ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ThaiVersion   PaliThai   PaliRoman 
read First itemread Previous itemไม่แสดงหมายเลขหน้า
ในกรณี :- 
   บรรทัดแรกของแต่ละหน้าread Next itemread Last item chage to ENGLISH letter
TIPITAKA Volume 23 : PALI ROMAN Sutta Pitaka Vol 15 : Sutta. Aṅ. (4): sattaka-aṭṭhaka-navakanipātā
     [46]   Sattimā   bhikkhave   saññā  bhāvitā  bahulīkatā  mahapphalā
honti   mahānisaṃsā   amatogadhā   amatapariyosānā   .   katamā   satta
asubhasaññā     maraṇasaññā     āhāre     paṭikkūlasaññā    sabbaloke
anabhiratasaññā  aniccasaññā  anicce  dukkhasaññā  dukkhe anattasaññā [1]-
asubhasaññā   bhikkhave   bhāvitā   bahulīkatā   mahapphalā  hoti  mahānisaṃsā
amatogadhā   amatapariyosānāti   iti  kho  panetaṃ  vuttaṃ  kiñcetaṃ  paṭicca
vuttaṃ   asubhasaññāparicitena   bhikkhave   bhikkhuno   cetasā  bahulaṃ  viharato
methunadhammasamāpattiyā   cittaṃ   paṭilīyati   paṭikujjati   2-   paṭivattati  na
sampasārīyati  upekkhā  vā  pāṭikkūlyatā  vā saṇṭhāti seyyathāpi bhikkhave
kukkuṭapattaṃ  vā  nhārudaddulaṃ  vā  aggimhi  pakkhittaṃ  paṭilīyati  paṭikujjati
paṭivattati  na  sampasārīyati evameva kho bhikkhave bhikkhuno asubhasaññāparicitena
cetasā   bahulaṃ  viharato  methunadhammasamāpattiyā  cittaṃ  paṭilīyati  paṭikujjati
paṭivattati na sampasārīyati upekkhā vā paṭikkūlyatā vā saṇṭhāti
     {46.1}   sace   bhikkhave   bhikkhuno  asubhasaññāparicitena  cetasā
bahulaṃ     viharato    methunadhammasamāpattiyā    cittaṃ    anusandati    3-
@Footnote: 1 Ma. imā kho bhikkhave satta saññā bhāvitā bahulīkatā mahapphalā honti mahānisaṃsā
@amatogadhā amatapariyosānāti .   2 Ma. patikuṭati. evamuparipi .  3 Ma. anusandahati.
@evamuparipi.

--------------------------------------------------------------------------------------------- page49.

Appāṭikkūlyatā vā saṇṭhāti veditabbametaṃ bhikkhave bhikkhunā abhāvitā me asubhasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno asubhasaññāparicitena cetasā bahulaṃ viharato methunadhammasamāpattiyā cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti veditabbametaṃ bhikkhave bhikkhunā bhāvitā me asubhasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti asubhasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.2} Maraṇasaññā bhikkhave bhāvitā bahulīkatā mahapphalā hoti mahānisaṃsā amadhogadhā amatapariyosānāti iti kho panetaṃ vuttaṃ kiñcetaṃ paṭicca vuttaṃ maraṇasaññāparicitena bhikkhave bhikkhuno cetasā bahulaṃ viharato jīvitanikantiyā cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti seyyathāpi bhikkhave kukkuṭapattaṃ vā nhārudaddulaṃ vā aggimhi pakkhittaṃ paṭilīyati paṭikujjati paṭivattati na sampasārīyati evameva kho bhikkhave bhikkhuno maraṇasaññāparicitena cetasā bahulaṃ viharato jīvitanikantiyā cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti {46.3} sace bhikkhave bhikkhuno maraṇasaññāparicitena cetasā bahulaṃ viharato

--------------------------------------------------------------------------------------------- page50.

Jīvitanikantiyā cittaṃ anusandati appāṭikkūlyatā vā saṇṭhāti veditabbametaṃ bhikkhave bhikkhunā abhāvitā me maraṇasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno maraṇasaññāparicitena cetasā bahulaṃ viharato jīvitanikantiyā cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti veditabbametaṃ bhikkhave bhikkhunā bhāvitā me maraṇasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti maraṇasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.4} Āhāre paṭikkūlasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti kho panetaṃ vuttaṃ kiñcetaṃ paṭicca vuttaṃ āhāre paṭikkūlasaññāparicitena bhikkhave bhikkhuno cetasā bahulaṃ viharato rasataṇhāya cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti seyyathāpi bhikkhave kukkuṭapattaṃ vā nhārudaddulaṃ vā aggimhi pakkhittaṃ paṭilīyati paṭikujjati paṭivattati na sampasārīyati evameva kho bhikkhave bhikkhuno āhāre paṭikkūlasaññāparicitena cetasā bahulaṃ viharato rasataṇhāya cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā

--------------------------------------------------------------------------------------------- page51.

