พระไตรปิฎกเล่มที่ ๓๕ ภาษาบาลี อักษรไทย
พระอภิธรรมปิฎกเล่มที่ ๒ อภิ. วิภงฺโค

     [๓๑]   ตตฺถ  กตมํ  วิญฺญาณํ  ทูเร  อกุสลํ วิญฺญาณํ กุสลาพฺยากเตหิ
วิญฺญาเณหิ   ทูเร   กุสลาพฺยากตา   วิญฺญาณา  อกุสลา  วิญฺญาณา  ทูเร
กุสลํ   วิญฺญาณํ   อกุสลาพฺยากเตหิ   วิญฺญาเณหิ   ทูเร  อกุสลาพฺยากตา
วิญฺญาณา     กุสลา     วิญฺญาณา     ทูเร     อพฺยากตํ     วิญฺญาณํ
กุสลากุสเลหิ   วิญฺญาเณหิ   ทูเร   กุสลากุสลา   วิญฺญาณา   อพฺยากตา
วิญฺญาณา   ทูเร   ทุกฺขาย   เวทนาย   สมฺปยุตฺตํ   วิญฺญาณํ  สุขาย  จ
อทุกฺขมสุขาย   จ   เวทนาหิ   สมฺปยุตฺเตหิ   วิญฺญาเณหิ   ทูเร  สุขาย
จ  อทุกฺขมสุขาย  จ  เวทนาหิ  สมฺปยุตฺตา  วิญฺญาณา  ทุกฺขาย  เวทนาย
สมฺปยุตฺตา   วิญฺญาณา   ทูเร   สุขาย   เวทนาย   สมฺปยุตฺตํ   วิญฺญาณํ
ทุกฺขาย   จ   อทุกฺขมสุขาย   จ   เวทนาหิ   สมฺปยุตฺเตหิ   วิญฺญาเณหิ
ทูเร   ทุกฺขาย   จ   อทุกฺขมสุขาย  จ  เวทนาหิ  สมฺปยุตฺตา  วิญฺญาณา
สุขาย   เวทนาย   สมฺปยุตฺตา  วิญฺญาณา  ทูเร  อทุกฺขมสุขาย  เวทนาย
สมฺปยุตฺตํ    วิญฺญาณํ   สุขทุกฺขาหิ   เวทนาหิ   สมฺปยุตฺเตหิ   วิญฺญาเณหิ
ทูเร    สุขทุกฺขาหิ    เวทนาหิ   สมฺปยุตฺตา   วิญฺญาณา   อทุกฺขมสุขาย
เวทนาย    สมฺปยุตฺตา    วิญฺญาณา    ทูเร    อสมาปนฺนสฺส   วิญฺญาณํ
สมาปนฺนสฺส    วิญฺญาณา   ทูเร   สมาปนฺนสฺส   วิญฺญาณํ   อสมาปนฺนสฺส
วิญฺญาณา   ทูเร   สาสวํ   วิญฺญาณํ  อนาสวา  วิญฺญาณา  ทูเร  อนาสวํ
วิญฺญาณํ สาสวา วิญฺญาณา ทูเร อิทํ วุจฺจติ วิญฺญาณํ ทูเร ฯ
     {๓๑.๑}   ตตฺถ  กตมํ  วิญฺญาณํ  สนฺติเก  อกุสลํ  วิญฺญาณํ อกุสลสฺส
วิญฺญาณสฺส   สนฺติเก   กุสลํ   วิญฺญาณํ   กุสลสฺส   วิญฺญาณสฺส   สนฺติเก
อพฺยากตํ    วิญฺญาณํ    อพฺยากตสฺส    วิญฺญาณสฺส    สนฺติเก   ทุกฺขาย
เวทนาย  สมฺปยุตฺตํ  วิญฺญาณํ  ทุกฺขาย  เวทนาย  สมฺปยุตฺตสฺส  วิญฺญาณสฺส
สนฺติเก    สุขาย   เวทนาย   สมฺปยุตฺตํ   วิญฺญาณํ   สุขาย   เวทนาย
สมฺปยุตฺตสฺส   วิญฺญาณสฺส   สนฺติเก   อทุกฺขมสุขาย   เวทนาย  สมฺปยุตฺตํ
