พระไตรปิฎกเล่มที่ ๔๒ ภาษาบาลี อักษรไทย
พระอภิธรรมปิฎกเล่มที่ ๙ อภิ. ป.(๓) อนุโลมทุกปฏฺฐานํ ปุริมํ

                            นีวรณนีวรณิยทุกํ
                                 ปฏิจฺจวาโร
     [๖๔๑]   นีวรณญฺเจวนีวรณิยญฺจ  ธมฺมํ  ปฏิจฺจ  นีวรโณเจวนีวรณิโยจ
ธมฺโม      อุปฺปชฺชติ     เหตุปจฺจยา:     กามจฺฉนฺทนีวรณํ     ปฏิจฺจ
ถีนมิทฺธนีวรณํ   อุทฺธจฺจนีวรณํ   อวิชฺชานีวรณํ   ฯ   เอวํ  สพฺเพ  คณนา
วิภชิตพฺพา ฯ นีวรณทุกสทิสา นินฺนานากรณา ฯ
                               ปญฺหาวาโร
     [๖๔๒]   นีวรโณเจวนีวรณิโยจ      ธมฺโม     นีวรณสฺสเจว
นีวรณิยสฺสจ   ธมฺมสฺส   เหตุปจฺจเยน   ปจฺจโย:   นีวรณาเจวนีวรณิยาจ
เหตู  สมฺปยุตฺตกานํ นีวรณานํ เหตุปจฺจเยน ปจฺจโย ฯ นีวรโณเจวนีวรณิโยจ
ธมฺโม นีวรณิยสฺสเจวโนจนีวรณสฺส ธมฺมสฺส
เหตุปจฺจเยน    ปจฺจโย:   นีวรณาเจวนีวรณิยาจ   เหตู   สมฺปยุตฺตกานํ
ขนฺธานํ  จิตฺตสมุฏฺฐานานญฺจ  รูปานํ  เหตุปจฺจเยน ปจฺจโย ฯ นีวรโณเจว-
นีวรณิโยจ   ธมฺโม  นีวรณสฺสเจวนีวรณิยสฺสจ  นีวรณิยสฺสเจวโนจนีวรณสฺส
จ     ธมฺมสฺส     เหตุปจฺจเยน     ปจฺจโย:    นีวรณาเจวนีวรณิยาจ
เหตู     สมฺปยุตฺตกานํ    ขนฺธานํ    นีวรณานญฺจ    จิตฺตสมุฏฺฐานานญฺจ
รูปานํ     เหตุปจฺจเยน     ปจฺจโย     ฯ    นีวรณิโยเจวโนจนีวรโณ
ธมฺโม      นีวรณิยสฺสเจวโนจนีวรณสฺส      ธมฺมสฺส      เหตุปจฺจเยน
ปจฺจโย:    นีวรณิยาเจวโนจนีวรณา    เหตู    สมฺปยุตฺตกานํ   ขนฺธานํ
จิตฺตสมุฏฺฐานานญฺจ รูปานํ เหตุปจฺจเยน ปจฺจโย ปฏิสนฺธิ ฯ
     [๖๔๓]   นีวรโณเจวนีวรณิโยจ   ธมฺโม   นีวรณสฺสเจวนีวรณิยสฺสจ
ธมฺมสฺส      อารมฺมณปจฺจเยน      ปจฺจโย:     นีวรเณ     อารพฺภ
นีวรณา    อุปฺปชฺชนฺติ    ฯ    มูลํ    ปุจฺฉิตพฺพํ    นีวรเณ    อารพฺภ
นีวรณิยาเจวโนจนีวรณา   ขนฺธา  อุปฺปชฺชนฺติ  ฯ  มูลํ  ปุจฺฉิตพฺพํ  นีวรเณ
อารพฺภ  นีวรณา  จ  สมฺปยุตฺตา  จ  ขนฺธา  อุปฺปชฺชนฺติ ฯ นีวรณิโยเจว-
โนจนีวรโณ      ธมฺโม      นีวรณิยสฺสเจวโนจนีวรณสฺส      ธมฺมสฺส
อารมฺมณปจฺจเยน  ปจฺจโย:  ทานํ  ...  สีลํ  ...  อุโปสถกมฺมํ  กตฺวา
ตํ   ปจฺจเวกฺขติ   อสฺสาเทติ   อภินนฺทติ   ตํ   อารพฺภ   ราโค  ทิฏฺฐิ
วิจิกิจฺฉา    อุทฺธจฺจํ   โทมนสฺสํ   อุปฺปชฺชติ   ปุพฺเพ   สุจิณฺณานิ   ...
