พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                  ทุติยํ โมรหตฺถิยตฺเถราปทานํ (๔๕๒)
     [๔๒]   |๔๒.๙| โมรหตฺถํ คเหตฺวาน        อุเปสิ ๑- โลกนายกํ
                       ปสนฺนจิตฺโต สุมโน          โมรหตฺถํ อทาสหํ ฯ
         |๔๒.๑๐| อิมินา โมรหตฺเถน           เจตนาปณิธีหิ จ
                       นิพฺพุตา ๒- เม ตโย อคฺคี  ลภามิ วิปุลํ สุขํ ฯ
         |๔๒.๑๑| อโห พุทฺธา อโห ธมฺมา    อโห โน สตฺถุสมฺปทา
                       ทตฺวานหํ โมรหตฺถํ          ลภามิ วิปุลํ สุขํ ฯ
         |๔๒.๑๒| ติธคฺคี นิพฺพุตา มยฺหํ       ภวา สพฺเพ สมูหตา
                       สพฺพาสวา ปริกฺขีณา       นตฺถิ ทานิ ปุนพฺภโว ฯ
         |๔๒.๑๓| เอกตึเส อิโต กปฺเป          ยํ ทานมททินฺตทา
                       ทุคฺคตึ นาภิชานามิ         โมรหตฺถสฺสิทํ ผลํ ฯ
         |๔๒.๑๔| กิเลสา ฌาปิตา มยฺหํ       ภวา สพฺเพ สมูหตา
                       นาโคว พนฺธนํ เฉตฺวา       วิหรามิ อนาสโว ฯ
         |๔๒.๑๕| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๔๒.๑๖| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ
@เชิงอรรถ: ๑ ม. ยุ. อุเปสึ ฯ ๒ ม. นิพฺพายึสุ ตโย อคฺคี ฯ ยุ. นิพฺพนฺติเม ตโย อคฺคี ฯ
            อิตฺถํ สุทํ อายสฺมา โมรหตฺถิโย เถโร อิมา คาถาโย อภาสิตฺถาติ ฯ
                                 โมรหตฺถิยตฺเถรสฺส อปทานํ สมตฺตํ ฯ
                                ตติยํ สีหาสนพีชิยตฺเถราปทานํ (๔๕๓)
     [๔๓]   |๔๓.๑๗| ติสฺสสฺสาหํ ภควโต      โพธิรุกฺขํ อวนฺทิหํ ๑-
                       ปคฺคยฺห วีชนึ ตตฺถ          สีหาสนมวิชฺชหํ ฯ
         |๔๓.๑๘| เทฺวนวุเต อิโต กปฺเป        สีหาสนมวิชฺชหํ
                       ทุคฺคตึ นาภิชานามิ         วีชนาย อิทํ ผลํ ฯ
         |๔๓.๑๙| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๔๓.๒๐| สฺวาคตํ วต เม อาสิ          มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๔๓.๒๑| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา สีหาสนพีชิโย เถโร อิมา คาถาโย อภาสิตฺถาติ ฯ
                                สีหาสนพีชิยตฺเถรสฺส อปทานํ สมตฺตํ ฯ
                                จตุตฺถํ ติณุกฺกธาริยตฺเถราปทานํ (๔๕๔)
     [๔๔]   |๔๔.๒๒| ปุทุมุตฺตรสฺส พุทฺธสฺส  โพธิยา ปาทปุตฺตเม
                         ปสนฺนจิตฺโต สุมโน      ตโย อุกฺเก อธารยึ ฯ
@เชิงอรรถ: ๑ ม. อวนฺทิยํ ฯ
         |๔๔.๒๓| สตสหสฺเส อิโต กปฺเป      ยาหํ ๑- อุกฺกมธารยึ
                        ทุคฺคตึ นาภิชานามิ        อุกฺกทานสฺสิทํ ผลํ ฯ
         |๔๔.๒๔| กิเลสา ฌาปิตา มยฺหํ      ภวา สพฺเพ สมูหตา
                        นาโคว พนฺธนํ เฉตฺวา     วิหรามิ อนาสโว ฯ
         |๔๔.๒๕| สฺวาคตํ วต เม อาสิ         มม พุทฺธสฺส สนฺติเก
                        ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
