Anamataggasaṃyuttaṃ
------
paṭhamavaggo paṭhamo
[421] Evamme sutaṃ ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . tatra kho .pe. etadavoca
anamataggoyaṃ bhikkhave saṃsāro pubbā koṭi na paññāyati avijjānīvaraṇānaṃ
sattānaṃ taṇhāsaññojanānaṃ sandhāvataṃ saṃsarataṃ.
[422] Seyyathāpi bhikkhave puriso yaṃ imasmiṃ jambūdīpe
tiṇakaṭṭhasākhāpalāsaṃ tacchetvā ekajjhaṃ saṃhareyya ekajjhaṃ saṃharitvā
caturaṅgulaṃ caturaṅgulaṃ ghaṭikaṃ karitvā nikkhipeyya ayaṃ me mātā
tassā me mātu ayaṃ mātāti . apariyādinnā ca bhikkhave tassa
purisassa mātu mātaro assu atha imasmiṃ jambūdīpe tiṇakaṭṭhasākhāpalāsaṃ
parikkhayaṃ pariyādānaṃ gaccheyya taṃ kissa hetu anamataggoyaṃ bhikkhave
saṃsāro pubbā koṭi na paññāyati avijjānīvaraṇānaṃ sattānaṃ
taṇhāsaññojanānaṃ sandhāvataṃ saṃsarataṃ evaṃ dīgharattaṃ kho 1-
bhikkhave dukkhaṃ paccanubhūtaṃ tippaṃ paccanubhūtaṃ byasanaṃ paccanubhūtaṃ
kaṭasī 2- vaḍḍhitā . yāvañcidaṃ bhikkhave alameva sabbasaṅkhāresu
nibbindituṃ alaṃ virajjituṃ alaṃ vimuccitunti. Paṭhamaṃ.
[423] Sāvatthiyaṃ viharati ... tatra kho bhagavā ... Anamataggoyaṃ
@Footnote: 1 Ma. Yu. vo. evamuparipi . 2 Po. Yu. kaṭasi.
Bhikkhave saṃsāro pubbā koṭi na paññāyati avijjānīvaraṇānaṃ
sattānaṃ taṇhāsaññojanānaṃ sandhāvataṃ saṃsarataṃ.
[424] Seyyathāpi bhikkhave puriso imaṃ mahāpaṭhaviṃ kolaṭṭhimattaṃ
kolaṭṭhimattaṃ guḷikaṃ 1- karitvā nikkhipeyya ayaṃ [2]- me pitā tassa
me pitu ayaṃ pitāti . apariyādinnā ca bhikkhave tassa purisassa
pitu pitaro assu athāyaṃ mahāpaṭhavī parikkhayaṃ pariyādānaṃ gaccheyya
taṃ kissa hetu anamataggoyaṃ bhikkhave saṃsāro pubbā koṭi na
paññāyati avijjānīvaraṇānaṃ sattānaṃ taṇhāsaññojanānaṃ sandhāvataṃ
saṃsarataṃ evaṃ dīgharattaṃ kho bhikkhave dukkhaṃ paccanubhūtaṃ tippaṃ paccanubhūtaṃ
byasanaṃ paccanubhūtaṃ kaṭasī vaḍḍhitā . yāvañcidaṃ bhikkhave alameva
sabbasaṅkhāresu nibbindituṃ alaṃ virajjituṃ alaṃ vimuccitunti. Dutiyaṃ.
[425] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. taṃ kiṃ maññatha bhikkhave katamaṃ nu kho bahutaraṃ
yaṃ vā vo iminā dīghena addhunā sandhāvataṃ saṃsarataṃ
amanāpasampayogā manāpavippayogā kandantānaṃ rodantānaṃ
assu pasandaṃ paggharitaṃ yaṃ vā catūsu mahāsamuddesu udakanti .
Yathā kho mayaṃ bhante bhagavatā dhammaṃ desitaṃ ājānāma etadeva
bhante bahutaraṃ yaṃ no iminā dīghena addhunā sandhāvataṃ saṃsarataṃ
amanāpasampayogā manāpavippayogā kandantānaṃ rodantānaṃ
assu pasandaṃ paggharitaṃ na tveva catūsu mahāsamuddesu udakanti.