ฌานา   ...   อริยา   โคตฺรภุํ   ปจฺจเวกฺขนฺติ  โวทานํ  ...  ปหีเน
กิเลเส  ...  วิกฺขมฺภิเต กิเลเส ... ปุพฺเพ สมุทาจิณฺเณ ... จกฺขุํ ...
วตฺถุํ   ...   นีวรณิเยเจวโนจนีวรเณ  ขนฺเธ  อนิจฺจโต  ...  วิปสฺสติ
อสฺสาเทติ   อภินนฺทติ   ฯเปฯ  โทมนสฺสํ  ...  ทิพฺเพน  จกฺขุนา  ...
ยาว อาวชฺชนา ตาว กาตพฺพา ฯ
     {๖๔๓.๑}   นีวรณิโยเจวโนจนีวรโณ  ธมฺโม นีวรณสฺสเจวนีวรณิยสฺสจ
ธมฺมสฺส  อารมฺมณปจฺจเยน  ปจฺจโย: ทานํ ... สีลํ ... อุโปสถกมฺมํ ...
ปุพฺเพ สุจิณฺณานิ ... ฌานา ... จกฺขุํ ... วตฺถุํ ... นีวรณิเยเจวโนจนีวรเณ
ขนฺเธ  อสฺสาเทติ  อภินนฺทติ  ตํ  อารพฺภ  ราโค  ทิฏฺฐิ วิจิกิจฺฉา อุทฺธจฺจํ
โทมนสฺสํ   อุปฺปชฺชติ  ฯ  นีวรณิโยเจวโนจนีวรโณ  ธมฺโม  นีวรณสฺสเจว-
นีวรณิยสฺสจ   นีวรณิยสฺสเจวโนจนีวรณสฺส  จ  ธมฺมสฺส  อารมฺมณปจฺจเยน
ปจฺจโย: ทานํ ... สีลํ ... อุโปสถกมฺมํ ... ปุพฺเพ สุจิณฺณานิ ... ฌานา
...  จกฺขุํ  ...  วตฺถุํ  ...  นีวรณิเยเจวโนจนีวรเณ ขนฺเธ อสฺสาเทติ
อภินนฺทติ  ตํ  อารพฺภ  นีวรณา  จ  สมฺปยุตฺตกาจ  ขนฺธา  อุปฺปชฺชนฺติ  ฯ
เอวํ  อิตเรปิ  ตีณิ  กาตพฺพา  ฯ  อารมฺมณสทิสา  อธิปติ  ฯ ปุเรชาตมฺปิ
อารมฺมณสทิสํ   ฯ   อุปนิสฺสเยปิ  โลกุตฺตรํ  น  กาตพฺพํ  ฯ  สงฺขิตฺตํ  ฯ
เอวํ วิตฺถาเรตพฺพํ ฯ ยถา นีวรณทุกํ เอวํ ปจฺจเวกฺขิตฺวา กาตพฺพํ ฯ
                     นีวรณนีวรณิยทุกํ นิฏฺฐิตํ ฯ
                                ----------
                     นีวรณนีวรณสมฺปยุตฺตทุกํ
                               ปฏิจฺจวาโร
     [๖๔๔]   นีวรณญฺเจวนีวรณสมฺปยุตฺตญฺจ      ธมฺมํ      ปฏิจฺจ
นีวรโณเจวนีวรณสมฺปยุตฺโตจ      ธมฺโม     อุปฺปชฺชติ     เหตุปจฺจยา:
กามจฺฉนฺทนีวรณํ    ปฏิจฺจ   ถีนมิทฺธนีวรณํ   อุทฺธจฺจนีวรณํ   อวิชฺชานีวรณํ
จกฺกํ   สพฺเพปิ   นีวรณา   กาตพฺพา   ฯ   นีวรณญฺเจวนีวรณสมฺปยุตฺตญฺจ
