บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
ปญฺญาสโม กึกณิปุปฺผวคฺโค ปฐมํ ตีณิกึกณิปุปฺผิยตฺเถราปทานํ (๔๙๑) [๘๑] |๘๑.๑| กณิการํว โชตนฺตํ นิสินฺนํ ปพฺพตนฺตเร อทฺทสํ วิรชํ พุทฺธํ วิปสฺสึ โลกนายกํ ฯ |๘๑.๒| ตีณิกึกณิปุปฺผานิ ปคฺคยฺห อภิโรปยึ สมฺพุทฺธํ อภิปูเชตฺวา คจฺฉามิ ทกฺขิณามุโข ฯ |๘๑.๓| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๘๑.๔| เอกนวุเต อิโต กปฺเป ยํ พุทฺธมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๘๑.๕| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๑.๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๘๑.๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ตีณิกึกณิปุปฺผิโย เถโร อิมา คาถาโย อภาสิตฺถาติ ฯ ตีณิกึกณิปุปฺผิยตฺเถรสฺส อปทานํ สมตฺตํ ฯ ทุติยํ ปํสุกูลปูชกตฺเถราปทานํ (๔๙๒) [๘๒] |๘๒.๘| หิมวนฺตสฺส อวิทูเร อุทพฺพโล ๑- นาม ปพฺพโต ตตฺถทฺทสํ ปํสุกูลํ ทุมคฺคมฺหิ วิลมฺพิตํ ฯ |๘๒.๙| ตีณิ กึกณิปุปฺผานิ โอจินิตฺวานหํ ตทา หฏฺโฐ หฏฺเฐน จิตฺเตน ปํสุกูลํ อปูชยึ ฯ |๘๒.๑๐| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๘๒.๑๑| เอกนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ ปูเชตฺวา อรหทฺธชํ ฯ |๘๒.๑๒| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๒.๑๓| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๘๒.๑๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปํสุกูลปูชโก เถโร อิมา คาถาโย อภาสิตฺถาติ ฯ ปํสุกูลปูชกตฺเถรสฺส อปทานํ สมตฺตํ ฯ @เชิงอรรถ: ๑ ม. อุทงฺคโณ ฯ ยุ. อุทโก ฯ ตติยํ โกรณฺฑปุปฺผิยตฺเถราปทานํ (๔๙๓) [๘๓] |๘๓.๑๕| วนกมฺมิโก ปุเร อาสึ ปิตุปิตามเหนหํ ๑- ปสุมาเรน ชีวามิ กุสลํ เม น วิชฺชติ ฯ |๘๓.๑๖| มม อาสยสามนฺตา ติสฺโส โลกคฺคนายโก ตีณิ ปทานิ ทสฺเสสิ อนุกมฺปาย จกฺขุมา ฯ |๘๓.๑๗| อกฺกมนฺเต ๒- ปเท ทิสฺวา ติสฺสสฺส นาม สตฺถุโน หฏฺโฐ หฏฺเฐน จิตฺเตน ปเท จิตฺตํ ปสาทยึ ฯ |๘๓.๑๘| โกรณฺฑํ ปุปฺผิตํ ทิสฺวา ปาทปํ ธรณีรุหํ จงฺโกฏกํ ๓- คเหตฺวาน ปทเสฏฺฐํ อปูชยึ ฯ |๘๓.๑๙| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๘๓.๒๐| ยํ ยํ โยนูปปชฺชามิ เทวตฺตํ อถ มานุสํ โกรณฺฑกฉวิ โหมิ สปฺปภาโส ๔- ภวามหํ ฯ |๘๓.๒๑| เทฺวนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ ปทปูชายิทํ ผลํ ฯ |๘๓.