[๑๘] |๑๘.๑| สิทฺธตฺถสฺส อปเรน อสโม อปฺปฏิปุคฺคโล
อนนฺตสีโล ๑- อมิตยโส ติสฺโส โลกคฺคนายโก ฯ
|๑๘.๒| ตมนฺธการํ วิธมิตฺวา โอภาเสตฺวา สเทวกํ
อนุกมฺปโก มหาวีโร โลเก อุปฺปชฺชิ จกฺขุมา ฯ
|๑๘.๓| ตสฺสาปิ อตุลา อิทฺธิ อตุลา ๒- สีลสมาธิโย
สพฺพตฺถ ปารมึ คนฺตฺวา ธมฺมจกฺกํ ปวตฺตยิ ฯ
|๑๘.๔| โส พุทฺโธ ทสสหสฺสมฺหิ วิญฺญาเปสิ คิรํ สุจึ
โกฏิสตานิ ๓- อภิสมึสุ ปฐเม ธมฺมเทสเน ฯ
|๑๘.๕| ทุติโย นวุติโกฏีนํ ตติเย ๔- สฏฺฐิโกฏิโย
พนฺธนาโต ๕- ปโมเจสิ สมฺปตฺเต ๖- นรมรู ตทา ฯ
|๑๘.๖| สนฺนิปาตา ตโย อาสุ ํ ติสฺสสฺส ๗- จ มเหสิโน
ขีณาสวานํ วิมลานํ สนฺตจิตฺตาน ตาทินํ ฯ
|๑๘.๗| ขีณาสวสตสหสฺสานํ ปฐโม อาสิ สมาคโม
นวุติสตสหสฺสานํ ทุติโย อาสิ สมาคโม ฯ
@เชิงอรรถ: ๑ ม. อนนฺตเตโช ฯ ๒ ม. อตุลํ สีลํ สมาธิ จ ฯ ยุ. อตุลสีลสมาธี จ ฯ
@๓ ยุ. โกฏิสตสหสฺสานิ สมึสฺ ฯ ๔ ม. ตติโย ฯ ๕ ยุ. พนฺธนา โส ฯ
@๖ ม. สตฺเต -- ฯ ๗ ม. ยุ. ติสฺเส โลกคฺคนายเก ฯ
|๑๘.๘| อสีติสตสหสฺสานํ ตติโย อาสิ สมาคโม
ขีณาสวานํ วิมลานํ ปุปฺผิตานํ วิมุตฺติยา ฯ
|๑๘.๙| อหนฺเตน สมเยน สุชาโต นาม ขตฺติโย
มหาโภคํ ฉฑฺฑยิตฺวา ปพฺพชึ อิสิปพฺพชฺชํ ฯ
|๑๘.๑๐| มยิ ปพฺพชิเต สนฺเต อุปฺปชฺชิ โลกนายโก
พุทฺโธติ สทฺทํ สุตฺวาน ปีติ เม อุปปชฺชถ ฯ
|๑๘.๑๑| ทิพฺพํ มนฺทารวํ ปุปฺผํ ปทุมํ ปาริฉตฺตกํ
อุโภ หตฺเถหิ ปคฺคยฺห ธุนมาโน อุปาคมึ ฯ
|๑๘.๑๒| ปาตุวณฺณปริวุตํ ติสฺสํ โลกคฺคนายกํ
ตมหํ ปุปฺผํ คเหตฺวาน มตฺถเก ธารเย ๑- ชินํ ฯ
|๑๘.๑๓| โสปิ มํ ตทา ๒- พฺยากาสิ ชนมชฺเฌ นิสีทิย
ทฺวานวุเต อิโต กปฺเป อยํ พุทฺโธ ภวิสฺสติ ฯ
|๑๘.๑๔| อหุ กปิลวฺหยา รมฺมา นิกฺขมิตฺวา ตถาคโต
ปธานํ ปทหิตฺวาน กตฺวา ทุกฺกรการิกํ ฯ
|๑๘.๑๕| อชปาลรุกฺขมูลสฺมึ นิสีทิตฺวา ตถาคโต
ตตฺถ ปายาสํ ปคฺคยฺห เนรญฺชรมุเปหิติ ฯ
|๑๘.๑๖| เนรญฺชราย ตีรมฺหิ ปายาสํ อทิ โส ชิโน
ปฏิยตฺตวรมคฺเคน โพธิมูลมฺหิ เอหิติ ฯ
|๑๘.๑๗| ตโต ปทกฺขิณํ กตฺวา โพธิมณฺฑํ อนุตฺตรํ