ธมฺมํ        ปฏิจฺจ       นีวรณสมฺปยุตฺโตเจวโนจนีวรโณ       ธมฺโม
อุปฺปชฺชติ   เหตุปจฺจยา:   นีวรเณ   ปฏิจฺจ   สมฺปยุตฺตกา   ขนฺธา   ฯ
นีวรณญฺเจวนีวรณสมฺปยุตฺตญฺจ   ธมฺมํ   ปฏิจฺจ  นีวรโณเจวนีวรณสมฺปยุตฺโตจ
นีวรณสมฺปยุตฺโตเจวโนจนีวรโณ       จ       ธมฺมา       อุปฺปชฺชนฺติ
เหตุปจฺจยา:        กามจฺฉนฺทนีวรณํ       ปฏิจฺจ       ถีนมิทฺธนีวรณํ
อุทฺธจฺจนีวรณํ อวิชฺชานีวรณํ สมฺปยุตฺตกา จ ขนฺธา จกฺกํ ฯ
     {๖๔๔.๑}   นีวรณสมฺปยุตฺตญฺเจวโนจนีวรณํ     ธมฺมํ     ปฏิจฺจ
นีวรณสมฺปยุตฺโตเจวโนจนีวรโณ     ธมฺโม     อุปฺปชฺชติ    เหตุปจฺจยา:
นีวรณสมฺปยุตฺตญฺเจวโนจนีวรณํ   เอกํ   ขนฺธํ  ปฏิจฺจ  ตโย  ขนฺธา  เทฺว
ขนฺเธ  ...  ฯ  นีวรณสมฺปยุตฺตญฺเจวโนจนีวรณํ  ธมฺมํ ปฏิจฺจ นีวรโณเจว-
นีวรณสมฺปยุตฺโตจ  ธมฺโม  อุปฺปชฺชติ  เหตุปจฺจยา:  นีวรณสมฺปยุตฺเตเจว-
โนจนีวรเณ    ขนฺเธ    ปฏิจฺจ   นีวรณา   ฯ    นีวรณสมฺปยุตฺตญฺเจว
โนจนีวรณํ       ธมฺมํ       ปฏิจฺจ       นีวรโณเจวนีวรณสมฺปยุตฺโตจ
นีวรณสมฺปยุตฺโตเจวโนจนีวรโณ   จ   ธมฺมา   อุปฺปชฺชนฺติ   เหตุปจฺจยา:
นีวรณสมฺปยุตฺตญฺเจวโนจนีวรณํ    เอกํ    ขนฺธํ   ปฏิจฺจ   ตโย   ขนฺธา
นีวรณา จ เทฺว ขนฺเธ ... ฯ
     {๖๔๔.๒}   นีวรณญฺเจวนีวรณสมฺปยุตฺตญฺจ    นีวรณสมฺปยุตฺตญฺเจว-
โนจนีวรณญฺจ      ธมฺมํ      ปฏิจฺจ      นีวรโณเจวนีวรณสมฺปยุตฺโตจ
ธมฺโม        อุปฺปชฺชติ        เหตุปจฺจยา:       กามจฺฉนฺทนีวรณญฺจ
สมฺปยุตฺตเก    จ    ขนฺเธ    ปฏิจฺจ    ถีนมิทฺธนีวรณํ    อุทฺธจฺจนีวรณํ
อวิชฺชานีวรณํ        จกฺกํ       ฯ       นีวรณญฺเจวนีวรณสมฺปยุตฺตญฺจ
นีวรณสมฺปยุตฺตญฺเจวโนจนีวรณญฺจ    ธมฺมํ   ปฏิจฺจ   นีวรณสมฺปยุตฺโตเจว-
โนจนีวรโณ   ธมฺโม   อุปฺปชฺชติ   เหตุปจฺจยา:   นีวรณสมฺปยุตฺตญฺเจว-
โนจนีวรณํ เอกํ ขนฺธญฺจ นีวรเณ จ ปฏิจฺจ ตโย ขนฺธา เทฺว ขนฺเธ ... ฯ
     {๖๔๔.๓}   นีวรณญฺเจวนีวรณสมฺปยุตฺตญฺจ    นีวรณสมฺปยุตฺตญฺเจว-
