พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                   ทุติยํ โกลทายกตฺเถราปทานํ (๔๔๒)
     [๓๒]   |๓๒.๘| อชิเนน นิวตฺโถหํ           วากจีรธโร ตทา
                      ภาริยา ๑- ปูรยิตฺวาน          โกลํ หาสิ ๒- มมสฺสมํ ฯ
         |๓๒.๙| ตมฺหิ กาเล สิขี พุทฺโธ         เอโก อทุติโย อหุ
                     มมสฺสมํ อุปาคญฺฉิ            โชเตนฺโต ๓- สพฺพกาลิกํ ฯ
         |๓๒.๑๐| สกํ จิตฺตํ ปสาเทตฺวา        วนฺทิตฺวาน จ สุพฺพตํ
                       อุโภหตฺเถหิ ปคฺคยฺห        โกลํ พุทฺธสฺสทาสหํ ฯ
         |๓๒.๑๑| เอกตฺตึเส อิโต กปฺเป        ยํ ผลํ อททึ ตทา
                       ทุคฺคตึ นาภิชานามิ          โกลทานสฺสิทํ ผลํ ฯ
         |๓๒.๑๒| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา       วิหรามิ อนาสโว ฯ
         |๓๒.๑๓| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา    กตํ พุทฺธสฺส สาสนํ ฯ
         |๓๒.๑๔| ปฏิสมฺภิทา จตสฺโส          วิโมกฺขาปิจ อฏฺฐิเม
                       ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
            อิตฺถํ สุทํ อายสฺมา โกลทายโก เถโร อิมา คาถาโย อภาสิตฺถาติ ฯ
                                  โกลทายกตฺเถรสฺส อปทานํ สมตฺตํ ฯ
@เชิงอรรถ: ๑ ม. ขาริยา ฯ ยุ. ขาริภารํ หริตฺวาน ฯ ๒ ม. หาสึ ฯ ยุ. โกลมาหริมสฺสมํ ฯ
@๓ ม. ชานนฺโต ฯ
                               ตติยํ เวลุวผลิยตฺเถราปทานํ ๑- (๔๔๓)
     [๓๓]   |๓๓.๑๕| จนฺทภาคานทีตีเร       อสฺสโม สุกโต มม
                       เวลุวรุกฺเขหิ อากิณฺโณ      นานาทุมนิเสวิโต ฯ
         |๓๓.๑๖| สุคนฺธํ เวลุวํ ทิสฺวา           พุทฺธเสฏฺฐํ อนุสฺสรึ
                       ขาริภารํ ปูรยิตฺวา             ตุฏฺโฐ สํวิคฺคมานโส ฯ
         |๓๓.๑๗| กกุสนฺธํ อุปาคมฺม           พิลฺลปกฺกมทาสหํ
                       ปุญฺญกฺเขตฺตสฺส ธีรสฺส     วิปฺปสนฺเนน เจตสา ฯ
         |๓๓.๑๘| อิมสฺมึเยว กปฺปสฺมึ          ยํ ผลํ อททึ ตทา
                       ทุคฺคตึ นาภิชานามิ         ผลทานสฺสิทํ ผลํ ฯ
         |๓๓.๑๙| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๓๓.๒๐| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา    กตํ พุทฺธสฺส สาสนํ ฯ
         |๓๓.๒๑| ปฏิสมฺภิทา จตสฺโส          วิโมกฺขาปิจ อฏฺฐิเม
                       ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
            อิตฺถํ สุทํ อายสฺมา เวลุวผลิโย เถโร อิมา คาถาโย อภาสิตฺถาติ ฯ
                                  เวลุวผลิยตฺเถรสฺส อปทานํ สมตฺตํ ฯ
@เชิงอรรถ: ๑ ม. พิลฺลิยตฺเถร... ฯ ยุ. พิลฺลผลิยตฺเถร... ฯ
                              จตุตฺถํ ภลฺลาตกทายกตฺเถราปทานํ (๔๔๔)
     [๓๔]   |๓๔.๒๒| สุวณฺณวณฺณํ สมฺพุทฺธํ  ทฺวตฺตึสวรลกฺขณํ
                       ปวนคฺเคน คจฺฉนฺตํ          สาลราชํว ผุลฺลิตํ ฯ