@Footnote: 1 Ma. Yu. mattikāguḷikaṃ . 2 Yu. kho.
[426] Sādhu sādhu bhikkhave sādhu kho me tumhe bhikkhave
evaṃ dhammaṃ desitaṃ ājānātha etadeva bhikkhave bahutaraṃ yaṃ vo
iminā dīghena addhunā sandhāvataṃ saṃsarataṃ amanāpasampayogā
manāpavippayogā kandantānaṃ rodantānaṃ assu pasandaṃ paggharitaṃ na
tveva catūsu mahāsamuddesu udakaṃ . dīgharattaṃ vo bhikkhave mātumaraṇaṃ
paccanubhūtaṃ tesaṃ vo mātumaraṇaṃ paccanubhontānaṃ amanāpasampayogā
manāpavippayogā kandantānaṃ rodantānaṃ assu pasandaṃ paggharitaṃ na
tveva catūsu mahāsamuddesu udakaṃ . dīgharattaṃ vo bhikkhave pitumaraṇaṃ
paccanubhūtaṃ ... bhātumaraṇaṃ paccanubhūtaṃ ... bhaginimaraṇaṃ paccanubhūtaṃ ...
Puttamaraṇaṃ paccanubhūtaṃ ... dhītumaraṇaṃ paccanubhūtaṃ ... ñātibyasanaṃ
paccanubhūtaṃ ... bhogabyasanaṃ paccanubhūtaṃ ... dīgharattaṃ vo bhikkhave
rogabyasanaṃ paccanubhūtaṃ tesaṃ vo rogabyasanaṃ paccanubhontānaṃ
amanāpasampayogā manāpavippayogā kandantānaṃ rodantānaṃ
assu pasandaṃ paggharitaṃ na tveva catūsu mahāsamuddesu udakaṃ taṃ
kissa hetu anamataggoyaṃ bhikkhave saṃsāro .pe. yāvañcidaṃ
bhikkhave alameva sabbasaṅkhāresu nibbindituṃ alaṃ virajjituṃ alaṃ
vimuccitunti. Tatiyaṃ.
[427] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. taṃ kiṃ maññatha bhikkhave katamaṃ nu kho
bahutaraṃ yaṃ vā vo iminā dīghena addhunā sandhāvataṃ saṃsarataṃ mātu
thaññaṃ pītaṃ yaṃ vā catūsu mahāsamuddesu udakanti . yathā kho
Mayaṃ bhante bhagavatā dhammaṃ desitaṃ ājānāma etadeva bhante
bahutaraṃ yaṃ no iminā dīghena addhunā sandhāvataṃ saṃsarataṃ mātu
thaññaṃ pītaṃ na tveva catūsu mahāsamuddesu udakanti.
[428] Sādhu sādhu bhikkhave sādhu kho me tumhe bhikkhave
evaṃ dhammaṃ desitaṃ ājānātha etadeva bhikkhave bahutaraṃ yaṃ vo
iminā dīghena addhunā sandhāvataṃ saṃsarataṃ mātu thaññaṃ pītaṃ na
tveva catūsu mahāsamuddesu udakaṃ taṃ kissa hetu anamataggoyaṃ
bhikkhave saṃsāro .pe. Alaṃ vimuccitunti. Catutthaṃ.
[429] Sāvatthiyaṃ viharati ... atha kho aññataro bhikkhu yena
bhagavā tenupasaṅkami upasaṅkamitvā .pe. ekamantaṃ nisinno
kho so bhikkhu bhagavantaṃ etadavoca kīvadīgho nu kho bhante
kappoti . dīgho kho bhikkhu kappo so na sukaro saṅkhātuṃ
ettakāni vassāni iti vā ettakāni vassasatāni iti vā
ettakāni vassasahassāni iti vā ettakāni vassasatasahassāni
iti vāti. Sakkā pana bhante upamā 1- kātunti.