โนจนีวรณญฺจ      ธมฺมํ      ปฏิจฺจ      นีวรโณเจวนีวรณสมฺปยุตฺโตจ
นีวรณสมฺปยุตฺโตเจวโนจนีวรโณ   จ   ธมฺมา   อุปฺปชฺชนฺติ   เหตุปจฺจยา:
นีวรณสมฺปยุตฺตญฺเจวโนจนีวรณํ     เอกํ    ขนฺธญฺจ    กามจฺฉนฺทนีวรณญฺจ
ปฏิจฺจ   ตโย   ขนฺธา  ถีนมิทฺธนีวรณํ  อุทฺธจฺจนีวรณํ  อวิชฺชานีวรณํ  เทฺว
ขนฺเธ ... จกฺกํ ฯ สงฺขิตฺตํ ฯ
     [๖๔๕]   เหตุยา  นว  อารมฺมเณ  นว  อธิปติยา  นว สพฺพตฺถ นว
กมฺเม นว อาหาเร นว อวิคเต นว ฯ
     [๖๔๖]   นีวรณญฺเจวนีวรณสมฺปยุตฺตญฺจ ธมฺมํ ปฏิจฺจ นีวรโณเจวนีวรณ-
สมฺปยุตฺโตจ    ธมฺโม    อุปฺปชฺชติ    นเหตุปจฺจยา:    วิจิกิจฺฉานีวรณํ
ปฏิจฺจ    อวิชฺชานีวรณํ    อุทฺธจฺจนีวรณํ    ปฏิจฺจ    อวิชฺชานีวรณํ   ฯ
นีวรณสมฺปยุตฺตญฺเจวโนจนีวรณํ      ธมฺมํ      ปฏิจฺจ      นีวรโณเจว-
นีวรณสมฺปยุตฺโตจ   ธมฺโม   อุปฺปชฺชติ   นเหตุปจฺจยา:  วิจิกิจฺฉาสหคเต
อุทฺธจฺจสหคเต    ขนฺเธ    ปฏิจฺจ    อวิชฺชานีวรณํ   ฯ   นีวรณญฺเจว-
นีวรณสมฺปยุตฺตญฺจ นีวรณสมฺปยุตฺตญฺเจวโนจนีวรณญฺจ
ธมฺมํ     ปฏิจฺจ     นีวรโณเจวนีวรณสมฺปยุตฺโตจ    ธมฺโม    อุปฺปชฺชติ
นเหตุปจฺจยา:   วิจิกิจฺฉานีวรณญฺจ   สมฺปยุตฺตเก   จ    ขนฺเธ   ปฏิจฺจ
อวิชฺชานีวรณํ    อุทฺธจฺจนีวรณญฺจ    สมฺปยุตฺตเก    จ   ขนฺเธ   ปฏิจฺจ
อวิชฺชานีวรณํ ฯ สงฺขิตฺตํ ฯ
     [๖๔๗]   นเหตุยา   ตีณิ   นอธิปติยา   นว   นปุเรชาเต   นว
นปจฺฉาชาเต    นว    นอาเสวเน    นว   นกมฺเม   ตีณิ   นวิปาเก
นว นวิปฺปยุตฺเต นว ฯ
     [๖๔๘]   เหตุปจฺจยา  นอธิปติยา นว ฯ สงฺขิตฺตํ ฯ ... นวิปฺปยุตฺเต
นว ฯ
     [๖๔๙]   นเหตุปจฺจยา   อารมฺมเณ   ตีณิ   ...  อนนฺตเร  ตีณิ
สมนนฺตเร ตีณิ สพฺพตฺถ ตีณิ มคฺเค ตีณิ อวิคเต ตีณิ ฯ
     เอวํ สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ
     สมฺปยุตฺตวาโรปิ ปฏิจฺจวารสทิสา นินฺนานากรณา ฯ
