปฏิเสวนตฺถาย   อุพฺภกฺขกํ
อโธชานุมณฺฑลํ     คหณํ     สาทิยติ     อาปตฺติ    ถุลฺลจฺจยสฺส    ฯ
สงฺฆาฏิกณฺณคหณํ     วา     สาทิเยยฺยาติ     เอตสฺส     อสทฺธมฺมสฺส
ปฏิเสวนตฺถาย   นิวตฺถํ   วา   ปารุตํ   วา   คหณํ   สาทิยติ  อาปตฺติ
ถุลฺลจฺจยสฺส ฯ
     {๒๗.๑}   สนฺติฏฺเฐยฺย  วาติ  เอตสฺส  อสทฺธมฺมสฺส  ปฏิเสวนตฺถาย
ปุริสสฺส   หตฺถปาเส   ติฏฺฐติ   อาปตฺติ   ถุลฺลจฺจยสฺส   ฯ   สลฺลเปยฺย
วาติ    เอตสฺส    อสทฺธมฺมสฺส   ปฏิเสวนตฺถาย   ปุริสสฺส   หตฺถปาเส
ฐิตา   สลฺลปติ   อาปตฺติ   ถุลฺลจฺจยสฺส   ฯ  สงฺเกตํ  วา  คจฺเฉยฺยาติ
เอตสฺส   อสทฺธมฺมสฺส   ปฏิเสวนตฺถาย   ปุริเสน   อิตฺถนฺนามํ   โอกาสํ
อาคจฺฉาติ   วุตฺตา   คจฺฉติ   ปเท   ปเท  อาปตฺติ  ทุกฺกฏสฺส  ปุริสสฺส
หตฺถปาสํ   โอกฺกนฺตมตฺเต   อาปตฺติ   ถุลฺลจฺจยสฺส   ฯ   ปุริสสฺส   วา
อพฺภาคมนํ    สาทิเยยฺยาติ    เอตสฺส    อสทฺธมฺมสฺส    ปฏิเสวนตฺถาย
ปุริสสฺส     อพฺภาคมนํ    สาทิยติ    อาปตฺติ    ทุกฺกฏสฺส    หตฺถปาสํ
โอกฺกนฺตมตฺเต   อาปตฺติ   ถุลฺลจฺจยสฺส   ฯ   ฉนฺนํ  วา  อนุปวิเสยฺยาติ
เอตสฺส    อสทฺธมฺมสฺส    ปฏิเสวนตฺถาย    เยน    เกนจิ   ปฏิจฺฉนฺนํ
โอกาสํ   ปวิฏฺฐมตฺเต   อาปตฺติ   ถุลฺลจฺจยสฺส  ฯ  กายํ  วา  ตทตฺถาย
อุปสํหเรยฺยาติ     เอตสฺส    อสทฺธมฺมสฺส    ปฏิเสวนตฺถาย    ปุริสสฺส
หตฺถปาเส ฐิตา กายํ อุปสํหรติ อาปตฺติ ถุลฺลจฺจยสฺส ฯ
     [๒๘]   อยมฺปีติ  ปุริมาโย  อุปาทาย  วุจฺจติ  ฯ  ปาราชิกา โหตีติ
เสยฺยถาปิ   นาม  ตาโล  มตฺถกจฺฉินฺโน  อภพฺโพ  ปุนวิรุฬฺหิยา  เอวเมว
ภิกฺขุนี  อฏฺฐมํ  วตฺถุํ  ปริปูเรนฺตี  อสฺสมณี  โหติ  อสกฺยธีตา  เตน วุจฺจติ
ปาราชิกา  โหตีติ  ฯ  อสํวาสาติ  สํวาโส  นาม  เอกกมฺมํ  เอกุทฺเทโส
สมสิกฺขาตา  เอโส  สํวาโส  นาม  โส  ตาย  สทฺธึ  นตฺถิ  เตน วุจฺจติ
อสํวาสาติ ฯ
     [๒๙]   อนาปตฺติ   อสญฺจิจฺจ  อสติยา  อชานนฺติยา  อสาทิยนฺติยา
อุมฺมตฺติกาย ขิตฺตจิตฺตาย เวทนฏฺฏาย อาทิกมฺมิกายาติ ฯ
                            จตุตฺถปาราชิกํ นิฏฺฐิตํ ฯ
                                     ---------
     [๓๐]   อุทฺทิฏฺฐา  โข  อยฺยาโย  อฏฺฐ  ปาราชิกา  ธมฺมา  เยสํ