[430] Sakkā bhikkhūti bhagavā avoca seyyathāpi bhikkhu mahāselo
pabbato yojanaṃ āyāmena yojanaṃ vitthārena yojanaṃ ubbedhena
acchiddo asusiro ekaghano tamenaṃ puriso vassasatassa vassasatassa
accayena kāsikena vatthena sakiṃ sakiṃ parimajjeyya khippataraṃ kho
so bhikkhu mahāselo pabbato iminā upakkamena parikkhayaṃ pariyādānaṃ
@Footnote: 1 Ma. upamaṃ. evamuparipi.
Gaccheyya na tveva kappo evaṃ dīgho kho 1- bhikkhu kappo .
Evaṃ dīghānaṃ kho bhikkhu kappānaṃ neko kappo saṃsito nekaṃ
kappasataṃ saṃsitaṃ nekaṃ kappasahassaṃ saṃsitaṃ nekaṃ kappasatasahassaṃ
saṃsitaṃ taṃ kissa hetu anamataggoyaṃ bhikkhu saṃsāro .pe. yāvañcidaṃ
bhikkhu alameva sabbasaṅkhāresu nibbindituṃ alaṃ virajjituṃ alaṃ
vimuccitunti. Pañcamaṃ.
[431] Sāvatthiyaṃ viharati ... atha kho aññataro bhikkhu yena
bhagavā .pe. ekamantaṃ nisinno kho so bhikkhu bhagavantaṃ etadavoca
kīvadīgho nu kho bhante kappoti . dīgho kho bhikkhu kappo
so na sukaro saṅkhātuṃ ettakāni vassāni iti vā .pe.
Ettakāni vassasatasahassāni iti vāti . sakkā pana bhante
upamā kātunti.
[432] Sakkā bhikkhūti bhagavā avoca seyyathāpi bhikkhu āyasaṃ
nagaraṃ yojanaṃ āyāmena yojanaṃ vitthārena yojanaṃ ubbedhena puṇṇaṃ
sāsapānaṃ guḷikābandhaṃ 2- tato puriso vassasatassa vassasatassa accayena
ekamekaṃ sāsapaṃ uddhareyya khippataraṃ kho so bhikkhu mahāsāsaparāsi
iminā upakkamena parikkhayaṃ pariyādānaṃ gaccheyya na tveva kappo
evaṃ dīgho kho bhikkhu kappo . evaṃ dīghānaṃ kho bhikkhu kappānaṃ neko
kappo saṃsito nekaṃ kappasataṃ saṃsitaṃ nekaṃ kappasahassaṃ saṃsitaṃ
nekaṃ kappasatasahassaṃ saṃsitaṃ taṃ kissa hetu anamataggoyaṃ bhikkhu
@Footnote: 1 Ma. Yu. khosaddo natthi . 2 Ma. guḷikābaddhaṃ. Yu. cuḷikābaddhaṃ.
Saṃsāro .pe. Alaṃ vimuccitunti. Chaṭṭhaṃ.
[433] Sāvatthiyaṃ viharati ... atha kho sambahulā bhikkhū yena
bhagavā .pe. ekamantaṃ nisinnā kho te bhikkhū bhagavantaṃ etadavocuṃ
kīvabahukā nu kho bhante kappā abbhatītā atikkantāti . bahukā
kho bhikkhave kappā abbhatītā atikkantā te na sukarā saṅkhātuṃ
ettakā kappā iti vā ettakāni kappasatāni iti vā
ettakāni kappasahassāni iti vā ettakāni kappasatasahassāni
iti vāti. Sakkā pana bhante upamā kātunti.
[434] Sakkā bhikkhaveti bhagavā avoca idhassu bhikkhave
cattāro sāvakā vassasatāyukā vassasatajīvino te ce 1- divase
divase kappasatasahassaṃ kappasatasahassaṃ anussareyyuṃ . ananussaritāva 2-
bhikkhave tehi kappā assu . atha kho me 3- cattāro sāvakā
vassasatāyukā vassasatajīvino vassasatassa vassasatassa accayena
kālaṃ kareyyuṃ . evaṃ bahukā kho bhikkhave kappā abbhatītā atikkantā
te na sukarā saṅkhātuṃ ettakā kappā iti vā ettakāni kappasatāni
iti vā ettakāni kappasahassāni iti vā ettakāni kappasatasahassāni
iti vā 4- taṃ kissa hetu anamataggoyaṃ bhikkhave saṃsāro .pe. Alaṃ
vimuccitunti. Sattamaṃ.
