พระไตรปิฎกเล่มที่ ๓๕ ภาษาบาลี อักษรไทย
พระอภิธรรมปิฎกเล่มที่ ๒ อภิ. วิภงฺโค

     [๗๖๑]   ตตฺถ  กตมา  เมตฺตา  อิธ  ภิกฺขุ  ยสฺมึ  สมเย รูปาวจรํ
ฌานํ   ภาเวติ   กิริยํ   เนว   กุสลํ   นากุสลํ   น   จ   กมฺมวิปากํ
ทิฏฺฐธมฺมสุขวิหารํ   วิวิจฺเจว   กาเมหิ   ฯเปฯ  ปฐมํ  ฌานํ  อุปสมฺปชฺช
วิหรติ  เมตฺตาสหคตํ  ยา  ตสฺมึ  สมเย  เมตฺติ เมตฺตายนา เมตฺตายิตตฺตํ
เมตฺตา   เจโตวิมุตฺติ  อยํ  วุจฺจติ  เมตฺตา  อวเสสา  ธมฺมา  เมตฺตาย
สมฺปยุตฺตา   ฯ   ตตฺถ   กตมา   เมตฺตา   อิธ   ภิกฺขุ   ยสฺมึ  สมเย
รูปาวจรํ  ฌานํ  ภาเวติ  กิริยํ  เนว  กุสลํ  นากุสลํ  น  จ  กมฺมวิปากํ
ทิฏฺฐธมฺมสุขวิหารํ   วิตกฺกวิจารานํ   วูปสมา  ฯเปฯ  ทุติยํ  ฌานํ  ฯเปฯ
ตติยํ  ฌานํ  ฯเปฯ  ปฐมํ  ฌานํ  ฯเปฯ  จตุตฺถํ  ฌานํ  อุปสมฺปชฺช วิหรติ
เมตฺตาสหคตํ   ยา   ตสฺมึ   สมเย   เมตฺติ  เมตฺตายนา  เมตฺตายิตตฺตํ
เมตฺตา   เจโตวิมุตฺติ  อยํ  วุจฺจติ  เมตฺตา  อวเสสา  ธมฺมา  เมตฺตาย
สมฺปยุตฺตา  ฯ  ตตฺถ  กตมา  กรุณา  ฯเปฯ  ตตฺถ  กตมา  มุทิตา ฯเปฯ
ตตฺถ  กตมา  อุเปกฺขา  อิธ  ภิกฺขุ  ยสฺมึ  สมเย  รูปาวจรํ ฌานํ ภาเวติ
กิริยํ  เนว  กุสลํ  นากุสลํ  น  จ  กมฺมวิปากํ  ทิฏฺฐธมฺมสุขวิหารํ  สุขสฺส
จ   ปหานา   ฯเปฯ   จตุตฺถํ  ฌานํ  อุปสมฺปชฺช  วิหรติ  อุเปกฺขาสหคตํ
ยา   ตสฺมึ   สมเย   อุเปกฺขา  อุเปกฺขายนา  อุเปกฺขายิตตฺตํ  อุเปกฺขา
เจโตวิมุตฺติ   อยํ   วุจฺจติ   อุเปกฺขา   อวเสสา   ธมฺมา   อุเปกฺขาย
สมฺปยุตฺตา ฯ
                                  อภิธมฺมภาชนียํ ฯ
     [๗๖๒]   จตสฺโส   อปฺปมญฺญาโย  ฯ  อิธ  ภิกฺขุ  เมตฺตาสหคเตน
เจตสา   เอกํ   ทิสํ   ผริตฺวา  วิหรติ  ตถา  ทุติยํ  ตถา  ตติยํ  ตถา
จตุตฺถํ   อิติ   อุทฺธมโธ   ติริยํ   สพฺพธิ  สพฺพตฺตตาย  สพฺพาวนฺตํ  โลกํ
เมตฺตาสหคเตน   เจตสา   วิปุเลน   มหคฺคเตน  อปฺปมาเณน  อเวเรน
อพฺยาปชฺเฌน   ผริตฺวา   วิหรติ  ฯ  กรุณาสหคเตน  เจตสา  เอกํ  ทิสํ
ผริตฺวา   วิหรติ  ตถา  ทุติยํ  ตถา  ตติยํ  ตถา  จตุตฺถํ  อิติ  อุทฺธมโธ
ติริยํ   สพฺพธิ   สพฺพตฺตตาย   สพฺพาวนฺตํ  โลกํ  กรุณาสหคเตน  เจตสา