ภิกฺขุนี   อญฺญตรํ   วา   อญฺญตรํ   วา  อาปชฺชิตฺวา  น  ลภติ  ภิกฺขุนีหิ
สทฺธึ  สํวาสํ  ยถา  ปุเร  ตถา  ปจฺฉา  ปาราชิกา  โหติ  อสํวาสา  ฯ
ตตฺถยฺยาโย    ปุจฺฉามิ    กจฺจิตฺถ   ปริสุทฺธา   ฯ   ทุติยมฺปิ   ปุจฺฉามิ
กจฺจิตฺถ   ปริสุทฺธา   ฯ   ตติยมฺปิ   ปุจฺฉามิ   กจฺจิตฺถ   ปริสุทฺธา   ฯ
ปริสุทฺเธตฺถยฺยาโย ตสฺมา ตุณฺหี ฯ เอวเมตํ ธารยามีติ ฯ
                            ปาราชิกกณฺฑํ นิฏฺฐิตํ ฯ
                                  สตฺตรสกณฺฑํ
อิเม โข ปนยฺยาโย สตฺตรส สงฺฆาทิเสสา ธมฺมา อุทฺเทสํ อาคจฺฉนฺติ ฯ
                                ปฐมสงฺฆาทิเสสํ
     [๓๑]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน  อญฺญตโร
อุปาสโก   ภิกฺขุนีสงฺฆสฺส   อุทฺโทสิตํ   ทตฺวา  กาลกโต  โหติ  ฯ  ตสฺส
เทฺว   ปุตฺตา   โหนฺติ   เอโก   อสฺสทฺโธ   อปฺปสนฺโน  เอโก  สทฺโธ
ปสนฺโน  ฯ  เต  เปตฺติกํ  สาปเตยฺยํ  วิภชึสุ  ฯ  อถโข  โส  อสฺสทฺโธ
อปฺปสนฺโน   ตํ   สทฺธํ   ปสนฺนํ   เอตทโวจ   อมฺหากํ   อุทฺโทสิโต  ตํ
ภาเชมาติ  ^๑-  ฯ  เอวํ  วุตฺเต  โส สทฺโธ ปสนฺโน ตํ อสฺสทฺธํ อปฺปสนฺนํ
เอตทโวจ  มายฺโย  เอวํ  อวจ  อมฺหากํ  ปิตุนา ภิกฺขุนีสงฺฆสฺส ทินฺโนติ ฯ
ทุติยมฺปิ  โข  อสฺสทฺโธ  อปฺปสนฺโน  ตํ  สทฺธํ  ปสนฺนํ  เอตทโวจ อมฺหากํ
อุทฺโทสิโต ตํ ภาเชมาติ ฯ
     {๓๑.๑}   อถโข  โส สทฺโธ ปสนฺโน ตํ อสฺสทฺธํ อปฺปสนฺนํ เอตทโวจ
มายฺโย   เอวํ   อวจ   อมฺหากํ   ปิตุนา   ภิกฺขุนีสงฺฆสฺส   ทินฺโนติ  ฯ
ตติยมฺปิ   โข   โส  อสฺสทฺโธ  อปฺปสนฺโน  ตํ  สทฺธํ  ปสนฺนํ  เอตทโวจ
อมฺหากํ  อุทฺโทสิโต  ตํ  ภาเชมาติ  ฯ  อถโข  โส  สทฺโธ ปสนฺโน สเจ
@เชิงอรรถ: ^๑ ม. ยุ. ภาชามาติ ฯ
มยฺหํ    ภวิสฺสติ    อหํปิ    ภิกฺขุนีสงฺฆสฺส    ทสฺสามีติ    ตํ   อสฺสทฺธํ
อปฺปสนฺนํ   เอตทโวจ   ภาเชมาติ   ฯ   อถโข  โส  อุทฺโทสิโต  เตหิ
ภาชิยมาโน ตสฺส อสฺสทฺธสฺส อปฺปสนฺนสฺส ปาปุณิ ^๑- ฯ
     {๓๑.๒}   อถโข  โส  อสฺสทฺโธ  อปฺปสนฺโน ภิกฺขุนิโย อุปสงฺกมิตฺวา
เอตทโวจ  นิกฺขมถยฺเย  อมฺหากํ  อุทฺโทสิโตติ  ฯ  เอวํ วุตฺเต ถุลฺลนนฺทา
ภิกฺขุนี   ตํ   ปุริสํ   เอตทโวจ   มายฺโย  เอวํ  อวจ  ตุมฺหากํ  ปิตุนา