วิญฺญาณํ     อทุกฺขมสุขาย     เวทนาย     สมฺปยุตฺตสฺส     วิญฺญาณสฺส
สนฺติเก   อสมาปนฺนสฺส   วิญฺญาณํ   อสมาปนฺนสฺส   วิญฺญาณสฺส   สนฺติเก
สมาปนฺนสฺส    วิญฺญาณํ    สมาปนฺนสฺส    วิญฺญาณสฺส   สนฺติเก   สาสวํ
วิญฺญาณํ     สาสวสฺส     วิญฺญาณสฺส    สนฺติเก    อนาสวํ    วิญฺญาณํ
อนาสวสฺส   วิญฺญาณสฺส   สนฺติเก   อิทํ   วุจฺจติ   วิญฺญาณํ  สนฺติเก  ฯ
ตํ   ตํ  วา  ปน  วิญฺญาณํ  อุปาทาย  อุปาทาย  วิญฺญาณํ  ทูเร  สนฺติเก
ทฏฺฐพฺพํ ฯ
                                 สุตฺตนฺตภาชนียํ ฯ
     [๓๒]   ปญฺจกฺขนฺธา   รูปกฺขนฺโธ   เวทนากฺขนฺโธ   สญฺญากฺขนฺโธ
สงฺขารกฺขนฺโธ วิญฺญาณกฺขนฺโธ ฯ
                              ตตฺถ กตโม รูปกฺขนฺโธ
     [๓๓]   เอกวิเธน รูปกฺขนฺโธ สพฺพํ รูปํ น เหตุ อเหตุกํ เหตุวิปฺปยุตฺตํ
สปฺปจฺจยํ  สงฺขตํ  รูปํ  โลกิยํ  สาสวํ  สญฺโญชนิยํ คนฺถนิยํ โอฆนิยํ โยคนิยํ
นีวรณิยํ    ปรามฏฺฐํ    อุปาทานิยํ   สงฺกิเลสิกํ   อพฺยากตํ   อนารมฺมณํ
อเจตสิกํ  จิตฺตวิปฺปยุตฺตํ  เนววิปาก  นวิปากธมฺมธมฺมํ  อสงฺกิลิฏฺฐสงฺกิเลสิกํ
นสวิตกฺกสวิจารํ     นอวิตกฺกวิจารมตฺตํ     อวิตกฺกอวิจารํ    นปีติสหคตํ
นสุขสหคตํ        นอุเปกฺขาสหคตํ       เนวทสฺสเนนนภาวนายปหาตพฺพํ
เนวทสฺสเนนนภาวนายปหาตพฺพเหตุกํ เนวาจยคามินาปจยคามิ
เนวเสกฺขนาเสกฺขํ    ปริตฺตํ    กามาวจรํ    นรูปาวจรํ    นอรูปาวจรํ
ปริยาปนฺนํ    โนอปริยาปนฺนํ    อนิยตํ    อนิยฺยานิกํ    อุปฺปนฺนํ    ฉหิ
วิญฺญาเณหิ วิญฺเญยฺยํ อนิจฺจํ ชราภิภูตํ เอวํ เอกวิเธน รูปกฺขนฺโธ ฯ
     [๓๔]   ทุวิเธน   รูปกฺขนฺโธ   อตฺถิ   รูปํ   อุปาทา  อตฺถิ  รูปํ
โน   อุปาทา   ฯ   อตฺถิ   รูปํ   อุปาทินฺนํ  อตฺถิ  รูปํ  อนุปาทินฺนํ  ฯ
อตฺถิ    รูปํ   อุปาทินฺนุปาทานิยํ   อตฺถิ   รูปํ   อนุปาทินฺนุปาทานิยํ   ฯ
อตฺถิ   รูปํ   สนิทสฺสนํ   อตฺถิ   รูปํ  อนิทสฺสนํ  ฯ  อตฺถิ  รูปํ  สปฺปฏิฆํ
อตฺถิ  รูปํ  อปฺปฏิฆํ  ฯ  อตฺถิ  รูปํ  อินฺทฺริยํ  อตฺถิ  รูปํ  น  อินฺทฺริยํ ฯ