         |๓๔.๒๓| ติณสนฺถรํ ปญฺญาเปตฺวา  พุทฺธเสฏฺฐํ อยาจหํ
                       อนุกมฺปตุ มํ พุทฺโธ          ภิกฺขํ อิจฺฉามิ ทาตเว ฯ
         |๓๔.๒๔| อนุกมฺปโก การุณิโก        อตฺถทสฺสี มหายโส
                       มม สงฺกปฺปมญฺญาย       โอรุยฺห ๑- มม อสฺสเม ฯ
         |๓๔.๒๕| โอโรหิตฺวาน สมฺพุทฺโธ      นิสีทิ ปณฺณสนฺถเร
                       ภลฺลาตกํ คเหตฺวาน         พุทฺธเสฏฺฐสฺสทาสหํ ฯ
         |๓๔.๒๖| มม นิชฺฌายมานสฺส        ปริภุญฺชิ ตทา ชิโน
                       ตตฺถ จิตฺตํ ปสาเทตฺวา      อภิวนฺทึ ตทา ชินํ ฯ
         |๓๔.๒๗| อฏฺฐารเส กปฺปสเต           ยํ ผลํ อททึ ตทา
                       ทุคฺคตึ นาภิชานามิ          ผลทานสฺสิทํ ผลํ ฯ
         |๓๔.๒๘| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา       วิหรามิ อนาสโว ฯ
         |๓๔.๒๙| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา    กตํ พุทฺธสฺส สาสนํ ฯ
         |๓๔.๓๐| ปฏิสมฺภิทา จตสฺโส          วิโมกฺขาปิจ อฏฺฐิเม
                       ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
@เชิงอรรถ: ๑ ม. ยุ. โอรูหิ ฯ
            อิตฺถํ สุทํ อายสฺมา ภลฺลาตกทายโก เถโร อิมา คาถาโย อภาสิตฺถาติ ฯ
                               ภลฺลาตกทายกตฺเถรสฺส อปทานํ สมตฺตํ ฯ
                            ปญฺจมํ อุมฺมาปุปฺผิยตฺเถราปทานํ ๑- (๔๔๕)
     [๓๕]   |๓๕.๓๑| นิโคฺรเธ หริโตภาเส       สํวิรูฬฺหมฺหิ ปาทเป
                   อุมฺมามาลญฺหิ ๒- ปคฺคยฺห   โพธิยา อภิโรปยึ ฯ
     |๓๕.๓๒| อิมสฺมึเยว กปฺปสฺมึ              ยํ โพธิมภิปูชยึ ๓-
                   ทุคฺคตึ นาภิชานามิ              โพธิปูชายิทํ ผลํ ฯ
     |๓๕.๓๓| กิเลสา ฌาปิตา มยฺหํ           ภวา สพฺเพ สมูหตา
                   นาโคว พนฺธนํ เฉตฺวา           วิหรามิ อนาสโว ฯ
     |๓๕.๓๔| สฺวาคตํ วต เม อาสิ              มม พุทฺธสฺส สนฺติเก
                   ติสฺโส วิชฺชา อนุปฺปตฺตา        กตํ พุทฺธสฺส สาสนํ ฯ
     |๓๕.๓๕| ปฏิปสมฺภิทา จตสฺโส           วิโมกฺขาปิจ อฏฺฐิเม
                   ฉฬภิญฺญา สจฺฉิกตา            กตํ พุทฺธสฺส สาสนนฺติ ฯ
        อิตฺถํ สุทํ อายสฺมา อุมฺมาปุปฺผิโย เถโร อิมา คาถาโย อภาสิตฺถาติ ฯ
                                 อุมฺมาปุปฺผิยตฺเถรสฺส อปทานํ สมตฺตํ ฯ
                                  ฉฏฺฐํ อมฺพาฏกิยตฺเถราปทานํ (๔๔๖)
     [๓๖]   |๓๖.๓๖| สุปุปฺผิตํ สาลวนํ        โอคฺคยฺห เวสฺสภู มุนิ
                       นิสีทิ คิริทุคฺเคสุ                  อภิชาโตว เกสรี ฯ
@เชิงอรรถ: ๑ ม. อุตฺตริปุปฺผิยตฺเถร... ฯ ยุ. อุตุฬฺหิปุปฺผิยตฺเถร... ฯ
@๒ ม. อุตฺตริมาลํ ฯ ยุ. อุตุฬฺหิมาลํ ฯ ๓ ยุ. ยํ ปุปฺผมภิโรปยึ ฯ
         |๓๖.๓๗| ปสนฺนจิตฺโต สุมโน           อมฺพาฏกมปูชยึ
                       ปุญฺญกฺเขตฺตํ มหาวีรํ ๑-    ปสนฺโน เสหิ ปาณิภิ ฯ
         |๓๖.๓๘| เอกตฺตึเส อิโต กปฺเป         ยํ ปุปฺผมภิโรปยึ