ภิกฺขุนีสงฺฆสฺส   ทินฺโนติ   ฯ  ทินฺโน  น  ทินฺโนติ  โวหาริเก  มหามตฺเต
ปุจฺฉึสุ   ฯ   มหามตฺตา  เอวมาหํสุ  โก  อยฺเย  ชานาติ  ภิกฺขุนีสงฺฆสฺส
ทินฺโนติ  ฯ  เอวํ  วุตฺเต  ถุลฺลนนฺทา  ภิกฺขุนี  เต  มหามตฺเต เอตทโวจ
อปินฺวยฺยา   ^๒-   ตุเมฺหหิ  ทิฏฺฐํ  วา  สุตํ  วา  สกฺขึ  ฐปยิตฺวา  ทานํ
ทียมานนฺติ   ฯ  อถโข  เต  มหามตฺตา  สจฺจํ  โข  อยฺยา  อาหาติ  ตํ
อุทฺโทสิตํ ภิกฺขุนีสงฺฆสฺส อกํสุ ฯ
     {๓๑.๓}   อถโข  โส  ปุริโส  ปราชิโต  อุชฺฌายติ  ขียติ วิปาเจติ
อสฺสมณิโย    อิมา    มุณฺฑา   พนฺธกินิโย   กถํ   หิ   นาม   อมฺหากํ
อุทฺโทสิตํ    อจฺฉินฺนาเปสฺสนฺตีติ   ฯ   ถุลฺลนนฺทา   ภิกฺขุนี   มหามตฺตานํ
เอตมตฺถํ  อาโรเจสิ  ฯ  มหามตฺตา  ตํ  ปุริสํ  ทณฺฑาเปสุํ  ฯ อถโข โส
ปุริโส    ทณฺฑิโต    ^๓-    ภิกฺขุนูปสฺสยสฺส    อวิทูเร    อาชีวกเสยฺยํ
การาเปตฺวา อาชีวเก อุยฺโยเชสิ เอตา ภิกฺขุนิโย อจฺจาวทถาติ ฯ
     {๓๑.๔}   ถุลฺลนนฺทา     ภิกฺขุนี     มหามตฺตานํ    เอตมตฺถํ
อาโรเจสิ    ฯ    มหามตฺตา   ตํ   ปุริสํ   พนฺธาเปสุํ   ฯ   มนุสฺสา
@เชิงอรรถ: ^๑ ม. ยุ. ปาปุณาติ ฯ  ^๒ ม. ยุ. อปินยฺโย ฯ  ^๓ ม. ยุ. ทณฺฑิโก ฯ
อุชฺฌายนฺติ  ขียนฺติ  วิปาเจนฺติ  ปฐมํ  ^๑-  หิ  นาม  ภิกฺขุนิโย  อุทฺโทสิตํ
อจฺฉินฺทาเปสุํ    ทุติยมฺปิ    ทณฺฑาเปสุํ    ตติยมฺปิ   พนฺธาเปสุํ   อิทานิ
ฆาตาเปสฺสนฺตีติ  ฯ  อสฺโสสุํ  โข  ภิกฺขุนิโย  เตสํ มนุสฺสานํ อุชฺฌายนฺตานํ
ขียนฺตานํ วิปาเจนฺตานํ ฯ
     {๓๑.๕}   ยา  ตา  ภิกฺขุนิโย อปฺปิจฺฉา ฯเปฯ ตา อุชฺฌายนฺติ ขียนฺติ
วิปาเจนฺติ  กถํ  หิ  นาม  อยฺยา  ถุลฺลนนฺทา  อุสุยฺยวาทิกา วิหริสฺสตีติ ฯ
อถโข   ตา  ภิกฺขุนิโย  ภิกฺขูนํ  เอตมตฺถํ  อาโรเจสุํ  ฯเปฯ  สจฺจํ  กิร
ภิกฺขเว  ถุลฺลนนฺทา  ภิกฺขุนี  อุสุยฺยวาทิกา  วิหรตีติ  ฯ  สจฺจํ  ภควาติ ฯ
วิครหิ   พุทฺโธ   ภควา   กถํ   หิ   นาม  ภิกฺขเว  ถุลฺลนนฺทา  ภิกฺขุนี
อุสุยฺยวาทิกา   วิหริสฺสติ   เนตํ   ภิกฺขเว   อปฺปสนฺนานํ  วา  ปสาทาย
ฯเปฯ เอวญฺจ ปน ภิกฺขเว ภิกฺขุนิโย อิมํ สิกฺขาปทํ อุทฺทิสนฺตุ
     {๓๑.๖}   ยา  ปน  ภิกฺขุนี  อุสุยฺยวาทิกา  วิหเรยฺย  คหปตินา วา