         |๔๔.๒๖| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา ติณุกฺกธาริโย เถโร อิมา คาถาโย อภาสิตฺถาติ ฯ
                                 ติณุกฺกธาริยตฺเถรสฺส อปทานํ สมตฺตํ ฯ
                              ปญฺจมํ อกฺกมนทายกตฺเถราปทานํ (๔๕๕)
     [๔๕]   |๔๕.๒๗| กกุสนฺธสฺส มุนิโน      พฺราหฺมณสฺส วุสีมโต
                        ทิวาวิหารํ วชโต             อกฺกมนมทาสหํ ฯ
         |๔๕.๒๘| อิมสฺมึเยว กปฺปสฺมึ         ยํ ทานมททินฺตทา
                        ทุคฺคตึ นาภิชานามิ        อกฺกมนสฺสิทํ ผลํ ฯ
         |๔๕.๒๙| กิเลสา ฌาปิตา มยฺหํ      ภวา สพฺเพ สมูหตา
                        นาโคว พนฺธนํ เฉตฺวา     วิหรามิ อนาสโว ฯ
         |๔๕.๓๐| สฺวาคตํ วต เม อาสิ         มม พุทฺธสฺส สนฺติเก
                        ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
@เชิงอรรถ: ๑ ม. โสหํ ฯ ยุ. โยหํ ฯ
         |๔๕.๓๑| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา อกฺกมนทายโก เถโร อิมา คาถาโย อภาสิตฺถาติ ฯ
                               อกฺกมนทายกตฺเถรสฺส อปทานํ สมตฺตํ ฯ
                                ฉฏฺฐํ วนโกรณฺฑิยตฺเถราปทานํ (๔๕๖)
     [๔๖]   |๔๖.๓๒| สิทฺธตฺถสฺส ภควโต     โลกเชฏฺฐสฺส ตาทิโน
                        วนโกรณฺฑมาทาย         พุทฺธสฺส อภิโรปยึ ฯ
         |๔๖.๓๓| จตุนวุเต อิโต กปฺเป         ยํ ปุปฺผมภิโรปยึ
                        ทุคฺคตึ นาภิชานามิ        พุทฺธปูชายิทํ ผลํ ฯ
         |๔๖.๓๔| กิเลสา ฌาปิตา มยฺหํ      ภวา สพฺเพ สมูหตา
                        นาโคว พนฺธนํ เฉตฺวา     วิหรามิ อนาสโว ฯ
         |๔๖.๓๕| สฺวาคตํ วต เม อาสิ         มม พุทฺธสฺส สนฺติเก
                        ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
         |๔๖.๓๖| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา วนโกรณฺฑิโย เถโร อิมา คาถาโย อภาสิตฺถาติ ฯ
                              วนโกรณฺฑิยตฺเถรสฺส อปทานํ สมตฺตํ ฯ
                                              วีสติมํ ภาณวารํ ฯ
                               สตฺตมํ เอกฉตฺติยตฺเถราปทานํ (๔๕๗)
     [๔๗]   |๔๗.๓๗| องฺคารชาตา ปฐวี       กุกฺกุฬานุคตา มหิ
                       ปทุมุตฺตโร ภควา            อพฺโภกาสมฺหิ จงฺกมิ ฯ
         |๔๗.๓๘| ปณฺฑรํ ฉตฺตมาทาย        อทฺธานํ ปติปชฺชหํ
                       ตตฺถ ทิสฺวาน สมฺพุทฺธํ     จิตฺตํ ๑- เม อุปปชฺชถ ฯ
         |๔๗.๓๙| มรีจิโมผุนา ๒- ภูมิ         องฺคาราว มหี อยํ
                       อุปฏฺฐนฺติ ๓- มหาวาตา  สรีรกายุเขปนา ๔- ฯ
         |๔๗.๔๐| สีตํ อุณฺหํ วิหนติ ๕-        วาตาตปนิวารณํ
                       ปฏิคฺคณฺห อิมํ ฉตฺตํ        ผสฺสยิสฺสามิ นิพฺพุตึ ฯ
         |๔๗.๔๑| อนุกมฺปโก การุณิโก       ปทุมุตฺตโร มหายโส
                       มม สงฺกปฺปมญฺญาย       ปฏิคฺคณฺหิ ตทา ชิโน ฯ
         |๔๗.๔๒| ตึสกปฺปานิ เทวินฺโท        เทวรชฺชมการยึ