๒๒| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๓.๒๓| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ @เชิงอรรถ: ๑ ม. ปิตุมาตุมเตนหํ ฯ ๒ ม. ยุ. อกฺกนฺเต จ ... ฯ ๓ ม. สโกสกํ ฯ ๔ ม. @สุปฺปภาโส ฯ |๘๓.๒๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โกรณฺฑปุปฺผิโย เถโร อิมา คาถาโย อภาสิตฺถาติ ฯ โกรณฺฑปุปฺผิยตฺเถรสฺส อปทานํ สมตฺตํ ฯ จตุตฺถํ กึสุกปุปฺผิยตฺเถราปทานํ (๔๙๔) [๘๔] |๘๔.๒๕| กึสุกํ ปุปฺผิตํ ทิสฺวา ปคฺคเหตฺวาน อญฺชลึ พุทฺธเสฏฺฐํ สริตฺวาน อากาเส อภิปูชยึ ฯ |๘๔.๒๖| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๘๔.๒๗| เอกตฺตึเส อิโต กปฺเป ยํ กมฺมมกรึ ตทา ทุคฺคตึ นาภิชานามิ พุทฺธปูชายิทํ ผลํ ฯ |๘๔.๒๘| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๔.๒๙| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๘๔.๓๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ อิตฺถํ สุทํ อายสฺมา กึสุกปุปฺผิโย เถโร อิมา คาถาโย อภาสิตฺถาติ ฯ กึสุกปุปฺผิยตฺเถรสฺส อปทานํ สมตฺตํ ฯ ปญฺจมํ อุปฑฺฒทุสฺสทายกตฺเถราปทานํ (๔๙๕) [๘๕] |๘๕.๓๑| ปทุมุตฺตรภควโต สุชาโต นาม สาวโก ปํสุกูลํ คเวสนฺโต สงฺกาเร รถิยา ๑- ตทา ฯ |๘๕.๓๒| นคเร หํสวติยา ปเรสํ ภติโก ๒- อหํ อุปฑฺฒทุสฺสํ ทตฺวาน สิรสา อภิวาทยึ ฯ |๘๕.๓๓| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๘๕.๓๔| เตตฺตึสกฺขตฺตุํ เทวินฺโท เทวรชฺชมการยึ สตฺตสตฺตติขตฺตุญฺจ จกฺกวตฺติ อโหสหํ ฯ |๘๕.๓๕| ปเทสรชฺชํ วิปุลํ คณนาโต อสงฺขยํ อุปฑฺฒทุสฺสทาเนน โมทามิ อกุโตภโย ฯ |๘๕.๓๖| อิจฺฉมาโน อหํ ๓- อชฺช สกานนํ สปพฺพตํ โขมทุสฺเสหิ ฉาเทยฺยํ อฑฺฒทุสฺสสฺสิทํ ผลํ ฯ |๘๕.๓๗| สตสหสฺเส อิโต กปฺเป ยํ ทานมททึ ตทา ทุคฺคตึ นาภิชานามิ อฑฺฒทุสฺสสฺสิทํ ผลํ ฯ |๘๕.๓๘| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๕.๓๙| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ @เชิงอรรถ: ๑ ม. จรเต ฯ ยุ. จรเต สทา ฯ ๒ ม. ยุ. ภตโก ฯ ๓ โป. ม. ยุ. จหํ ฯ |๘๕.๔๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อุปฑฺฒทุสฺสทายโก เถโร อิมา คาถาโย อภาสิตฺถาติ ฯ อุปฑฺฒทุสฺสทายกตฺเถรสฺส อปทานํ สมตฺตํ ฯ ฉฏฺฐํ ฆตมณฺฑทายกตฺเถราปทานํ (๔๙๖) [๘๖] |๘๖.๔๑| สุจินฺติตํ ภควนฺตํ โลกเชฏฺฐํ นราสภํ อุปวิฏฺฐํ มหารญฺญํ วาตาพาเธน ปีฬิตํ ฯ |๘๖.