[435] Ekaṃ samayaṃ bhagavā rājagahe viharati veḷuvane kalandakanivāpe.
Atha kho aññataro brāhmaṇo yena bhagavā tenupasaṅkami
@Footnote: 1 Ma. Yu. cesaddo natthi . 2 Yu. anussaritāva . 3 Ma. atha kho te.
@Yu. atha te . 4 Ma. vāti.
Upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi . ekamantaṃ nisinno kho so
brāhmaṇo bhagavantaṃ etadavoca kīvabahukā nu kho bho gotama
kappā abbhatītā atikkantāti . bahukā kho brāhmaṇa kappā
abbhatītā atikkantā te na sukarā saṅkhātuṃ ettakā kappā
iti vā ettakāni kappasatāni iti vā ettakāni kappasahassāni
iti vā ettakāni kappasatasahassāni iti vāti .
Sakkā pana bho gotama upamā kātunti.
[436] Sakkā brāhmaṇāti bhagavā avoca seyyathāpi brāhmaṇa
yato cāyaṃ gaṅgānadī pahoti yattha ca mahāsamuddaṃ appeti yā
etasmiṃ 1- antare vālikā sā na sukarā saṅkhātuṃ ettakā vālikā
iti vā ettakāni vālikasatāni iti vā ettakāni vālikasahassāni
iti vā ettakāni vālikasatasahassāni iti vā 2- . tato bahutarā
kho brāhmaṇa kappā abbhatītā atikkantā te na sukarā saṅkhātuṃ
ettakā kappā iti vā ettakāni kappasatāni iti vā ettakāni
kappasahassāni iti vā ettakāni kappasatasahassāni iti vā taṃ
kissa hetu anamataggoyaṃ brāhmaṇa saṃsāro pubbā koṭi na
paññāyati avijjānīvaraṇānaṃ sattānaṃ taṇhāsaññojanānaṃ
sandhāvataṃ saṃsarataṃ evaṃ dīgharattaṃ kho brāhmaṇa dukkhaṃ paccanubhūtaṃ
tippaṃ paccanubhūtaṃ byasanaṃ paccanubhūtaṃ kaṭasī vaḍḍhitā .
@Footnote: 1 Yu. yā ca tasmiṃ . 2 Ma. vāti.
Yāvañcidaṃ brāhmaṇa alameva sabbasaṅkhāresu nibbindituṃ
alaṃ virajjituṃ alaṃ vimuccitunti.
[437] Evaṃ vutte so brāhmaṇo bhagavantaṃ etadavoca
abhikkantaṃ bho gotama abhikkantaṃ bho gotama upāsakaṃ maṃ bhavaṃ
gotamo dhāretu ajjatagge pāṇupetaṃ saraṇaṅgatanti. Aṭṭhamaṃ.
[438] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro pubbā koṭi na paññāyati avijjānīvaraṇānaṃ
sattānaṃ taṇhāsaññojanānaṃ sandhāvataṃ saṃsarataṃ .pe.
[439] Seyyathāpi bhikkhave daṇḍo uparivehāsaṃ khitto sakimpi
mūlena nipatati sakimpi majjhena nipatati sakimpi aggena 1- nipatati
evameva kho bhikkhave avijjānīvaraṇā sattā taṇhāsaññojanā
sandhāvantā saṃsarantā sakimpi asmā lokā paraṃ lokaṃ gacchanti
sakimpi parasmā lokā imaṃ lokaṃ āgacchanti taṃ kissa hetu
anamataggoyaṃ bhikkhave saṃsāro .pe. Alaṃ vimuccitunti. Navamaṃ.
[440] Ekaṃ samayaṃ bhagavā rājagahe viharati gijjhakūṭe pabbate.
Tatra kho bhagavā bhikkhū āmantesi bhikkhavoti . bhadanteti te
bhikkhū bhagavato paccassosuṃ.
[441] Bhagavā etadavoca anamataggoyaṃ bhikkhave saṃsāro .pe.