อตฺถิ   รูปํ   มหาภูตํ   อตฺถิ  รูปํ  น  มหาภูตํ  ฯ  อตฺถิ  รูปํ  วิญฺญตฺติ
อตฺถิ   รูปํ   น   วิญฺญตฺติ   ฯ   อตฺถิ   รูปํ  จิตฺตสมุฏฺฐานํ  อตฺถิ  รูปํ
น  จิตฺตสมุฏฺฐานํ  ฯ  อตฺถิ  รูปํ  จิตฺตสหภู  อตฺถิ  รูปํ  น  จิตฺตสหภู  ฯ
อตฺถิ   รูปํ   จิตฺตานุปริวตฺติ   อตฺถิ   รูปํ  น  จิตฺตานุปริวตฺติ  ฯ  อตฺถิ
รูปํ   อชฺฌตฺติกํ   อตฺถิ   รูปํ   พาหิรํ   ฯ  อตฺถิ  รูปํ  โอฬาริกํ  อตฺถิ
รูปํ  สุขุมํ  ฯ  อตฺถิ  รูปํ  ทูเร  อตฺถิ  รูปํ  สนฺติเก  ฯเปฯ  อตฺถิ  รูปํ
กพฬิงฺกาโร   อาหาโร  อตฺถิ  รูปํ  น  กพฬิงฺกาโร  อาหาโร  ฯ  เอวํ
ทุวิเธน รูปกฺขนฺโธ ฯ
     [๓๕]   ติวิเธน   รูปกฺขนฺโธ   ยนฺตํ  รูปํ  อชฺฌตฺติกํ  ตํ  อุปาทา
ยนฺตํ   รูปํ   พาหิรํ  ตํ  อตฺถิ  อุปาทา  อตฺถิ  อนุปาทา  ฯ  ยนฺตํ  รูปํ
อชฺฌตฺติกํ   ตํ   อุปาทินฺนํ  ยนฺตํ  รูปํ  พาหิรํ  ตํ  อตฺถิ  อุปาทินฺนํ  อตฺถิ
อนุปาทินฺนํ   ฯ   ยนฺตํ  รูปํ  อชฺฌตฺติกํ  ตํ  อุปาทินฺนุปาทานิยํ  ยนฺตํ  รูปํ
พาหิรํ   ตํ   อตฺถิ   อุปาทินฺนุปาทานิยํ  อตฺถิ  อนุปาทินฺนุปาทานิยํ  ฯเปฯ
ยนฺตํ   รูปํ  อชฺฌตฺติกํ  ตํ  น  กพฬิงฺกาโร  อาหาโร  ยนฺตํ  รูปํ  พาหิรํ
ตํ  อตฺถิ  กพฬิงฺกาโร  อาหาโร  อตฺถิ  น  กพฬิงฺกาโร  อาหาโร  เอวํ
ติวิเธน รูปกฺขนฺโธ ฯ
     [๓๖]   จตุพฺพิเธน   รูปกฺขนฺโธ   ยนฺตํ   รูปํ  อุปาทา  ตํ  อตฺถิ
อุปาทินฺนํ   อตฺถิ   อนุปาทินฺนํ  ยนฺตํ  รูปํ  อนุปาทา  ตํ  อตฺถิ  อุปาทินฺนํ
อตฺถิ   อนุปาทินฺนํ   ฯ  ยนฺตํ  รูปํ  อุปาทา  ตํ  อตฺถิ  อุปาทินฺนุปาทานิยํ
อตฺถิ    อนุปาทินฺนุปาทานิยํ    ยนฺตํ    รูปํ    อนุปาทา    ตํ    อตฺถิ
อุปาทินฺนุปาทานิยํ   อตฺถิ   อนุปาทินฺนุปาทานิยํ   ฯ   ยนฺตํ  รูปํ  อุปาทา
ตํ   อตฺถิ   สปฺปฏิฆํ   อตฺถิ   อปฺปฏิฆํ   ยนฺตํ  รูปํ  อนุปาทา  ตํ  อตฺถิ
สปฺปฏิฆํ   อตฺถิ   อปฺปฏิฆํ   ฯ  ยนฺตํ  รูปํ  อุปาทา  ตํ  อตฺถิ  โอฬาริกํ
อตฺถิ   สุขุมํ  ยนฺตํ  รูปํ  อนุปาทา  ตํ  อตฺถิ  โอฬาริกํ  อตฺถิ  สุขุมํ  ฯ
ยนฺตํ  รูปํ  อุปาทา  ตํ  อตฺถิ  ทูเร  อตฺถิ  สนฺติเก  ยนฺตํ  รูปํ อนุปาทา