วิปุเลน   มหคฺคเตน   อปฺปมาเณน   อเวเรน   อพฺยาปชฺเฌน   ผริตฺวา
วิหรติ   ฯ   มุทิตาสหคเตน  เจตสา  เอกํ  ทิสํ  ผริตฺวา  วิหรติ  ตถา
ทุติยํ   ตถา   ตติยํ   ตถา   จตุตฺถํ   อิติ   อุทฺธมโธ   ติริยํ   สพฺพธิ
สพฺพตฺตตาย    สพฺพาวนฺตํ    โลกํ   มุทิตาสหคเตน   เจตสา   วิปุเลน
มหคฺคเตน   อปฺปมาเณน   อเวเรน   อพฺยาปชฺเฌน  ผริตฺวา  วิหรติ  ฯ
อุเปกฺขาสหคเตน   เจตสา   เอกํ   ทิสํ   ผริตฺวา  วิหรติ  ตถา  ทุติยํ
ตถา   ตติยํ   ตถา   จตุตฺถํ  อิติ  อุทฺธมโธ  ติริยํ  สพฺพธิ  สพฺพตฺตตาย
สพฺพาวนฺตํ    โลกํ   อุเปกฺขาสหคเตน   เจตสา   วิปุเลน   มหคฺคเตน
อปฺปมาเณน   อเวเรน   อพฺยาปชฺเฌน   ผริตฺวา   วิหรติ   ฯ   จตุนฺนํ
อปฺปมญฺญานํ   กติ   กุสลา   กติ   อกุสลา   กติ   อพฺยากตา   ฯเปฯ
กติ สรณา กติ อรณา ฯ
     [๗๖๓]   สิยา  กุสลา  สิยา  อพฺยากตา  ฯ  ติสฺโส  อปฺปมญฺญาโย
สุขาย    เวทนาย    สมฺปยุตฺตา   อุเปกฺขา   อทุกฺขมสุขาย   เวทนาย
สมฺปยุตฺตา    ฯ    สิยา    วิปากา    สิยา   วิปากธมฺมธมฺมา   สิยา
เนววิปากนวิปากธมฺมธมฺมา      สิยา      อุปาทินฺนุปาทานิยา     สิยา
อนุปาทินฺนุปาทานิยา   อสงฺกิลิฏฺฐสงฺกิเลสิกา   ฯ   ติสฺโส   อปฺปมญฺญาโย
สิยา   สวิตกฺกสวิจารา  สิยา  อวิตกฺกวิจารมตฺตา  สิยา  อวิตกฺกอวิจารา
อุเปกฺขา   อวิตกฺกอวิจารา   ฯ  ติสฺโส  อปฺปมญฺญาโย  สิยา  ปีติสหคตา
สิยา   สุขสหคตา  น  อุเปกฺขาสหคตา  สิยา  น  วตฺตพฺพา  ปีติสหคตาติ
อุเปกฺขา     อุเปกฺขาสหคตา     ฯ    เนวทสฺสเนนนภาวนายปหาตพฺพา
เนวทสฺสเนนนภาวนายปหาตพฺพเหตุกา     สิยา    อาจยคามิโน    สิยา
เนวอาจยคามิโนนอปจยคามิโน    เนวเสกฺขานาเสกฺขา    มหคฺคตา   น
วตฺตพฺพา    ปริตฺตารมฺมณาติปิ   มหคฺคตารมฺมณาติปิ   อปฺปมาณารมฺมณาติปิ
มชฺฌิมา       อนิยตา       น       วตฺตพฺพา      มคฺคารมฺมณาติปิ
มคฺคเหตุกาติปิ   มคฺคาธิปติโนติปิ   สิยา   อุปฺปนฺนา   สิยา   อนุปฺปนฺนา
สิยา   อุปฺปาทิโน  สิยา  อตีตา  สิยา  อนาคตา  สิยา  ปจฺจุปฺปนฺนา  น
วตฺตพฺพา    อตีตารมฺมณาติปิ   อนาคตารมฺมณาติปิ   ปจฺจุปฺปนฺนารมฺมณาติปิ
สิยา   อชฺฌตฺตา   สิยา   พหิทฺธา  สิยา  อชฺฌตฺตพหิทฺธา  พหิทฺธารมฺมณา
