พระไตรปิฎกเล่มที่ ๓๖ ภาษาบาลี อักษรไทย
พระอภิธรรมปิฎกเล่มที่ ๓ อภิ. ธาตุกถา เจว ปุคฺคลปญฺญตฺติ จ

                                อภิธมฺมปิฏเก ปุคฺคลปญฺญตฺติ
                                            ------
                    นโม ตสฺส ภควโต อรหโต สมฺมาสมฺพุทฺธสฺส ฯ
                                        อุทฺเทสวาโร
     [๑]   ฉ   ปญฺญตฺติโย   ขนฺธปญฺญตฺติ   อายตนปญฺญตฺติ  ธาตุปญฺญตฺติ
สจฺจปญฺญตฺติ อินฺทฺริยปญฺญตฺติ ปุคฺคลปญฺญตฺตีติ ฯ
                                         ขนฺธปญฺญตฺติ
     [๒]   กิตฺตาวตา   ขนฺธานํ   ขนฺธปญฺญตฺติ   ยาวตา   ปญฺจกฺขนฺธา
รูปกฺขนฺโธ       เวทนากฺขนฺโธ      สญฺญากฺขนฺโธ      สงฺขารกฺขนฺโธ
วิญฺญาณกฺขนฺโธ เอตฺตาวตา ขนฺธานํ ขนฺธปญฺญตฺติ ฯ
                                       อายตนปญฺญตฺติ
     [๓]   กิตฺตาวตา  อายตนานํ  อายตนปญฺญตฺติ ยาวตา ทฺวาทสายตนานิ
จกฺขฺวายตนํ     รูปายตนํ     โสตายตนํ     สทฺทายตนํ     ฆานายตนํ
คนฺธายตนํ   ชิวฺหายตนํ   รสายตนํ  กายายตนํ  โผฏฺฐพฺพายตนํ  มนายตนํ
ธมฺมายตนํ เอตฺตาวตา อายตนานํ อายตนปญฺญตฺติ ฯ
                                           ธาตุปญฺญตฺติ
     [๔]   กิตฺตาวตา    ธาตูนํ    ธาตุปญฺญตฺติ   ยาวตา   อฏฺฐารส
ธาตุโย    จกฺขุธาตุ   รูปธาตุ   จกฺขุวิญฺญาณธาตุ   โสตธาตุ   สทฺทธาตุ
โสตวิญฺญาณธาตุ    ฆานธาตุ    คนฺธธาตุ   ฆานวิญฺญาณธาตุ   ชิวฺหาธาตุ
รสธาตุ   ชิวฺหาวิญฺญาณธาตุ   กายธาตุ   โผฏฺฐพฺพธาตุ   กายวิญฺญาณธาตุ
มโนธาตุ     ธมฺมธาตุ     มโนวิญฺญาณธาตุ     เอตฺตาวตา     ธาตูนํ
ธาตุปญฺญตฺติ ฯ
                                          สจฺจปญฺญตฺติ
     [๕]   กิตฺตาวตา    สจฺจานํ    สจฺจปญฺญตฺติ   ยาวตา   จตฺตาริ
สจฺจานิ    ทุกฺขสจฺจํ   สมุทยสจฺจํ   นิโรธสจฺจํ   มคฺคสจฺจํ   เอตฺตาวตา
สจฺจานํ สจฺจปญฺญตฺติ ฯ
                                        อินฺทฺริยปญฺญตฺติ
     [๖]   กิตฺตาวตา     อินฺทฺริยานํ     อินฺทฺริยปญฺญตฺติ    ยาวตา
พาวีสตินฺทฺริยานิ   จกฺขุนฺทฺริยํ   โสตินฺทฺริยํ   ฆานินฺทฺริยํ  ชิวฺหินฺทฺริยํ
กายินฺทฺริยํ    มนินฺทฺริยํ    อิตฺถินฺทฺริยํ   ปุริสินฺทฺริยํ   ชีวิตินฺทฺริยํ
สุขินฺทฺริยํ  ทุกฺขินฺทฺริยํ โสมนสฺสินฺทฺริยํ โทมนสฺสินฺทฺริยํ อุเปกฺขินฺทฺริยํ
สทฺธินฺทฺริยํ    วิริยินฺทฺริยํ    สตินฺทฺริยํ    สมาธินฺทฺริยํ   ปญฺญินฺทฺริยํ
อนญฺญาตญฺญสฺสามีตินฺทฺริยํ     อญฺญินฺทฺริยํ    อญฺญาตาวินฺทฺริยํ    เอตฺตาวตา
อินฺทฺริยานํ อินฺทฺริยปญฺญตฺติ ฯ
                                         ปุคฺคลปญฺญตฺติ
                                             -------
                            กิตฺตาวตา ปุคฺคลานํ ปุคฺคลปญฺญตฺติ
                                        เอกกมาติกา