๔๒| ทิสฺวา จิตฺตํ ปสาเทตฺวา ฆตมณฺฑํ อุปานยึ กตตฺตา อุปจิตตฺตา ๑- จ คงฺคา ภาคีรสี อยํ ฯ |๘๖.๔๓| มหาสมุทฺทา จตฺตาโร ฆตํ สมฺปชฺชเร มม อยญฺจ ปฐวี โฆรา อปฺปมาณา อสงฺขยา ฯ |๘๖.๔๔| มม สงฺกปฺปมญฺญาย ภวนฺติ ๒- เต มธุสกฺขรา จตุทฺทิสา ๓- อิเม รุกฺขา ปาทปา ธรณีรุหา ฯ |๘๖.๔๕| มม สงฺกปฺปมญฺญาย กปฺปรุกฺขา ภวนฺติ เต ปญฺญาสกฺขตฺตุํ เทวินฺโท เทวรชฺชมการยึ ฯ |๘๖.๔๖| เอกปญฺญาสกฺขตฺตุญฺจ จกฺกวตฺติ อโหสหํ ปเทสรชฺชํ วิปุลํ คณนาโต อสงฺขยํ ฯ |๘๖.๔๗| จตุนวุเต อิโต กปฺเป ยํ ทานมททึ ตทา ทุคฺคตึ นาภิชานามิ ฆตมณฺฑสฺสิทํ ผลํ ฯ @เชิงอรรถ: ๑ ม. ยุ. อาจิตตฺตา ฯ ๒ ม. ยุ. ภวเต มธุสกฺขรา ฯ ๓ ม. ยุ. จาตุทฺทีปา ฯ |๘๖.๔๘| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๖.๔๙| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๘๖.๕๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ฆตมณฺฑทายโก เถโร อิมา คาถาโย อภาสิตฺถาติ ฯ ฆตมณฺฑทายกตฺเถรสฺส อปทานํ สมตฺตํ ฯ สตฺตมํ อุทกทายกตฺเถราปทานํ (๔๙๗) [๘๗] |๘๗.๕๑| ปทุมุตฺตรพุทฺธสฺส ภิกฺขุสงฺเฆ อนุตฺตเร ปสนฺนจิตฺโต สุมโน ปานิฆฏํ ๑- อปูรยึ ฯ |๘๗.๕๒| ปพฺพตคฺเค ทุมคฺเค วา อากาเส วาถ ภูมิยํ ยทา ปานียมิจฺฉามิ ขิปฺปํ นิพฺพตฺตเต มมํ ฯ |๘๗.๕๓| สตสหสฺเส อิโต กปฺเป ยํ ทานมททึ ตทา ทุคฺคตึ นาภิชานามิ อุทกทานสฺสิทํ ผลํ ฯ |๘๗.๕๔| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๗.๕๕| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปตฺตา กตํ พุทฺธสฺส สาสนํ ฯ @เชิงอรรถ: ๑ โป. ยุ. ปานียฆฏํ ฯ |๘๗.๕๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อุทกทายโก เถโร อิมา คาถาโย อภาสิตฺถาติ ฯ อุทกทายกตฺเถรสฺส อปทานํ สมตฺตํ ฯ อฏฺฐมํ ปุฬินถูปิยตฺเถราปทานํ (๔๙๘) [๘๘] |๘๘.๕๗| หิมวนฺตสฺสวิทูเร ยมโก ๑- นาม ปพฺพโต อสฺสโม สุกโต มยฺหํ ปณฺณสาลา สุมาปิตา ฯ |๘๘.๕๘| นารโท นาม นาเมน ชฏิโล อุคฺคตาปโน จตุทฺทสสหสฺสานิ สิสฺสา ปริจรนฺติ มํ ฯ |๘๘.๕๙| ปฏิสลฺลีนโก สนฺโต เอวํ จินฺเตสหนฺตทา มหาชนา ๒- มํ ปูเชนฺติ นาหํ ปูเชมิ กิญฺจนํ ฯ |๘๘.๖๐| น เม โอวาทโก อตฺถิ วตฺตา โกจิ น วิชฺชติ อนาจริยุปชฺฌาโย วเน วาสํ อุเปมหํ ฯ |๘๘.๖๑| อุปาสมาโน ยมกํ ๓- ครุจิตฺตํ อุปฏฺฐเห โส เม อาจริโย นตฺถิ วนวาโส นิรตฺถโก ฯ |๘๘.๖๒| อายาคํ เม คเวสิยํ ๔- ครุภาวนิยํ ตถา สาสสฺสโย ๕- วสิสฺสามิ น โกจิ ครหิสฺสติ ฯ |๘๘.