อนิทสฺสนอปฺปฏิฆา ฯ
     [๗๖๔]   เมตฺตา  เหตุ  ติสฺโส  อปฺปมญฺญาโย  น เหตู ฯ สเหตุกา
เหตุสมฺปยุตฺตา  ฯ  เมตฺตา  เหตุ  เจว  สเหตุกา จ ติสฺโส อปฺปมญฺญาโย
น  วตฺตพฺพา  เหตู  เจว  สเหตุกา  จาติ  สเหตุกา  เจว น จ เหตู ฯ
เมตฺตา   เหตุ   เจว   เหตุสมฺปยุตฺตา   จ   ติสฺโส  อปฺปมญฺญาโย  น
วตฺตพฺพา    เหตู    เจว    เหตุสมฺปยุตฺตา    จาติ    เหตุสมฺปยุตฺตา
เจว  น  จ  เหตู  ฯ  ติสฺโส  อปฺปมญฺญาโย  น  เหตู สเหตุกา เมตฺตา
น วตฺตพฺพา น เหตุ สเหตุกาติปิ น เหตุ อเหตุกาติปิ ฯ
     [๗๖๕]   สปฺปจฺจยา   สงฺขตา   อนิทสฺสนา   อปฺปฏิฆา   อรูปา
โลกิยา   เกนจิ   วิญฺเญยฺยา   เกนจิ  น  วิญฺเญยฺยา  ฯ  โน  อาสวา
สาสวา    อาสววิปฺปยุตฺตา   น   วตฺตพฺพา   อาสวา   เจว   สาสวา
จาติ   สาสวา   เจว   โน  จ  อาสวา  น  วตฺตพฺพา  อาสวา  เจว
อาสวสมฺปยุตฺตา   จาติปิ   อาสวสมฺปยุตฺตา   เจว   โน  จ  อาสวาติปิ
อาสววิปฺปยุตฺตสาสวา   ฯ   โน  สญฺโญชนา  ฯเปฯ  โน  คนฺถา  ฯเปฯ
โน   โอฆา   ฯเปฯ   โน   โยคา  ฯเปฯ  โน  นีวรณา  ฯเปฯ  โน
ปรามาสา   ฯเปฯ   สารมฺมณา   โน  จิตฺตา  เจตสิกา  จิตฺตสมฺปยุตฺตา
จิตฺตสํสฏฺฐา      จิตฺตสมุฏฺฐานา      จิตฺตสหภุโน     จิตฺตานุปริวตฺติโน
จิตฺตสํสฏฺฐสมุฏฺฐานา        จิตฺตสํสฏฺฐสมุฏฺฐานสหภุโน       จิตฺตสํสฏฺฐ-
สมุฏฺฐานานุปริวตฺติโน     พาหิรา     นุปาทา     สิยา    อุปาทินฺนา
สิยา อนุปาทินฺนา ฯ นุปาทานา ฯเปฯ โน กิเลสา ฯเปฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๕ หน้าที่ ๓๘๓-๓๘๗.
https://84000.org/tipitaka/read/pali_item.php?book=35&item=761&items=5
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=35&item=761&items=5&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=35&item=761&items=5
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=35&item=761&items=5
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=35&i=761
             สารบัญพระไตรปิฎกเล่มที่ ๓๕
https://84000.org/tipitaka/read/?index_35
https://84000.org/tipitaka/english/?index_35