                       ทุคฺคตึ นาภิชานามิ            พุทฺธปูชายิทํ ผลํ ฯ
         |๓๖.๓๙| กิเลสา ฌาปิตา มยฺหํ        ภวา สพฺเพ สมูหตา
                       นาโคว พนฺธนํ เฉตฺวา        วิหรามิ อนาสโว ฯ
         |๓๖.๔๐| สฺวาคตํ วต เม อาสิ           มม พุทฺธสฺส สนฺติเก
                       ติสฺโส วิชฺชา อนุปฺปตฺตา     กตํ พุทฺธสฺส สาสนํ ฯ
         |๓๖.๔๑| ปฏิสมฺภิทา จตสฺโส           วิโมกฺขาปิจ อฏฺฐิเม
                       ฉฬภิญฺญา สจฺฉิกตา         กตํ พุทฺธสฺส สาสนนฺติ ฯ
            อิตฺถํ สุทํ อายสฺมา อมฺพาฏกิโย เถโร อิมา คาถาโย อภาสิตฺถาติ ฯ
                                  อิมฺพาฏกิยตฺเถรสฺส อปทานํ สมตฺตํ ฯ
                                  สตฺตมํ สีหาสนิกตฺเถราปทานํ (๔๔๗)
     [๓๗]   |๓๗.๔๒| ปทุมุตฺตรสฺส ภควโต   สพฺพภูตหิเตสิโน
                       ปสนฺนจิตฺโต สุมโน          สีหาสนมทาสหํ ฯ
         |๓๗.๔๓| เทวโลเก มนุสฺเส วา         ยตฺถ ยตฺถ วสามหํ
                       ลภามิ วิปุลํ พฺยมฺหํ          สีหาสนสฺสิทํ ผลํ ฯ
         |๓๗.๔๔| สุวณฺณรูปิยมยา              โลหิตงฺกมยา พหู
                       มณิมยา จ ปลฺลงฺกา        นิพฺพตฺตนฺติ มมํ สทา ฯ
@เชิงอรรถ: ๑ ม. อนุตฺตรํ ฯ
         |๓๗.๔๕| โพธิยา อาสนํ กตฺวา        ชลชุตฺตมนามิโน
                       อุจฺเจ กุเล ปชายามิ         อโห ธมฺมสุธมฺมตา ฯ
         |๓๗.๔๖| สตสหสฺเส อิโต กปฺเป       สีหาสนมกาสหํ
                       ทุคฺคตึ นาภิชานามิ          สีหาสนสฺสิทํ ผลํ ฯ
         |๓๗.๔๗| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา       วิหรามิ อนาสโว ฯ
         |๓๗.๔๘| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๓๗.๔๙| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
            อิตฺถํ สุทํ อายสฺมา สีหาสนิโก เถโร อิมา คาถาโย อภาสิตฺถาติ ฯ
                                  สีหาสนิกตฺเถรสฺส อปทานํ สมตฺตํ ฯ
                                  อฏฺฐมํ ปาทปีฐิยตฺเถราปทานํ (๔๔๘)
     [๓๘]   |๓๘.๕๐| สุเมโธ นาม สมฺพุทฺโธ   การุณิโก ๑- มหามุนิ
                        ตารยิตฺวา พหู สตฺเต        นิพฺพุโต โส มหายโส ฯ
         |๓๘.๕๑| สีหาสนสฺส สามนฺตา       สุเมธสฺส มเหสิโน
                       ปสนฺนจิตฺโต สุมโน          ปาทปีฐมการยึ ฯ
         |๓๘.๕๒| กตฺวาน กุสลํ กมฺมํ           สุขปากํ สุขุทฺรยํ ๒-
                       ปุญฺญกมฺเมน สํยุตฺโต      ตาวตึสํ อคญฺฉหํ ฯ
@เชิงอรรถ: ๑ ม. ยุ. อคฺโค การุณิโก มุนิ ฯ ๒ ยุ. สุขินฺทฺริยํ ฯ
         |๓๘.๕๓| ตตฺถ เม วสมานสฺส         ปุญฺญกมฺมสมงฺคิโน
                        ปทานิ อุทฺธรนฺตสฺส        โสณฺณปีฐา ภวนฺติ เม ฯ
         |๓๘.๕๔| ลาภา เตสํ สุลทฺธนฺเต      เย ลภนฺติ อุปสฺสุติ ๑-
                        นิพฺพุเต การํ กตฺวาน       ลภนฺติ วิปุลํ สุขํ ฯ