                              ปญฺหาวาโร
     [๖๕๐]   นีวรโณเจวนีวรณสมฺปยุตฺโตจ          ธมฺโม
นีวรณสฺสเจวนีวรณสมฺปยุตฺตสฺสจ     ธมฺมสฺส    เหตุปจฺจเยน    ปจฺจโย:
นีวรณาเจวนีวรณสมฺปยุตฺตาจ      เหตู      สมฺปยุตฺตกานํ     นีวรณานํ
เหตุปจฺจเยน    ปจฺจโย    ฯ    นีวรโณเจวนีวรณสมฺปยุตฺโตจ    ธมฺโม
นีวรณสมฺปยุตฺตสฺสเจวโนจนีวรณสฺส    ธมฺมสฺส    เหตุปจฺจเยน   ปจฺจโย:
นีวรณาเจวนีวรณสมฺปยุตฺตาจ     เหตู     นีวรณสมฺปยุตฺตานํ     ขนฺธานํ
เหตุปจฺจเยน    ปจฺจโย    ฯ    นีวรโณเจวนีวรณสมฺปยุตฺโตจ    ธมฺโม
นีวรณสฺสเจวนีวรณสมฺปยุตฺตสฺสจ    นีวรณสมฺปยุตฺตสฺสเจวโนจนีวรณสฺส    จ
ธมฺมสฺส     เหตุปจฺจเยน     ปจฺจโย:     นีวรณาเจวนีวรณสมฺปยุตฺตาจ
เหตู สมฺปยุตฺตกานํ ขนฺธานํ นีวรณานญฺจ เหตุปจฺจเยน ปจฺจโย ฯ
     [๖๕๑]   นีวรโณเจวนีวรณสมฺปยุตฺโตจ          ธมฺโม
นีวรณสฺสเจวนีวรณสมฺปยุตฺตสฺสจ    ธมฺมสฺส   อารมฺมณปจฺจเยน   ปจฺจโย:
นีวรเณ  อารพฺภ  นีวรณา  อุปฺปชฺชนฺติ  ฯ  มูลํ  ปุจฺฉิตพฺพํ นีวรเณ อารพฺภ
นีวรณสมฺปยุตฺตาเจวโนจนีวรณา     ขนฺธา     อุปฺปชฺชนฺติ     ฯ    มูลํ
ปุจฺฉิตพฺพํ   นีวรเณ   อารพฺภ   นีวรณา   จ   สมฺปยุตฺตกา   จ  ขนฺธา
อุปฺปชฺชนฺติ       ฯ       นีวรณสมฺปยุตฺโตเจวโนจนีวรโณ       ธมฺโม
นีวรณสมฺปยุตฺตสฺสเจวโนจนีวรณสฺส   ธมฺมสฺส   อารมฺมณปจฺจเยน  ปจฺจโย:
นีวรณสมฺปยุตฺเตเจวโนจนีวรเณ   ขนฺเธ   อารพฺภ   นีวรณสมฺปยุตฺตาเจว-
โนจนีวรณา    ขนฺธา    อุปฺปชฺชนฺติ    ฯ   มูลานิ   ปุจฺฉิตพฺพานิ   ฯ
นีวรณสมฺปยุตฺเตเจวโนจนีวรเณ   ขนฺเธ  อารพฺภ  นีวรณา  อุปฺปชฺชนฺติ  ฯ
นีวรณสมฺปยุตฺเตเจวโนจนีวรเณ  ขนฺเธ  อารพฺภ  นีวรณา  จ  สมฺปยุตฺตกา
จ      ขนฺธา      อุปฺปชฺชนฺติ     ฯ     นีวรโณเจวนีวรณสมฺปยุตฺโตจ
นีวรณสมฺปยุตฺโตเจวโนจนีวรโณ     จ     ธมฺมา    นีวรณสฺสเจวนีวรณ-
สมฺปยุตฺตสฺสจ ธมฺมสฺส อารมฺมณปจฺจเยน ปจฺจโย: ตีณิ ฯ