                       สตานํ ปญฺจกฺขตฺตุํ จ       จกฺกวตฺติ อโหสหํ ฯ
         |๔๗.๔๓| ปเทสรชฺชํ วิปุลํ               คณนาโต อสงฺขยํ
                       อนุโภมิ สกํ กมฺมํ            ปุพฺเพ สุกตมตฺตโน ฯ
         |๔๗.๔๔| อยํ เม ปจฺฉิมา ชาติ         จริโม วตฺตเต ภโว
                       อชฺชาปิ เสตฉตฺตํ เม        สพฺพกาลํ ธรียติ ฯ
         |๔๗.๔๕| สตสหสฺเส อิโต กปฺเป      ยํ ฉตฺตมททึ ตทา
                       ทุคฺคตึ นาภิชานามิ         ฉตฺตทานสฺสิทํ ผลํ ฯ
@เชิงอรรถ: ๑ ม. ยุ. วิตฺติ ฯ ๒ ม. มรีจิโยตฺถฏา ฯ ยุ. มรีจิโวผุฏา ฯ ๓ ม. อุปหนฺติ ฯ
@ยุ. อุปวายนฺติ ฯ ๔ ม. สรีรสฺสาสุเขปนา ฯ ยุ. สรีรสฺสานุเขปนา ฯ ๕ ม. วิหนนฺตํ ฯ
@ยุ. วิหรนฺติ ฯ
         |๔๗.๔๖| กิเลสา ฌาปิตา มยฺหํ      ภวา สพฺเพ สมูหตา
                       นาโคว พนฺธนํ เฉตฺวา      วิหรามิ อนาสโว ฯ
         |๔๗.๔๗| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๔๗.๔๘| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา เอกฉตฺติโย เถโร อิมา คาถาโย อภาสิตฺถาติ ฯ
                                  เอกฉตฺติยตฺเถรสฺส อปทานํ สมตฺตํ ฯ
                                 อฏฺฐมํ ชาติปุปฺผิยตฺเถราปทานํ (๔๕๘)
     [๔๘]   |๔๘.๔๙| ปรินิพฺพุเต ภควติ        ปทุมุตฺตเร มหายเส
                       ปุปฺผจงฺโกฏเก ๑- คเหตฺวา  สรีรํ อภิโรปยึ ฯ
         |๔๘.๕๐| ตตฺถ จิตฺตํ ปสาเทตฺวา      นิมฺมานํ อคมาสหํ
                       เทวโลกํ คโต สนฺโต         ปุญฺญกมฺมํ จรามหํ ฯ
         |๔๘.๕๑| อมฺพรา ปุปฺผวสฺโส เม     สพฺพกาลํ ปวสฺสติ
                       สมฺภวามิ ๒- มนุสฺเส เว    ราชา โหมิ มหายโส ฯ
         |๔๘.๕๒| ตหึ กุสุมวสฺโส เม           อภิวสฺสติ สพฺพทา
                       กาเยสุ ๓- ปุปฺผปูชาย      วาหสา สพฺพทสฺสิโน ฯ
         |๔๘.๕๓| อยํ ปจฺฉิมโก มยฺหํ          จริโม วตฺตเต ภโว
                       อชฺชาปิ ปุปฺผวสฺโส เม        อภิวสฺสติ สพฺพทา ฯ
@เชิงอรรถ: ๑ ม. ปุปฺผวฏํ สเก กตฺวา ฯ ๒ ม. ยุ. สํสรามิ มนุสฺเส เจ ฯ ๓ ม. ตสฺเสว ฯ
@ยุ. ตาเยว ฯ
         |๔๘.๕๔| สตสหสฺเส อิโต กปฺเป      ยํ ปุปฺผํ อภิโรปยึ
                        ทุคฺคตึ นาภิชานามิ        เทหปูชายิทํ ผลํ ฯ
         |๔๘.๕๕| กิเลสา ฌาปิตา มยฺหํ      ภวา สพฺเพ สมูหตา
                        นาโคว พนฺธนํ เฉตฺวา     วิหรามิ อนาสโว ฯ
         |๔๘.๕๖| สฺวาคตํ วต เม อาสิ         มม พุทฺธสฺส สนฺติเก
                        ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๔๘.๕๗| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา ชาติปุปฺผิโย เถโร อิมา คาถาโย อภาสิตฺถาติ ฯ
                                  ชาติปุปฺผิยตฺเถรสฺส อปทานํ สมตฺตํ ฯ
                                นวมํ สตฺติปณฺณิยตฺเถราปทานํ ๑- (๔๕๙)
     [๔๙]   |๔๙.๕๘| นีหรนฺเต สรีรมฺหิ        วิชฺชมานาสุ ๒- เภริสุ
                        ปสนฺนจิตฺโต สุมโน        สตฺติปุปฺผํ อปูชยึ ฯ