คหปติปุตฺเตน   วา   ทาเสน   วา   กมฺมกเรน   ^๒-   วา  อนฺตมโส
สมณปริพฺพาชเกนาปิ    อยํ    ภิกฺขุนี    ปฐมาปตฺติกํ   ธมฺมํ   อาปนฺนา
นิสฺสารณียํ สงฺฆาทิเสสนฺติ ฯ
     [๓๒]   ยา   ปนาติ  ยา  ยาทิสา  ฯเปฯ  ภิกฺขุนีติ  ฯเปฯ  อยํ
อิมสฺมึ  อตฺเถ  อธิปฺเปตา  ภิกฺขุนีติ  ฯ  อุสุยฺยวาทิกา  นาม  อฏฺฏการิกา
วุจฺจติ  ฯ  คหปติ  นาม  โย  โกจิ  อคารํ  อชฺฌาวสติ  ฯ  คหปติปุตฺโต
นาม  เย  เกจิ  ^๓-  ปุตฺตภาตโร  ฯ  ทาโส นาม อนฺโตชาโต ธนกฺกีโต
@เชิงอรรถ: ^๑ ยุ. กถํ ฯ ม. ปฐฺมํ ภิกฺขุนิโย ... ทุติยํ ... ตติยํ ... ฯ
@^๒ ม. ยุ. กมฺมกาเรน ฯ ^๓ ม. ยุ. โย โกจิ ฯ
กรมรานีโต  ฯ  กมฺมกโร  ^๑-  นาม  ภฏโก อาหฏโก ฯ สมณปริพฺพาชโก
นาม    ภิกฺขุญฺจ    ภิกฺขุนิญฺจ   สิกฺขมานญฺจ   สามเณรญฺจ   สามเณริญฺจ
ฐเปตฺวา   โย   โกจิ  ปริพฺพาชกสมาปนฺโน  ฯ  อฏฺฏํ  กริสฺสามีติ  ทุติยํ
วา  ปริเยสติ  คจฺฉติ  วา  อาปตฺติ  ทุกฺกฏสฺส เอกสฺส อาโรเจติ อาปตฺติ
ทุกฺกฏสฺส   ทุติยสฺส   อาโรเจติ   อาปตฺติ  ถุลฺลจฺจยสฺส  อฏฺฏปริโยสาเน
อาปตฺติ สงฺฆาทิเสสสฺส ฯ
     [๓๓]   ปฐมาปตฺติกนฺติ สห วตฺถุชฺฌาจารา อาปชฺชติ อสมนุภาสนาย ฯ
นิสฺสารณียนฺติ   สงฺฆมฺหา  นิสฺสาริยติ  ฯ  สงฺฆาทิเสโสติ  ^๒-  สงฺโฆ  ว
ตสฺสา   อาปตฺติยา   มานตฺตํ   เทติ   มูลาย   ปฏิกสฺสติ   อพฺเภติ  น
สมฺพหุลา  ภิกฺขุนิโย  ^๓-  น  เอกา  ภิกฺขุนี เตน วุจฺจติ สงฺฆาทิเสโสติ ฯ
ตสฺเสว    อาปตฺตินิกายสฺส    นาม   กมฺมํ   อธิวจนํ   เตนปิ   วุจฺจติ
สงฺฆาทิเสโสติ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๓ หน้าที่ ๑๙-๒๖. https://84000.org/tipitaka/read/pali_item.php?book=3&item=26&items=8 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=3&item=26&items=8&mode=bracket อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=3&item=26&items=8 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=3&item=26&items=8 ศึกษาอรรถกถานี้ได้ที่ :- https://84000.org/tipitaka/attha/attha.php?b=3&i=26 สารบัญพระไตรปิฎกเล่มที่ ๓ https://84000.org/tipitaka/read/?index_3 https://84000.org/tipitaka/english/?index_3