พระไตรปิฎกเล่มที่ ๕ ภาษาบาลี อักษรไทย
พระวินัยปิฎกเล่มที่ ๕ วินย. มหาวคฺโค (๒)

     [๗๐]   อถโข   ภควา   ปาฏลิคามิเก  อุปาสเก  พหุเทว  รตฺตึ
ธมฺมิยา     กถาย     สนฺทสฺเสตฺวา    สมาทเปตฺวา    สมุตฺเตเชตฺวา
สมฺปหํเสตฺวา   อุยฺโยเชสิ   อภิกฺกนฺตา   โข  คหปตโย  รตฺติ  ยสฺสทานิ
ตุเมฺห   ๑-   กาลํ   มญฺญถาติ   ฯ  เอวํ  ภนฺเตติ  โข  ปาฏลิคามิกา
อุปาสกา    ภควโต    ปฏิสฺสุณิตฺวา    ๒-    อุฏฺฐายาสนา    ภควนฺตํ
อภิวาเทตฺวา    ปทกฺขิณํ    กตฺวา    ปกฺกมึสุ    ฯ    อถโข   ภควา
อจิรปกฺกนฺเตสุ ปาฏลิคามิเกสุ อุปาสเกสุ สุญฺญาคารํ ปาวิสิ ฯ
@เชิงอรรถ: ๑ สี. ยุ. อยํ ปาโฐ น โหติ ฯ ๒ โป. ปฏิสฺสุตฺวา ฯ
     [๗๑]   เตน   โข  ปน  สมเยน  สุนีธวสฺสการา  มคธมหามตฺตา
ปาฏลิคาเม   นครํ   มาเปนฺติ   วชฺชีนํ   ปฏิพาหาย   ฯ  อทฺทสา  โข
ภควา   รตฺติยา   ปจฺจูสสมยํ   ปจฺจุฏฺฐาย   ทิพฺเพน  จกฺขุนา  วิสุทฺเธน
อติกฺกนฺตมานุสเกน     สมฺพหุลา    เทวตาโย    ปาฏลิคาเม    วตฺถูนิ
ปริคฺคณฺหนฺติโย   ยสฺมึ  ปเทเส  มเหสกฺขา  เทวตา  วตฺถูนิ  ปริคฺคณฺหนฺติ
มเหสกฺขานํ   ตตฺถ  ราชูนํ  ราชมหามตฺตานํ  จิตฺตานิ  นมนฺติ  นิเวสนานิ
มาเปตุํ    ยสฺมึ    ปเทเส   มชฺฌิมา   เทวตา   วตฺถูนิ   ปริคฺคณฺหนฺติ
มชฺฌิมานํ   ตตฺถ   ราชูนํ   ราชมหามตฺตานํ  จิตฺตานิ  นมนฺติ  นิเวสนานิ
มาเปตุํ   ยสฺมึ   ปเทเส   นีจา   เทวตา  วตฺถูนิ  ปริคฺคณฺหนฺติ  นีจานํ
ตตฺถ ราชูนํ ราชมหามตฺตานํ จิตฺตานิ นมนฺติ นิเวสนานิ มาเปตุํ ฯ
     {๗๑.๑}   อถโข  ภควา  อายสฺมนฺตํ  อานนฺทํ อามนฺเตสิ เก นุ โข
เต   อานนฺท  ปาฏลิคาเม  นครํ  มาเปนฺตีติ  ฯ  สุนีธวสฺสการา  ภนฺเต
มคธมหามตฺตา   ปาฏลิคาเม   นครํ  มาเปนฺติ  วชฺชีนํ  ปฏิพาหายาติ  ฯ
เสยฺยถาปิ   นาม   ๑-  อานนฺท  เทเวหิ  ตาวตึเสหิ  สทฺธึ  มนฺเตตฺวา
เอวเมว   โข   อานนฺท   สุนีธวสฺสการา   มคธมหามตฺตา  ปาฏลิคาเม
นครํ  มาเปนฺติ  วชฺชีนํ  ปฏิพาหาย  อิธาหํ  อานนฺท  รตฺติยา  ปจฺจูสสมยํ
ปจฺจุฏฺฐาย   อทฺทสํ   ทิพฺเพน   จกฺขุนา   วิสุทฺเธน   อติกฺกนฺตมานุสเกน
สมฺพหุลา    เทวตาโย    ปาฏลิคาเม   วตฺถูนิ   ปริคฺคณฺหนฺติโย   ยสฺมึ
ปเทเส   มเหสกฺขา   เทวตา   วตฺถูนิ  ปริคฺคณฺหนฺติ  มเหสกฺขานํ  ตตฺถ
ราชูนํ    ราชมหามตฺตานํ    จิตฺตานิ    นมนฺติ    นิเวสนานิ   มาเปตุํ
@เชิงอรรถ: ๑ ม. ยุ. นามสทฺโท นตฺถิ ฯ
ยสฺมึ    ปเทเส   มชฺฌิมา   เทวตา   วตฺถูนิ   ปริคฺคณฺหนฺติ   มชฺฌิมานํ
ตตฺถ   ราชูนํ   ราชมหามตฺตานํ   จิตฺตานิ   นมนฺติ  นิเวสนานิ  มาเปตุํ
ยสฺมึ   ปเทเส   นีจา   เทวตา   วตฺถูนิ   ปริคฺคณฺหนฺติ   นีจานํ  ตตฺถ
ราชูนํ   ราชมหามตฺตานํ   จิตฺตานิ  นมนฺติ  นิเวสนานิ  มาเปตุํ  ยาวตา
อานนฺท    อริยานํ    อายตนํ   ยาวตา   วณิชฺชปโถ   อิทํ   อคฺคนครํ