๖๓| อุตฺตานกูลา นทิกา สุปติตฺถา มโนรมา สุสุทฺธปุฬินากิณฺณา อวิทูเร มมสฺสมํ ฯ @เชิงอรรถ: ๑ โป. ยุ. สมงฺโค ฯ ๒ ม. สพฺโพ ชโน มํ ปูเชติ ฯ ยุ. สพฺพชโน ฯ ๓ โป. @ม. ยุ. ยมหํ ฯ ๔ ม. ยุ. คเวสิสฺสํ ฯ ๕ ม. ยุ. สาวสฺสโย ฯ |๘๘.๖๔| นทึ อมริกํ นาม อุปคนฺตฺวา ๑- อหนฺตทา สงฺกฑฺฒิตฺวาน ๒- ปุฬินํ อกํ ปุฬินเจติยํ ฯ |๘๘.๖๕| เย เต อเหสุํ สมฺพุทฺธา ภวนฺตกรณา มุนี เตสํ เอตาทิโส ถูโป ตํ นิมิตฺตํ กโรมหํ ฯ |๘๘.๖๖| กริตฺวา ปุฬิเน ๓- ถูปํ โสวณฺณํ มาปยึ อหํ โสณฺณกึกณิปุปฺผานิ สหสฺเส ตีณิ ปูชยึ ฯ |๘๘.๖๗| สายํ ปาตํ นมสฺสามิ ปีติชาโต ๔- กตญฺชลี สมฺมุขา วิย สมฺพุทฺธํ วนฺทึ ปุฬินเจติยํ ฯ |๘๘.๖๘| ยทา กิเลสา ชายนฺติ วิตกฺกา เคหนิสฺสิตา สรามิ สุกตํ ถูปํ ปจฺจเวกฺขามิ ตาวเท ฯ |๘๘.๖๙| อุปนิสฺสาย วิหรึ ๕- สตฺถวาหํ วินายกํ กิเลเส สํวเรยฺยาสิ ๖- น ยุตฺตํ ตว มาริส ฯ |๘๘.๗๐| สห อาวชฺชิเต ถูเป คารวํ โหติ เม ตทา กุวิตกฺเก วิโนเทสึ นาโค ตุตฺตฏฺฏิโต ๗- ยถา ฯ |๘๘.๗๑| เอวํ วิหรมานํ มํ มจฺจุราชาภิมทฺทถ ตตฺถ กาลํ กโต สนฺโต พฺรหฺมโลกํ อคจฺฉหํ ฯ |๘๘.๗๒| ยาวตายุํ วสิตฺวาน ติทิเว ๘- อุปปชฺชหํ อสีติกฺขตฺตุํ เทวินฺโท เทวรชฺชมการยึ ฯ |๘๘.๗๓| สตานํ ตีณิขตฺตุญฺจ จกฺกวตฺติ อโหสหํ ปเทสรชฺชํ วิปุลํ คณนาโต อสงฺขยํ ฯ @เชิงอรรถ: ๑ ม. อุปคนฺตวานหนฺตทา ฯ ๒ ม. ยุ. สํวฑฺฒยิตฺวา ฯ ๓ ม. ปุฬินํ ฯ @๔ ม. เวทชาโต ฯ ยุ. วิตฺติชาโต ฯ ๕ ม. วิหรํ ฯ ๖ ม. ยุ. สํวเสยฺยาสิ ฯ @๗ โป. ตุณฺณฏฺฏิโต ฯ ยุ. ตุตฺตทฺทิโต ฯ ๘ ยุ. ติทเส ฯ |๘๘.๗๔| เตสํ กึกณิปุปฺผานํ วิปากํ อนุโภมหํ พาวีสติสหสฺสานิ ปริวาเรนฺติ มํ ภเว ฯ |๘๘.๗๕| ถูปสฺส ปริจิณฺณตฺตา รโชชลฺลํ น ลิมฺปติ คตฺเต เสทา น มุญฺจนฺติ สปฺปภาโส ภวามหํ ฯ |๘๘.๗๖| อโห เม สุกโต ถูโป สุทิฏฺฐามริกา นที ถูปํ กตฺวาน ปุฬินํ ๑- ปตฺโตมฺหิ อจลํ ปทํ ฯ |๘๘.๗๗| กุสลํ กตฺตุกาเมน ชนฺตุนา สารคาหินา ๒- นตฺถิ เขตฺตํ อเขตฺตํ วา ปฏิปตฺติว สารกา ๓- ฯ |๘๘.๗๘| ยถาปิ พลวา โปโส อณฺณวํ ตริตุสฺสโห ๔- ปริตฺตํ กฏฺฐมาทาย ปกฺขนฺเทยฺย มหาสรํ ฯ |๘๘.๗๙| อิมาหํ กิฏฺฐํ ๕- นิสฺสาย ตริสฺสามิ มโหทธึ อุสฺสาเหน วิริเยน ตเรยฺย อุทธึ นโร ฯ |๘๘.๘๐| ตเถว เม กตํ กมฺมํ ปริตฺตํ โถกกญฺจ ๖- ยํ ตํ ๗- กมฺมํ อุปนิสฺสาย สํสารํ สมติกฺกมึ ฯ |๘๘.๘๑| ปจฺฉิเม ภวสมฺปตฺเต สุกฺกมูเลน โจทิโต สาวตฺถิยํ ปุเร ชาโต มหาสาเล สุอทฺธเก ฯ |๘๘.