ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ThaiVersion   PaliThai   PaliRoman 
read First itemread Previous itemแสดงหมายเลขหน้า
ในกรณี :- 
   บรรทัดแรกของแต่ละหน้าread Next itemread Last item chage to ENGLISH letter
TIPITAKA Volume 32 : PALI ROMAN Sutta Pitaka Vol 24 : Sutta. Khu. Apa(1)
                              Ekacattāḷīsamo metteyyavaggo
                           paṭhamaṃ tissametteyyattherāpadānaṃ (401)
     [403] |403.1| Pabbhārakūṭaṃ nissāya      sobhito nāma tāpaso
                     pavattaphalaṃ bhuñjitvā            vasati pabbatantare.
      |403.2| Aggidāruṃ āharitvā             ujjalesiṃ ahaṃ tadā
                     uttamatthaṃ gavesanto            brahmalokūpapattiyā.
      |403.3| Padumuttaro lokavidū               āhutīnaṃ paṭiggaho
                     mamuddharitukāmo so              āgañchi mama santike.
      |403.4| Kiṃ karosi mahāpuñña             dehi me aggidārukaṃ
                     ahaṃ aggiṃ paricare                 tato me suddhi hohiti 1-.
      |403.5| Subhaddako tvaṃ manuja              devate tvaṃ pajānasi
                     tuvaṃ aggiṃ paricara                  handa te aggidārukaṃ.
      |403.6| Tato kaṭṭhaṃ gahetvāna           aggiṃ ujjālayī jino
                     na tattha kaṭṭhaṃ pajjhāyi        pāṭiheraṃ mahesino.
      |403.7| Na te aggi pajjalati             āhuti te na vijjati
                     niratthakaṃ ca 2- taṃ tuyhaṃ         aggiṃ paricarassu me.
      |403.8| Kīdiso te 3- mahāvīra           aggi tava pavuccati
                     mayhaṃpi kathayassetaṃ              ubho paricarāmase.
@Footnote: 1 Po. Yu. hehiti. 2 Ma. Yu. va. 3 Ma. Yu. so.
      |403.9| Hetudhammanirodhāya                kilesajhāpanāya ca
                     issāmacchariyaṃ hitvā           tayo ete mamāhutī.
      |403.10| Kīdiso tvaṃ mahāvīra             kathaṃgottosi mārisa
                        ācārapaṭipatti te           bāḷhaṃ kho mama ruccati.
      |403.11| Khattiyamhi kule jāto         abhiññāpāramiṃ gato
                        sabbāsavaparikkhīṇo          natthi dāni punabbhavo.
      |403.12| Yadi buddhosi sabbaññū      pabhaṅkara tamonuda
                        namassissāmi taṃ deva         dukkhassantaṃ karo tuvaṃ.
      |403.13| Pattharitvā jinacammaṃ           nisīdanamadāsahaṃ
                        nisīda tattha 1- sabbaññū  upaṭṭhissāmahaṃ tuvaṃ.
      |403.14| Nisīdi bhagavā tattha              ajinamhi suvitthate
                        nimantayitvā sambuddhaṃ      pabbataṃ agamāsahaṃ.
      |403.15| Khāribhārañca pūretvā         tindukaphalamāhariṃ
                        madhunā yojayitvāna          phalaṃ buddhassadāsahaṃ.
      |403.16| Mama nijjhāyamānassa         paribhuñji tadā jino
                        tattha cittaṃ pasādesi 2-    pekkhanto lokanāyakaṃ.
      |403.17| Padumuttaro lokavidū           āhutīnaṃ paṭiggaho
                        mamassame nisīditvā         imā gāthā abhāsatha.
      |403.18| Yo me 3- phalena tappesi    pasanno sehi pāṇibhi
                        tamahaṃ kittayissāmi          suṇātha mama bhāsato.
@Footnote: 1 Ma. ... nātha sabbaññu. 2 Ma. Yu. pasādesiṃ. 3 Ma. maṃ.
      |403.19| Pañcavīsatikkhattuṃ so          devarajjaṃ karissati
                        sahassakkhattuṃ rājā ca       cakkavatti bhavissati.
      |403.20| Tassa saṅkappamaññāya      pubbakammasamaṅgino
                        annapānañca vatthañca     sayanañca mahārahaṃ.
      |403.21| Puññakammena saṃyuttā       nibbattissanti tāvade
                        sadā sammudito 1- cāyaṃ    bhavissati anāmayo.
      |403.22| Upapajjati yaṃ yoniṃ              devattaṃ atha mānusaṃ
                        sabbattha sukhito hutvā      manussattaṃ bhavissati.
      |403.23| Ajjhāyako mantadharo         tiṇṇaṃ vedāna pāragū
                        sambuddhaṃ upagantvāna     arahā so bhavissati.
      |403.24| Yato sarāmi attānaṃ          yato pattosmi viññutaṃ
                        bhoge me ūnatā natthi       phaladānassidaṃ phalaṃ.
      |403.25| Varadhammamanuppatto           rāgadose samūhaniṃ
                        sabbāsavaparikkhīṇo          natthi dāni punabbhavo.
      |403.26| Kilesā jhāpitā mayhaṃ       bhavā sabbe samūhatā
                        nāgova bandhanaṃ chetvā      viharāmi anāsavo.
      |403.27| Svāgataṃ vata me āsi          mama buddhassa santike
                        tisso vijjā anuppattā  kataṃ buddhassa sāsanaṃ.
      |403.28| Paṭisambhidā catasso          vimokkhāpica aṭṭhime
                        chaḷabhiññā sacchikatā      kataṃ buddhassa sāsananti.
@Footnote: 1 Ma. Yu. pamudito.
        Itthaṃ sudaṃ āyasmā tissametteyyo thero imā gāthāyo
abhāsitthāti.
                           Tissametteyyattherassa apadānaṃ samattaṃ.



             The Pali Tipitaka in Roman Character Volume 32 page 533-536. http://84000.org/tipitaka/pali/roman_item_s.php?book=32&item=403&items=1              Classified by [Item Number] :- http://84000.org/tipitaka/pali/roman_item_s.php?book=32&item=403&items=1&mode=bracket              Compare with The Pali Tipitaka in Thai Character :- http://84000.org/tipitaka/read/pali_item_s.php?book=32&item=403&items=1              Compare with The Royal Version of Thai Tipitaka :- http://84000.org/tipitaka/read/byitem_s.php?book=32&item=403&items=1              Study Atthakatha :- http://84000.org/tipitaka/attha/attha.php?b=32&i=403              The Pali Atthakatha in Thai :- http://84000.org/tipitaka/atthapali/read_th.php?B=50&A=5404              The Pali Atthakatha in Roman :- http://84000.org/tipitaka/atthapali/read_rm.php?B=50&A=5404              Contents of The Tipitaka Volume 32 http://84000.org/tipitaka/read/?index_32

read First itemread Previous itemแสดงหมายเลขหน้า
ในกรณี :- 
   บรรทัดแรกของแต่ละหน้าread Next itemread Last item chage to ENGLISH letter

บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]

Background color :