     [๗]   สมยวิมุตฺโต    อสมยวิมุตฺโต    กุปฺปธมฺโม    อกุปฺปธมฺโม
ปริหานธมฺโม   อปริหานธมฺโม   เจตนาภพฺโพ  อนุรกฺขนาภพฺโพ  ปุถุชฺชโน
โคตฺรภู    ภยูปรโต   อภยูปรโต   ภพฺพาคมโน   อภพฺพาคมโน   นิยโต
อนิยโต   ปฏิปนฺนโก   ผเลฏฺฐิโต   สมสีสี   ฐิตกปฺปี   อริโย   อนริโย
เสโข   อเสโข  เนวเสโขนาเสโข  เตวิชฺโช  ฉฬภิญฺโญ  สมฺมาสมฺพุทฺโธ
ปจฺเจกสมฺพุทฺโธ      อุภโตภาควิมุตฺโต      ปญฺญาวิมุตฺโต     กายสกฺขี
ทิฏฺฐิปฺปตฺโต   สทฺธาวิมุตฺโต   ธมฺมานุสารี   สทฺธานุสารี  สตฺตกฺขตฺตุํปรโม
โกลํโกโล     เอกพีชี     สกทาคามี    อนาคามี    อนฺตราปรินิพฺพายี
อุปหจฺจปรินิพฺพายี    อสงฺขารปรินิพฺพายี   สสงฺขารปรินิพฺพายี   อุทฺธํโสโต
อกนิฏฺฐคามี      โสตาปนฺโน     โสตาปตฺติผลสจฺฉิกิริยาย     ปฏิปนฺโน
สกทาคามี   สกทาคามิผลสจฺฉิกิริยาย   ปฏิปนฺโน  อนาคามี  อนาคามิผล-
สจฺฉิกิริยาย ปฏิปนฺโน อรหา อรหตฺตผลสจฺฉิกิริยาย ปฏิปนฺโน ฯ
                                     เอกกมาติกา นิฏฺฐิตา ฯ
                                          ทุกมาติกา
     [๘]   เทฺว   ปุคฺคลา  ฯ  โกธโน  จ  อุปนาหี  จ  ฯ  มกฺขี  จ
ปลาสี  จ  ฯ  อิสฺสุกี  จ  มจฺฉรี  จ  ฯ สโฐ จ มายาวี จ ฯ อหิริโก จ
อโนตฺตปฺปี  จ  ฯ  ทุพฺพโจ  จ  ปาปมิตฺโต  จ ฯ อินฺทฺริเยสุ อคุตฺตทฺวาโร
จ   โภชเน   อมตฺตญฺญู   จ   ฯ   มุฏฺฐสฺสติ   จ  อสมฺปชาโน  จ  ฯ
สีลวิปนฺโน  จ  ทิฏฺฐิวิปนฺโน  จ  ฯ  อชฺฌตฺตสญฺโญชโน จ พหิทฺธาสญฺโญชโน
จ   ฯ   อกฺโกธโน   จ  อนุปนาหี  จ  ฯ  อมกฺขี  จ  อปลาสี  จ  ฯ
อนิสฺสุกี   จ   อมจฺฉรี  จ  ฯ  อสโฐ  จ  อมายาวี  จ  ฯ  หิริมา  จ
โอตฺตปฺปี  จ  ฯ  สุวโจ  จ  กลฺยาณมิตฺโต จ ฯ อินฺทฺริเยสุ คุตฺตทฺวาโร จ
โภชเน  มตฺตญฺญู  จ  ฯ  อุปฏฺฐิตสฺสติ  จ  สมฺปชาโน จ ฯ สีลสมฺปนฺโน จ
ทิฏฺฐิสมฺปนฺโน  จ  ฯ  เทฺว  ปุคฺคลา  ทุลฺลภา  โลกสฺมึ  ฯ  เทฺว ปุคฺคลา
ทุตฺตปฺปยา   ฯ  เทฺว  ปุคฺคลา  สุตปฺปยา  ฯ  ทฺวินฺนํ  ปุคฺคลานํ  อาสวา
วฑฺฒนฺติ  ฯ  ทฺวินฺนํ  ปุคฺคลานํ  อาสวา  น  วฑฺฒนฺติ  ฯ  หีนาธิมุตฺโต  จ
ปณีตาธิมุตฺโต จ ฯ ติตฺโต จ ตปฺเปตา จ ฯ
                                      ทุกมาติกา นิฏฺฐิตา ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๖ หน้าที่ ๑๒๙-๑๓๒.
https://84000.org/tipitaka/read/pali_item.php?book=36.2&item=1&items=8
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=36.2&item=1&items=8&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=36.2&item=1&items=8
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=36.2&item=1&items=8
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=36.2&i=1
             สารบัญพระไตรปิฎกเล่มที่ ๓๖
https://84000.org/tipitaka/read/?index_36
https://84000.org/tipitaka/english/?index_36