๘๒| สทฺธา มาตาปิตา มยฺหํ พุทฺธสฺส สรณํ คตา อุโภ ทิฏฺฐสุตา ๘- เอเต อนุวตฺตนฺติ สาสนํ ฯ |๘๘.๘๓| โพธิปปฺปฏิกํ คยฺห โสณฺณถูปํ อการยุํ สายํ ปาตํ นมสฺสนฺติ สกฺยปุตฺตสฺส สมฺมุขา ฯ @เชิงอรรถ: ๑ ยุ. ปุพิเน ฯ ๒ โป. ยุ. ปารคามินา ฯ ๓ ม. สาธกา ฯ ยุ. สาธิกา ฯ ๔ ม. ยุ. @ตริตุสฺสเห ฯ ๕ โป. ม. ยุ. กฏฺฐํ ฯ ๖ โป. ยุ. โถกกญฺจนํ ฯ ๗ ยุ. กตํ ฯ @๘ ม. ยุ. ทิฏฺฐปทา ฯ |๘๘.๘๔| อุโปสถมฺหิ ทิวเส โสณฺณถูปํ วินีหรุํ พุทฺธสฺส วณฺณํ กิตฺเตนฺตา ติยามํ วีตินามยุํ ฯ |๘๘.๘๕| สมา ๑- ทิสฺวานหํ ถูปํ สรึ ปุฬินเจติยํ เอกาสเน นิสีทิตฺวา อรหตฺตํ อปาปุณึ ฯ พาวีสติมํ ภาณวารํ ฯ |๘๘.๘๖| คเวสมาโน ตํ ธีรํ ธมฺมเสนาปติทฺทสํ อคารา นิกฺขมิตฺวาน ปพฺพชึ ตสฺส สนฺติเก ฯ |๘๘.๘๗| ชาติยา สตฺตวสฺเสน อรหตฺตํ อปาปุณึ อุปสมฺปาทยิ พุทฺโธ คุณมญฺญาย จกฺขุมา ฯ |๘๘.๘๘| ทารเกเนว สนฺเตน กิริยํ นิฏฺฐิตํ มยา กตํ เม กรณียชฺช สกฺยปุตฺตสฺส สาสเน ฯ |๘๘.๘๙| สพฺพเวรภยาตีโต สพฺพสงฺคาติโค อิสิ สาวโก เต มหาวีร โสณฺณถูปสฺสิทํ ผลํ ฯ |๘๘.๙๐| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๘.๙๑| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๘๘.๙๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ๑ ม. ยุ. สห ฯ อิตฺถํ สุทํ อายสฺมา ปุฬินถูปิโย เถโร อิมา คาถาโย อภาสิตฺถาติ ฯ ปุฬินถูปิยตฺเถรสฺส อปทานํ สมตฺตํ ฯ นวมํ นฬกุฏิกทายกตฺเถราปทานํ (๔๙๙) [๘๙] |๘๙.๙๓| หิมวนฺตสฺสวิทูเร หาริโก ๑- นาม ปพฺพโต สยมฺภู นารโท นาม รุกฺขมูเล วสิ ตทา ฯ |๘๙.๙๔| นฬาคารํ กริตฺวาน ติเณน ฉาทยึ อหํ จงฺกมํ โสธยิตฺวาน สยมฺภุสฺส อทาสหํ ฯ |๘๙.๙๕| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคจฺฉหํ ฯ |๘๙.๙๖| ตตฺถ เม สุกตํ พฺยมฺหํ นฬกุฏิกาย นิมฺมิตํ สฏฺฐิโยชนมุพฺพิทฺธํ ๒- ตึสโยชนวิตฺถตํ ฯ |๘๙.๙๗| จตุทฺทเสสุ กปฺเปสุ เทวโลเก รมึ อหํ เอกสตฺตติกฺขตฺตุญฺจ เทวรชฺชํ อการยึ ฯ |๘๙.๙๘| จตุตฺตึสติกฺขตฺตุญฺจ ๓- จกฺกวตฺติ อโหสหํ ปเทสรชฺชํ วิปุลํ คณนาโต อสงฺขยํ ฯ |๘๙.๙๙| ธมฺมปาสาทมารุยฺห สุญฺญาคารวรูปคํ ยถิจฺฉกาหํ วิหเร สกฺยปุตฺตสฺส สาสเน ฯ |๘๙.๑๐๐| เอกตฺตึเส อิโต กปฺเป ยํ กมฺมมกรึ ตทา ทุคฺคตึ นาภิชานามิ นฬกุฏิกายิทํ ผลํ ฯ @เชิงอรรถ: ๑ ม. หาริโต ฯ ยุ. ภาริโก ฯ ๒ ม. สพฺพตฺถ ...มุพฺเพธํ ฯ ๓ โป. ยุ. @จตุตฺตึสกฺขตฺตุญฺเจว ฯ ๔ ม. ยุ. สพฺพาการวรูปมํ ฯ |๘๙.