paliTIPITAKA Volume 19 - Sutta Pitaka 11

[991] Taṃyeva nidānaṃ . katinaṃ nu kho bhikkhave indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Bhagavaṃmūlakā no bhante dhammā .pe. [992] Dvinnaṃ kho bhikkhave indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [993] Katamesaṃ dvinnaṃ . ariyāya ca paññāya ariyāya ca vimuttiyā . yā hissa bhikkhave ariyā paññā tadassa paññindriyaṃ . Yā hissa bhikkhave ariyā vimutti tadassa samādhindriyaṃ. [994] Imesaṃ kho bhikkhave dvinnaṃ indriyaranaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [995] Taṃyeva nidānaṃ . katinaṃ nu kho bhikkhave indriyānaṃ

--------------------------------------------------------------------------------------------- page295.

Bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Bhagavaṃmūlakā no bhante dhammā .pe. [996] Catunnaṃ kho bhikkhave indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [997] Katamesaṃ catunnaṃ . viriyindriyassa satindriyassa samādhindriyassa paññindriyassa. [998] Imesaṃ kho bhikkhave catunnaṃ indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [999] Taṃyeva nidānaṃ . katinaṃ nu kho bhikkhave indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Bhagavaṃmūlakā no bhante dhammā .pe. [1000] Pañcannaṃ kho bhikkhave indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1001] Katamesaṃ pañcannaṃ . saddhindriyassa viriyindriyassa satindriyassa samādhindriyassa paññindriyassa.

--------------------------------------------------------------------------------------------- page296.

[1002] Imesaṃ kho bhikkhave pañcannaṃ indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1003] Evamme sutaṃ ekaṃ samayaṃ bhagavā kosambiyaṃ viharati ghositārāme . tena kho pana samayena āyasmatā piṇḍolabhāradvājena aññā byākatā hoti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1004] Atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ āyasmatā bhante piṇḍolabhāradvājena aññā byākatā khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1005] Kiṃ nu kho bhante atthavasaṃ sampassamānena āyasmatā piṇḍolabhāradvājena aññā byākatā khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1006] Tiṇṇaṃ kho ^[1]- bhikkhave indriyānaṃ bhāvitattā bahulīkatattā piṇḍolabhāradvājena bhikkhunā aññā byākatā khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1007] Katamesaṃ tiṇṇaṃ . satindriyassa samādhindriyassa paññindriyassa. @Footnote: ¹ Ma. Yu. pana.

--------------------------------------------------------------------------------------------- page297.

[1008] Imesaṃ kho bhikkhave tiṇṇaṃ indriyānaṃ bhāvitattā bahulīkatattā piṇḍolabhāradvājena bhikkhunā aññā byākatā khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. [1009] Imāni ca bhikkhave tīṇi indriyāni kimantāni . Khayantāni . kissa khayantāni . jātijarāmaraṇassa. Jātijarāmaraṇakkhayanti kho bhikkhave sampassamānena piṇḍolabhāradvājena bhikkhunā aññā byākatā khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti.

The Pali Tipitaka in Roman Character Volume 19 page 294-297. http://84000.org/tipitaka/pali/roman_item_s.php?book=19&item=991&items=19&pagebreak=1 Classified by [Item Number] :- http://84000.org/tipitaka/pali/roman_item_s.php?book=19&item=991&items=19&pagebreak=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=19&item=991&items=19&pagebreak=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=19&item=991&items=19&pagebreak=1 Study Atthakatha :- http://84000.org/tipitaka/attha/attha.php?b=19&i=991 Contents of The Tipitaka Volume 19 http://84000.org/tipitaka/read/?index_19