Ekassa puggalassa bhikkhave kappaṃ sandhāvato saṃsarato siyā evaṃ
mahā aṭṭhikaṅkalo aṭṭhipuñjo aṭṭhirāsi yathāyaṃ vepullo pabbato
@Footnote: 1 Ma. antena.
Sace saṃhārako assa sambhatañca na vinasseyya taṃ kissa hetu
anamataggoyaṃ bhikkhave saṃsāro .pe. Alaṃ vimuccitunti.
[442] Idamavoca bhagavā idaṃ vatvāna sugato athāparaṃ
etadavoca satthā
ekassekena kappena puggalassaṭṭhisañcayo
siyā pabbatasamo rāsi iti vuttaṃ mahesinā
so kho panāyaṃ akkhāto vepullo pabbato mahā
uttaro gijjhakūṭassa magadhānaṃ giribbaje 1-
yato ca ariyasaccāni sammappaññāya passati
dukkhaṃ dukkhasamuppādaṃ dukkhassa ca atikkamaṃ
ariyañcaṭṭhaṅgikaṃ maggaṃ dukkhūpasamagāminaṃ
sattakkhattuparamaṃ 2- sandhāvitvāna puggalo
dukkhassantakaro hoti sabbasaññojanakkhayāti. Dasamaṃ.
Paṭhamavaggo paṭhamo.
Tassa uddānaṃ
tiṇakaṭṭhañca paṭhavī assu khīrañca pabbataṃ
sāsapā sāvako gaṅgā daṇḍo ca puggalena cāti.
---------
@Footnote: 1 Yu. giribbajo . 2 Ma. Yu. sasattakkhattuṃ paramaṃ.
Dutiyavaggo dutiyo
[443] Ekaṃ samayaṃ bhagavā sāvatthiyaṃ viharati .pe. tatra
kho bhagavā ... anamataggoyaṃ bhikkhave saṃsāro pubbā koṭi na
paññāyati avijjānīvaraṇānaṃ sattānaṃ taṇhāsaññojanānaṃ sandhāvataṃ
saṃsarataṃ . yaṃ bhikkhave passeyyātha duggataṃ durupetaṃ niṭṭhamettha
gantabbaṃ amhehi 1- evarūpaṃ paccanubhūtaṃ iminā dīghena addhunāti
taṃ kissa hetu anamataggoyaṃ bhikkhave saṃsāro .pe. alaṃ
vimuccitunti. Paṭhamaṃ.
[444] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro ... yaṃ bhikkhave passeyyātha sukhitaṃ susajjitaṃ niṭṭhamettha
gantabbaṃ amhehi 1- evarūpaṃ paccanubhūtaṃ iminā dīghena addhunāti
taṃ kissa hetu anamataggoyaṃ bhikkhave saṃsāro pubbā koṭi na
paññāyati .pe. Alaṃ vimuccitunti. Dutiyaṃ.
[445] Rājagahe viharati veḷuvane ... Atha kho tiṃsamattā pāveyyakā
bhikkhū sabbe āraññikā sabbe piṇḍapātikā sabbe paṃsukūlikā
sabbe tecīvarikā sabbe sasaññojanā yena bhagavā tenupasaṅkamiṃsu
upasaṅkamitvā bhagavantaṃ abhivādetvā ekamantaṃ nisīdiṃsu.
[446] Atha kho bhagavato etadahosi ime kho tiṃsamattā
pāveyyakā bhikkhū sabbe āraññikā sabbe piṇḍapātikā sabbe
@Footnote: 1 Ma. Yu. amhehipi.
Paṃsukūlikā sabbe tecīvarikā sabbe sasaññojanā yannūnāhaṃ imesaṃ
tathā dhammaṃ deseyyaṃ yathā nesaṃ imasmiṃyeva āsane anupādāya
āsavehi cittāni vimucceyyunti . atha kho bhagavā bhikkhū āmantesi
bhikkhavoti. Bhadanteti te bhikkhū bhagavato paccassosuṃ.