         |๓๘.๕๕| มยาปิ สุกตํ กมฺมํ            วาณิชฺเช สุปโยชิตํ
                        ปาทปีฐํ กริตฺวาน            โสณฺณปีฐํ ลภามหํ ฯ
         |๓๘.๕๖| ยํ ยํ ทิสํ ปกฺกมามิ           เกนจิ กิจฺจเยนหํ ๒-
                       โสณฺณปีเฐ อกฺกมามิ       ปุญฺญกมฺมสฺสิทํ ผลํ ฯ
         |๓๘.๕๗| ตึสกปฺปสหสฺสมฺหิ           ยํ กมฺมมกรึ ตทา
                       ทุคฺคตึ นาภิชานามิ          ปาทปีฐสฺสิทํ ผลํ ฯ
         |๓๘.๕๘| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา       วิหรามิ อนาสโว ฯ
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๓๘.๕๙| ปฏิสมฺภิทา จตสฺโส          วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา ปาทปีฐิโย เถโร อิมา คาถาโย อภาสิตฺถาติ ฯ
                                 ปาทปีฐิยตฺเถรสฺส อปทานํ สมตฺตํ ฯ
@เชิงอรรถ: ๑ ม. ยุ. อุปสฺสุตึ ฯ ๒ ยุ. ปจฺจเยนหํ ฯ
                              นวมํ เวทิยการกตฺเถราปทานํ ๑- (๔๔๙)
     [๓๙]   |๓๙.๖๐| ปทุมุตฺตรสฺส พุทฺธสฺส   โพธิยา ปาทปุตฺตเม
                       เวทิยํ สุกตํ กตฺวา             สกํ จิตฺตํ ปสาทยึ ฯ
         |๓๙.๖๑| อคฺโคฬารานิ ๒- ภณฺฑานิ  กตานิ อกตานิ จ
                       อนฺตลิกฺขา ปวสฺสนฺติ        เวทิกาย อิทํ ผลํ ฯ
         |๓๙.๖๒| อุภโต พฺยุฬฺหสงฺคาเม      ปกฺขนฺทนฺโต ภยานเก
                       ภยเภรวํ น ปสฺสามิ          เวทิกาย อิทํ ผลํ ฯ
         |๓๙.๖๓| มม สงฺกปฺปมญฺญาย       พฺยมฺหํ นิพฺพตฺตเต สุภํ
                       สยนานิ มหคฺฆานิ           เวทิกาย อิทํ ผลํ ฯ
         |๓๙.๖๔| สตสหสฺเส อิโต กปฺเป      ยํ เวทิกมการยึ
                       ทุคฺคตึ นาภิชานามิ          เวทิกาย อิทํ ผลํ ฯ
         |๓๙.๖๕| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา       วิหรามิ อนาสโว ฯ
         |๓๙.๖๖| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๓๙.๖๗| ปฏิสมฺภิทา จตสฺโส          วิโมกฺขาปิจ อฏฺฐิเม
                       ฉฬภิญฺญา สจฺฉิกตา        กตํ พุทฺธสฺส สาสนนฺติ ฯ
  อิตฺถํ สุทํ อายสฺมา เวทิยการโก เถโร อิมา คาถาโย อภาสิตฺถาติ ฯ
                                เวทิยการกตฺเถรสฺส อปทานํ สมตฺตํ ฯ
@เชิงอรรถ: ๑ ม. ยุ. เวทิการตฺเถร ... ฯ ๒ ม. อโตฬารานิ ฯ ยุ. อโถฬารานิ ฯ
                               ทสมํ โพธิฆรการกตฺเถราปทานํ ๑- (๔๕๐)
     [๔๐] |๔๐.๖๘| สิทฺธตฺถสฺส ภควโต        ทิปทินฺทสฺส ตาทิโน
                       ปสนฺนจิตฺโต สุมโน            โพธิฆรมการยึ ฯ
         |๔๐.๖๙| ตุสฺสิตํ อุปปนฺโนมฺหิ          วสามิ รตเน ฆเร
                       น เม สีตํ ว อุณฺหํ วา         วาโต คตฺเต น สมฺผุเส ฯ
         |๔๐.๗๐| ปญฺจสฏฺฐิมฺหิโต กปฺเป      จกฺกวตฺติ อโหสหํ
                       กาสิกํ นาม นครํ               วิสุกมฺเมน มาปิตํ ฯ
         |๔๐.๗๑| ทสโยชนอายามํ               อฏฺฐโยชนวิตฺถตํ