     [๖๕๒]   นีวรโณเจวนีวรณสมฺปยุตฺโตจ    ธมฺโม   นิวรณสฺสเจว-
นีวรณสมฺปยุตฺตสฺสจ       ธมฺมสฺส       อธิปติปจฺจเยน      ปจฺจโย:
อารมฺมณาธิปติ  ฯ  ตีณิ ครุการมฺมณาเยว ฯ นีวรณสมฺปยุตฺโตเจวโนจนีวรโณ
ธมฺโม           นีวรณสมฺปยุตฺตสฺสเจวโนจนีวรณสฺส           ธมฺมสฺส
อธิปติปจฺจเยน     ปจฺจโย:     อารมฺมณาธิปติ     สหชาตาธิปติ    ฯ
อารมฺมณาธิปติ:   นีวรณสมฺปยุตฺเตเจวโนจนีวรเณ   ขนฺเธ   ครุํ   กตฺวา
นีวรณสมฺปยุตฺตาเจวโนจนีวรณา   ขนฺธา   อุปฺปชฺชนฺติ   ฯ  สหชาตาธิปติ:
นีวรณสมฺปยุตฺตาเจวโนจนีวรณาธิปติ        สมฺปยุตฺตกานํ        ขนฺธานํ
อธิปติปจฺจเยน ปจฺจโย ฯ มูลานิ ปุจฺฉิตพฺพานิ ฯ
     {๖๕๒.๑}   นีวรณสมฺปยุตฺเตเจวโนจนีวรเณ   ขนฺเธ   ครุํ  กตฺวา
นีวรณา      อุปฺปชฺชนฺติ      สหชาตาธิปติ:      นีวรณสมฺปยุตฺตาเจว-
โนจนีวรณาธิปติ   สมฺปยุตฺตกานํ   นีวรณานํ  อธิปติปจฺจเยน  ปจฺจโย  ฯ
นีวรณสมฺปยุตฺเตเจวโนจนีวรเณ  ขนฺเธ  ครุํ  กตฺวา นีวรณา จ สมฺปยุตฺตกา
จ  ขนฺธา  อุปฺปชฺชนฺติ  สหชาตาธิปติ:  นีวรณสมฺปยุตฺตาเจวโนจนีวรณาธิปติ
สมฺปยุตฺตกานํ    ขนฺธานํ    นีวรณานญฺจ   อธิปติปจฺจเยน   ปจฺจโย   ฯ
นีวรโณเจวนีวรณสมฺปยุตฺโตจ      นีวรณสมฺปยุตฺโตเจวโนจนีวรโณ      จ
ธมฺมา     นีวรณสฺสเจวนีวรณสมฺปยุตฺตสฺสจ     ธมฺมสฺส    อธิปติปจฺจเยน
ปจฺจโย: อารมฺมณาธิปติ ฯ ตีณิ ฯ
     [๖๕๓]   อนนฺตรปจฺจเยน   ปจฺจโย:   อาวชฺชนาปิ   วุฏฺฐานมฺปิ
นตฺถิ    สพฺพตฺถ    ปุริมา   ปุริมา   กาตพฺพา   ฯ   สมนนฺตรปจฺจเยน
ปจฺจโย:  นว  ฯ  สหชาตปจฺจเยน  ปจฺจโย:  นว  ฯ  อญฺญมญฺญปจฺจเยน
ปจฺจโย:   นว  ฯ  นิสฺสยปจฺจเยน  ปจฺจโย:  นว  ฯ  อุปนิสฺสยปจฺจเยน
ปจฺจโย: นว อารมฺมณสทิสํ วิภงฺโค นตฺถิ ฯ อาเสวนปจฺจเยน ปจฺจโย: ฯ
     [๖๕๔]   นีวรณสมฺปยุตฺโตเจวโนจนีวรโณ  ธมฺโม  นีวรณสมฺปยุตฺตสฺส-
เจวโนจนีวรณสฺส   ธมฺมสฺส   กมฺมปจฺจเยน  ปจฺจโย:  นีวรณสมฺปยุตฺตา-