[447] Bhagavā etadavoca anamataggoyaṃ bhikkhave saṃsāro
pubbā koṭi na paññāyati avijjānīvaraṇānaṃ sattānaṃ taṇhāsaññojanānaṃ
sandhāvataṃ saṃsarataṃ . taṃ kiṃ maññatha bhikkhave katamaṃ nu
kho bahutaraṃ yaṃ vā vo bhikkhave 1- iminā dīghena addhunā sandhāvataṃ
saṃsarataṃ sīsacchinnānaṃ lohitaṃ pasandaṃ paggharitaṃ yaṃ vā catūsu
mahāsamuddesu udakanti . yathā kho mayaṃ bhante bhagavatā dhammaṃ
desitaṃ ājānāma etadeva bhante bahutaraṃ yaṃ no iminā
dīghena addhunā sandhāvataṃ saṃsarataṃ sīsacchinnānaṃ lohitaṃ pasandaṃ
paggharitaṃ na tveva catūsu mahāsamuddesu udakanti.
[448] Sādhu sādhu bhikkhave sādhu kho me tumhe bhikkhave
evaṃ dhammaṃ desitaṃ ājānātha etadeva bhikkhave bahutaraṃ yaṃ vo
iminā dīghena addhunā sandhāvataṃ saṃsarataṃ sīsacchinnānaṃ lohitaṃ
pasandaṃ paggharitaṃ na tveva catūsu mahāsamuddesu udakaṃ . dīgharattaṃ
vo bhikkhave gunnaṃ sataṃ gobhūtānaṃ sīsacchinnānaṃ lohitaṃ pasandaṃ
paggharitaṃ na tveva catūsu mahāsamuddesu udakaṃ . dīgharattaṃ vo
bhikkhave mahisānaṃ sataṃ mahisabhūtānaṃ sīsacchinnānaṃ lohitaṃ pasandaṃ
@Footnote: 1 Ma. Yu. bhikkhaveti natthi.
Paggharitaṃ . dīgharattaṃ vo bhikkhave urabbhānaṃ sataṃ urabbhabhūtānaṃ
.pe. ajānaṃ sataṃ ajabhūtānaṃ .pe. migānaṃ sataṃ migabhūtānaṃ
.pe. sūkarānaṃ sataṃ sūkarabhūtānaṃ .pe. kukkuṭānaṃ sataṃ kukkuṭabhūtānaṃ 1-
.pe. dīgharattaṃ vo bhikkhave corā gāmaghātakāti gahetvā
sīsacchinnānaṃ lohitaṃ pasandaṃ paggharitaṃ . dīgharattaṃ vo bhikkhave
corā pāripanthakāti gahetvā .pe. corā pāradārikāti gahetvā
sīsacchinnānaṃ lohitaṃ pasandaṃ paggharitaṃ na tveva catūsu mahāsamuddesu
udakaṃ taṃ kissa hetu anamataggoyaṃ bhikkhave saṃsāro .pe.
Alaṃ vimuccitunti.
[449] Idamavoca bhagavā attamanā te bhikkhū bhagavato bhāsitaṃ
abhinanduṃ 2- . imasmiñca pana veyyākaraṇasmiṃ bhaññamāne
tiṃsamattānaṃ pāveyyakānaṃ bhikkhūnaṃ anupādāya āsavehi cittāni
vimucciṃsūti. Tatiyaṃ.
[450] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. na so bhikkhave satto sulabharūpo yo na
mātā bhūtapubbo iminā dīghena addhunā taṃ kissa hetu anamataggoyaṃ
bhikkhave saṃsāro .pe. Alaṃ vimuccitunti. Catutthaṃ.
[sabbesaṃ evaṃ peyyālo]
[451] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. na so bhikkhave satto sulabharūpo yo
@Footnote: 1 Ma. Yu. kukkuṭa ... sūkara ... . 2 Po. Ma. Yu. abhinandunti.
Na pitā bhūtapubbo .pe. Pañcamaṃ.
[452] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. na so bhikkhave satto sulabharūpo yo
na bhātā bhūtapubbo .pe. Chaṭṭhaṃ.
[453] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. na so bhikkhave satto sulabharūpo yo
na bhaginī bhūtapubbo .pe. Sattamaṃ.
[454] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro .pe. na so bhikkhave satto sulabharūpo yo
na putto bhūtapubbo .pe. Aṭṭhamaṃ.