                       น ตมฺหิ นคเร อตฺถิ            กฏฺฐํ วลฺลี จ มตฺติกา ฯ
         |๔๐.๗๒| ติริยํ โยชนํ อาสิ               อฑฺฒโยชนวิตฺถตํ
                       มงฺคโล นาม ปาสาโท       วิสุกมฺเมน มาปิโต ฯ
         |๔๐.๗๓| จูฬาสีติสหสฺสานิ              ถมฺภา โสวณฺณิยา อหุ
                       มณิมยา จ นิยฺยูหา           ฉทนํ รูปิยํ อหุ ฯ
         |๔๐.๗๔| สพฺพโสณฺณมยํ ฆรํ           วิสุกมฺเมน มาปิตํ
                       อชฺฌาวุตฺถํ มยา เอตํ         ฆรทานสฺสิทํ ผลํ ฯ
         |๔๐.๗๕| เต สพฺเพ อนุโภตฺวาน        เทวมานุสเก ภเว
                       อชฺช ปตฺโตมฺหิ นิพฺพานํ     สนฺติปทํ อนุตฺตรํ ฯ
         |๔๐.๗๖| ตึสกปฺปสหสฺสมฺหิ             โพธิฆรมการยึ
@เชิงอรรถ: ๑ ม. โพธิฆรทายตฺเถร ... ฯ ยุ. โพธิฆริยตฺเถร ... ฯ
                       ทุคฺคตึ นาภิชานามิ           ฆรทานสฺสิทํ ผลํ ฯ
         |๔๐.๗๗| กิเลสา ฌาปิตา มยฺหํ        ภวา สพฺเพ สมูหตา
                       นาโคว พนฺธนํ เฉตฺวา        วิหรามิ อนาสโว ฯ
         |๔๐.๗๘| สฺวาคตํ วต เม อาสิ           มม พุทฺธสฺส สนฺติเก
                       ติสฺโส วิชฺชา อนุปฺปตฺตา     กตํ พุทฺธสฺส สาสนํ ฯ
         |๔๐.๗๙| ปฏิสมฺภิทา จตสฺโส           วิโมกฺขาปิจ อฏฺฐิเม
                       ฉฬภิญฺญา สจฺฉิกตา         กตํ พุทฺธสฺส สาสนนฺติ ฯ
            อิตฺถํ สุทํ อายสฺมา โพธิฆรการโก เถโร อิมา คาถาโย อภาสิตฺถาติ ฯ
                                 โพธิฆรการกตฺเถรสฺส อปทานํ สมตฺตํ ฯ
                                                   อุทฺทานํ
                             วิเภทกิ โกลผลิ             พิลฺลภลฺลาตกปฺปโท
                             อุมฺมา อมฺพาฏกิ เจว     อาสนิ ปาทปีฐโก ฯ
                             เวทิกา โพธิฆริโก          คาถาโย คณิตาปิจ
                             เอกูนาสีติกา สพฺพา      อสฺมึ วคฺเค ปกิตฺติตา ฯ
                                      วิเภทกิวคฺโค ปญฺจจตฺตาฬีโส ฯ
                                            ---------------------


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๗-๖๖.
http://84000.org/tipitaka/pali/pali_item_s.php?book=33&item=32&items=9&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=33&item=32&items=9&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=32&items=9&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=32&items=9&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=32
             The Pali Atthakatha in Thai :-
http://84000.org/tipitaka/atthapali/read_th.php?B=50&A=5506
             The Pali Atthakatha in Roman :-
http://84000.org/tipitaka/atthapali/read_rm.php?B=50&A=5506
             สารบัญพระไตรปิฎกเล่มที่ ๓๓
http://84000.org/tipitaka/read/?index_33