เจวโนจนีวรณา    เจตนา    สมฺปยุตฺตกานํ    ขนฺธานํ   กมฺมปจฺจเยน
ปจฺจโย   ฯ   มูลานิ   ปุจฺฉิตพฺพานิ   ฯ  นีวรณสมฺปยุตฺตาเจวโนจนีวรณา
เจตนา         สมฺปยุตฺตกานํ         นีวรณานํ        กมฺมปจฺจเยน
ปจฺจโย    ฯ   นีวรณสมฺปยุตฺตาเจวโนจนีวรณา   เจตนา   สมฺปยุตฺตกานํ
ขนฺธานํ นีวรณานญฺจ กมฺมปจฺจเยน ปจฺจโย ฯ
     [๖๕๕]   นีวรณสมฺปยุตฺโตเจวโนจนีวรโณ         ธมฺโม
นีวรณสมฺปยุตฺตสฺสเจวโนจนีวรณสฺส   ธมฺมสฺส   อาหารปจฺจเยน   ปจฺจโย:
ตีณิ   ฯ   อินฺทฺริยปจฺจเยน   ปจฺจโย:  ตีณิ  ฯ  ฌานปจฺจเยน  ปจฺจโย:
ตีณิ    ฯ    มคฺคปจฺจเยน    ปจฺจโย:    ตีณิ   ฯ   สมฺปยุตฺตปจฺจเยน
ปจฺจโย:   นว   ฯ   อตฺถิปจฺจเยน   ปจฺจโย:   นว  ฯ  นตฺถิปจฺจเยน
ปจฺจโย:   นว   ฯ   วิคตปจฺจเยน   ปจฺจโย:  นว  ฯ  อวิคตปจฺจเยน
ปจฺจโย: นว ฯ
     [๖๕๖]   เหตุยา    ตีณิ    อารมฺมเณ   นว   อธิปติยา   นว
อนนฺตเร    นว    สมนนฺตเร    นว    สหชาเต    นว   อญฺญมญฺเญ
นว    นิสฺสเย    นว    อุปนิสฺสเย   นว   อาเสวเน   นว   กมฺเม
ตีณิ    อาหาเร    ตีณิ    อินฺทฺริเย    ตีณิ    ฌาเน    ตีณิ   มคฺเค
ตีณิ   สมฺปยุตฺเต   นว   อตฺถิยา   นว   นตฺถิยา   นว   วิคเต   นว
อวิคเต นว ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๔๒ หน้าที่ ๓๘๑-๓๙๐.
https://84000.org/tipitaka/read/pali_item.php?book=42&item=641&items=16
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=42&item=641&items=16&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=42&item=641&items=16
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=42&item=641&items=16
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=42&i=641
             สารบัญพระไตรปิฎกเล่มที่ ๔๒
https://84000.org/tipitaka/read/?index_42
https://84000.org/tipitaka/english/?index_42