[455] Sāvatthiyaṃ viharati ... tatra kho bhagavā ... Anamataggoyaṃ
bhikkhave saṃsāro pubbā koṭi na paññāyati avijjānīvaraṇānaṃ
sattānaṃ taṇhāsaññojanānaṃ sandhāvataṃ saṃsarataṃ . na so bhikkhave
satto sulabharūpo yo na dhītā bhūtapubbo iminā dīghena addhunā
taṃ kissa hetu anamataggoyaṃ bhikkhave saṃsāro pubbā koṭi na
paññāyati avijjānīvaraṇānaṃ sattānaṃ taṇhāsaññojanānaṃ sandhāvataṃ
saṃsarataṃ . evaṃ dīgharattaṃ vo bhikkhave dukkhaṃ paccanubhūtaṃ
tippaṃ paccanubhūtaṃ byasanaṃ paccanubhūtaṃ kaṭasī vaḍḍhitā . yāvañcidaṃ
bhikkhave alameva sabbasaṅkhāresu nibbindituṃ alaṃ virajjituṃ alaṃ
vimuccitunti. Navamaṃ.
[456] Ekaṃ samayaṃ bhagavā rājagahe viharati gijjhakūṭe pabbate.
Tatra kho bhagavā bhikkhū āmantesi bhikkhavoti . bhadanteti te
bhikkhū bhagavato paccassosuṃ.
[457] Bhagavā etadavoca anamataggoyaṃ bhikkhave saṃsāro
pubbā koṭi na paññāyati avijjānīvaraṇānaṃ sattānaṃ taṇhāsaññojanānaṃ
sandhāvataṃ saṃsarataṃ . bhūtapubbaṃ bhikkhave imassa vepullassa
pabbatassa pācīnavaṃsotveva samaññā udapādi . tena kho pana
bhikkhave samayena manussānaṃ tivarātveva samaññā udapādi .
Tivarānaṃ bhikkhave manussānaṃ cattāḷīsavassasahassāni āyuppamāṇaṃ
ahosi . tivarā bhikkhave manussā pācīnavaṃsaṃ pabbataṃ catūhena
ārohanti catūhena orohanti . tena kho pana bhikkhave samayena
kakusandho bhagavā arahaṃ sammāsambuddho loke uppanno hoti .
Kakusandhassa bhikkhave bhagavato arahato sammāsambuddhassa vidhūrasañjīvannāma
sāvakayugaṃ ahosi aggaṃ bhaddayugaṃ . passatha bhikkhave
sā cevimassa pabbatassa samaññā antarahitā te ca manussā
kālakatā so ca bhagavā parinibbuto . evaṃ aniccā bhikkhave
saṅkhārā evaṃ addhuvā bhikkhave saṅkhārā evaṃ anassāsikā bhikkhave
saṅkhārā . yāvañcidaṃ bhikkhave alameva sabbasaṅkhāresu nibbindituṃ
alaṃ virajjituṃ alaṃ vimuccituṃ.
[458] Bhūtapubbaṃ bhikkhave imassa vepullassa pabbatassa
Vaṅkatotveva samaññā udapādi . tena kho pana bhikkhave samayena
manussānaṃ rohitassātveva samaññā udapādi . rohitassānaṃ
bhikkhave manussānaṃ tiṃsavassasahassāni āyuppamāṇaṃ ahosi .
Rohitassā bhikkhave manussā vaṅkataṃ pabbataṃ tīhena ārohanti tīhena
orohanti . tena kho pana bhikkhave samayena konāgamano bhagavā
arahaṃ sammāsambuddho loke uppanno hoti . konāgamanassa bhikkhave
bhagavato arahato sammāsambuddhassa bhiyyosuttaraṃ nāma sāvakayugaṃ
ahosi aggaṃ bhaddayugaṃ . passatha bhikkhave sā cevimassa pabbatassa
samaññā antarahitā te ca manussā kālakatā so ca bhagavā
parinibbuto. Evaṃ aniccā bhikkhave saṅkhārā .pe. Alaṃ vimuccituṃ.