Saṇṭhāti sace bhikkhave bhikkhuno āhāre paṭikkūlasaññāparicitena cetasā bahulaṃ viharato rasataṇhāya cittaṃ anusandati appāṭikkūlyatā vā saṇṭhāti veditabbametaṃ bhikkhave bhikkhunā abhāvitā me āhāre paṭikkūlasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno āhāre paṭikkūlasaññāparicitena cetasā bahulaṃ viharato rasataṇhāya cittaṃ paṭilīyati .pe. upekkhā vā pāṭikkūlyatā vā saṇṭhāti veditabbametaṃ bhikkhave bhikkhunā bhāvitā me āhāre paṭikkūlasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti āhāre paṭikkūlasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.5} Sabbaloke anabhiratasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti kho panetaṃ vuttaṃ kiñcetaṃ paṭicca vuttaṃ sabbaloke anabhiratasaññāparicitena bhikkhave bhikkhuno cetasā bahulaṃ viharato lokacittesu cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti seyyathāpi bhikkhave kukkuṭapattaṃ vā nhārudaddulaṃ vā aggimhi pakkhittaṃ paṭilīyati paṭikujjati paṭivattati na sampasārīyati evameva kho bhikkhave bhikkhuno sabbaloke anabhiratasaññāparicitena cetasā bahulaṃ viharato

--------------------------------------------------------------------------------------------- page52.

Lokacittesu cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti {46.6} sace bhikkhave bhikkhuno sabbaloke anabhiratasaññāparicitena cetasā bahulaṃ viharato lokacittesu cittaṃ anusandati appāṭikkūlyatā vā saṇṭhāti veditabbametaṃ bhikkhave bhikkhunā abhāvitā me sabbaloke anabhiratasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno sabbaloke anabhiratasaññāparicitena cetasā bahulaṃ viharato lokacittesu cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti veditabbametaṃ bhikkhave bhikkhunā bhāvitā me sabbaloke anabhiratasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti sabbaloke anabhiratasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.7} Aniccasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti kho panetaṃ vuttaṃ kiñcetaṃ paṭicca vuttaṃ aniccasaññāparicitena bhikkhave bhikkhuno cetasā bahulaṃ viharato lābhasakkārasiloke cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti seyyathāpi bhikkhave kukkuṭapattaṃ vā nhārudaddulaṃ vā aggimhi pakkhittaṃ

--------------------------------------------------------------------------------------------- page53.

Paṭilīyati paṭikujjati paṭivattati na sampasārīyati evameva kho bhikkhave bhikkhuno aniccasaññāparicitena cetasā bahulaṃ viharato lābhasakkārasiloke cittaṃ paṭilīyati paṭikujjati na sampasārīyati upekkhā vā pāṭikkūlyatā vā saṇṭhāti {46.8} sace bhikkhave bhikkhuno aniccasaññāparicitena cetasā bahulaṃ viharato lābhasakkārasiloke cittaṃ anusandati appāṭikkūlyatā vā saṇṭhāti veditabbametaṃ bhikkhave bhikkhunā abhāvitā me aniccasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno aniccasaññāparicitena cetasā bahulaṃ viharato lābhasakkārasiloke cittaṃ paṭilīyati paṭikujjati paṭivattati na sampasārīyati upekkhā vā pāṭikkūlyatā vā saṇṭhāti veditabbametaṃ bhikkhave bhikkhunā bhāvitā me aniccasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti aniccasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.9} Anicce dukkhasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti kho panetaṃ vuttaṃ kiñcetaṃ paṭicca vuttaṃ anicce dukkhasaññāparicitena bhikkhave bhikkhuno cetasā bahulaṃ viharato ālasse 1- kosajje vissaṭṭhiye pamāde ananuyoge appaccavekkhaṇāya tibbā bhayasaññā paccupaṭṭhitā hoti seyyathāpi [2]- @Footnote: 1 Ma. ālasye. evamuparipi . 2 Ma. bhikkhave. evamīdisesu ṭhānesupi.