ภวิสฺสติ   ปาฏลิปุตฺตํ   ปุฏเภทนํ   ปาฏลิปุตฺตสฺส   โข   อานนฺท   ตโย
อนฺตรายา    ภวิสฺสนฺติ    อคฺคิโต   วา   อุทกโต   วา   อพฺภนฺตรโต
วา มิถุเภทาติ ฯ
     [๗๒]   อถ   โข   สุนีธวสฺสการา  มคธมหามตฺตา  เยน  ภควา
เตนุปสงฺกมึสุ    อุปสงฺกมิตฺวา   ภควตา   สทฺธึ   สมฺโมทึสุ   สมฺโมทนียํ
กถํ   สาราณียํ   วีติสาเรตฺวา   เอกมนฺตํ   อฏฺฐํสุ  ฯ  เอกมนฺตํ  ฐิตา
โข   สุนีธวสฺสการา   มคธมหามตฺตา   ภควนฺตํ   เอตทโวจุํ  อธิวาเสตุ
โน   ภวํ   โคตโม   อชฺชตนาย   ๑-  ภตฺตํ  สทฺธึ  ภิกฺขุสงฺเฆนาติ  ฯ
อธิวาเสสิ  ภควา  ตุณฺหีภาเวน  ฯ  อถโข  สุนีธวสฺสการา มคธมหามตฺตา
ภควโต อธิวาสนํ วิทิตฺวา อุฏฺฐายาสนา ๒- ปกฺกมึสุ ฯ
     {๗๒.๑}   อถโข   สุนีธวสฺสการา   มคธมหามตฺตา  [๓]-  ปณีตํ
ขาทนียํ  โภชนียํ  ปฏิยาทาเปตฺวา  ภควโต  กาลํ  อาโรจาเปสุํ   กาโล
โภ  โคตม  นิฏฺฐิตํ  ภตฺตนฺติ  ฯ  อถโข  ภควา  ปุพฺพณฺหสมยํ นิวาเสตฺวา
ปตฺตจีวรมาทาย  เยน  สุนีธวสฺสการานํ  มคธมหามตฺตานํ  ปริเวสนา  ๔-
เตนุปสงฺกมิ     อุปสงฺกมิตฺวา    ปญฺญตฺเต    อาสเน    นิสีทิ    สทฺธึ
@เชิงอรรถ: ๑ โป. อชฺชสฺวาตนาย ฯ ม. สฺวาตนาย ฯ ๒ ม. ยุ. อุฏฺฐายาสนาติ ปาฐา น ทิสฺสนฺติ ฯ
@๓ โป. สเก นิเวสเน ฯ ๔ โป. นิเวสนานิ ฯ ม. ปริเวสนํ ฯ
ภิกฺขุสงฺเฆน   ฯ   อถโข   สุนีธวสฺสการา   มคธมหามตฺตา   พุทฺธปฺปมุขํ
ภิกฺขุสงฺฆํ    ปณีเตน   ขาทนีเยน   โภชนีเยน   สหตฺถา   สนฺตปฺเปตฺวา
สมฺปวาเรตฺวา   ภควนฺตํ   ภุตฺตาวึ  โอนีตปตฺตปาณึ  เอกมนฺตํ  นิสีทึสุ  ฯ
เอกมนฺตํ   นิสินฺเน   โข  สุนีธวสฺสกาเร  มคธมหามตฺเต  ภควา  อิมาหิ
คาถาหิ อนุโมทิ
     [๗๓]   ยสฺมึ ปเทเส กปฺเปติ            วาสํ ปณฺฑิตชาติโย
               สีลวนฺเตตฺถ โภเชตฺวา              สญฺญเต พฺรหฺมจาริโน ๑-
               ยา ตตฺถ เทวตา อาสุํ               ตาสํ ทกฺขิณมาทิเส ฯ
               ตา ปูชิตา ปูชยนฺติ                   มานิตา มานยนฺติ นํ
               ตโต นํ อนุกมฺปนฺติ                  มาตา ปุตฺตํว โอรสํ ฯ
               เทวตานุกมฺปิโต โปโส             สทา ภทฺรานิ ปสฺสตีติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๕ หน้าที่ ๘๙-๙๒.
https://84000.org/tipitaka/read/pali_item.php?book=5&item=70&items=4
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=5&item=70&items=4&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=5&item=70&items=4
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=5&item=70&items=4
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=5&i=70
             สารบัญพระไตรปิฎกเล่มที่ ๕
https://84000.org/tipitaka/read/?index_5
https://84000.org/tipitaka/english/?index_5