[459] Bhūtapubbaṃ bhikkhave imassa vepullassa pabbatassa
supassotveva samaññā udapādi . tena kho pana bhikkhave samayena
manussānaṃ suppiyātveva samaññā udapādi . suppiyānaṃ bhikkhave
manussānaṃ vīsativassasahassāni āyuppamāṇaṃ ahosi . suppiyā
bhikkhave manussā supassaṃ pabbataṃ dvīhena ārohanti dvīhena
orohanti . tena kho pana bhikkhave samayena kassapo bhagavā arahaṃ
sammāsambuddho loke uppanno hoti . kassapassa bhikkhave bhagavato
arahato sammāsambuddhassa tissa bhāradvājaṃ nāma sāvakayugaṃ ahosi
aggaṃ bhaddayugaṃ . passatha bhikkhave sā cevimassa pabbatassa samaññā
antarahitā te ca manussā kālakatā so ca bhagavā parinibbuto. Evaṃ
Aniccā bhikkhave saṅkhārā evaṃ addhuvā bhikkhave saṅkhārā evaṃ
.pe. Alaṃ vimuccituṃ.
[460] Etarahi kho pana bhikkhave imassa vepullassa pabbatassa
vepullotveva samaññā udapādi . etarahi kho pana bhikkhave
imesaṃ manussānaṃ māgadhakātveva samaññā udapādi . māgadhakānaṃ
bhikkhave manussānaṃ appakaṃ āyuppamāṇaṃ parittakaṃ lahukaṃ yo ciraṃ
jīvati so vassasataṃ appaṃ vā bhiyyo vā . Māgadhakā bhikkhave manussā
vepullaṃ pabbataṃ muhutteneva ārohanti muhuttena orohanti .
Etarahi kho panāyaṃ bhikkhave arahaṃ sammāsambuddho loke uppanno.
Mayhaṃ kho pana bhikkhave sārīputtamoggallānaṃ nāma sāvakayugaṃ
aggaṃ bhaddayugaṃ . bhavissati bhikkhave so samayo yā ayañcevimassa
pabbatassa samaññā antaradhāyissati ime ca manussā kālaṃ
karissanti ahañca parinibbāyissāmi . evaṃ aniccā bhikkhave
saṅkhārā evaṃ addhuvā bhikkhave saṅkhārā evaṃ anassāsikā
bhikkhave saṅkhārā . yāvañcidaṃ bhikkhave alameva sabbasaṅkhāresu
nibbindituṃ alaṃ virajjituṃ alaṃ vimuccitunti.
[461] Idamavoca bhagavā idaṃ vatvāna sugato athāparaṃ
etadavoca satthā
pācīnavaṃso tivarānaṃ rohitassāna vaṅkato
suppiyānaṃ supassopi 1- māgadhānañca vepulo
@Footnote: 1 Ma. supassoti. Yu. supassāti.
Aniccā vata saṅkhārā uppādavayadhammino
uppajjitvā nirujjhanti tesaṃ vūpasamo sukhoti. Dasamaṃ.
Dutiyavaggo dutiyo.
Tassa uddānaṃ
duggataṃ sukhitañceva tiṃsamātā pitena ca
bhātā bhaginī putto ca dhītā vepullapabbataṃ.
Anamataggasaṃyuttaṃ tatiyaṃ samattaṃ.
---------
The Pali Tipitaka in Roman Character Volume 16 page 212-228.
http://84000.org/tipitaka/pali/roman_item_s.php?book=16&item=421&items=41
Classified by [Item Number] :-
http://84000.org/tipitaka/pali/roman_item_s.php?book=16&item=421&items=41&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=16&item=421&items=41
Compare with The Royal Version of Thai Tipitaka :-
http://84000.org/tipitaka/read/byitem_s.php?book=16&item=421&items=41
Study Atthakatha :-
http://84000.org/tipitaka/attha/attha.php?b=16&i=421
The Pali Atthakatha in Thai :-
http://84000.org/tipitaka/atthapali/read_th.php?B=12&A=3923
The Pali Atthakatha in Roman :-
http://84000.org/tipitaka/atthapali/read_rm.php?B=12&A=3923
Contents of The Tipitaka Volume 16
http://84000.org/tipitaka/read/?index_16
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
