บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ฉบับภาษาไทย บาลีอักษรไทย บาลีอักษรโรมัน |
จตุตฺโถ กุณฺฑธานวคฺโค ปฐมํ กุณฺฑธานตฺเถราปทานํ (๓๑) [๓๓] |๓๓.๑| สตฺตาหํ ปฏิสลฺลีนํ สยมฺภุํ อคฺคปุคฺคลํ ปสนฺนจิตฺโต สุมโน พุทฺธเสฏฺฐํ อุปฏฺฐหึ ฯ |๓๓.๒| วุฏฺฐิตํ กาลมญฺญาย ปทุมุตฺตรํ มหามุนึ มหนฺตํ กทลิกณฺณึ คเหตฺวา อุปคญฺฉหํ ฯ |๓๓.๓| ปฏิคฺคเหสิ ๑- ภควา สพฺพญฺญู ๒- โลกนายโก มม จิตฺตํ ปสาเทนฺโต ปริภุญฺชิ มหามุนิ ฯ |๓๓.๔| ปริภุญฺชิตฺวาน สมฺพุทฺโธ สตฺถวาโห อนุตฺตโร สกาสเน นิสีทิตฺวา อิมา คาถา อภาสถ ฯ |๓๓.๕| เย จ สนฺติ สมีตาโร ๓- ยกฺขา อิมมฺหิ ปพฺพเต อรญฺเญ ภูตคณา สพฺเพ ๔- สุณนฺตุ วจนํ มม ฯ |๓๓.๖| โย โส พุทฺธํ อุปฏฺฐาสิ มิคราชํว เกสรึ ตมหํ กิตฺตยิสฺสามิ สุณาถ มม ภาสโต ฯ |๓๓.๗| เอกาทสญฺจ ขตฺตุํ โส เทวราชา ภวิสฺสติ จตุตฺตึสติขตฺตุญฺจ จกฺกวตฺติ ภวิสฺสติ ฯ |๓๓.๘| กปฺปสตสหสฺสมฺหิ โอกฺกากกุลสมฺภโว โคตโม นาม โคตฺเตน สตฺถา โลเก ภวิสฺสติ ฯ |๓๓.๙| อกฺโกสิตฺวาน สมเณ สีลวนฺเต อนาสเว ปาปกมฺมวิปาเกน นามเธยฺยํ ลภิสฺสติ ฯ |๓๓.๑๐| ตสฺส ธมฺเมสุ ทายาโท โอรโส ธมฺมนิมฺมิโต กุณฺฑธาโนติ นาเมน สาวโก โส ภวิสฺสติ ฯ |๓๓.๑๑| ปวิเวกํ อนุยุตฺโต ฌายี ฌานรโต อหํ โตสยิตฺวาน สตฺถารํ วิหรามิ อนาสโว ฯ |๓๓.๑๒| สาวเกหิ ๕- ปริวุโต ภิกฺขุสงฺฆปุรกฺขโต ภิกฺขุสงฺเฆ นิสีทิตฺวา สลากํ คาหยี ชิโน ฯ @เชิงอรรถ: ๑ ม. ยุ. ปฏิคฺคเหตฺวา ฯ ๒ ยุ. ตํ ผลํ ฯ ๓ ยุ. เย วสนฺติ สเมตาโร ฯ @๔ ม. ยุ. อรญฺเญ ภูตภพฺยานิ ฯ ๕ ยุ. สาวกคฺเคหิ ฯ |๓๓.๑๓| เอกํสํ จีวรํ กตฺวา วนฺทิตฺวา โลกนายกํ วทตํ วรสฺส ปุรโต ปฐมํ อคฺคเหสหํ ฯ |๓๓.๑๔| เตน กมฺเมน ภควา ทสสหสฺสีปกมฺปโก ภิกฺขุสงฺเฆ นิสีทิตฺวา อคฺคฏฺฐาเน ฐเปสิ มํ ฯ |๓๓.๑๕| วิริยํ เม ธุรโธรยฺหํ โยคกฺเขมาธิวาหนํ ธาเรมิ อนฺติมํ เทหํ สมฺมา สมฺพุทฺธสาสเน ฯ |๓๓.๑๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา กุณฺฑธาโน เถโร อิมา คาถาโย อภาสิตฺถาติ ฯ กุณฺฑธานตฺเถรสฺส อปทานํ สมตฺตํ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๑๑๖-๑๑๘. https://84000.org/tipitaka/read/pali_item.php?book=32&item=33&items=1 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=32&item=33&items=1&mode=bracket อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=32&item=33&items=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=33&items=1 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=33 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32
|
บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]