อสฺสตฺถรุกฺขมูลมฺหิ พุชฺฌิสฺสติ มหายโส ฯ
@เชิงอรรถ: ๑ ม. ยุ. ธารยึ ฯ ๒ ม. ยุ. พุทฺโธ ฯ อิโต ปรํ อีทิสเมว ฯ
|๑๘.๑๘| อิมสฺส ชนิกา มาตา มายา นาม ภวิสฺสติ
ปิตา สุทฺโธทโน นาม อยํ เหสฺสติ โคตโม ฯ
|๑๘.๑๙| โกลิโต อุปติสฺโส จ อคฺคา เหสฺสนฺติ สาวกา
อนาสวา วีตราคา สนฺตจิตฺตา สมาหิตา
อานนฺโท นามุปฏฺฐาโก อุปฏฺฐิสฺสติมํ ชินํ ฯ
|๑๘.๒๐| เขมา อุปฺปลวณฺณา จ อคฺคา เหสฺสนฺติ สาวิกา
อนาสวา วีตราคา สนฺตจิตฺตา สมาหิตา ฯ
|๑๘.๒๑| โพธิ ตสฺส ภควโต อสฺสตฺโถติ ปวุจฺจติ
จิตฺโต จ หตฺถาฬวโก อคฺคา เหสฺสนฺตุปฏฺฐกา ฯ
|๑๘.๒๒| นนฺทมาตา จ อุตฺตรา อคฺคา เหสฺสนฺตุปฏฺฐิกา
อายุ วสฺสสตํ ตสฺส โคตมสฺส ยสสฺสิโน ฯ
|๑๘.๒๓| อิทํ สุตฺวาน วจนํ อสมสฺส มเหสิโน
อาโมทิตา นรมรู พุทฺธวีชงฺกุโร อยํ ฯ
|๑๘.๒๔| อุกฺกุฏฺฐิสทฺทา วตฺตนฺติ อปฺโผเฏนฺติ หสนฺติ จ
กตญฺชลี นมสฺสนฺติ ทสสหสฺสี สเทวกา ฯ
|๑๘.๒๕| ยทิมสฺส โลกนาถสฺส วิรชฺฌิสฺสาม สาสนํ
อนาคตมฺหิ อทฺธาเน เหสฺสาม สมฺมุขา อิมํ ฯ
|๑๘.๒๖| ยถา มนุสฺสา นทึ ตรนฺตา ปฏิติตฺถํ วิรชฺฌิย
เหฏฺฐาติตฺถํ คเหตฺวาน อุตฺตรนฺติ มหานทึ ฯ
|๑๘.๒๗| เอวเมว มยํ สพฺเพ ยทิ มุญฺจามิมํ ชินํ
อนาคตมฺหิ อทฺธาเน เหสฺสาม สมฺมุขา อิมํ ฯ
|๑๘.๒๘| ตสฺสาปิ วจนํ สุตฺวา ภิยฺโย จิตฺตํ ปสาทยึ
อุตฺตรึ วตฺตมธิฏฺฐาสึ ทสปารมิปูริยา ฯ
|๑๘.๒๙| เขมกํ นาม นครํ ชนสนฺโท ๑- นาม ขตฺติโย
ปทุมา นาม ชนิกา ติสฺสสฺส จ มเหสิโน ฯ
|๑๘.๓๐| สตฺตวสฺสสหสฺสานิ อคารํ อชฺฌาวสิ โส
คุณเสลานาทิยนิสโภ ๒- ตโย ปาสาทมุตฺตมา ฯ
|๑๘.๓๑| สมตึสสหสฺสานิ นาริโย สมลงฺกตา
สุภทฺทา นาม ๓- สา นารี อานนฺโท นาม อตฺรโช ฯ
|๑๘.๓๒| นิมิตฺเต จตุโร ทิสฺวา อสฺสยาเนน นิกฺขมิ
อนูนกํ ๔- อฑฺฒมาสํ ปธานํ ปทหี ชิโน ฯ
|๑๘.๓๓| พฺรหฺมุนา ยาจิโต สนฺโต ติสฺโส โลกคฺคนายโก
วตฺตจกฺโก มหาวีโร ยสวตีทายมุตฺตเม ๕- ฯ
|๑๘.๓๔| พฺรหฺมเทโว จ อุทโย จ อเหสุ ํ อคฺคสาวกา
สมโค ๖- นามุปฏฺฐาโก ติสฺสสฺส จ มเหสิโน ฯ
|๑๘.๓๕| ผุสฺสา เจว สุทตฺตา จ อเหสุ ํ อคฺคสาวิกา