๑๐๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๘๙.๑๐๒| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ |๘๙.๑๐๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา นฬกุฏิกทายโก เถโร อิมา คาถาโย อภาสิตฺถาติ ฯ นฬกุฏิกทายกตฺเถรสฺส อปทานํ สมตฺตํ ฯ ทสมํ ปิยาลผลทายกตฺเถราปทานํ (๕๐๐) [๙๐] |๙๐.๑๐๔| มิคลุทฺโธ ปุเร อาสึ วิวเน ๑- วิจรํ ตทา อทฺทสํ วิรชํ พุทฺธํ สพฺพธมฺมาน ปารคุํ ฯ |๙๐.๑๐๕| ปิยาลผลมาทาย พุทฺธเสฏฺฐสฺสทาสหํ ปุญฺญเขตฺตสฺส วีรสฺส ปสนฺโน เสหิ ปาณิภิ ฯ |๙๐.๑๐๖| เอกตฺตึเส อิโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ ฯ |๙๐.๑๐๗| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๙๐.๑๐๘| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ @เชิงอรรถ: ๑ ยุ. วิจิเน ฯ อิโต ปรํ อีทิสเมว ฯ |๙๐.๑๐๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปิยาลผลทายโก เถโร อิมา คาถาโย อภาสิตฺถาติ ฯ ปิยาลผลทายกตฺเถรสฺส อปทานํ สมตฺตํ ฯ อุทฺทานํ กึกณิ ปํสุกูลญฺจ วรโกรณฺฑกึสุกํ อุปฑฺฒทุสฺสิ ฆตโท อุทกํ ถูปการโก ฯ นฬาคาริ จ นวโม ปิยาลผลทายโก สตเมกญฺจ คาถานํ นวกญฺจ ตทุตฺตริ ฯ กึกณิปุปฺผวคฺโค ปญฺญาสโม ฯ อถ วคฺคุทฺทานํ เมตฺเตยฺยวคฺโค ภทฺทาลิ สกึสมฺมชฺชโกปิจ เอกวิหารี วิเภทโก ชคติ สาลปุปฺผิโย ฯ นฬมาลิ ปํสุกูลํ กีกณิปุปฺผิโก ตถา อสีติ เทฺว จ คาถาโย จตุทฺทสา สตานิ จ ฯ เมตฺเตยฺยวคฺคทสกํ ปญฺจมํ สตกํ สมตฺตํ ฯ -----------------------เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๑๒๕-๑๓๘. http://84000.org/tipitaka/pali/pali_item_s.php?book=33&item=81&items=10&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=33&item=81&items=10&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=81&items=10&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=81&items=10&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=81 The Pali Atthakatha in Thai :- http://84000.org/tipitaka/atthapali/read_th.php?B=50&A=5597 The Pali Atthakatha in Roman :- http://84000.org/tipitaka/atthapali/read_rm.php?B=50&A=5597 สารบัญพระไตรปิฎกเล่มที่ ๓๓ http://84000.org/tipitaka/read/?index_33
|
บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]