--------------------------------------------------------------------------------------------- page54.

Ukkhittāsike vadhake {46.10} sace bhikkhave bhikkhuno anicce dukkhasaññāparicitena cetasā bahulaṃ viharato ālasse kosajje vissaṭṭhiye pamāde ananuyoge appaccavekkhaṇāya tibbā bhayasaññā na paccupaṭṭhitā hoti seyyathāpi ukkhittāsike vadhake veditabbametaṃ bhikkhave bhikkhunā abhāvitā me anicce dukkhasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno anicce dukkhasaññāparicitena cetasā bahulaṃ viharato ālasse kosajje vissaṭṭhiye pamāde ananuyoge appaccavekkhaṇāya tibbā bhayasaññā paccupaṭṭhitā hoti seyyathāpi ukkhittāsike vadhake veditabbametaṃ bhikkhave bhikkhunā bhāvitā me anicce dukkhasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti anicce dukkhasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.11} Dukkhe anattasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti kho panetaṃ vuttaṃ kiñcetaṃ paṭicca vuttaṃ dukkhe anattasaññāparicitena bhikkhave bhikkhuno cetasā bahulaṃ viharato imasmiñca saviññāṇake kāye bahiddhā ca sabbanimittesu ahaṃkāramamaṃkāramānāpagataṃ mānasaṃ hoti vidhāsamatikkantaṃ santaṃ suvimuttaṃ sace bhikkhave bhikkhuno dukkhe anattasaññāparicitena cetasā bahulaṃ viharato

--------------------------------------------------------------------------------------------- page55.

Imasmiñca saviññāṇake kāye bahiddhā ca sabbanimittesu ahaṃkāramamaṃkāramānāpagataṃ mānasaṃ na hoti vidhāsamatikkantaṃ santaṃ suvimuttaṃ veditabbametaṃ bhikkhave bhikkhunā abhāvitā me dukkhe anattasaññā natthi me pubbenāparaṃ viseso appattaṃ me bhāvanāphalanti itiha tattha sampajāno hoti sace pana bhikkhave bhikkhuno dukkhe anattasaññāparicitena cetasā bahulaṃ viharato imasmiñca saviññāṇake kāye bahiddhā ca sabbanimittesu ahaṃkāramamaṃkāramānāpagataṃ mānasaṃ hoti vidhāsamatikkantaṃ santaṃ suvimuttaṃ veditabbametaṃ bhikkhave bhikkhunā bhāvitā me dukkhe anattasaññā atthi me pubbenāparaṃ viseso pattaṃ me bhāvanāphalanti itiha tattha sampajāno hoti dukkhe anattasaññā bhikkhave bhāvitā bahulīkatā mahapphalā hoti mahānisaṃsā amatogadhā amatapariyosānāti iti yantaṃ vuttaṃ idametaṃ paṭicca vuttaṃ. {46.12} Imā kho bhikkhave satta saññā bhāvitā bahulīkatā mahapphalā honti mahānisaṃsā amatogadhā amatapariyosānāti.


             The Pali Tipitaka in Roman Character Volume 23 page 48-55. http://84000.org/tipitaka/pali/roman_item_s.php?book=23&item=46&items=1&pagebreak=1              Classified by [Item Number] :- http://84000.org/tipitaka/pali/roman_item_s.php?book=23&item=46&items=1&pagebreak=1&mode=bracket              Compare with The Pali Tipitaka in Thai Character :- http://84000.org/tipitaka/read/pali_item_s.php?book=23&item=46&items=1&pagebreak=1              Compare with The Royal Version of Thai Tipitaka :- http://84000.org/tipitaka/read/byitem_s.php?book=23&item=46&items=1&pagebreak=1              Study Atthakatha :- http://84000.org/tipitaka/attha/attha.php?b=23&i=46              The Pali Atthakatha in Thai :- http://84000.org/tipitaka/atthapali/read_th.php?B=16&A=4106              The Pali Atthakatha in Roman :- http://84000.org/tipitaka/atthapali/read_rm.php?B=16&A=4106              Contents of The Tipitaka Volume 23 http://84000.org/tipitaka/read/?index_23

read First itemread Previous itemไม่แสดงหมายเลขหน้า
ในกรณี :- 
   บรรทัดแรกของแต่ละหน้าread Next itemread Last item chage to ENGLISH letter

บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]

Background color :