โพธิ ตสฺส ภควโต อสโนติ ปวุจฺจติ ฯ
|๑๘.๓๖| สมฺพโล จ สิริ เจว อเหสุ ํ อคฺคุปฏฺฐกา
กีสาโคตมี อุปเสนา อเหสุ ํ อคฺคุปฏฺฐิกา ฯ
@เชิงอรรถ: ๑ ม. ยุ. ชนสนฺโธ ฯ ๒ ม. คุหเสลนาริสยนิสภา ฯ ยุ. คฺหเสลนารีนิสภา ฯ
@๓ ม. นามิกา ฯ ๔ ม. อนูนอฏฺฐมาสานิ ฯ ยุ. อนูนกํ อฏฺฐมาสํ ฯ ๕ ม.
@ยุ. ยสวตียมุตฺตเม ฯ ๖ ม. ยุ. สมงฺโค ฯ
โสปิ พุทฺโธ สฏฺฐิรตโน อหุ อุจฺจตฺตเน ชิโน
อนูปโม อสทิโส หิมวา วิย ทิสฺสติ ฯ
|๑๘.๓๗| ตสฺสาปิ อตุลเตชสฺส อายุ อาสิ อนุตฺตโร
วสฺสสตสหสฺสานิ โลเก อฏฺฐาสิ จกฺขุมา ฯ
|๑๘.๓๘| อุตฺตมํ ปวรํ เสฏฺฐํ อนุโภตฺวา มหายสํ
ชลิตฺวา อคฺคิกฺขนฺโธว นิพฺพุโต โส สสาวโก ฯ
|๑๘.๓๙| วลาหโกว อนิเลน สุริเยน วิย อุสฺสโว
อนฺธกาโรว ทีเปน ๑- นิพฺพุโต โส สสาวโก ฯ
|๑๘.๔๐| ติสฺโส ชินวโร พุทฺโธ นนฺทารามมฺหิ นิพฺพุโต
ตตฺเถว ตสฺส ชินถูโป ตีณิ โยชนสมุสฺสิโตติ ฯ
ติสฺสพุทฺธวํโส สตฺตรสโม ฯ
อฏฺฐารสโม ปุสฺสพุทฺธวํโส ๒-
เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๐๗-๕๑๑.
http://84000.org/tipitaka/pali/pali_item_s.php?book=33&item=198&items=1&modeTY=2&mode=bracket
อ่านโดยใช้เนื้อความเป็นเกณฑ์แบ่งข้อ :-
http://84000.org/tipitaka/pali/pali_item_s.php?book=33&item=198&items=1&modeTY=2
อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=198&items=1&modeTY=2&mode=bracket
อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=198&items=1&modeTY=2&mode=bracket
ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=198
The Pali Atthakatha in Thai :-
http://84000.org/tipitaka/atthapali/read_th.php?B=51&A=7273
The Pali Atthakatha in Roman :-
http://84000.org/tipitaka/atthapali/read_rm.php?B=51&A=7273
สารบัญพระไตรปิฎกเล่มที่ ๓๓
http://84000.org/tipitaka/read/?index_33
บันทึก ๑๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ DhammaPerfect@yahoo.com