         |๔๙.๕๙| สตสหสฺเส อิโต กปฺเป      ยํ ปุปฺผํ อภิปูชยึ
                        ทุคฺคตึ นาภิชานามิ        เทหปูชายิทํ ผลํ ฯ
         |๔๙.๖๐| กิเลสา ฌาปิตา มยฺหํ      ภวา สพฺเพ สมูหตา
                        นาโคว พนฺธนํ เฉตฺวา     วิหรามิ อนาสโว ฯ
         |๔๙.๖๑| สฺวาคตํ วต เม อาสิ         มม พุทฺธสฺส สนฺติเก
                        ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
@เชิงอรรถ: ๑ ม. ปฏฺฏิปุปฺผิยตฺเถราปทานํ ฯ ๒ ม. ยุ. วชฺชมานาสุ ฯ
         |๔๙.๖๒| ปฏิสมฺภิทา จตสฺโส         วิโมกฺขาปิจ อฏฺฐิเม
                        ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา สตฺติปณฺณิโย เถโร อิมา คาถาโย อภาสิตฺถาติ ฯ
                                 สตฺติปณฺณิยตฺเถรสฺส อปทานํ สมตฺตํ ฯ
                                     ทสมํ คนฺธปูชกตฺเถราปทานํ (๔๖๐)
     [๕๐]   |๕๐.๖๓| จิตเกสุ กุรุมาเนสุ       นานาคนฺเธ สมาหเฏ
                        ปสนฺนจิตฺโต สุมโน        คนฺธมุฏฺฐึ อปูชยึ ฯ
         |๕๐.๖๔| สตสหสฺเส อิโต กปฺเป      จิตกํ ยํ อปูชยึ
                        ทุคฺคตึ นาภิชานามิ        จิตปูชายิทํ ผลํ ฯ
         |๕๐.๖๕| กิเลสา ฌาปิตา มยฺหํ      ภวา สพฺเพ สมูหตา
                        นาโคว พนฺธนํ เฉตฺวา     วิหรามิ อนาสโว ฯ
         |๕๐.๖๖| สฺวาคตํ วต เม อาสิ         มม พุทฺธสฺส สนฺติเก
                       ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
         |๕๐.๖๗| ปฏิสมฺภิทา จตสฺโส         วิโมกฺขาปิจ อฏฺฐิเม
                       ฉฬภิญฺญา สจฺฉิกตา       กตํ พุทฺธสฺส สาสนนฺติ ฯ
            อิตฺถํ สุทํ อายสฺมา คนฺธปูชโก เถโร อิมา คาถาโย อภาสิตฺถาติ ฯ
                                  คนฺธปูชกตฺเถรสฺส อปทานํ สมตฺตํ ฯ
                                                   อุทฺทานํ
                           ชคตี โมรหตฺโถ จ              อาสนิ อุกฺกธารโก
                           อกฺกมิ วนโกรณฺฑิ             ฉตฺตโท ชาติปูชโก ฯ
                           สตฺติปณฺณิโย เถโร จ         ทสโม คนฺธปูชโก
                           สตฺตสฏฺฐี จ คาถาโย         คณิตาโย วิภาวิหิ ฯ
                                       ชคติทายกวคฺโค ฉจตฺตาฬีโส ฯ
                                           ----------------------


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๖๘-๗๖.
http://84000.org/tipitaka/pali/pali_item_s.php?book=33&item=42&items=9&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=33&item=42&items=9&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=42&items=9&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=42&items=9&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=42
             สารบัญพระไตรปิฎกเล่มที่ ๓๓
http://84000.org/tipitaka/read/?index_33