ตํ   อตฺถิ  ทูเร  อตฺถิ  สนฺติเก  ฯเปฯ  ทิฏฺฐํ  สุตํ  มุตํ  วิญฺญาตํ  เอวํ
จตุพฺพิเธน รูปกฺขนฺโธ ฯ
     [๓๗]   ปญฺจวิเธน   รูปกฺขนฺโธ  ปฐวีธาตุ  อาโปธาตุ  เตโชธาตุ
วาโยธาตุ ยญฺจ รูปํ อุปาทา เอวํ ปญฺจวิเธน รูปกฺขนฺโธ ฯ
     [๓๘]   ฉพฺพิเธน   รูปกฺขนฺโธ   จกฺขุวิญฺเญยฺยํ  รูปํ  โสตวิญฺเญยฺยํ
รูปํ     ฆานวิญฺเญยฺยํ    รูปํ    ชิวฺหาวิญฺเญยฺยํ    รูปํ    กายวิญฺเญยฺยํ
รูปํ มโนวิญฺเญยฺยํ รูปํ เอวํ ฉพฺพิเธน รูปกฺขนฺโธ ฯ
     [๓๙]   สตฺตวิเธน  รูปกฺขนฺโธ  จกฺขุวิญฺเญยฺยํ  รูปํ ฯเปฯ มโนธาตุ-
วิญฺเญยฺยํ    รูปํ    มโนวิญฺญาณธาตุวิญฺเญยฺยํ   รูปํ   เอวํ   สตฺตวิเธน
รูปกฺขนฺโธ ฯ
     [๔๐]   อฏฺฐวิเธน  รูปกฺขนฺโธ จกฺขุวิญฺเญยฺยํ รูปํ ฯเปฯ กายวิญฺเญยฺยํ
รูปํ   อตฺถิ   สุขสมฺผสฺสํ   อตฺถิ   ทุกฺขสมฺผสฺสํ   มโนธาตุวิญฺเญยฺยํ   รูปํ
มโนวิญฺญาณธาตุวิญฺเญยฺยํ รูปํ เอวํ อฏฺฐวิเธน รูปกฺขนฺโธ ฯ
     [๔๑]   นววิเธน   รูปกฺขนฺโธ  จกฺขุนฺทฺริยํ  โสตินฺทฺริยํ  ฆานินฺทฺริยํ
ชิวฺหินฺทฺริยํ  กายินฺทฺริยํ  อิตฺถินฺทฺริยํ ปุริสินฺทฺริยํ ชีวิตินฺทฺริยํ ยญฺจ
รูปํ น อินฺทฺริยํ เอวํ นววิเธน รูปกฺขนฺโธ ฯ
     [๔๒]   ทสวิเธน   รูปกฺขนฺโธ  จกฺขุนฺทฺริยํ  ฯเปฯ  ชีวิตินฺทฺริยํ  น
อินฺทฺริยํ    รูปํ    อตฺถิ   สปฺปฏิฆํ   อตฺถิ   อปฺปฏิฆํ   เอวํ   ทสวิเธน
รูปกฺขนฺโธ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๑๕-๒๐.
https://84000.org/tipitaka/read/pali_item.php?book=35&item=31&items=12
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=35&item=31&items=12&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=35&item=31&items=12
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=35&item=31&items=12
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=35&i=31
             สารบัญพระไตรปิฎกเล่มที่ ๓๕
https://84000.org/tipitaka/read/?index_35
https://84000.org/tipitaka/english/?index_35